Frankaa Kyia, Ɔman Nnwom Ne Abatow

Ebia mmeae ahorow a ɛho asɛm ka yɛ den wɔ nneɛma a yɛn mmofra ne sukuu ahorow yɛ no mu no mu biako ne nea ɛfa ɔman ho dɔ nneyɛe ahorow ho no. Yenim sɛ ebia nkate ahorow a emu yɛ den wɔ hɔ, na yɛn ani sɔ akyerɛkyerɛfo a wɔde nkate ne ntease di saa tebea horow no ho dwuma no kɛse. Ebia nea enti a Yehowa Adansefo mfa wɔn ho nhyɛ ɔman ho dɔ nneyɛe ahorow mu no mu nkyerɛkyerɛmu betumi aboa.

Abakɔsɛm mu adanse kyerɛ sɛ Kristofo a wodi kan no ammfa wɔn ho anhyɛ amammuisɛm mu. Sɛnea Yesu ka faa wɔn ho no; “Womfi wiase, sɛnea me nso mimfi wiase no.” (Yohane 17:16) Mmom no, wɔn nyinaa dii ɔsoro nniso, Onyankopɔn Ahenni no nokware. New York akyerɛkyerɛfo Eugene A. Colligan ne Maxwell F. Littwin ka faa wɔn ho wɔ wɔn nhoma From the Old World to the New no mu sɛ: “Wɔpɛɛ Onyankopɔn Ahenni mmom sen ahenni foforo biara a wɔbɛsom wɔ asase so.”

Wɔ eyi fam no tete Kristofo no dii nhwɛso a Yesu Kristo yɛe no akyi, na nnɛ Yehowa Adansefo bɔ mmɔden sɛ wɔbɛtra ase sɛnea saa gyinapɛn no te. (Yohane 6:15; 18:36) Hyɛ sɛnea adesua nhoma ahorow ka tete Kristo akyidifo no gyinabea wɔ afã biara a wonni wɔ ammamuisɛm ho no ho asɛm no nsow:

“Nnipa pii ante tete Kristosom ase yiye na wɔn a wodii abosonsom wiase no so no ani annye ho biara. . . . Kristofo ampene sɛ wɔbɛyɛ Roma ɔman mma nnwuma horow binom. . . . Wɔrennye amammui dibea.”—On the Road to Civilization, A World History (1937), a Albert K. Heckel ne James G. Sigman yɛe, nkratafa 237, 238.

“Roma nniso no frɛɛ Kristofo no sɛ ɔman no atamfo. Wɔrenyɛ Roma asraafo. Wɔpowee sɛ wobekyia ɔhempɔn no honi a na ɛkyerɛ ade koro no ara ma Roma ɔmanfo sɛnea ɔman frankaa yɛ ma amanfo nnɛ no. Ná wɔn som no nkutoo na wodi no nokware.”—Man—His World and Cultures (1974), a Edith McCall, Evalyn Rapparlie ne Jack Spatafora yɛe, nkratafa 67, 68.

Sɛnea ebia wubehu no, afã biara a wonni kwan a ɛte saa so a yɛn mmofra no bɛfa nnɛ no kã wɔn ho a wɔde hyehyɛ sukuu adeyɛ ne dwumadi ahorow bi mu no. Gyinabea bɛn na Yehowa Adansefo fi ahonim mu paw wɔ wiase nyinaa wɔ saa nsɛm yi ho?

Frankaa Kyia

Ɛwom sɛ yenkyia ɔman biara frankaa de, nanso eyi nkyerɛ sɛ yenni obu. Yɛde obu ma ɔman biara a yɛte mu no frankaa, na yɛnam osetie a yɛyɛ ma ɔman no mmara ahorow no so kyerɛ eyi. Yɛmfa yɛn ho nhyɛ nneyɛe biara a etia nniso no mu da. Nokware mu no, yegye di sɛ mprempren adesamma nniso horow no yɛ nea “Onyankopɔn ahyɛ ato hɔ,” a wama kwan sɛ ɛntra hɔ nkosi bere bi. Enti yehu sɛ yɛwɔ ɔsoro ahyɛde ase sɛ yetua tow ahorow, amanne ne nnidi ma “tumi a ɛwɔ anuonyam” a ɛtete saa no.—Romafo 13:1-7.

Nanso ebia wubebisa sɛ, ‘ɛnde dɛn nti na munkyia frankaa no mfa nni no ni?’ Efisɛ yebu frankaa kyia no sɛ ɔsom adeyɛ bi. Ɛwom sɛ yemmu afoforo abam wɔ frankaa kyia ho de, nanso yɛn de yɛrentumi mfi ahonim mu mfa nea yebu sɛ ɛyɛ ɔsom no mma obiara anaasɛ biribiara gye yɛn Nyankopɔn, Yehowa, nkutoo. (Mateo 4:10) Nokwarem no, nkurɔfo pii mmu frankaa no sɛ ade kronkron anaasɛ kyia a wobekyia no no sɛ ɔsom adeyɛ. Nanso, susuw nea wiase mu abenfo ka wɔ eyi ho yi ho:

“Frankaa, te sɛ mmeamudua no, yɛ kronkron. . . . Mmara horow ne ahyɛde ahorow a ɛfa adesamma su a wokura wɔ ɔman frankaa ahorow ho no de nsɛm a emu yɛ den a ɛkyerɛ biribi te sɛ, ‘Frankaa no Som,’. . . ‘Osuro ma Frankaa no,’ ‘Ahofama ma Frankaa no’” na edi dwuma.—The Encyclopedia Americana (1942), Po 11, kratafa 316.

“Ɔmampɛ gyidi ho sɛnkyerɛnne ne ne ɔsom mu ade titiriw ne frankaa no, na wɔayɛ ɔsom yɛbea ahorow a ɛyɛ nwonwa ama frankaa no ‘kyia’, frankaa no ‘a wosi ne ti ase,’ frankaa no a ‘wɔtwetwe ba fam,’ ne frankaa no a ‘wɔde sɛn soro.’ Mmarima tu wɔn kyɛw bere a wɔde frankaa no retwam; na anwensɛm akyerɛwfo kyerɛw frankaa no ho ayeyi nnwom na mmofra to nnwom de kamfo.”—What Americans Believe and How They Worship (1952), a J. Paul Williams yɛe, kratafa 359, 360.

Ebia wobɛte nka sɛ nea ɛwɔ atifi hɔ no yɛ adwenhorow a ɛkɔ akyiri dodow. Nanso, nea ɛyɛ anigye ne sɛ wɔ Amerika atubrafo no nna no mu no, Puritanfo kasa tiaa Britania frankaa no esiane “Ɔhoteni” George mmeamudua kɔkɔɔ a na ɛwɔ mu no nti. Sɛnea The Encyclopædia Britannica (1910-1911) kyerɛ no, wɔyɛɛ eyi, “ɛnyɛ sɛ ná wonni ɔman a wofi mu no nokware nti, na mmom ahonim mu a wofi kasa tiaa nea wobuu no sɛ ɛyɛ abosonsom sɛnkyerɛnne nti.”

Mmara Nsɛm Du no mu biako bara ɔsom a wɔde ma “ade a ɛwɔ wim wɔ ɔsoro anaa nea ɛwɔ asase so wɔ fam” sɛso biara. (Exodus 20:4, 5) Sɛ Kristofo no, yɛn nso yɛte nka sɛ Bible ahyɛde no da yɛn so sɛ ‘yɛnnwɛn nyi yɛn ho mfi abosom ho.’—1 Yohane 5:21.

Yɛn ani sɔ bere a akyerɛkyerɛfo nya yɛn gyidi horow no ho ntease na wɔboa yɛn mma ma wɔde tra ase no. Afoforo ada ntease adi wɔ yɛn gyinabea a ɛne sɛ frankaa kyia fa ɔsom ho no ho, sɛnea nsɛm a edidi so yi kyerɛ no:

“Kristofo powee sɛ . . . wɔbɛbɔ [Roma] ɔhempɔn no nwonwafoyɛ no afɔre—a sɛnea ɛte no ɛne pow a wɔpow sɛ wobekyia frankaa anaasɛ wobeti̇̃ nokwaredi ntam mu aka nnɛ no yɛ adekoro.”—Those About to Die (1958), a Daniel P. Mannix yɛe, kratafa 135.

“Asɛm titiriw no ne sɛ frankaa bi kyia yɛ ɔsom ahofama adeyɛ. . . . Bere a nnipa pii nnye saa adwene yi ntom no, ɛnyɛ nea enni Bible mu mmoa biara koraa. . . . Sɛ nkyia no yɛ ɔsom adeyɛ a, ɛnde na Onyankopɔn mmara bara ɛmfa ho sɛ ade a wɔde obu ma no no som bo dɛn ara. Wɔ ɔkwan foforo so no, ɛho nhia sɛ kyia a wɔmpɛ sɛ wobekyia no kyerɛ obu a wonni mma frankaa anaa ɔman no.”—Render Unto Caesar, The Flag-Salute Controversy (1962), a David R. Manwaring, a ɔyɛ amammuisɛm ho nyansahu ho ɔbenfo wɔ Hobart and William Smith Colleges no yɛe, kratafa 32.

Yɛbɛpɛ sɛ yesi so dua sɛ ɛnyɛ yɛn adwene ne sɛ yɛnkyerɛ obu mma nniso bi anaa ne sodifo wɔ frankaa a yɛpow sɛ yebekyia no mu. Nea ɛte ara ne sɛ yɛrenyɛ ɔsom adeyɛ bi mfa nkotow anaasɛ yɛrenkyia ohoni bi a egyina hɔ ma ɔman bi, te sɛ nea Nebukadnesar de sii hɔ wɔ Dura tataw so, anaasɛ te sɛ nnɛyi amanaman no frankaa ahorow no. (Daniel 3:1-30) Nea ɛkyerɛ biribi titiriw no, United States (Amerika) Asennibea Kɛse no kae wɔ gyinae bi a na wɔadi kan asi a ɛdan ani no mu sɛ:

“Yesusuw sɛ ade a mpɔtam hɔ atumfo no yɛe de hyɛɛ nkurɔfo sɛ wonkyia frankaa na wɔnka ntam no tra tumi a wɔwɔ no anohyeto ahorow a amammui nhyehyɛe ma ho kwan no so na ɛtõ nyansa ne honhom a ɛwɔ yɛn Amammui Nhyehyɛe mu Nsakrae a Edi Kan a n’atirimpɔw ne sɛ wɔde bɛkora so afi ɔman mpanyimfo tumi nyinaa ase no.”—West Virginia State Board of Education v. Barnette (1943).

Enti afei, bere a afoforo kyia na wɔka nokwaredi ho ntam no, yɛn mmofra no gyina hɔ komm bere a frankaa kyia guasodeyɛ no rekɔ so no. Nanso sɛ biribi nti wɔyɛ frankaa guasodeyɛ no ɔkwan bi so a ɛkyerɛ sɛ gyina a obi gyina hɔ no di adanse sɛ ɔreyɛ guasodeyɛ no bi a, yɛn mmofra no kɔ so tra ase. Nea ɛka ho bio no, yɛn mmofra no ntu ɔman ho dɔ aprenten a ɛno nso bɛkyerɛ sɛ wɔboa ade a wɔde aprententu no rehyɛ no anuonyam no no bi. Yenni afã biara.

Ɔman Ne Sukuu Nnwom

Sɛ yɛbɛka a, ɔman dwom taa yɛ asɔredwom anaa mpaebɔ a wɔde ayɛ dwom. The Encyclopedia Americana (1956) sɛ: “Obi man ho dɔ ne ɔman a ofi mu no ho ahohoahoa ne ɔman nnwom dodow no ara mu nsɛntitiriw, na wɔ pii mu no, wɔde ɔsom mu nkate ne ɔman ho dɔ na afra.” Nokwarem no, ɔman ho dɔ nnwom ahorow da adwene titiriw a ɛwɔ nokwaredi ma frankaa no ho ntam a wɔka no mu adi. Na esiane sɛ Kyerɛwnsɛm mu nnyinaso biara nni hɔ mma ɔman ho dɔ ahohoahoa a apaapae yɛn wiase no mu no nti, yɛnto nnwom a wɔde kamfo asase so ɔman biara no bi.—Asomafo no Nnwuma 17:26; Yohane 17:15, 16.

Sɛ wɔrebɔ ɔman nnwom a, mpɛn pii no nea ɛsɛ sɛ obi yɛ de kyerɛ sɛ ɔne dwom no mu nsɛm yɛ adwene ne sɛ ɔbɛsɔre agyina hɔ. Wɔ nsɛm a ɛte saa mu no, Adansefo mmofra kɔ so tra ase. Nanso sɛ yɛn mmofra no gyina hɔ dedaw bere a wɔbɔ ɔman dwom no a, ɛho renhia sɛ wɔyɛ biribi titiriw biara sɛ wɔbɛtra ase; ɛnyɛ sɛ dwom no nti na wɔasɔre agyina hɔ. Wɔ ɔkwan foforo so no, sɛ wɔhwɛ kwan sɛ nnipakuw bi bɛsɔre agyina hɔ na wɔato dwom no a, ɛnde yɛn mmofra no betumi asɔre agyina hɔ obu nti. Nanso wɔbɛkyerɛ sɛ wɔne dwom no mu nsɛm nyɛ adwene denam to a wɔrento bi no so.

So sukuu nnwom ne ɔman nnwom gyina gyinapɛn koro anaa? Yiw, wɔn a wɔwɔ sukuu no mu no bu no sɛnea amanaman no bu ɔman nnwom ahorow no ara. Wɔtaa de ɔsom nkate ne anigye na ɛto. Yɛn mmofra no ne nnwom a ɛtete saa no mu nsɛm nyɛ adwene.

Dibea Ahorow a Wɔto ho Aba

Wɔ sukuu ahorow pii mu no, wɔtow aba de paw asuafo de dwumadi anaa dibea bi hyɛ wɔn nsa, te sɛ ebia sukuu dan mu panyin sɛɛ. Sukuu binom wɔ amammui ɔsatu nketewaa bi a ɔsatu ho badge ne nkrataa ahorow a wɔde bɔ wɔn a wɔrepere dibea no ho dawuru ka ho. Atirimpɔw no ne sɛ wɔde bɛma mmofra no ahu amansɛmdi ho nhyehyɛe. Nanso Adansefo mmofra mfa wɔn ho mfrafra sukuu amansɛmdi mu, sɛ ebia denam gye a wobegye dibea bi a wɔtow aba de paw wɔn anaasɛ wɔbɛtow aba de apaw afoforo no so. Enti sɛ wɔkamfo wɔn kyerɛ anaasɛ wɔtow aba paw wɔn ma dwumadi bi a, wɔfa nyansa kwan so pow. Wɔ saa kwan yi so no, wodi Yesu nhwɛso no akyi wɔ sɛnea ɔtwee ne ho bere a nkurɔfo pɛe sɛ wɔde no si hene no mu.—Yohane 6:15.

Nanso yebu adwuma a ɔkyerɛkyerɛfo de bɛhyɛ Adansefo mmofra nsa sɛ ɛyɛ soronko. Enti sɛ wɔde adwuma hyɛ Adansefo mmofra nsa sɛ wɔmmoa nkyerɛ kwan anaasɛ biribi foforo a ɛte saa a, wɔhyɛ wɔn nkuran sɛ wɔnyɛ nkosi baabi a ebetumi ayɛ yiye.

Ampa, yɛn mmofra no hu sɛ ɛnyɛ abatow nyinaa na ɛyɛ amammui kwan so de. Ɛtɔ mmere bi a ɔkyerɛkyerɛfo bisa asuafo no sɛ wɔnkyerɛ wɔn adwene. Ebia na biribiara nni hɔ a ɛto Bible nnyinasosɛm sɛ obi bɛkyerɛ nea ɔpɛ wɔ dwumadi ahorow bi ho anaasɛ ɔbɛkyerɛ sɛnea ohu ɔkasa bi anaa asɛm nsiesiei bi. Sɛ nkurɔfo kyerɛ wɔn adwene denam wɔn nsa a wɔbɛma so de akyerɛ sɛnea biribi te so a, eyi ne aba a wɔbɛtow de apaw ɔfoforo wɔ amammui kwan so ama dwumadi bi no nnyɛ ade koro.

[Asɛm a wɔafa aka wɔ kratafa 12]

“Womfi wiase, sɛnea me nso mimfi wiase no.”—Yohane 17:16

[Asɛm a wɔafa aka wɔ kratafa 13]

Yehowa Adansefo bu frankaa kyia sɛ ɔsom adeyɛ bi

[Asɛm a wɔafa aka wɔ kratafa 14]

“Kristofo powee sɛ wɔbɛbɔ [Roma] ɔhempɔn no nwonwafoyɛ no afɔre—a ɛne pow a wɔpow sɛ wobekyia frankaa nnɛ no yɛ adekoro”

[Kratafa 15 mfonini]

Sɛnea Hebrifo mmerante anokwafo no powee sɛ wɔbɛsɔre Ɔman honi no, saa ara na Yehowa Adansefo nkyia frankaa

[Kratafa 16 mfonini]

Adansefo mmofra mfa wɔn ho mfrafra sukuu amansɛm mu