Abrabɔ Nnyinasosɛm a Yedi Akyi

Yehowa Adansefo gye di sɛ abrabɔ ho adwene horow mu nsakrae kɛse a aba no anya mmofra so nkɛntɛnso bɔne. Sɛnea wunim no, nea wose wɔfrɛ no abrabɔ foforo no anya nkurɔfo fi 1960 mfe no mu. Engiresi Aburokyiri Ɔsɔfo Panyin bi a ɔwɔ Woolwich a ɔyɛ wɔn a wodii kan de ɛno bae no mu biako no kyerɛe sɛ: “Biribiara nni hɔ a wobetumi aka ho asɛm bere nyinaa sɛ ‘enye.’” Yɛne ɛno nyɛ adwene, nanso yɛpɛ sɛ yɛma emu da hɔ pefee sɛ yɛmpɛ sɛ yɛne wɔn a wɔne ɛno yɛ adwene no gye ho akyinnye. Nea yɛpɛ sɛ yɛkyerɛkyerɛ mu ara ne abrabɔ ho nnyinasosɛm a yedi akyi ne nea enti a yɛyɛ saa no.

Joseph Fletcher a ɔyɛ nyamekyerɛ mu ɔbenfo bi a wagye din wɔ United States (Amerika), kae wɔ abrabɔ foforo no ho sɛ: “Wɔ saa abrabɔ ho mmara yi mu no, biribiara nni hɔ a etia nna a wɔne obi foforo bɛda wɔ aware akyi, na wɔ nsɛm binom mu no eye.” Na Frederic C. Wood a ɔyɛ nyamesom mu ɔbenfo boafo bi a ɔwɔ United States (Amerika) no kyerɛkyerɛɛ mu kyerɛɛ adesuafo bi sɛ: “Mmara ahorow biara nni hɔ a ɛbata ɔbarima ne ɔbea ntam nna ho. Miti mu: mmara horow biara nni hɔ koraa. Biribiara nni hɔ a ɛsɛ sɛ woyɛ, anaasɛ enni sɛ woyɛ.”—Theology Today, October 1965, kratafa 396.

Ebia na abrabɔ ho adwenhorow a ɛtete saa no ahyeta de, nanso Yehowa Adansefo bu sɛ ɛne Bible bɔ abira ma enti ɛmfata. Yɛn gyinabea a egyina Bible so no da adi wɔ yɛn nhoma bi a wɔyɛe wɔ 1976 mu a wɔfrɛ no Your Youth—Getting the Best out of It a ɛka sɛnea abrabɔ pa nnyinasosɛm ahorow no ka asetra ho asɛm no mu. Nea ɛyɛ anigye no, bere a wɔama sukuufo 100 a wɔadi fi mfe 12 kosi 19 ahwehwɛ mu akyi no, nhwehwɛmufo bi kyerɛw de kasa tiae sɛ: “Ebia abrabɔ gyinapɛn ahorow te sɛ nea wɔada no adi wɔ mo nhoma no mu no tumi dii dwuma bere bi, nanso minnye nni sɛ ebetumi adi dwuma nnɛ. Saa awo ntoatoaso yi ani abue kɛse sen biara a aba pɛn.”

Nanso, yennye nni sɛ abrabɔ gyinapɛn foforo yi a mmofra gye tom no ama wɔn “ani abue kɛse.” Wɔ nhwehwɛmu bi a wɔyɛe nnansa yi wɔ mmofra bɛboro 160,000 a wɔadi fi mfe 13 kosi 15 ho mu no, na mmerante no mu ɔha biara mu 41 ne mmeawa no mu ɔha biara mu 21 na wɔde wɔn ho ahyɛ ɔbarima ne ɔbea nna mu pɛn. Na wɔ wɔn a wɔadi fi mfe 16 kosi 18 no ho de, bɛyɛ mmerante no mu anan biara mu abiɛsa ne mmeawa no fã na wɔayɛ saa. Nanso dɛn na afi mu aba?

Mmeawa a wɔrebɛn mpanyin afe so a wɔnyinsɛn abu so. Mmeawa a wonnii mfe aduonu a wɔwɔ United States no mu du biara mu biako nyinsɛn afe biara—bɛyɛ 1,250,000 afe biara. Eyinom mu bɛyɛ 600,000 na wɔwo wɔn mma no—wɔn a wɔaka no tu ɔyafunu no gu. Afei nso mmofra ɔpepem pii nya mmaninyare a nea wɔfrɛ no Borɔfo mu herpes a ɛka mmea a wosuro no kɛse no ka ho. Ne saa nti, yegye di sɛ ntease pa wɔ hɔ a enti ɛnsɛ sɛ wobu saa asetra mu tebea ahorow yi sɛ nea afi ‘anibuei’ mu aba.

Abrabɔ Nnyinasosɛm Pa Ahorow

Abrabɔ nnyinasosɛm ahorow a ɛsɛ sɛ wɔde kyerɛkyerɛ mmofra no ho nsɛnnennen pii wɔ hɔ. Akyerɛkyerɛfo taa di yaw wɔ nea ɛsɛ sɛ wɔyɛ wɔ eyi ho a emu nna hɔ yiye no ho. Yenim sɛ akyerɛkyerɛfo binom pɛ sɛ anka wobenya ahofadi pii de nnyinasosɛm pa a ɛwɔ Bible mu no akyerɛkyerɛ wɔn adesuafo. Sɛ́ Yehowa Adansefo no, yegye di yiye sɛ Bible nkyerɛkyerɛ a ɛfa abrabɔ ho no tumi nya nnipa so nkɛntɛnso a eye.

Adansefo awofo fi ase ntɛm de Bible mu abrabɔ nnyinasosɛm ahorow no kyerɛkyerɛ wɔn mma, na mpɛn pii no wɔde ɔkyerɛkyerɛ mmoa nhoma a ɛne Your Youth—Getting the Best out of It no na edi dwuma. Sɛ wopɛ a, w’adesuafo a wɔyɛ Adansefo no mu biako ani begye sɛ ɔbɛma wo nsa aka bi. Ɛbɛma woahu abrabɔ nnyinasosɛm ahorow a yedi akyi no no mu yiye, na ɛde nea yesusuw wɔ nsɛm a edidi so yi mu nsɛm pii ama wo.

Ɔbarima ne Ɔbea Nna a Edi Aware Anim: Yegye di sɛ ɔbarima ne ɔbea nna a edi aware anim biara a ɛno ne aguamammɔ no nnye; ɛyɛ ɔbrasɛe. Bible no ahyɛde ahorow ne sɛ: “Munguan aguamammɔ!” (1 Korintofo 6:18) “Munyi mo ho mfi aguamammɔ mu.” (1 Tesalonikafo 4:3) Yɛn adwene ne sɛ nna a ɔbarima ne ɔbea bɛda ansa na wɔaware no yɛ bɔne a anibere wom a wɔyɛ tia Onyankopɔn. Kyerɛwnsɛm no se: “Nguaman ne awaresɛefo de, Onyankopɔn bebu wɔn ntɛn.”—Hebrifo 13:4; Adiyisɛm 21:8.

Mmarima a Wɔne Wɔn ho Da: Yegye di nso sɛ nna a mmarima ne wɔn ho wɔn ho bɛda no yɛ ɔbra bɔne. Hyɛ nea Bible ka fa mmea ne mmarima nyinaa a wɔne wɔn ho wɔn ho da no ho no nsow: “Onyankopɔn gyaa wɔn maa aniwu akɔnnɔ; na wɔn mmaa de honam fam ayɔnkofa yɛbea a ɛyɛ ne kwan so no sesaa nea ɛmfa ne kwan so; saa ara nso na mmarima gyaw wɔne ɔbea honam fam ayɔnkofa yɛbea a ɛyɛ ne kwan so no maa wɔn [mfɛfo mmarima] ho akɔnnɔ dɛwee wɔn mu, na mmarima ne mmarima yɛɛ adapaade.”—Romafo 1:26, 27; 1 Korintofo 6:9-11.

Mmosa: Mmosa yɛ nnuan na sɛ wɔnom no ne kwan so a, ebetumi ayɛ nea ɛho wɔ mfaso. (Dwom 104:14, 15; 1 Timoteo 5:23) Nanso wobetumi de adi dwuma wɔ ɔkwammɔne so, na mpɛn pii no saa na wɔyɛ no. Sɛnea Bible si so dua no, yegye di sɛ nom a wobɛnom no pii no yɛ ɔbrasɛe a anibere wom. (Mmebusɛm 20:1; 23:29-35; 1 Korintofo 6:9, 10) Afei nso yɛde obu ma atumfo a wɔhyɛ mmara de siw mmosa a mmofra bɛnom a nyansa wom no, na yedi mmara horow yi so.

Nnubɔne: Yɛmmfa nnuru ahorow a ɛbow onipa na ɛsakra ne su te sɛ ebia marijuana, heroin, cocaine, LSD, betel aba ne tawa, sɛ yɛbɛbobɔ kakraa bi din a, no nni dwuma sɛ nea yɛde gye yɛn ani. Yehowa Adansefo gye di sɛ enye sɛ ahopɛ akɔnnɔ nti wɔde nnuru a ɛma obi bow anaa ɛsakra obi adwene bɛsɛe wɔn nipadua, efisɛ Bible hyɛ yɛn sɛ: “Momma yɛnhohoro yɛn ho mfi ɔhonam ne honhom mu fi nyinaa mu.”—2 Korintofo 7:1.

Kasa Fi̇̃: Yebu kasa fi̇̃ ahorow sɛ ɛmfata; ɛne Bible ahyɛde yi nhyia: “Na aguamammɔ ne afideyɛ nyinaa anaa anibere de, mommma wɔmmmɔ din po wɔ mo mu, . . . ne nkwaseasɛm anaa asereseresɛm a ɛnsɛ.”—Efesofo 5:3, 4.

Obu ma Tumidi: Nea ɛne Bible nnyinasosɛm ahorow hyia no, yɛhwɛ kwan sɛ yɛn mmofra de obu bɛma tumidi a wɔde asisi hɔ nyinaa, a sukuu akyerɛkyerɛfo nso ka ho. (Romafo 13:1-7; 1 Petro 2:13-17) Yehowa Nyankopɔn a yɛkyerɛkyerɛ yɛn mmofra sɛ wɔmfa osuro kɛse mma no no se yenni nokware na yɛnka nokwasɛm na yennwen afoforo ho.—Hebrifo 13:18; Kolosefo 3:9; Efesofo 4:25; Mateo 7:12.

Bo a Bible Nnyinasosɛm Ahorow Som

Yɛahu sɛ Bible abrabɔ pa ho nnyinasosɛm ahorow akyidi asiesie yɛn nkurɔfo asetra yiye. Ɛwom sɛ yɛn nso yɛwɔ yɛn nsɛnnennen ahorow na yɛn mmofra no nso nyɛ pɛ de, nanso wɔ ɔkwan a ɛkɔ akyiri so no, yɛade yɛn ho afi nnebɔne te sɛ korɔnbɔ, atorodi, nsisi ne pira a wopira afoforo no ho. Dodow a yɛne yɛn mmofra tie Onyankopɔn mmara ahorow na yedi ho dwuma no, dodow no ara na mmanyinyare ahorow, ɛnanom a wɔnwaree, nguaman mma ne yafunu a wotu gu nhaw yɛn, na koma mu yaw ne ahonim bɔne nso nhaw yɛn. Yegye di sɛ tete Amerika ɔmampanyin John Adams asɛm no yɛ nokware bere a ɔfrɛɛ Bible sɛ “nhoma a eye sen biara wɔ wiase” no. Yegye di nso sɛ ɔmampanyin Abraham Lincoln kaa no yiye sɛ sɛ wugye Bible tom a, “wobɛtra ase na w’awu sɛ onipa a ɔwɔ anigye na ɔyɛ onipa pa.”

Nanso, sɛnea wunim no atipɛnfo nhyɛso pii a ɛhwehwɛ sɛ mmofra yɛ nea Bible tu ho fo sɛ enye, sɛ ebia, ‘sɛ wobetu mmirika akɔ sakasaka dontori mu’ no wɔ hɔ. Na bere a ebinom nyɛ saa no, ɛyɛ afoforo nwonwa “na wɔka [wɔn] ho nsɛmmɔne.” (1 Petro 4:4) Ɛtɔ bere bi a wodi yɛn mmofra no ho fɛw na wɔserew wɔn mpo esiane sɛ wɔmfa wɔn ho nhyɛ adeyɛ te sɛ nna a ɔbarima ne ɔbea bɛda ansa na wɔaware anaa nea ɛte saa mu no nti. Enti yɛn ani sɔ bere a akyerɛkyerɛfo gyina yɛn mmofra akyi wɔ mmɔden a wɔbɔ sɛ wɔde wɔn ho bɛbata Bible nnyinasosɛm ahorow ho no mu na wɔnam saa yɛ so hyɛ yɛn mmofra a wɔbɔ mmɔden sɛ wɔbɛtra ase sɛnea nnyinasosɛm ahorow yi kyerɛ no nkuran no.

Wubehu sɛ yɛn mmofra no nte nka sɛ wɔakame wɔn biribi esiane Bible mu abrabɔ ho anohyeto ahorow no nti. Mmom no bere a Ɔdansefo abrantewaa bi de n’asetra retoto ne mfɛfo sukuufo de ho no, ɔkae: “Ade biako pɛ a mahwere ne ɔhaw bebrebe.” Sɛnea yehu no nneɛma ahorow a Ade Nyinaa so Tumfoɔ Nyankopɔn hwehwɛ fi yɛn hɔ no yɛ nea ɛbɔ yɛn ho ban, na tie a yebetie no nkutoo na ɛbɛma yɛanya mfaso.—Dwom 19:7-11.

[Asɛm a wɔafa aka wɔ kratafa 11]

‘Sɛ wugye Bible tom a wobɛtra ase na woawu sɛ onipa pa’—Abraham Lincoln

[Kratafa 8 mfonini]

Nhoma a ɛka sɛnea abrabɔ nnyinasosɛm ahorow ka suban no ho nsɛm. Adansefo awofo de kyerɛkyerɛ wɔn mma

[Kratafa 9 mfonini]

Nea ɛka abrabɔ foforo no ho bae ne asetra mu nsɛnnennen a adɔɔso

[Kratafa 9 mfonini]

Awofo a wɔyɛ Adansefo fi ase ntɛm de Bible mu abrabɔ nnyinasosɛm ahorow kyerɛkyerɛ wɔn mma nkumaa