Wobedi “Ɔtamfo a Odi Akyiri” no so Nkonim!

BERE a woyɛ abofra no, ebia na wusuro esum. Ebia nsɛm ne anansesɛm a ɛma nnipa koma tu bi mpo ma wobɔɔ hu. Hwɛ akomatɔyam ara a na ɛyɛ sɛ wo maame anaa wo papa sɔɔ kanea sii so bere a na worebɔ mmɔden sɛ wobɛda no! Saa ara na owu bɔ nnipa pii hu. Nanso, ɛnsɛ sɛ ɛba saa. Dɛn ntia? Esiane dekode a owu yɛ ankasa nti.

Hu Wo Tamfo No

Tete Israel hene onyansafo Salomo kae sɛ: “Ateasefo nim sɛ wobewuwu, na awufo de, wonnim biribiara.” (Ɔsɛnkafo 9:5) Sɛnea asɛm a wɔnam honhom so kyerɛwee a ɛwɔ w’ankasa wo Bible mu yi kyerɛ no, nea owu kyerɛ tiawa ne nkwa abirabɔ. Awufo nte ase wɔ baabiara.

Kristoni ɔsomafo Paulo kyerɛw owu ho asɛm wɔ mfatoho kwan so sɛ: “Owu, wo nkonim wɔ he? Owu, wo nwowɔee wɔ he?” Nwowɔee bɛn na ɛde owu ba? Paulo se: “Owu nwowɔee ne bɔne.” (1 Korintofo 15: 55, 56; Hosea 13:14) Ɛnde, ɛyɛɛ dɛn na nwowɔee a edi awu yi bae? Paulo ka wɔ Kyerɛwnsɛm no fã foforo sɛ: “Sɛnea ɛnam onipa biako so na bɔne baa wiase, na owu nam bɔne so bae no, saa na ɛyɛe na owu trɛw kaa nnipa nyinaa, efisɛ wɔn nyinaa ayɛ bɔne.” (Romafo 5:12) Ɔsomafo no da nea saa “onipa biako” no yɛ no adi pefee bere a ɔka eyi no: “Wɔn nyinaa wu Adam mu.” (1 Korintofo 15:22) Yiw, ɛdenam yɛn nana a odi kan, Adam asoɔden so no, owu nwowɔee no aka yɛn nyinaa.​—Genesis 3:1-19.

Sɛ yɛwɔ akwahosan na yɛne yɛn abusua a wɔwɔ ɔdɔ te baabi a ɛhɔ yɛ anigye a, anka yɛn mu biara rempaw sɛ obewu. Nanso sɛnea Bible no kyerɛ no, ‘ɛbere ne akwanhyia’ betumi ama yɛahwere yɛn nkwa. (Ɔsɛnkafo 9:11) Nokwarem no, yennim nea ɛbɛto yɛn ɔkyena. (Yakobo 4:14) Yenim ade biako​—wɔde bɔne ne owu awo yɛn nyinaa. Enti, ɔwu taa yɛn, na ɛba yɛn so sɛ ɔtamfo.

Ɔdɔfo Wu a Wogyina Ano

Owu yɛ ɔtamfo, titiriw bere a ɔfa ɔdɔfo bi no. Ɔyere bi a na ɔyare bi a emu yɛ den yiye abɔ no, a ɔresusuw ne wu ho ka kyerɛɛ ne kunu sɛ: “Ɛbɛyɛ den ama wo asen me.” Dɛn nti na otumi kaa saa? Efisɛ Bible no se: “Biribiara a wo nsa bɛka sɛ wobɛyɛ no, fa w’ahoɔden yɛ, na adwuma ne ɔdwene ne nimdeɛ ne nyansa nni asaman [adesamma nyinaa adamoa] a worekɔ hɔ no.” (Ɔsɛnkafo 9:10) Awufo nhu amane bio. Nanso wɔn a wodi awerɛhow ne abusuafo ne nnamfo a wɔte nkwa mu no. So yebetumi ayɛ amanehunu a ɛte saa ho biribi?

Awerɛkyekye nsɛm pii wɔ Onyankopɔn Asɛm, Bible no mu. Sɛ́ nhwɛso no, nnwom nhoma no mu nsɛm ahorow a wobɛkenkan na woadwen ho no yɛ ade biako a ɛde awerɛkyekye ba ankasa. Nokwarem no, nsɛm te sɛ eyinom ma awerɛkyekye: “Nhyira ne [Yehowa] a ɔsoa yɛn adesoa ma yɛn daa daa, ɔno Nyankopɔn no ne yɛn nkwagye.”​—Dwom 68:19.

Awerɛkyekye fibea foforo ne Kristofo asafo no. Wɔ afeha a edi kan Y.B. mu no, ɔsomafo Paulo kyerɛwee sɛ: “Di mmea akunafo a wɔyɛ akunafo ampa no ni. Na sɛ okunafo bi wɔ mma anaa mmanana [a wobetumi ahwɛ no honam fam] a, wonsua onyamesom pa wɔn fi mu kan ntua wɔn awofo ka; efisɛ eyi na eye na ɛsɔ Onyankopɔn ani. Wɔmmfa okunafo a onnya nnii mfirihyia aduosia nnhyɛm, na mmom wɔmfa nea waware kunu biako, nea wodi no ne nnwuma pa ho adanse: sɛ wayɛn mma, sɛ wayɛ hɔho, sɛ wahohoro ahotefo anan ho, sɛ waboa wɔn a wɔn ho hia wɔn, sɛ wadi adwuma pa nyinaa akyi.” (1 Timoteo 5:3, 4, 9, 10) Saa ara na ɛnnɛ, Yehowa Adansefo boa mfɛfo gyidifo a wɔte saa, na wɔkyekye wɔn werɛ.

Mpɛn pii no nsakrae a ɛso sen biara a ɛsɛ sɛ nea ade atɔ n’ani yɛ no yɛ nkate fam de. Ɔbarima bi yere wui na edii mfe abien no, ɔkyerɛwee sɛ: “Ná medɔ me yere yiye. Eyi ne awerɛhosɛm a ɛsen biara wɔ m’asetram na ɛyɛ den ma me sɛ megyina ano.” Obi a waware akyɛ kakra no ne obi atra wɔ nnipa abusuabɔ a ɛkɔ akyiri sen biara mu. Sɛ n’aware mu ɔhokafo wu a, nea ɛba ara ne sɛ ɔte nka sɛ wahwere ade kɛse. Hena na onii no betumi akɔhwehwɛ mmoa afi ne hɔ?

Wɔ tebea horow a ɛtete saa mu no, nnamfo pa a wɔyɛ Kristofo betumi ahyɛ no den. Abebusɛm bi a nyansa wom se: “Adamfo dɔ bere nyinaa mu, na onua, wɔwoo no maa hiada.” (Mmebusɛm 17:17) Ɔbarima anaa ɔbea kunafo hia mmoa​—nnamfo a wobeso ne mu ankasa. Nnamfo a wonim nyansa hyɛ nea odi awerɛhow no nkuran ma ɔkasa, ɛmfa ho sɛ saa a ɔyɛ no ma osu mpo no. Ebia Kristoni bi a wahwere ne hokafo ma wadi ho yaw ne awerɛhow pɛn betumi afi ayamye mu aboa. Bible tu fo sɛ: “Monkyekye wɔn a wɔn koma atu werɛ.” (1 Tesalonikafo 5:14) Nanso kae sɛ mmarima ne mmea akunafo ani gyina wɔn ahokafo. Enti, ɛsɛ sɛ wɔn a ade atɔ wɔn ani no ka wɔn asɛm kyerɛ afoforo wɔ tebea horow a ɛma obiara kura abrabɔ pa mu nkutoo mu.​—1 Petro 2:12.

Ɛyaw a owu de ba ano aduru a eye sen biara ne sɛ wode bere pii bɛboa afoforo​—ade a ɛyɛ den ma wɔn a wogye di sɛ wɔn na wohia mmoa no! Ayamye ho hia wɔ ha. Ayamye mu a wubefi ayɛ nneɛma ama afoforo no betumi ayi awerɛhow ne ɛyaw afi wo mu, efisɛ Yesu kae sɛ: “Ɔma mu wɔ nhyira mmom sen ogye.”​—Asomafo no Nnwuma 20:35.

Owu So Nkonimdi

Sɛ ɔdowa bɔ wo a ebetumi ayɛ yaw yiye, na ebetumi akum wo mpo. Nanso, mpɛn pii no, aboa no ano a ɛhyɛ wo were mu a wubeyi no bɛma wo ho atɔ wo. Nanso anidaso bɛn na ɛwɔ hɔ sɛ yebenya ahotɔ afi nwowɔee a ɛde owu ba no mu?

Bere a Paulo akyerɛkyerɛ mu sɛ bɔne ne nwowɔee a ɛde owu ba awie no, ose: “Aseda nka Onyankopɔn a ɔnam yɛn Awurade Yesu Kristo so de nkonim ama yɛn.” (1 Korintofo 15:57) Ɔkwan bɛn so na owu so nkonimdi fa Kristo ho? Yesu kyerɛe sɛ eyi te saa bere a ɔkaa n’ankasa ne ho asɛm yi: “Onipa ba no amma sɛ wɔnsom no, na ɔbɛsomee, na ɔde ne kra ayɛ agyede ama nnipa pii.” (Mateo 20:28) Yiw, wɔ wɔn a wɔkyerɛ Onyankopɔn Ba, Yesu Kristo ne agyede afɔrebɔ a Yehowa nam ne so de ama no mu gyidi no fam no, owu a wɔanya afi Adam hɔ no renyi wɔn mfi nkwa mu daa.​—Yohane 3:16.

Nokwarem no, Yesu nsɛm yi hyɛ nkuran: “Mommma eyi nnyɛ mo nwonwa, efisɛ dɔn no reba a wɔn a wɔwɔ ada mu nyinaa bɛte ne nne, na wɔafi adi; wɔn a wɔayɛ papa no bɛkɔ nkwa sɔre mu, na wɔn a wɔayɛ bɔne no bɛkɔ atemmu sɔre mu.”​—Yohane 5: 28, 29.

Ná Onyankopɔn diyifo Yesaia adi kan ahyɛ nkɔm mfehaha bi sɛ: “[Yehowa Nyankopɔn bɛmene] owu akosi daa, na Awurade [Yehowa] bɛpopa ani nyinaa so nusu.” (Yesaia 25:8) Afei nso, Bible no de anidaso a ɛyɛ anigye yi ma wɔ Adiyisɛm 21:4: “[Onyankopɔn bɛpopa] wɔn aniwam nusu nyinaa. Na owu nni hɔ bio, na awerɛhow ne osu ne ɛyaw bi nni hɔ bio, efisɛ kan nneɛma no atwam.” Esiane sɛ anidaso a Bible no wɔ ma wɔn a wɔadeda wɔ owu mu no hyɛ wɔn a ade atɔ wɔn ani den nti, ɛho nhia sɛ ‘wɔn werɛ how sɛ wɔn a aka a wonni anidaso no.’​—1 Tesalonikafo 4:13.

Bɔ mmɔden twa nea Bible da no adi sɛ Onyankopɔn de bɛbrɛ adesamma no ho mfonini. “Ahohiahia kɛse” a abɛn no kyerɛ mprempren nneɛma nhyehyɛe bɔne yi sɛe. (Adiyisɛm 7:14) Wɔsɛe wɔn a wodi atoro som akyi. Amammuifo ne aguadifo adifudepɛfo a wɔka ho bi na ɔkɔm ne akodi ba nni hɔ bio. Afei Yesu Kristo de Satan Ɔbonsam a wama nnipa pii awuwu no to bun mu. Kristo fi ne Mfirihyia Apem Nniso no ase, na ɔde bo a n’agyede afɔre no som no di ma adesamma. Awufo san ba nkwa mu wɔ owusɔre a yɛahwɛ kwan no mu, na Onyankopɔn Asɛm no mu hann hyerɛn araa ma gyidihunu a ɛfa owu, adesamma tamfo, ho no nni hɔ bio. Wɔn a wɔte ase saa bere yi nyinaa wɔ hokwan a wɔde besua Onyankopɔn akwan na wɔadi ne trenee gyinapɛn ahorow akyi.​—Mmebusɛm 4:18; Asomafo no Nnwuma 24:15; Hebrifo 2:14, 15; Adiyisɛm 18:4-8; 19:19-21; 20:1-3.

Paulo se: ‘Ansa na awiei no di hɔ a Kristo Yesu de ahenni no hyɛ ne Nyankopɔn ne n’Agya nsa. Na odi hene kosi sɛ Onyankopɔn de atamfo nyinaa begu ne nan ase. Otu owu gu sɛ ɔtamfo a odi akyiri.’ (1 Korintofo 15:24-26) Nyarewa a Adam bɔne no de bae biara kɔ. Sɔhwɛ a etwa to ba, na wɔn a wɔdɔ Onyankopɔn de nokwaredi fa mu. (Adiyisɛm 20:4-10) Bere a wɔasiesie nnipa a wɔyɛ osetie yi ma wɔayɛ pɛ no, wɔntra ase nni mfe aduoson pɛ anaa mfe ɔha ne du mpo, na mmom wɔtra ase daa. Akyɛde a Onyankopɔn nam ne Dɔba no so de ma bɛn ara ni! ​—Romafo 6:23.

Enti, bere tenten bɛn na wubetumi atra ase? Wubetumi atra ase daa apem. Bere a wote saa wiase yi “awiei bere no” mu no, ebetumi aba sɛ wunwu koraa. (Daniel 12:4; Yohane 11:25, 26; 17:3) Sɛ woyɛ Onyankopɔn apɛde a, wubetumi atwa akɔ wiase foforo a wahyɛ ho bɔ no mu pɛɛ.​—2 Petro 3:13.

Nanso, sɛ wo mfe akɔ anim a, ehia ankasa sɛ wususuw wu a wubetumi awu no ho. Nokwarem no, owusɔre ho anidaso no de anigye ba. Nanso ebia wuntumi nhu sɛnea Yehowa bɛhyehye abusua asetra wɔ saa nneɛma nhyehyɛe foforo no mu. Ɛnsɛ sɛ woma saa nsɛm no haw wo, efisɛ Yehowa bɛhwɛ ma wɔn a wodi no nokware daa no anya daa anigye.

Bere a Satan nhyehyɛe bɔne yi “nna a edi akyiri” a emu yɛ den yi rekɔ n’awiei no, ɛnsɛ sɛ woma owu ho suro sɛe hokwan a wode som Yehowa mprempren no. (2 Timoteo 3:1) Sɛ wohwere wo dɔfo bi a, ma tra a owu tumi ntra hɔ nkyɛ no nkyekye wo werɛ. (Adiyisɛm 20:13, 14) Nya owusɔre ho anidaso no mu ahotoso.

Afei, sɛ́ ɛnam ahohiahia kɛse no a wubetwa so na wobɛkɔ wiase foforo no mu anaa sɛ ɛnam owusɔre so no, nya awerɛhyem wɔ anidaso a wɔnam honhom so ama yɛanya sɛ wobetu owu, ɔtamfo a odi akyiri no, agu no mu.​—Adiyisɛm 7:9, 14.

[Mfonini wɔ kratafa 5]

Nnamfo pa a wɔyɛ Kristofo betumi ahyɛ nea ade atɔ n’ani no den honhom mu

[Mfonini wɔ kratafa 7]

Bere pii a wode bɛboa afoforo no brɛ ɛyaw a ɔdɔfo bi wu de ba no ase