Wɔannya Adwene Biara sɛ Wobegyae Wɔn Gyidi Mu!

NÁ YEHOWA nsa ka Yesu Kristo tete akyidifo no ho. (Asomafo no Nnwuma 11:21) Ɛdenam Onyankopɔn mmoa so no, wɔfaa ɔkwan trenee so a wɔannyae nneɛma mu ansiesie. Animtiaabu ne ɔtaa a emu yɛ den mpo a wohyiae no yɛ nokwasɛm a wonim no yiye.

Kristo akyidifo anokwafo a wodi kan no mudi mu kura abɛyɛ nokwasɛm a wonim no yiye. Bere a na wɔn nkwa da asiane mu mpo no, wɔannyae wɔn gyidi mu. Nanso dɛn nti na wɔne wɔn dii no atirimɔden so saa?

Wɔtan Wɔn Kwa

Te sɛ Yesu no, nokware Kristofo ne saa wiase yi anyɛ adwene wɔ n’anidaso ne ne gyidi ahorow ho. (1 Yohane 4:4-6) Afei nso, abakɔsɛm kyerɛwfo Edmond de Pressensé ka sɛ Kristosom trɛwee “ntɛmntɛm, na enyaa nkoanim a na ɛyɛ nwonwa araa ma ná ntawntawdi a ɛyɛ hu a [na ɛne tete Roma tumidi] no benya no yɛ nea na wontumi nkwati”.

Yesu faa dwom mu nkɔmhyɛsɛm bi kaa ne ho asɛm sɛ: “Wɔtan me kwa.” (Yohane 15:25; Dwom 69:4) Ansa na ɔreka ‘eyi akyerɛ n’asuafo no, na wabɔ kɔkɔ sɛ: “Akoa nsen ne wura. Sɛ wɔataa me a, wɔbɛtaa mo nso.” (Yohane 15:20) Na ɛrenyɛ mmerɛw sɛ wobedi n’anammɔn akyi. Ade biako ne sɛ, na nyamesom akannifo a wɔwɔ Yudasom mu no bebu Yesu asuafo a na wɔyɛ Yudafo no sɛ Yudasom no mu awaefo. Nanso, bere a wɔhyɛe sɛ Yesu akyidifo no nnyae ne ho asem ka koraa no, wɔpowee sɛ wobedi nea wɔka no so na wɔansɛe wɔn gyidi.​—Asomafo no Nnwuma 4:17-20; 5:27-32.

Wɔ asɛm a wɔde kɔtoo Yudafo no Sanhedrin no anim wɔ Pentekoste 33 Y.B. mu akyi bere tiaa bi mu no, wotwaa atoro too osuani Stefano so sɛ “ɔkaa abususɛm tiaa Mose ne Nyankopɔn.” Ɛwom sɛ na sobo ahorow no yɛ ntwatoso de, nanso wosiw no abo kum no. Na ɛde “ɔtaa kɛse baa asafo a ɛwɔ Yerusalem no so,” na “wɔn nyinaa hwete kɔɔ Yudea ne Samaria nsase so, gye asomafo no nko.” (Asomafo no Nnwuma 6:11, 13; 8:1) Na wɔde pii guu afiase.

Nhoma Christianity and the Roman Empire ka sɛ, “wɔde ɔtan a emu yɛ den tan” Yesu akyidifo no. Na wunim, Roma aban no de ne ho gyee nsɛm mu de bɔɔ Kristofo no ho ban mpɛn pii! Sɛ́ nhwɛso no, Roma asraafo gyee ‘ɔsomafo Paulo fii kum a Yudafo pɛe sɛ wokum no no mu. (Asomafo no Nnwuma 21:26-36) Nanso, eyi nyinaa akyi no, abusuabɔ a na ɛda Kristofo ne Roma man ntam no kɔɔ so yɛɛ nea na asomdwoe nnim.

Roma Mia Ɔtaa no Mu

Bɛyɛ Stefano wu no akyi mfe akron no, Roma sodifo Herode Agripa I kum ɔsomafo Yakobo de sɔɔ Yudafo no ani. (Asomafo no Nnwuma 12:1-3) Saa bere no, na Kristo mu gyidi atrɛw adu Roma. (Asomafo no Nnwuma 2:10) Wɔ afe 64 Y.B. mu no, ogya hyew saa kurow no fã kɛse no ara. Ɔtaa a ɛyɛ hu dii akyi bae bere a Nero de ogya no ho asodi too Kristofo so de kataa nokwasɛm a ɛne sɛ ɔno na ɔhyew kurow no so no. So ɔno na ɔde ogya too kurow no mu sɛnea ɛbɛyɛ a ɔbɛsan akyekye no kɛse na ɔde ne din ato so ma wɔafrɛ no Neropoli? Anaa ne hemmea Poppaea, a na wadan Yudani a wonim no yiye sɛ na ɔtan Kristofo no na ɔyɛ maa otwaa atoro too wɔn so? Nhwehwɛmufo adwenem yɛ wɔn nãã wɔ ho, nanso nea efii mu bae no yɛɛ hu yiye.

Roma abakɔsɛm kyerɛwfo Tacitus ka sɛ: “Wɔde fɛwdi kaa owu ho; wɔde mmoa nhoma furafuraa wɔn, akraman tetew wɔn [Kristofo] mu; wɔbɔɔ wɔn fomfam mmeamudua so; wɔde nnuru guu wɔn ho na ama wɔatumi adɛw, na sɛ ade sa a wɔde wɔn ayɛ akanea,” nnipa akanea a ɛhyerɛn ɔhene no turom. Tacitus a na ɔnyɛ Kristofo adamfo de ka ho sɛ: “Ɛwom sɛ na wodi fɔ na na wofata asotwe a ɛbɛyɛ asuade ama afoforo de, nanso na ɛfata sɛ woyi mmɔborɔhunu adi kyerɛ wɔn, efisɛ na ɛnyɛ ɔmanfo no yiyedi nti na na wɔresɛe wɔn na mmom na efi onipa otirimɔdenfo biako,” Nero.

Abirabɔ Ahorow a Ɛda Adi Pefee

Ɛwom sɛ Roma sɛe ho sobo a Nero de too Kristofo so no dii n’atirimpɔw ho dwuma de, nanso wammara wɔn anaasɛ wangu Kristosom koraa wɔ Ɔman no mu. Ɛnde dɛn nti na Romafo no kɔɔ so de ɔtaa baa wɔn so? Abakɔsɛm kyerɛwfo Will Durant ka sɛ efisɛ “na Kristofo akuw nketewa no de wɔn ahotew ne abrabɔ pa no rehaw abosonsom wiase a na anigyede akyi nkutoo na wodi no.” Na biribiara nni hɔ a ɛbɛma abirabɔ a ɛda Kristosom ne Romafo agumadibea akansi ahorow a na mogyahwiegu wom ntam no ayɛ kɛse asen eyi. Nanso na ɛyɛ hokwan a Romafo no nam so beyi Kristofo no afi hɔ na wɔnam saayɛ so ama wɔn ahonim mu adwo wɔn, enti na wɔmpɛ sɛ wobegyaa wɔn.

Ná ɛte sɛ nea wontumi nni Roma so da sɛ́ wiase tumidi. Ná Romafo gye di sɛ ade biako a ɛma wɔn ho yɛ den wɔ asraadi mu ne som a na wɔsom anyame ahorow nyinaa no. Enti na ɛyɛ den ma wɔn sɛ wɔbɛte ɔsom a wɔde ma onipa biako pɛ a Kristosom kyerɛkyerɛ no ne pow a ɛpow anyame afoforo nyinaa, a na ɔhempɔn no som nso ka ho no ase. Enti na ɛnyɛ nwonwa sɛ Roma buu Kristosom sɛ tumi bi a edidi ahemman no ase.

Adanse a Wodii So Akatua

Ɛde rekɔ afeha a edi kan Y.B. mu awiei hɔ no, wɔde ɔsomafo Yohane kɔɔ nnommumfa mu wɔ supɔw Patmo so esiane “Onyankopɔn asɛm ne Yesu adanse nti.” (Adiyisɛm 1:9) Wogye di sɛ Roma ɔhempɔn Domitia na ɔyɛɛ eyi. Nanso, ɛmfa ho nhyɛso a wɔde baa Yesu akyidifo no so no, bɛyɛ afeha no awiei no, na Kristosom atrɛw wɔ Roma Ahemman no nyinaa mu. Ɔkwan bɛn so na eyi tumi yɛɛ yiye? A History of the Early Church ka sɛ nea ɛkaa Kristosom “boom ne ne som adwuma.” Te sɛ Yohane no, tete Kristofo a wɔtaa wɔn no annyae wɔn gyidi mu ansiesie na mmom wɔde mmɔdenbɔ kɔɔ so kaa Onyankopɔn ho asɛm na wodii Yesu ho adanse.​—Asomafo no Nnwuma 20:20, 21; 2 Timoteo 4:2.

Kristofo ɔtaa no daa adi wɔ ɔkwan foforo so bɛyɛ 112 Y.B. mu, bere a Ɔhempɔn Trajan paw Pliny sɛ amrado wɔ Bitinia (a mprempren ɛne Turkey atifi fam atɔe) no akyi mfe abien. Na nniso a ɛwɔ hɔ kan no atoto nneɛma ase ma ɛde basabasayɛ aba. Ɛkame ayɛ sɛ na nnipa dodow no ara agyae abosomfi kɔ koraa, na na mmoa a wɔde bɔ afɔre aduan a wotɔn so atew ara yiye. Aguadifo kasa tiaa Kristosom sɛ ɛyɛ mmerɛw, efisɛ na mmoa a wɔde bɔ afɔre ne ahoni ahorow nnim.

Pliny bɔɔ mmɔden de abosonsom sii hɔ bio, bere a Kristofo de wɔn nkwa twaa so denam pow a wɔpowee sɛ wɔde nsa bɛbɔ afɔre na wɔahyew aduhuam wɔ ahempɔn no ahoni ahorow anim no so. Awiei koraa no Roma atumfoɔ gye toom sɛ na Kristofo no “yɛ nnipa a wobu bra pa, nanso na wokyi ɔman no tete nyamesom mu amanne no koraa” sɛnea Ɔbenfo Henry Chadwick kae no. Ɛwom sɛ kumfɔ a na wobu obi esiane sɛ ɔyɛ Kristoni kɛkɛ nti no kɔɔ so traa hɔ de, nanso na Yesu nokware akyidifo no nyɛɛ wɔn adwene da sɛ wobegyae mu asiesie.

Ade foforo nso a ɛde ɔtan bae ne nea Ɔbenfo W. M Ramsey ka no, “abufuw a ɛbaa abosonsomfo mmusua ahorow mu esiane emu ankorankoro bi a wɔbɛdan gyidifo no nti.” Ɔbenfo J. W. C. Wand ka sɛ: “Sɛ na ɔyɔnko bi ntumi nni asetram amanne bi so esiane sɛ saa a ɔbɛyɛ no bɛkyerɛ sɛ wagye abosonsomfo anyame no atom nti a, na ɛma asetra yɛ den yiye.” Enti na ɛnyɛ nwonwa sɛ wobuu tete Kristofo no sɛ adesamma atamfo anaasɛ nkurɔfo a wɔnnye onyame biara nni.

Nkɔanim de Ɔtaa a Emu Yɛ Den Ba

Polycarp a wɔbɔ amanneɛ sɛ ɔsomafo Yohane kyerɛkyerɛɛ no no bɛyɛɛ ɔpanyin a na wobu no yiye wɔ Smirna (mprempren Izmir) kurow no mu. Esiane ne gyidi nti wɔde no fam dua ho hyew no wɔ afe 155 Y.B. mu. Roma mantam so amrado Statius Quadratus na ɔmaa nkurɔfo yɛɛ saa. Abosonsomfo a wɔyɛ basabasa a wobuu Polycarp a na wadi mfe 86 no animtiaa sɛ wabrɛ ɔsom a wɔde ma wɔn abosom no ase hyɛɛ agumadibea hɔ ma, na Yudafo a wɔyɛ katee no nso fii wɔn pɛ mu boaboaa ogya ano, ɛwom mpo sɛ na ɛyɛ Homeda kɛse bi mu de.

Ɔtaa ahorow pii kɔɔ so baa Kristofo no so wɔ Roma ahemman no nyinaa mu. Wokum Kristofo kɛse wɔ Ɔhempɔn Marcus Aurelius nniso ase mpo. Na wɔde nkrante kunkum wɔn a na wɔyɛ Romafo no; na wɔn a na wɔnyɛ Romafo no de wɔmaa mmoa kunkum wɔn wɔ wɔn agumadibea ahorow hɔ. Na wɔn bɔne ne dɛn? Ɛne sɛ wɔyɛ Kristofo a wɔpow sɛ wobegyae wɔn gyidi mu asiesie ara kwa nti.

Wɔkyekyee nnɛyi France kurow Lyons wɔ Roma atubra man Lugdunum, a na ɛyɛ dwumadibea ti titiriw ne nsraafo adwumayɛbea koro pɛ a na ɛwɔ Roma ne Rhine Asubɔnten no ntam no mu. Ebeduu afe 177 Y.B. mu no, na wɔwɔ Kristofo kuw a wɔyɛ den wɔ kurow no mu na na abosonsomfo no de abufuw sɔre tia wɔn. Bere a wɔbaraa Kristofo sɛ wɔnnkɔ mmeae ahorow a amanfo no hyiam no na eyi fii ase. Basabasayɛfo kanyan basabasayɛ, na ɔtaa a edi akyi bae no mu yɛɛ den kɛse araa ma ná Kristoni biara ntumi mpue mfi ne fie. Roma amrado no hyɛe sɛ wɔnhwehwɛ Kristofo nkunkum wɔn.

Akatua No

Bere a Yesu asomafo no wuwui a wɔn nkɛntɛnso a na esiw kwan no to twae no, ɔwae fii ase wɔ wɔn a na wɔse wɔyɛ Kristofo no mu. (2 Tesalonikafo 2:7) Bere a afeha a ɛto so anan Y.B. rekɔ n’awiei no, Kristosom a awae bɛyɛɛ Ɔman som. Saa bere no na aporɔw na na asiesie ne ho sɛ ebegyae nneɛma mu asiesie, na na ɛde ne ho abɔ wiase no ho​—biribi a Yesu ne n’asuafo a wodi kan no anyɛ da. (Yohane 17:16) Nanso, na wɔakyerɛw Bible no mu mmara no awie dedaw a na Kristofo gyidi ho kyerɛwtohɔ ka ho.

So tete Kristofo mpempem no amanehunu ne wɔn wu no yɛɛ ɔkwa? Ɛnte saa koraa! Esiane adwene biara a na wonni sɛ wobegyae wɔn gyidi mu asiesie nti, ‘wodii nokware kosii owu mu na wɔama wɔn nkwa abotiri.’ (Adiyisɛm 2:10) Yehowa asomfo da so ara hyia ɔtaa, nanso wɔn mfɛfo gyidifo no gyidi ne wɔn mudi mu kura no da so ara yɛ nkuranhyɛ kɛse ma wɔn. Enti, nnɛyi Kristofo nso nyɛɛ wɔn adwene sɛ wobegyae nneɛma mu asiesie.

[Mfonini wɔ kratafa 8, 9]

Nero

Tete Roma nsuwsuwso

Afɔremuka a na wɔde di Kaesare som ho dwuma

[Mfonini Fibea]

Nero: The British Museum na wɔmaa hokwan

Museo della Civiltà Romana, Roma

[Mfonini wɔ kratafa 10]

Marcus Aurelius

[Mfonini Fibea]

The Bettmann Archive