Nhomawa Ahorow a Ɛbɛboa Yɛn Ma Yɛayɛ Asuafo
1 Yehowa nkurɔfo de anigye adi Yesu ahyɛde sɛ ‘wɔnyɛ amanaman nyinaa asuafo’ no so. (Mat. 28:19) Wɔ mfe pii a atwam no mu no, yɛnam akwan horow pii so anya nnipa a wɔn ani gye Ahenni asɛm no ho. Yɛaka akyerɛ wɔn sɛ wonsua Onyankopɔn Asɛm no na wonnya Ahenni bɔhyɛ no mu gyidi. Nhoma akɛse ne nsɛmma nhoma titiriw na ada asɛm no adi, nanso nhomawa nso aboa wɔ asuafo a wɔyɛ no mu.
2 Nea yɛde bɛma wɔ July mu ne nhomawa anan de agye ¢20. Adawurubɔfo a wɔn ho nkokwawee pii mpo behu sɛ ɛyɛ mmerɛw sɛ wɔde eyi bɛma, na akyinnye biara nni ho sɛ yɛde pii bɛma. Nea ɛho hia a ɛsɛ sɛ woma ɛtra w’adwene mu ne sɛ yɛn nhomawa ahorow no betumi aboa ma yɛayɛ asuafo. Sɛ ebetumi a, ɛsɛ sɛ anyɛ yiye koraa no wode nea edidi so yi biako ka anan biara a wode ma ho: Daakye Dwoodwoo Asetra—Ɔkwan a Wobɛfa So Anya, Pii Wɔ Asetra Mu!, So Onyankopɔn Bi Wɔ Hɔ a Odwen Yɛn Ho? ne “Ahenni ho Asɛmpa Yi.” Yɛn botae ne sɛ yɛne wɔn a wogye bi no befi Bible adesua ase, na wɔahyɛ da asiesie anan yi ama ɛno yɛ.
ƆKWAN BƐN SO NA WODE NHOMAWA NO BƐMA?
3 Eye sɛ wode nhomawa biako pɛ bedi dwuma wɔ wo kasa no mu. Sɛ wo ne obi a asetra a ɛkɔ so yɛ bisibasaa nnɛ no ahaw no rekasa a, fa mfonini a ɛwɔ Daakye Dwoodwoo Asetra,—Ɔkwan a Wobɛfa So Anya akyi no kyerɛ no na bisa sɛ ɔte nka sɛ daakye a ɛte saa betumi aba. Boa no ma onhu sɛ ɛmfa ho sɛ nnipa a na ɔhaw ahorow aba asase so no, tebea horow te sɛ nea ɛwɔ nhomawa no akyi ne nea Bible hyɛ ho bɔ. Nhomawa no kura nsɛm a ɛfa saa anidaso a egyina Bible so no ho.
4 Sɛ Pii Wɔ Asetra Mu! no na wopɛ sɛ wode di dwuma a, wubetumi aka sɛ: “Ɛwom sɛ ɛnnɛ nea nnipa pii hu wɔ asetra mu ara ne nea ɛkɔ so da biara da no de, nanso ebinom pɛ sɛ wohu baabi a yefi bae, nea asetra kyerɛ, ne nea ɛwɔ hɔ daakye. Ebia woasusuw saa nsɛm no ho. Sɛ saa a, ɛnde w’ani begye sɛ wubehu mmuae a Bible no de ma wɔ asetra mu ɔhaw ahorow no ho a wɔakyerɛkyerɛ mu wɔ nhomawa yi mu no.”
5 So Onyankopɔn Bi Wɔ Hɔ a Odwen Yɛn Ho? nhomawa no bisa asɛm bi a ɛwɔ nnipa pii adwene mu. Sɛ wode nhomawa yi rema a, wubetumi aka sɛ: “Bere a yɛne nkurɔfo kasa wɔ mpɔtam ha no yehu sɛ ebinom wɔ hɔ a wɔn adwenem yɛ wɔn naa wɔ sɛ ɛyɛ nea Onyankopɔn dwen asase yi ne onipa ho no ho. Wɔte nka sɛ, sɛ Onyankopɔn bi wɔ hɔ a odwen yɛn ho a, dɛn nti na ɔbɛma kwan ma nnipa adi awerɛhow, ahu amane a ɛso bi nni? Nhomawa yi de adanse ma a ɛkyerɛ sɛ Onyankopɔn wɔ hɔ na odwen adesamma ho. Ɛde daakye ho anidaso ankasa ma.”
6 Ebia wobɛpɛ sɛ wode nsɛm afoforo a etu mpɔn saa ara di dwuma. Ma ɛntra w’adwene mu sɛ yɛn botae ne sɛ yɛbɛyɛ asuafo, na nhomawa a yɛde bɛma yɛ ɔkwan a yɛbɛfa so ayɛ saa. Yesu kɔɔ so kae sɛ nea ɛsɛ sɛ ɛka asuafoyɛ no ho ne ‘kyerɛ a yɛbɛkyerɛkyerɛ wɔn sɛ wonni nea wahyɛ yɛn nyinaa so.’ Fa ofie Bible adesua foforo ase a wubefi yɛ wo botae wɔ July mu na nya Yesu asɛm foforo a ɔka kaa ho no mu gyidi sɛ, “Hwɛ, me ne mo wɔ hɔ.”—Mat. 28:20.