“Wo Man Beyi Wɔn Yam Koraa Aba”
1 Wɔ 1982 mu no, Asafo ti no sii gyinae sɛ ɛbɛto nsa afrɛ daa akwampaefo ne ankorankoro a wobetumi ayɛ akwampaefo aboafo asram dodow bi ma wɔakɔyɛ asasesin titiriw bi a wɔmfa nhyɛɛ obiara nsa mu adwuma wɔ Ɔmantifi. Efi saa bere no nnipa dodow a wogye ɔfrɛ no so afe biara no dodow kɔ anim. Nnipa a wɔdɔɔso sen biara gyee ɔfrɛ no so afe a etwaam no. Nnipa bɛboro 140 de wɔn ho mae na wɔyɛɛ nkurow 10 mu adwuma wɔ ɔmantifi. Ampa, ɛyɛ Dawid nkɔmhyɛsɛm no mmamu a ɛyɛ nwonwa, sɛ: “Wo man beyi wɔn yam koraa aba, wo koda no”!—Dw. 110:3.
NEA AFI MU ABA
2 Sɛ́ ɛyɛ nea Yehowa ahyira ne nkoa honhom a ɛpɛ no so no yɛ nea wotumi hu wɔ nea nnipa yi atumi ayɛ wɔ mpɔtam hɔ wɔ nnansa yi mfe no mu no mu. Mprempren wɔwɔ nhoma adesua kuw biako wɔ Walewale a ɔpanyin bi a ofi Bolgatanga asafo no mu hwɛ so. Anigyefo dodow bi afi ase reka asɛmpa no wɔ Sawla na ebinom resiesie wɔn ho ama asubɔ. Wa asafo no mu adawurubɔfo dodow akɔ soro fi 5 akodu 13. Afei nso, ɛwom sɛ Ahenni adawurubɔfo nni Gambaga, Paga ne Tumu de, nanso wɔn a wɔkra Ɔwɛn-Aban ne Nyan! no nsa ka bi bere nyinaa.
PII WƆ HƆ A ƐSƐ SƐ YƐYƐ
3 Ɛwom sɛ nnipa a wɔregye ɔfrɛ no so akɔsom wɔ baabi a mmoa ho hia kɛse no dodow kɔ soro ara de, nanso yebetumi aka ara sɛ ‘otwa adwuma no dɔɔso, na adwumayɛfo no de, wosua.’ (Mat. 9:37) Dɛn nti na yebetumi aka saa? Nea ɛte ne sɛ, nkurow akɛse foforo pii wɔ ɔmantifi a Ahenni asɛm no nnya nnuu hɔ ɛ. Ɔmansin sohwɛfo a ɔwɔ mpɔtam hɔ no kyerɛw brɛɛ yɛn nnansa yi ara sɛ yɛmfa nnipa no bi nkɔ Lawra mpɔtam hɔ. Ɔbobɔɔ mmeae te sɛ Jirapa, Hamile, Nandom, Tumu, ne ade, din na ɔkae sɛ nokware no ho kɔm ne sukɔm de nnipa a wɔwɔ mmeae yi nso.
4 So wobɛka wɔn a wɔde wɔn ho bɛma afe yi no ho? Sɛ woyɛ saa a, wubenya anigye kɛse. Ɛyɛ nokware sɛ egye ho a wɔde bɔ afɔre ankasa na obi atu akɔ akyirikyiri nsasesin a ɛwɔ ɔmantifi a wɔnyɛɛ mu adwuma da no mu. Nanso wɔn a wɔanya adwuma no mu kyɛfa nnansa yi ara no bɛka akyerɛ wo sɛ anigye ne akomatɔyam a obi nya wɔ asɛnka ne asuafoyɛ adwuma a wɔyɛ wɔ nnipa a wɔba fam a wɔwɔ saa mmeae yi mu no fata afɔre biara a ɛsɛ sɛ wɔbɔ wɔ ho. Onua bi a ofii asasesin no mu bae nnansa yi ara bere a wayɛ mu adwuma ɔsram biako no bɔ amanneɛ sɛ: “Esiane anigye kɛse a minyae wɔ asasesin no mu no nti, mayɛ nhyehyɛe sɛ mɛsan akɔ kurow no mu afe yi. Ɛnyɛ sɛ merekodi ɔsram biako pɛ na mmom asram pii.” Amanneɛbɔ foforo a efi anuanom baanu a wɔboom kɔyɛɛ adwuma no hɔ ka sɛ: “Yɛrentumi nka anigye ne osuahu a yenyae wɔ asasesin no mu no ho asɛm wɔ krataa so.” Wɔn nso wɔresiesie wɔn ho sɛ wɔbɛsan akɔ asasesin no mu bio. Yiw, wɔn a wɔanya asasesin titiriw a wɔmmfa nhyɛɛ obiara nsa mu adwumayɛ no mu kyɛfa no tumi hu Yesu asɛm a ɔkae no yiye sɛ, “Ɔma mu wɔ nhyira mmom sen ogye.” (Aso. 20:35) Hu a yebehu ɔma hokwan ahorow a yɛwɔ na yɛahu ɔkwan a yɛbɛfa so ama betumi ama yɛn anigye no ayɛ kɛse.
WUBETUMI ABOA
5 Afei, susuw wo nsɛm tebea ho. Sɛ biribiara nsiw wo kwan wɔ baabi a mmoa ho hia kɛse a wɔkɔsom ho ɔfrɛ no a wubegye so no mu a, ɛnde dɛn nti na womfa wo ho nhyɛ adwuma a ɛho hia kɛse yi mu afe yi? Wubetumi anya ɔkwan a wɔfa so bisa ho kwan no ho asɛm pii wɔ Yɛn Ahenni Som, July, 1985 de no mu. Yɛhyɛ nyansa sɛ kenkan saa asɛm no bio. Ɛsɛ sɛ wode w’akwammisa krataa no ma wo asafo ɔsom boayikuw no ma wɔpene so na wɔde mana Asafo ti no.
6 Bere a yɛkɔ so srɛ otwa Wura no sɛ ɔmfa adwumayɛfo pii mmra ne twa no mu no, ɛmmra sɛ yɛbɛyɛ ade ma ɛne yɛn mpaebɔ no ahyia denam wiase nyinaa adwuma a Yesu hyɛe no mu kyɛfa kɛse a yebenya no so.—Mat. 24:14; 28:19, 20.