Teokrase Ɔsom Sukuu No A Yɛde Benya Nkɔso
1 Ɛyɛ yɛn anigye kɛse sɛ Yehowa ama yɛn “asuafo tɛkrɛma.” (Yes. 50:4) Teokrase Ɔsom Sukuu no ayɛ ɔkyerɛkyerɛ adwinnade a ɛho hia a Yehowa de adi dwuma de ama yɛanya teokrase ntetee bɛboro mfirhyia 44 ni. Mprempren yɛn nsa aka yɛn Teokrase Ɔsom Sukuu Dwumadi nhyehyɛe foforo no. So woahwehwɛ 1988 sukuu no ho akwankyerɛ no mu yiye?
2 Dwumadi No. 1, Bible akenkan mu nsɛntitiriw, ne ɔkasa No. 2 bɛyɛ te sɛ afe a etwaam no de no ara. Nanso ɔkasa No. 3 ne 4 bɛyɛ soronko kakra efisɛ ɛde yɛn bɛkɔ ɔkyerɛkyerɛ mmoa abien a yɛde di dwuma pii wɔ asɛnka mu a ɛne Wubetumi Atra Ase Daa wɔ Paradise wɔ Asase So ne Reasoning nhoma no mu.
3 Wɔde ɔkasa No. 8 begyina Reasoning nhoma no ne Tra Ase Daa nhoma no so. Sɛ woyi fi Tra Ase Daa, nhoma no mu a, ɛsɛ sɛ wɔde ma anuawanom a wɔyɛ afoforo wɔ nokware no mu anaasɛ wonyinii no titiriw. Eyi bɛma wɔanya osuahu a mfaso wɔ so na wɔahu saa asɛnka adwinnade yi mu yiye. Ɔkasa No. 4 no begyina Reasoning nhoma no so daa.
4 Bere a yesiesie yɛn ho ma sukuu no dapɛn biara no, Reasoning nhoma no a yɛde nkankrankakra kenkan ne nyinaa no bɛma yɛahu nea ɛwom no mu kɛse, na afei yebesusuw sɛnea yɛde bedi dwuma no ho ntɛm ara bere a nsemmisa anaasɛ anoyi bi sɔre no. Eyi bɛboa yɛn ma yɛayɛ nnam kɛse wɔ asɛnka mu bere a yɛn tɛkrɛma a wɔakyerɛkyerɛ no no de nsɛm a ɛdan ti kɛse ka nokware no ho asɛm no.—Fa toto Asomafo no Nnwuma 17:2, 3 ho.