Yɛka Sɛ Obi Yɛ Kronkron a, Ɛkyerɛ Sɛn?

Nea Bible ka

Yɛka sɛ obi yɛ kronkron a, ɛkyerɛ sɛ onii no atwe ne ho afi efĩ ne nkekae biara ho. Hebri asɛmfua a wɔkyerɛɛ ase “kronkron” no, ntease a ɛwɔ akyi ne sɛ, “wubeyi biribi asi nkyɛn.” Enti sɛ biribi yɛ kronkron a, woyi si nkyɛn na wɔmfa nyɛ biribiara kɛkɛ esiane sɛ ɛho tew nti.

Onyankopɔn ne obi a ɔyɛ kronkron pa ara. Bible ka sɛ: “Obiara nni hɔ a ɔyɛ kronkron sɛ Yehowa.”a (1 Samuel 2:2) Ɛno nti, Onyankopɔn na ɔwɔ hokwan sɛ ɔkyerɛ sɛ biribi yɛ kronkron anaa ɛnyɛ kronkron.

Biribiara a ɛfa Onyankopɔn ho tẽẽ no, yebetumi de asɛmfua “kronkron” aka ho asɛm, titiriw nneɛma a yɛayi asi nkyɛn a yɛde yɛ adwuma wɔ Onyankopɔn som mu nkutoo no. Yɛbɛyɛ nhwɛso a, Bible ka nneɛma a edidi so yi ho asɛm:

• Mmeae a ɛyɛ kronkron: Onyankopɔn ka kyerɛɛ Mose wɔ nkyɛkyerɛ a ɛredɛw no ho sɛ: “Baabi a wugyina no yɛ asase kronkron.”​—Exodus 3:2-5.

• Afahyɛ ahorow a ɛyɛ kronkron: Ná tete Israelfo no taa kɔ afahyɛ ahorow ase kɔsom Yehowa. Ná wɔfrɛ saa afahyɛ ahorow no “nhyiam kronkron.”​—Leviticus 23:37.

• Nneɛma a ɛyɛ kronkron: Tete Yerusalem asɔrefie no mu no, na wɔfrɛ nneɛma a wɔde yɛ adwuma wɔ Onyankopɔn som mu no “anwenne kronkron.” (1 Ahene 8:4) Ɛwom, na ɛnsɛ sɛ wɔsom saa nneɛma a ɛyɛ kronkron no, nanso na ɛsɛ sɛ wodi no ni.b

Obi a bɔne wɔ ne ho betumi ayɛ kronkron anaa?

Yiw. Onyankopɔn hyɛ Kristofo nyinaa sɛ: “Monyɛ kronkron, efisɛ meyɛ kronkron.” (1 Petro 1:16) Nokwasɛm ne sɛ, nnipa a bɔne wɔ wɔn ho rentumi nyɛ kronkron te sɛ Onyankopɔn da. Nanso, nnipa a wodi Onyankopɔn mmara so no, yebetumi aka sɛ ‘wɔyɛ kronkron na wɔsɔ Onyankopɔn ani.’ (Romafo 12:1) Obi a ɔbɔ ne ho mmɔden sɛ ɔbɛyɛ kronkron no, ɔma ɛda adi wɔ ne kasa ne ne nneyɛe mu. Sɛ nhwɛso no, otie Bible afotu a ɛka sɛ, ɛsɛ sɛ ‘yɛn ho tew, na yɛtwe yɛn ho fi aguamammɔ ho,’ ne nea ɛka sɛ ‘yɛnyɛ kronkron yɛn nneyɛe nyinaa mu’ no.​—1 Tesalonikafo 4:3; 1 Petro 1:15.

Sɛ Onyankopɔn bu obi sɛ ɔyɛ kronkron a, saa gyinabea no betumi abɔ no anaa?

Yiw. Sɛ obi amfa Onyankopɔn mmara ammɔ ne bra a, saa na ɛbɛba. Onyankopɔn remmu onipa a ɔte saa no sɛ ɔyɛ kronkron bio. Sɛ nhwɛso no, wɔkyerɛw Bible mu nhoma a ɛne Hebrifo no kɔmaa ‘anuanom a wɔyɛ kronkron.’ Nanso nhoma no bɔɔ wɔn kɔkɔ sɛ wɔnhwɛ yiye ‘na koma bɔne a enni gyidi amma wɔn mu biara mu da, na wɔanwae amfi Onyankopɔn teasefo no ho.’​—Hebrifo 3:1, 12.

Atosɛm a nkurɔfo ka fa nea ɛma obi yɛ kronkron ho

Atosɛm: Sɛ obi si gyinae sɛ ɔrenware a, ɛma ɔyɛ kronkron pa ara.

Nokwasɛm: Kristoni bi betumi apaw sɛ ɔrenware, nanso ɛno nkyerɛ sɛ sigya a ɔredi no ara kɛkɛ bɛma wayɛ kronkron. Ɛwom, wɔn a wɔpaw sɛ wɔrenware no nya bere de som Onyankopɔn a biribiara ntwetwe wɔn adwene. (1 Korintofo 7:32-34) Nanso, Bible ka sɛ wɔn a wɔaware nso betumi ayɛ kronkron. Nokwasɛm ne sɛ, anyɛ yiye koraa no, na Yesu asuafo no mu baako a yɛfrɛ no Petro aware.​—Mateo 8:14; 1 Korintofo 9:5.