Ɔhamuni​—Obi A Wakɔ So Atra Ase Wo Tebea A Emu Yɛ Den Mu Wɔ Afrika

Efi South Africa “Nyan!” kyerɛwfo hɔ

“ƆHAMUNI a otwa to” Saa na The Star Today a ɛbae October 26, 1983 no kae. Star no toaa so sɛ, “bere bi na Bepɔw So Ahamufo mpempem pii kyinkyin Cape, Natal ne Transvaal mmepɔw no so.” Nanso ɛte sɛ nea nea waka wɔ abusua a na anka wɔn ho yɛ anigye yi mu ne akwakoraa ketewaa bi a wɔfrɛ no Japie Mabinde.

Nanso, Japie Mabinde abusua yi mufo mpempem pii da so ara te ase wɔ baabi a ɛbɛn Kalahari Anhweatan no so. Kɔ a wɔakɔ so atra ase wɔ ahokyere mu ne wɔn ase a ɛretɔre ho abakɔsɛm yɛ nea ɛyɛ anigye sɛ yebesusuw ho.

Aborɔfo ne Abibifo Ntam Akodi

Bere a Afrika abibifo mmusua horow no fii ase sɛ wɔbɛkɔ Afrika kesee fam no, wohuisɛ Ahamufo​—nnipa nketewa a wɔn tenten bɛyɛ sɛ anammɔn 4 ne nsateakwaa 10​—no wɔ asase no so dedaw. Ɛsono Ahamufo no wɔ Afrika abibifo no ho nso, efisɛ wɔn honam ani reyɛ ayɛ te sɛ akokɔsrade.

Wɔ bere bi mu no, na abibifo no ne asase no sofo a wɔn ho te sɛ akokɔsrade yi tumi tra ase asomdwoe mu wɔ asase koro no ara so. Abibifo no suae sɛ wobenya obu ama Ahamufo no esiane asase no ne ɛso mmoa ho nimdeɛ a wɔwɔ nti. Sesothofo tete bɛ bi mpo ka sɛ: “Ɔhamuni na ɔyɛ ɔkyerɛkyerɛfo.” Nanso asomdwoe a na.ɛwɔ wɔn ntam no ankyɛ.

Wɔ afeha a ɛto so 17 no mu no, aborɔfo bae na wobekunkum mmoa no pamee wɔn​—nea ɛyɛ Ahamufo no aduan titiriw no. Ahamufo no yɛɛ bi tuaa wɔn so ka denam wɔn nyɛmmoa a wowiawiae no so. Dɛn na efii mu bae? Ahamufo no ne aborɔfo no ntam ɔko a ɛyɛ awerɛhow a ɛkɔɔ so bɛyɛ mfirihyia 200! Afei 1802 bae a saa bere no nã aduankɔm a esii maa abibifo mmusua horow no ne wɔn ho wɔn ho koe no. Nsase ne aduan a ɛho yɛɛ nã no maa ntawntawdi bɛdaa wɔne Ahamufo no ntam. Ankyɛ na abɔmmɔfo nketewa yi hui sɛ wɔaka wɔn ahyɛ wɔ Drakensberg ne Lesotho mmepɔw no ntam.

Nanso, abibifo ne aborɔfo ntam akodi no kɔɔ so ara. Ɔhamuni no bɔɔ n’asase a aka no ho ban wɔ anifere kwan ahorow so: awudi, adewia, adesɛe. Nanso awiei koraa no nnipa no nam atuo ne wɔn dodow so tumi dii abɔmmɔfo nketewa yi so nkonim, na wɔ 1869 mu wɔ ahyɛde a Britania tete tumidifo no de mae mu no, wɔtɔree bepɔw so Ahamufo kuw a wɔaka no ase. Ansa na afeha a ɛto so 20 reba no na kakraa bi pɛ na wɔaka.

Nnipa kakraa bi pɛ na wodii awerɛhow wɔ wɔn ase a wɔtɔree yi ho. Wɔ 1897 mu no, George Theal a na anka ɔyɛ tete nniso no ananmusifo wɔ Cape no kae sɛ: “Ebia awudi a ɛte sɛɛ bɛyɛ obi mmɔbɔ, eyinom a wokunkum wɔn wɔ wɔn ankasa asase so no, nanso biribi titiriw biara nni hɔ a ɛbɛma obi adi awerɛhow wɔ wɔn ase a atɔre no ho . . . ná ɛyɛ wiase no nyinaa yiyedi sɛ wɔbɛma wɔama abusua a ɛkorɔn kwan.”a

Kalahari Ahamufo No

Nanso, Ahamufo no nyinaa ase antɔre. Mpempem pii nyaa nkwa wɔ Kalahari​—asase kɛse a nsu nni so a mfitiase no abibifo ne aborɔfo a wɔyɛn mmoa no powee sɛ wɔbɛkɔ hɔ no. Ɛyɛ asase a nsu nni so. Nsu kakraa a ɛtɔ wɔ ahohuru bere mu no yow ntɛm ara na ɛmma ɛnyɛ yiye sɛ wobedua nneɛma wɔ asase no so na saa ara na wontumi nyɛn anantwi nso wɔ so. Nanso na Ahamufo no anya akwan horow a ɛyɛ nwonwa a wɔfa so tra ase wɔ hɔ. Sɛ nhwɛso no, wonim akwan horow a wɔfa so nya nsu fi nnua ntini ne nnuaba ahorow mu. Anaasɛ wohu nsu a ɛwɔ asase no ase na wɔde ɔdorobɛn twe fi fam.

Asase no so a wobetumi atra hwehwɛ sɛ wɔbɛyɛ wɔn a wɔwɔ nnua ho nimdeɛ nso. Ɛde besi nnɛ no, Hamuni abeawa tumi kyerɛ afifide ahorow 75 ansa na wanya mfe awotwe. Nanso ansa na ɔbɛyɛ ɔpanyin no, na ɔwɔ afifide ahorow ahorow bɛyɛ 300 ho nimdeɛ kɛse. Chamuni ɔbea biako maa nnua ho ɔdenimfo, Brian Maguire, ho dwiriw no bere a otumi kyerɛɛ nsonsonoe a ɛda afifide ahorow abien a na ɔno a ɔyɛ “ɔbenfo” no susuw sɛ ɛyɛ afifide koro no. Germani nyansahufo H. J. Heinz kyerɛkyerɛ mu sɛ: “Wɔ ne nyinaa mu no, nnɛyi nnua ho adenimfo kyerɛ nsonsonoe a ɛda emu biara ntam denam sɛnea ɛte no so titiriw . . . [bere a Hamuni] tie ne hua, ne nkate, sɛnea ani te ne nea ɛkeka ho.”

Ɔhamuni no yɛ ɔbɔmmɔfo kɛse nso. Nea edi kan no, odi mmoa kuw bi akyi na ɔpaw nea ɔpɛ wɔ mu. Ɔwea wɔ n’abatwɔw ne ne nankoroma anim, ɔbɛn no sɛnea obetumi na afei ogyae agyan a bɔre wɔ ano no mu. Mmoakuw no guan ntɛm ara, nanso Mamuni no kɔ so ara dinea ɔtow no no akyi. Bere a Alf Wannenburg ahu sɛnea wɔyɛ ha mpɛn pii no, ɔkyerɛwee sɛ: “Wɔhyɛ biribiara nsow na wosusuw ho. Sɛnea wotwiw faa sare bi so, faako a wɔn anim kyerɛ a ɛmaa mmabaa bi bui wɔ dua bi ho, sɛnea ɔkwan a wɔnam so no trɛw, ne kɛse ne nea ɛtete saa yɛ nea ne nyinaa da tebea a aboa no anaa mmoakuw no wom adi; faako a wɔn anim kyerɛ, ahoɔhare a wɔde rekɔ ne faako a ebetumi aba sɛ wɔde wɔn anim bɛkyerɛ.” Ɛtɔ bere bi a egye boro da koro ansa na bɔre no aka no yiye, nanso awiei koraa no aboa a wapira no hwe ase na nea ɔretiw no no bɛto no.

Ade So Korafo ne Adufrafo

Esiane sɛ asase no kyerɛ nkwa ma wɔn nti, Ahamufo no anya obu ama. Enti sɛ wɔrepɛ aduan a, wɔhwɛ yiye sɛ wɔrentu ase wɔ baabi ansa na wɔakɔ wɔn anim. Esiane sɛ wogye di sɛ Ɔbɔadeɛ no bɛtwe wɔn aso sɛ wɔakum aboa bi wɔ ɔkwan a ɛho nhia so nti, wɔnyɛ ha mfa nni agoru. Bere bi Ahamufo kuw bi kohuu mmerebuw bi a sohori nkesua a ɛyɛ aduan kɛse ma wɔn ne afei nso biribi a wɔde nsu gu mu no. Nanso wogyaw mmerebuw no wɔ hɔ kosii sɛ wohui sɛ sohori no atow awiei. Afei wɔhwɛɛ nkesua no mu biara yiye na wɔwosow no hwɛe na wɔsan de nea mma wom no too hɔ. Ɛnyɛ nwonwa sɛ ebinom ka Hamuni no ho asɛm sɛ “ade so korafo a ɔsen biara wɔ wiase”!

South Africa Ahamufo no suaa sɛnea “wɔbota” wɔn ho sɛnea ɛbɛyɛ a ɔwɔ ka wɔn a ɛrentumi wɔn. Woso ɔwɔ a wawu no atiko na wɔde ne sẽ no twerɛw wɔn nsa ho nkakrankakra.Afei wonya bɔre kakra fi ne se no mu na wɔde srasra faako a ɛhɔ awerɛwerɛw no. Anitew kwan a ɛte saa ara so na wɔfa nyaa aduru a wɔde ko tia Cape gyata a ɔyɛ nnam no. Awiei koraa no aborɔfo a wɔbɛtraa hɔ no tɔree gyata a woyɛ keka yi ase. Nanso Ahamufo no tumi traa wɔn mu mfehaha pii. Dɛn na ɛma wotumi yɛ saa? Biribi a na wɔhyew wɔ ogya mu a ɛma gyata no guan!

Kɔ a Wɔbɛkɔ So Atra Ase Daakye Ho Anidaso!

Ɛnnɛ Ahamufo bɛyɛ 55,000 te Kalahari no ne n’ahye so. Nanso wɔn asetra sɛ abɔmmɔfo ne nneɛma anoboaboafo no ho aba asɛm. Woatutu ntokuru ahorow a wonya nsu wom ma anantwi. Ahamufo no nso agye nsu a ɛwɔ hɔ daa yi atom, nanso biribi a enye bi wɔ hɔ. Encyclopaedia Britannica kyerɛkyerɛ mu sɛ: “Europafo ne Bantufo a wɔyɛn anantwi no atu Ahamufo a wɔwɔ hɔ nnɛ no mu fã kɛse no ara afi wɔn asase so. Wɔn a wɔyɛn anantwi a wɔbaa hɔ no ama wuram mmoa ne afifide a wodi a wonya no so atew.”

Kalahari a Hamuni no tumi traa so bere bi no redan anhweatan ntɛmntɛm. Sir Laurens Van der Post kae yɛn sɛ: “Kan no na ɛnyɛ anhweatan. Yɛfrɛɛ no saa esiane sɛ na nsu nni asase no ani nti. Ná mmoa ne afifide ahorow pii wɔ so.” Enti Van der Post di awerɛhow wɔ Hamuni no nsɛm a ɛyɛ yaw yi ho, efisɛ “na ɔyɛ ɔdefo wɔ nneɛma a yɛyɛ ahiafo wom no mu. . . . Wɔ awosu mu no na ɔyɛ bɔkɔɔ. Na biribiara nhia no wɔ asetra mu.” Yiw, ɛwom sɛ na bere bi obu Ahamufo no sɛ nnipa a wogu nwuram de, nanso ɛsɛ sɛ nnɛyi nnipa gye nokwasɛm no tom mprempren sɛ ɔwɔ pii sua fi ɔkokodurufo a wakɔ so atra ase yi nkyɛn.

Afei Ahamufo no hyia ɔhaw foforo a ɛfa tra a wɔbɛkɔ so atra ase sɛ abusua no ho: Apuei Famfo amanne a ɛtwetwe wɔn no. Sɛ́ faako a wɔbɛkɔ so atra ase sɛ nnipa a wɔda nsow akodu no yɛ nea yennya nhui. Ebia eyi bɛyɛ asɛm a emu yɛ den sen biara ma nea wakɔ so atra ase wɔ tebea a emu yɛ den mu wɔ Afrika no.

[Ase hɔ nsɛm]

[Box on page 28]

“Saa Araa na Ɛsɛ sɛ Ɛyɛ”

Yehowa Adansefo abɔ mmɔden sɛ wɔbɛka wɔn anidaso a ɛfa trenee Nhyehyɛe Foforo wɔ Onyankopɔn akwankyerɛ ase no ho asɛm akyerɛ wɔn mfɛfo Ahamufo a wɔwɔ Afrika kesee fam no. (Adiyisɛm 21:3, 4) Anyɛ yiye koraa no, Hamuni biako a wɔfrɛ no Johannes gyee wɔn asɛm no toom​—ɛwom sɛ nsamanwaw kum no akyiri yi de. Nanso, bepɔw so hamuni a “otwa to,” Japie Mabinde a ɔwɔ benkum so ha no nso anya hokwan ate Bible mu asɛm no.

Wɔ 1984 mfiase mu hɔ no, Yehowa Adansefo ne no kasae. Wɔde asɛm a ɛwɔ Yohane 5:28, 29 no kyerɛɛ no wɔ Zulu Bible no mu na wɔkaa anidaso a ɛwɔ hɔ sɛ obehu n’abusua no mufo a wɔawuwu a wɔbɛsan aba wɔ owusɔre mu no ho asɛm kyerɛɛ no. Owura Mabinde kae sɛ: “M’ani agye kɛse, efisɛ ɛyɛ Bible no na ɛka saa.” N’ani gyei titiriw bere a wɔde mfonini a ɛfa Paradise tebea horow a Bible no hyɛ kɔm sɛ da bi ɛbɛba asase nyinaa so no kyerɛɛ no no. Ɔkae sɛ, “Yiw, saa na ɛsɛ sɛ ɛyɛ.”

[Kratafa 27 mfoni]

Ahamufo abusua tratra gya ho wɔ wɔn fi wɔ Kalahari anhweatan no so

[Asɛm Fibea]

By courtesy of the Africana Museum