Ɔsono Ani Atew Dɛn?

JIM Williams a ɔyɛ mmoa ho ɔdenimfo bi no kyerɛwee wɔ ne nhoma Elephant Bill mu sɛ “Minnye nni sɛ ‘ɔsono werɛ mfi ade da’” Ne nyinaa akyi no, Jim kyerɛ obu kɛse ma saa mmoa akɛse a na nnua adwumakuw bi a ɛwɔ Burma a na ɔyɛ adwuma wɔ hɔ no de wɔn yɛ adwuma no anitew. Ohui sɛ wobetumi akyerɛkyerɛ ɔsono ma wagye ahyɛde ahorow a wɔde ano ma 24 ne ahyɛde ahorow a wɔde ma komm a ne sotefo no de ne nipadua na ɛka kyerɛ no no so. Asɛm a edi so yi fa ɔsono bi a wɔfrɛ no Bandoola ne ne Burmani sotefo a wɔfrɛ no Po Toke no ho:

“Na ɛyɛ Po Toke anigye ara kwa sɛ ɔde Bandoola tumi bɛkyerɛ . . . Ɔde nneɛma ahorow du guu n’anim​—abonnua, ɔwan, nkɔnsɔnkɔnsɔn ahorow abiɛsa, asae, ne nea ɛkeka ho.

Ɔde Burma kasa kae sɛ: “‘Fa ɔwan no ma me.’

“Bandoola hwehwɛɛ nneɛma a wɔde agu hɔ no mu na ntɛm ara ɔde ne mfare maa ɔwan no so de maa Po Toke.

“Ɔkae sɛ: ‘Eye, fa to fam. Afei fa asae no ma me.’ Wantwentwɛn ne nan ase koraa na ɔmaa eyi nso so; na afei ɔde nneɛma a aka no nyinaa mae a wanyɛ mfomso biara.

“Po Toke kae sɛ: ‘Woyɛ ɔbarima fɛfɛ a ɔso,’ na ɛte sɛ nea Bandoola faa no sɛ nkamfo sɛnea na ɛte ampa no.

“Afei Po Toke sian faa ɔsono no ti so sii fam, ɔsoo nkɔnsɔnkɔnsɔn bi ti na ɔka kyerɛɛ Bandoola sɛ ɔmmɔ no pɔw. Ɔde ahoɔden kɛse yɛɛ eyi, de ne mfare kyinkyim no bɔɔ no pɔw bi a ɔdesani nsa biara rennya ahoɔden a ɛde besian. Nanso bere a wɔka kyerɛɛ Bandoola sɛ onsian no, ɔyɛɛ saa te sɛ nea ɛyɛ hama sin bi. Treve [Williams babarima] ani gyei.

“Po Toke de ahohoahoa kae sɛ: ‘Oo, obetumi ayɛ nea ɛsen saa. Mo de mommra mmɛhwɛ nea obetumi de ayɛ dua’

“Ɔtraa no so de no nantew kakraa bi kɔɔ faako a nnua bi a ennyinii sisi. Saa bere yi de odii ahyɛde ahorow no nyinaa so a wɔamfa ano na ɛkae​—na atɛ ne abaa biara nka ho​—ne kafo no srɛ a ɔde ka aboa no kɔn ho ne ne kokorobeti a ɔde ka n’aso akyi nkutoo.

“Bere biara no, Po Toke daa nea ɔrebɛma Bandoola ayɛ no adi kyerɛɛ yɛn, afei ɔkaa nea ɔhwehwɛ no kyerɛɛ aboa no a ne tumi a ɔde yiyi nneɛma mu no yɛ nwonwa no komm. Ɔkɔ benkum​—ɔkɔ nifa​—ɔde ne ti kɔ akyiri​—ɔde ne ti kɔ fam​—obu baa bi​—ɔka dua bi to fam​—otu dua bi a ɛrefifi, anaasɛ ɔbɔ dua bi a ɛrefifi ho ban ara kwa.”​—Efi The Footprints of Elephant Bill a Susan Williams kyerɛwee no mu.

Su ahorow bɛn na wohia wɔ ɔsono a wɔbɛtete no ma watumi ayɛ ade saa no mu? Atirimɔden anaasɛ ayamye? Ɔkyerɛwfo a wɔabɔ ne din wɔ atifi hɔ no kyerɛkyerɛ mu sɛ: “Esiane sɛ ɔsono osetie gyina ɔdɔ so kɛse nti, ɛsɛ sɛ wɔtete no bɔkɔɔ ne wɔ ayamye kɛse mu.”

Ɛsɛ sɛ ntetee no fi ase bere a aboa no sua nso. Bandoola ntetee no fii ase wɔ n’afe a ɛto so asia mu. Nea edi kan no wɔde no dii dwuma ma ɔboaboaa nneɛma ano, na bere a odii mfe 20 no nkutoo na wosusuwii sɛ wanyin sɛnea obetumi ayɛ adwuma a emu yɛ duru a ɛne sɛ ɔbɛma nnua so. So ntetee a egye boasetɔ saa no fata? Ɛda adi sɛ ɛte saa. Ɔsono a wanyin betumi atwe nnua a emu yɛ duru bɛyɛ mfe 35. Nnɛyi akwantu mfiri ahorow no mu ahe na ebetumi akyɛ bere tenten saa?