Wotu Kɔ Puerto Rico

WƆ MAY 9, 1993 no, Spania Nsɛm Asekyerɛ Dwumadibea adwumayɛfo 20 tu fii Yehowa Adansefo wiase nyinaa adwumayɛbea ti a ɛwɔ Brooklyn, New York, no kɔɔ Ɔwɛn Aban Asafo no Puerto Rico baa dwumadibea foforo a ɛwɔ Guaynabo no. Dɛn nti na wotui? Yehowa Adansefo adwumayɛbea ti nhoma akyerɛwfo no biako a asɛyɛde hyɛ ne nsa kyerɛkyerɛ mu sɛ: “Yɛahu sɛ nsɛm asekyerɛfo tumi yɛ adwuma pa bere a wɔte beae a wɔka kasa a wɔkyerɛ nsɛm ase kɔ mu da biara no. Afei nso, wohu kasa no mu nsakrae foforo biara. Wɔapaw Puerto Rico sɛ baabi pa ma wɔn a wɔka Spania kasa nyinaa.”

Spania Nsɛm Asekyerɛ Dwumadibea no wɔ Brooklyn, New York, fi 1928, na adi dwuma titiriw wɔ Ahenni nkrasɛm a wɔtrɛw mu no mu denam sɛnea ɛboa nnipa bɛyɛ 350,000,000 a wɔka Spania kasa wɔ wiase nyinaa ma wɔn nsa ka Bible nhoma no so. Wofii ase kyerɛɛ Ɔwɛn-Aban no ase kɔɔ Spania kasa mu wɔ 1917 mu. Ɛnnɛ, wotintim Ɔwɛn-Aban no mfuamfua bɛyɛ 5,000,000 ne Nyan! mfuamfua bɛyɛ 3,000,000 wɔ Spania kasa mu ɔsram biara. Wɔ nnansa yi mfe mu no, Ɔwɛn Aban Asafo no Spain baa dwumadibea no aboa adwuma yi yiye, titiriw wɔ Nyan! nsɛmma nhoma no asekyerɛ mu. Yehowa Adansefo a wɔka Spania kasa a wɔboro 1,100,000 na wɔwɔ wiase nyinaa, na wɔbɛyɛ Yehowa Adansefo a wɔwɔ wiase nyinaa no mu ɔha biara mu nkyem 25. Atubrafo ɔpedudu pii a wɔresom wɔ nsase a wɔnka Spania kasa wɔ so te sɛ Australia, Germany, Sweden, ne United States nyinaa ka saafo no ho.

Mfaso foforo nso wɔ adan akɛse a ɛyɛ foforo a wɔatu akɔ mu wɔ Puerto Rico no so. Ɛma kwan ma nsɛm asekyerɛfo ne wɔn a wɔhwɛ nsɛm a wɔakyerɛ ase no mu a wɔwɔ aman ahorow te sɛ, Colombia, Mexico, Puerto Rico, Spain, ne Venezuela nya hokwan hyia wɔ faako na ama Asafo ti no nhoma ahorow a ɛwɔ Spania kasa mu no akɔ so ayɛ dɛ. Eyi bɛboa ma wɔde nsɛm a emu da hɔ na ɛfata aka Ahenni nkrasɛm no akyerɛ wɔn a wɔka Spania kasa wɔ wiase nyinaa no. Yɛhwɛ kwan sɛ Yehowa behyira nhyehyɛe foforo yi so.