Asɛmpa a Wobɛka Akyerɛ—Bere a Woanya Adwuma Mu Akwamma
1 Ɔmantam nhyiam horow no fi ase ɔsram yi na ɛtoa so kosi September mfiase. Eyi yɛ ade biako nti a ɛsɛ sɛ adawurubɔfo dodow no ara yɛ nhyehyɛe na wogye akwamma wɔ wɔn adwuma mu no. So wubenya adwuma mu akwamma ɔsram yi anaa ɔsram foforo bi? Wode wo bere bedi dwuma dɛn?
ASƐNKA ADWUMA A WƆYƐ NO KƐSE
2 Wɔ akwamma bere mu no, yɛtaa nya kwan de yɛn bere yɛ nea yɛpɛ, so ɛnte saa? Yebetumi anya kyɛfa kɛse wɔ Ahenni no ho asɛmpaka no mu. Wususuw nkurɔfo ho, na wowɔ ɔpɛ sɛ wobɛyɛ ho biribi. Akwamma bere betumi ama woanya saa hokwan no. (Marko 1:40, 41) So wowɔ nnipa bi a woanto wɔn wɔ fie a ɛsɛ sɛ wosan kɔhwɛ wɔn? So wowɔ anigyefo bi a wonkɔɔ wɔn nkyɛn nnansa yi? So w’akwamma bere no bɛma woanya hokwan ayɛ sankɔhwɛ ahorow foforo na ebia woafi Bible adesua ase? So woreyɛ nhyehyɛe sɛ wobɛyɛ akwampaefo boafo wɔ w’akwamma bere no mu? Sɛ saa a, so wobɛto nsa afrɛ adawurubɔfo afoforo ma wɔne wo ayɛ adwuma? Eyinom nyinaa yɛ hokwan ahorow a yɛde bɛkyerɛ sɛ yesusuw nnipa afoforo ho ampa, na ama yɛanya asɛnka adwuma mu kyɛfa kɛse.
BƆNNƆ SO ADANSEDI
3 Bere a yɛwɔ akwamma no, sɛ ɛyɛ nea yɛretu kwan anaa yɛregye yɛn ahome no, yɛtaa nya bɔnnɔ so adansedi ho kwan ahorow fɛfɛ pii. So wofa saa kwan yi so ka asɛmpa no kyerɛ afoforo? Anaa so eyi yɛ ɔsom adwuma no fã a wubetumi anya mu kyɛfa kɛse‘? (Yoh. 4:7-9, 23) Wɔn a wotumi di adanse bɔnnɔ so no kyerɛ sɛ ɛboa ma wunya adamfofa su na wunya onipa no ho anigye ankasa. Afei nso nea wobɛka a wubedi kan asusuw ho boa ma wunya ahotoso na ɛma wutumi kasa kyerɛ afoforo yiye.
4 Bere a wɔretu kwan no, anuanom pii ne afoforo fi nkɔmmɔbɔ ase. Afei wɔ nkɔmmɔbɔ no mu no wobisa tiawa sɛ, “Wobɛpɛ sɛ wokenkan biribi anaa?” Sɛ wɔka sɛ yiw a, wɔtoa so sɛ: “Mekenkanee biribi a ɛyɛ anigye yiye wɔ nsɛmma nhoma yi mu. [Wɔde asɛm no kyerɛ, ka ho asɛm a ɛfata.] Makenkan awie. Sɛ wopɛ sɛ wokenkan a, wubetumi ayɛ saa.” Wɔayɛ eyi de nsɛmma nhoma a ayɛ dedaw no ama bɔnnɔ so. Ebia nnipa binom ani begye ho sɛ wobetua foforo a aba no ho ka bere a wɔde ma wɔ ɔkwan a ɛte saa so no. Mpɛn pii wɔn a wɔpow nsɛmma nhoma a wode ma no begye nkratawa a wode rema wɔn kwa no.
5 Bere a wɔredi adanse bɔnnɔ so no, ebinom ahu sɛ eye sɛ wɔbɛda wɔn ho adi sɛ Yehowa Adansefo na wɔabisa sɛ, “Wote nka dɛn wɔ Bible no ne nea ɛkyerɛkyerɛ no ho?” Eyi taa bue kwan ma nkɔmmɔbɔ a ɛyɛ anigye. Sɛ bere nyinaa wowɔ nkratawa, nsɛmma nhoma anaa nhoma a yɛde rema no kakra a, ebia wubenya hokwan ahorow pii na wode ama afoforo.
ABUSUAFO A WODI WƆN ADANSE
6 Mpɛn pii yɛn abusuafo a wonnye nni no nim sɛ yɛyɛ Yehowa Adansefo. Ebia wɔbɛpɛ sɛ wohu yɛn gyidi anaa dwumadi ahorow no mu nanso wɔbɛtwentwɛn wɔn nan ase sɛ wobebisa efisɛ wɔmpɛ sɛ ‘wobɛka bi akyerɛ wɔn’ anaa wɔne wo bɛbɔ ɛno ho nkɔmmɔ tenten. Anuanom binom atumi adi nsɛm ho dwuma denam asɛm biako pɛ a wɔbɛka afa nokware no ho na afei wɔama obusuani no kwan na sɛ ɔpɛ a watoa nkɔmmɔbɔ no so no so. Sɛ nhwɛso no, ebia wubetumi akyerɛ faako a wo ne w’abusua no kɔɔ nhyiam afe yi no. Wubetumi de Asafo nhoma ahorow no biako akyerɛ. Anaa, ebia asɛm bi a wobɛka afa wiase tebea horow no ho, nneɛma bo kɔ a ɛrekɔ soro anaa abusua mu ɔhaw bi bebue kwan ama nkɔmmɔbɔ foforo ne Onyankopɔn Ahenni no ho adansedi. Abusuafo taa tie mmofra nkumaa.
7 Bere a yɛde nnam ka asɛmpa no na yɛbɔ mmɔden sɛ yɛbɛkasa bere a ɛsɛ mu no, ɛho hia sɛ yɛde nhumu di dwuma na yesusuw afoforo ho bere nyinaa. Kae hia a ɛho hia sɛ wubeyi adamfofa su adi na woakyerɛ onipa no ho anigye ankasa no.—Mmeb. 15:23; 1 Pet. 3:15.
8 Adwuma mu akwamma nna ba na ɛsã ntɛmntɛm. Wɔ Yehowa nkurɔfo fam no, nea ɛka nneɛma ahorow a wɔkae kɛse ho taa yɛ osuahu a ɛyɛ anigye a wonya fii bere a wɔde dii Ahenni no ho adanse mu no. Ka yɛn dɔ Nyankopɔn ne n’Ahenni nniso no ho asɛm kyerɛ afoforo. Bere a woyɛ saa no, hwɛ Yehowa kwan sɛ obehyira wɔ mmɔdenbɔ no so.