Awake! Soronko Bi a Yɛde Bɛma wɔ September Mu
1 Ɛkame ayɛ sɛ obiara ani gye nnomaa su ne sɛnea owia tɔ ho. Nanso, nnipa pii nnye ntom sɛ yɛn soro Agya bi a ɔwɔ ɔdɔ na ɔbɔɔ eyinom. Yebenya hokwan titiriw de Awake! soronko bi ama nkurɔfo de adi adanse sɛ Yehowa ne Ɔbɔadeɛ. (Yes. 40:28; 43:10) September Awake! no mu nsɛm nyinaa bɛkyerɛkyerɛ asɛmti a ɛkyerɛ sɛ “So Ɔbɔadeɛ Bi wɔ Hɔ?” mu.
2 Wɔ Asasesin no Mu: Sɛ ɛbɛyɛ yiye a, yɛ nhyehyɛe na wo ne asafo no nyɛ afie afie asɛnka Memeneda biara. Wubetumi de Awake! soronko no ama bere biara wɔ dapɛn no mu nso. Ɛda adi sɛ akyerɛkyerɛfo ne nhomasua ho adwumayɛfo afoforo ani begye nsɛmma nhoma yi ho kɛse. Enti, mubetumi ayɛ nhyehyɛe titiriw akɔ saafo a wɔwɔ mo asasesin mu no nkyɛn.
3 Sɛ obi kyerɛ ho anigye a, bisa no asɛm bi a sɛ wosan kɔ ne nkyɛn a wubebua. Sɛ nhwɛso no, wubetumi abisa nea enti a Ɔbɔadeɛ a ɔwɔ ɔdɔ no ama kwan ma amanehunu pii kɔ so. Afei, sɛ wosan kɔ ne nkyɛn a, wubetumi de Bible Kyerɛkyerɛ nhoma no ti 1 anaa ti 11 akyerɛ no. Anaasɛ wubetumi abisa asɛm bi afa nea enti a Ɔbɔadeɛ no bɔɔ asase no ho, na moasusuw ti 3 no ho bere a woasan akɔ ne nkyɛn no.
4 Wɔ Sukuu Mu: Sɛ woyɛ sukuuni a, dɛn nti na womfa Awake! soronko yi bi nkyɛ w’akyerɛkyerɛfo ne wo mfɛfo sukuufo? Sɛ wode biako pɛ mpo to wo pon so a, ebetumi ama wɔabisa nsɛm afa yɛn gyidi ho. Eyi betumi ama woanya hokwan de emu nsɛm no adi dwuma bere a worekyerɛkyerɛ wo gyidi mu wɔ sukuu mu ne bere a ɛsɛ sɛ wokyerɛw biribi ho asɛm no. “Mmofra Bisa Sɛ” afa hɔ asɛmti a ɛkyerɛ sɛ “Mɛyɛ Dɛn Akyerɛkyerɛ Nea Minim Wɔ Adebɔ Ho Mu?” no bɛboa wo.
5 Esiane nneɛma a Yehowa abɔ nti, ɛfata sɛ yedi no ni na yɛhyɛ no anuonyam. (Adi. 4:11) Yɛnam September Awake! no a yɛde bɛma afoforo no so betumi ahyɛ Ɔbɔadeɛ no anuonyam na yɛaboa wɔn ma wɔayɛ saa ara.