Yehowa Da No Abɛn

¹ Kristofo retwɛn Yehowa da a ɛreba no denneennen. Ɛno mu na ɔbɛsɛe wiase nhyehyɛe a ɛwɔ hɔ yi na ɔde wiase foforo a trenee bɛtra mu aba. (2 Pet. 3:12, 13) Esiane sɛ yennim bere pɔtee a saa da no bɛba nti, ɛsɛ sɛ yɛkɔ so wɛn na yɛboa afoforo ma wɔn nso wɔwɛn. (Hes. 33:7-9; Mat. 24:42-44) Yesusuw Onyankopɔn nkɔmhyɛ Asɛm ho a, ɛbɛhyɛ gyidi a yɛwɔ sɛ ‘Yehowa da kɛse no abɛn’ no mu den.—Sef. 1:14.

² Wiase Tumidi a Edidi So: Sɛnea wɔakyerɛw wɔ Adiyisɛm 17:9-11 no, ɔsomafo Yohane kaa “ahemfo baason” a wɔyɛ wiase tumidifo baason a wobedidi so aba ho asɛm. Yohane kaa “ɔhene a ɔto so awotwe” a ogyina hɔ ma Amanaman Nkabom no nso ho asɛm. Ɛsɛ sɛ yɛhwɛ wiase tumidifo afoforo bi nso kwan? Dabi, efisɛ nkɔmhyɛ no kyerɛ sɛ ɔhene a ɔto so awotwe yi ‘kɔ ɔsɛe mu,’ a ɛnka asase so ahemfo foforo biara ho asɛm bio. Saa nkɔmhyɛ yi ma wuhu baabi a yɛadu?

³ Daniel 2:31-45 boa ma yehu sɛnea Yehowa da no bɛba. Wɔ saa nkɔmhyɛ no mu no, ohoni kɛse a Nebukadnesar soo dae hui no gyina hɔ ma wiase tumidi ahorow a ebedidi so aba no. Saa tumidi yi mu biara aba dedaw. Tumidi no mu nea ɛwɔ he na ɛredi tumi nnɛ? Yɛwɔ bere a ohoni no nan twa ho mfonini no mu. Nkɔmhyɛ no kyerɛ nea ɛbɛtoa so aba no mu pefee. Wɔbɛsɛe nnipa nniso pasapasa ma “ahenni a wɔrensɛe no da” abesi ananmu. Eyi ma wutumi hu sɛnea Yehowa da no abɛn afa?

⁴ Adanse Foforo: Yɛde yɛn ani hu adanse foforo a ɛkyerɛ sɛ Yehowa da no abɛn. Yehu suban a nnipa ada no adi wɔ “nna a edi akyiri” yi mu ma enti ɔsomafo Paulo nkɔmhyɛ no abam no. (2 Tim. 3:1-5) Afei nso adanse a ɛsɛ sɛ yedi wɔ wiase nyinaa ansa na awiei no aba no rekɔ so. (Mat. 24:14) Momma yɛnkɔ so nyɛ yɛn asɛnka adwuma no ntɛmso sɛnea ɔbɔfo a ɔkaa eyi yɛe no: “Munsuro Nyankopɔn na monhyɛ no anuonyam, efisɛ bere a ɔde bebu atɛn no adu.”—Adi. 14:6, 7.

Ɔfã 9—Bible Adesua a Etu Mpɔn a Yɛbɛyɛ

Kyerɛkyerɛ Asuafo Ma Wonni Adanse Bɔnnɔ So

¹ Bere a Andrea ne Filipo behui sɛ Yesu ne Mesia a wɔahyɛ ne ho bɔ no, wɔamfa anigyesɛm no ansie na mmom wɔkaa ho asɛm kyerɛɛ afoforo. (Yoh. 1:40-45) Saa ara na ɛte nnɛ. Sɛ Bible asuafo fi ase gye nea wɔresua no di a, ɛka wɔn ma wɔka ho asɛm. (2 Kor. 4:13) Yɛbɛyɛ dɛn ahyɛ wɔn nkuran akyerɛkyerɛ wɔn ma wɔadi adanse yiye wɔ bɔnnɔ so?

² Wubetumi abisa osuani no tiawa sɛ ebia waka nea wasua afi Bible mu no ho asɛm akyerɛ afoforo anaa. Ebia nnamfonom ne abusuafo bi wɔ hɔ a obetumi afrɛ wɔn abɛka n’adesua no ho. Bisa no sɛ ebia ne mfɛfo adwumayɛfo, sukuufo, anaa amannifo bi akyerɛ asɛmpa no ho anigye a. Ɔnam saa akwan yi so betumi afi ase adi adanse. Boa no ma onhu hia a ehia sɛ ɔde nhumu, obu ne ayamye ka Yehowa Nyankopɔn ne n’atirimpɔw ho asɛm kyerɛ afoforo no.—Kol. 4:6; 2 Tim. 2:24, 25.

³ Wɔn Gyidi Ho Adansedi: Ɛho hia paa sɛ yɛtete Bible asuafo ma wɔde Onyankopɔn Asɛm di wɔn gyidi ho adanse. Sɛ mudu adesua no afã bi so a, bisa osuani no sɛ: “Wobɛyɛ dɛn de Bible no akyerɛkyerɛ nokwasɛm yi mu akyerɛ w’abusuafo?” anaasɛ “Bible mu asɛm bɛn na wode besi asɛm yi so ama w’adamfo bi?” Tie ne mmuae no yiye na kyerɛ no sɛnea ɔde ne nkyerɛkyerɛ begyina Kyerɛwnsɛm no so. (2 Tim. 2:15) Wonam saa kwan yi so besiesie osuani no ma wadi adanse bɔnnɔ so, na sɛ ɔbɛfata a, ɔne asafo no abom ayɛ asɛnka adwuma no.

⁴ Nyansa wom sɛ wubesiesie Bible asuafo ma wɔatumi agyina ɔsɔretia ano. (Mat. 10:36; Luka 8:13; 2 Tim. 3:12) Sɛ ebinom ka Yehowa Adansefo ho nsɛm anaa wobisa nsɛm bi a, ebue hokwan ma asuafo no sɛ wobedi adanse. Yehowa Adansefo—Wɔyɛ Henanom? Wɔn Gyidi Ne Dɛn? nhomawa no betumi aboa wɔn ma ‘wɔayɛ krado sɛ wɔde anoyi bɛma.’ (1 Pet. 3:15) Wɔn a wɔyɛ foforo betumi de emu nokwasɛm aboa wɔn nnamfonom ne abusuafo a wokura adwempa no ma wɔate yɛn gyidi ne yɛn nnwuma a egyina Bible so no ase.