SƐNEA WUBEGYINA ADWINNWEN ANO
Bere Bi Bɛba a Adwinnwen Befi Hɔ
Afotusɛm a ɛwɔ Bible mu no betumi aboa yɛn na yɛankɔfa adwinnwen pii ammegu yɛn ho so. Yɛyɛ nnipa yi de, yɛn ankasa rentumi nyi nneɛma a egyaw yɛn adwinnwen no nyinaa mfi hɔ. Nanso, yɛn Bɔfo no de, obetumi ayi afi hɔ. Wapaw obi mpo sɛ ɔmmɛboa yɛn. Ɔno ne Yesu Kristo. Bere a na Yesu wɔ asase so no, ɔyɛɛ anwonwade bebree, na ɛrenkyɛ, ɔbɛyɛ nea ɛsen saa koraa wɔ wiase nyinaa. Nea ɔbɛyɛ no bi ni:
YESU BƐSA AYAREFO YARE, SƐNEA ƆYƐE BERE A NA ƆWƆ ASASE SO NO.
‘Wɔde wɔn a nyarewa ahorow ama wɔreteetee nyinaa brɛɛ no, na ɔsaa wɔn yare.’—MATEO 4:24.
YESU BƐMA NNIPA NYINAA ANYA ADAN ATENA MU NA WƆANYA ADUAN ADI.
“[Wɔn a Kristo bedi wɔn so no besisi] adan atena mu na wɔayeyɛ bobe nturo adi mu aba. Wɔrensi mma obi mmɛtena mu, na wɔrennua mma obi nni.”—YESAIA 65:21, 22.
YESU AHENNI BƐMA ASOMDWOE NE DWOODWOO ABA WIASE NYINAA.
“Ne bere so, ɔtreneeni bɛyɛ frɔmfrɔm, na ɔsram da so wɔ hɔ yi, asomdwoe bebu so. Obenya ɔmanfo fi po ano akosi po ano, ne asubɔnten kɛse no so akosi asase ano. . . . Mfutuma na n’atamfo bɛtaforo.”—DWOM 72:7-9.
YESU BEYI NSISI AFI HƆ.
“Ɔbrɛfo ne ohiani asɛm bɛyɛ no mmɔbɔ, na obegye ahiafo kra nkwa. Obegye wɔn kra afi nhyɛso ne atirimɔdensɛm mu.”—DWOM 72:13, 14.
YESU BEYI AMANEHUNU NE OWU MPO AFI HƆ.
“Owu nni hɔ bio, na awerɛhow ne osu ne yaw nso nni hɔ bio.”—ADIYISƐM 21:4.