Ku Aroma
12 Hino hama, ndinomudeketererai no usisi wa Mwari, kuti mupase mwiri wenyu hinga cibairo cipenyu, cakacena uye cinotenderhwa na Mwari, meciita basa cena meciseenzesa ndangariro dzenyu. 2 Uye siyai kuteedzera zviro zvinoizwa nge anhu e nyika ino,* asi tenderai kuti Mwari acinje marangariro enyu, kuitira kuti muziye mwega kuda ka Mwari kakanaka, kunomupfadza uye kakakwana.
3 Ngokuti nge ndaa ye nyasha dza Mwari dzandakapangidzirhwa, ndinobvunza munhu wese ari pakati penyu kuti asiye kurangarira nge zvake kudarika zvaanodikana kurangarira, asi kuti arangarire zvinopangidza kuti uno marangariro akanaka, zvecienderana no mudida we kutenda wakapaswa* munhu umwe na umwe na Mwari. 4 Ngokuti kuita hinga mwiri uno nhengo dzakawanda, asi nhengo dzakhona dzisikaiti mabasa amwewo, 5 isusuwo, tiri mwiri umwe basi mu rubatano na Kristu, asi umwe na umwe wedu i nhengo yakabatana no dzimweni. 6 Tino zvipo zvakasiyana-siyana maererano no nyasha dzatakapaswa; hino kana tino cipo ce kuphorofita, ngatiphorofite maererano no kutenda kedu; 7 kana ciri cipo ce kuseenzera amweni, ngatiseenzere; uya akapaswa cipo ce kufundisa, ngaafundise; 8 uya akapaswa cipo ce kubambisa amweni, ngaabambise; uya anopa,* ngaazviite no mwoyo wese; uya anotungamirira, ngaazviite no simba rese; uya anozwira usisi amweni, ngaazviite ecipfara.
9 Musagare no rudo ro kucengedzera. Zondai zvakashata; batisisai zvakanaka. 10 Pa rudo renyu hinga hama dananai no mwoyo wese. Pa kureremedzana, umwe na umwe wenyu ngaatange ndiye. 11 Senzai no simba, musaite nungo. Pipirai mu mwiya.* Seenzerai Djehovha* hinga aranda. 12 Pfarai pa kariro. Shingirirai pamunotambudzika. Rumbwai meciita munamato. 13 Rumbwai mecipasa anhu a Mwari* zviya zvaari kukonerhwa. Rumbwai mecitambira arendo zvakanaka. 14 Kumbirai Mwari kuti akomborere aya anomuteererai; musaatuke. 15 Pfarai no aya anopfara; cemai no aya anocema. 16 Onai amweni hinga maonero amunodziita; musagare mecirangarira zviro zvikuru, asi tungamirirhwai no zviro zvidoko. Musadzione hinga makangwara.
17 Musahwirinzirane cakashata no cakashata. Psvakai kuitira zvakanaka anhu ese. 18 Kana zvecikwanisika, itai zvese zvamunokwanisa kuti mugare mu runyararo no anhu ese. 19 Hama dzangu, musahwirinzirane cakashata no cakashata, asi siyai kuti Mwari apangidze shungu dzake ku anhu akashata mwoyo; ngokuti zvakatarhwa kuti: “‘Kuhwirinzira nge kangu; inini ndicahwirinzira,’ anodaro Djehovha.”* 20 Asi “kana muzondi wako ano nzara, mupase zvekurhya; kana ano mukaha, mupase mvura yo kumwa; ngokuti kana ukaita kudaro, unozounganidza masimbe ano muriro pamusoro pake.”* 21 Usasiye wecinyiswa ngo zvakashata, asi rumbwa wecinyisa zvakashata ngo zvakanaka.