Agosto

Pisarema ii inopanganidza ngezve mafundo maiiri anokosha: (1) Anatsi anosonganawo no matambudziko. (2) Djehovha anotisudzunura mu matambudziko edu. Asi Djehovha anozviita kudini? Mushobo we kuita izvona nge we kutibetsera kuti tigare no maonero e cokwadi mu nyika ino. Djehovha anotigondesa kuti ticaona mupfaro wakakura nge kumuseenzera, kunyazi zvakadaro iyena aatigondesi kuti upenyu ucagara usina matambudziko. (Isa. 66:14) Djehovha anotikohomedzesa kuti tikande ndangariro dzedu mune ramangwana—nguwa yekuti ticagara no upenyu waaida katiri, upenyu unopfadza uye nokusikaperi. (2 Ako. 4:16-18) Dakara ikona, Djehovha acatibetsera kuti tirumbwe tecimuseenzera zuwa no zuwa. (Mari. 3:22-24) Tingafundei no miezaniso ye aseenzi akatendeka a Djehovha e mu nguwa dze Bhaibheri uye e mu mazuwa edu ano? Tingakwanisa kukunda matambudziko atisikakariri. Asi kana tikagonda na Djehovha, iyena acatibetsera.—Pis. 55:22. w23.04 mapaji. 14-15 mandi. 3-4

Tingafunda no miezaniso ya Zuzee na Mariya, awona ainga akagadzirira kuzwira mitemo ye anyautongi kunyazi zveciashuphira. (Ruka 2:1-6) Onai muedzo wekuzwira waakabatana nawo, Mariya paainga anopamwiri. Mutungamiriri we ku Roma waizwi Augustus, wakagadza mutemo wekuti anhu ese ahwirire ku thaundi raakabarirhwa kuti ataririswe. Zuzee na Mariya aidikana kuita rhwendo rekuenda ku Bheterehema, rhwendo rino makirometro anodarika 150. Gwanza rainga rakadzara no matunhu uye miterero. Rhwendo iri rainga risiripi nyore, maka-maka kuna Mariya. Zvinyi zvaizoitika kana akatanga kurhwadziwa ngokuda kubara? Pamweni awona akanetseka maningi nge ndaa ye uthongo wa Mariya no mwana wainga ari mundani, ngekuti iyena ndiye waizogara Mesiya. Izvi zvaizoita here kuti awona atame kuteerera anyautongi? Zuzee na Mariya aazi kusiya kuti anetseke nge zviro zvaaibatana nazvo, awona akapurutana anyautongi. Uye Djehovha akakomborera kuzwira kawo. Mariya wakaguma ku Bheterehema akacengeteka uye wakabara mwana uno uthongo wakanaka uye wakatobetsera kuti umwe we uphorofiti udzadzike!—Mik. 5:2. w23.10 paji. 8 ndi. 9; paji. 9 mandi. 11-12

Asi zvakadini kana mecizwa kuthya ngekundorangarira basi kupasa mhinduro pa musangano? Imwimwi mungakwanisa kugumira rubetso kana mukanyasa kugadzirira. (Zvie. 21:5) Pamucanyasa kuziya zvamucafunda ku misangano, zvicamuitai nyore kuti mupase mhinduro. Cimweni camungaita, nge cekupasa mhinduro dzisikazi kureba. (Zvie. 15:23; 17:27) Imwimwi pamweni amuzogari no shungu kana mukapasa mhinduro isikazi kureba. Pa munopasa mhinduro yakafupika nge masoko enyu kamare, imwimwi mucanyasa kupangidza kuti makanyasa kugadzirira uye kuti mazwisisa kamare zviri kurekethwa ipona. Hino ngatimboti maedza kuseenzesa mazano manganani aya, asi kunyazi zvakadaro imwimwi munogara no shungu pamunonga mecipasa mhinduro! Imwimwi mungagonda kuti Djehovha anokoshesa kupeta masimba kamunoita ke kuita zviya zvamunokwanisa kuita. (Ruka 21:1-4) Kupeta masimba kamunoita azvirei kupasa zvinopindiridza zviya zvamunokwanisa kuita. (Afi. 4:5) Hino itai zvinangwa zvamunokwanisa kudzadzisa uye itai munamato kuna Djehovha mecikumbira mwoyo wakaterama. Pakutanga, cinangwa camunaco pamweni nge cekupasa mhinduro isikazi kureba. w23.04 paji. 21 mandi. 6-8

Muphostori Pauro wakatiezanisa no masurudado akamuka uye akanyasa kugadzirira kuti aende ku hondo. Mu hondo, musurudado unodikana kugara akagadzirira kuti arhwise pa nguwa ipi hayo. Ndizvona zvinoitikawo na isusu. Kuti tigare takagadzirira kuitira zuwa ra Djehovha, tinodikana kusimira cifukidzo ce paditi co kutenda uye ce rudo no kapaseti ye kariro. Cifukidzo ce paditi caidziirira mwoyo we musurudado. Kutenda uye rudo kunodziirira mwoyo wedu wekuezanisira. Mawara aya acatibetsera kuti tirumbwe teciseenzera Mwari uye teciteerera Djesu. Kutenda kunoita kuti tigare no rugondo rokuti Djehovha acakomborera aya anomupsvaka no mwoyo wese. (Aheb. 11:6) Kutenda kunotiitisawo kuti tirumbwe takagondeka ku Mutungamiriri wedu Djesu, kunyazi patinosongana no zvinetso. Kuti tibambise kutenda kedu uye kushingirira, tinodikana kufundira no muezaniso we hama dzedu dzakarumbwa dzakagondeka kunyazi padzaiteererhwa uye padzaibatana no matambudziko ekukonerhwa mare. Uye tingaita kuti tisadzikande pa ngozi yekudisa zvakawanda, nge kuteedzera muezaniso we hama dzedu dzakasanangura kugara no upenyu usina zvakawanda kuti akande Umambo wa Mwari pa mbuto yekutanga. w23.06 paji. 10 mandi. 8-9

Kudzibata kunoita kuti tikwanise kuonerera mazwiro uye maitiro edu. Asi isusu tinodikanawo kugara anhu anodzibata kuti tiite zviro zvakanaka, maka-maka kana ciri ciro cinoshupha, kana ciro catisina cido cekuciita. Edzurirai kuti wara rekudzibata rinobatanidzwawo pa zvibereko zve mwiya mucena, hino namatai kuna Djehovha mecikumbira mwiya wake mucena kuti mugare no wara iri rinokosha. (Ruka 11:13; Aga. 5:22, 23) Musagare mecietsera mugariro wakakwana. Mu nyika ino yatiri kugara atidikani kuetsera kuti zviro zvese zvigare zvakakwana. Kana tikaetsera kuti izvona zviitike, pamweni atizombodzadzisi zvinangwa zvedu. Pamweni mungazwa musina cido ngekuti cinangwa cenyu cinoita hingana kuti ciri kure kuti mucidzadzise. Kana zvakadaro, zvakadini kudzadzisa cinangwa cenyu ngekutanga padoko no padoko? Kana mecida kusakurira wara rimweni zvakadini kuripangidza no zviito zvidoko zuwa no zuwa? Kana cinangwa cenyu ciri cekuerenga Bhaibheri rese, zvakadini kurierenga mu miseswa minganani zuwa no zuwa? w23.05 mapaji. 29-30 mandi. 11-13

Ngo rubetso ra Djehovha no sangano rake, atiripi kushoterhwa no zvekurhya zvekunamata mu mazuwa ano e kupedzesera. Zvekurhya izvona zvirikubetsera tese isusu kuti tirumbwe tecihamba mu “Gwanza Rakacena. (Isa. 48:17; 60:17) Munhu pese paanotenda kufunda Bhaibheri, iyena uno mukana wekuhamba mu “Gwanza Rakacena.” Amweni anoita izvona ke nguwa doko uye anosiya gwanzero. Amweni akasanangura kurumbwa ecihamba mu gwanza irona dakara aguma kaari kuenda. Asi gwanza irona riri kuendepi? Aya ano kariro yekurarama kudenga, “Gwanza Rakacena” rinoaendesa “mu paraizo ya Mwari” ye kudenga. (Zvak. 2:7) Asi kune aya ano kariro yekurarama pa nyika pano, gwanza irona rinoaendesa pakuguma kekutonga ke makore 1000 ka Kristu, anhu ese paanonga akakwana. Kana imwimwi muri kuhamba mu gwanza irona zvino uno, musanangise sure uye musasiye gwanza irona dakara maguma kamurikuenda, mu nyika ipsva! w23.05 paji. 17 ndi. 15; paji. 19 mandi. 16-18

Pamunorangarira zviro zvese zvamakaizirhwa ndi Djehovha, imwimwi munomutenda maningi uye munotoda kudzipira upenyu wenyu kaari. (Pis. 116:12-14) Bhaibheri rinoti Djehovha ndiyena Anotipasa “cipo cese cakanaka uye cipo cese cakakwana.” (Tig. 1:17) Cipo cakakura kudarika zvese i cibairo co Mwana wake Djesu Kristu. Rangarirai zvinoteera! Rusudzunuro rakaita kuti imwimwi mugare no ushamwari wakabamba na Djehovha. Kupinda izvona, Djehovha anomupasai mukana we kurarama nokusikaperi. (1 Juau 4:9, 10) Kudzipira kuna Djehovha i mushobo we kupangidza kuti munotenda haiwa basi no rusudzunuro asi no zvese zvaakamuitirai.—Dhe. 16:17; 2 Ako. 5:15. w24.03 paji. 5 ndi. 8

Patinoona zvakashata zvinoizwa nge anhu mazuwa ano, tinozwawo hinga zvaiita Roti. Iyena “wainetseka maningi nge muhambiro usikazi kucena we anhu ainga asikateereri mutemo” ngekuti iyena waiziya kuti Baba edu e kudenga anozonda maitiro awona. (2 Ped. 2:7, 8) Kuthya uye kuda maningi Mwari ndizvona zvakaita kuti Roti azonde maitiro asikazi kucena. Isusu takatenderedzwawo nge anhu anoreremedza padoko uye amweni aatoreremedzi mitemo ya Djehovha. Kunyazi zvakadaro, isusu tingakwanisa kurumbwa takacena pa maitiro kana isusu tingarumbwa tecida Djehovha uye kufundira kumuthya nge mushobo wakanaka. (Zvie. 14:2) Kuti tiite izvona, Djehovha anotibetsera eciseenzesa masoko anobambisa atinogumira mu bhuku ra Zvierengo. Akristu ese, anarume no anakadzi, madjaha no acemberi angafunda zvakawanda nge kufunda bhuku iri. Patinothya Djehovha, isusu tinongwarira kuti tisapsvake cikonzero cekuti ngei ndaiita cakashata ici. w23.06 paji. 20 mandi. 1-2; paji. 21 ndi. 5

Pamweni makambobatana nokuphikiswa no umwe we mu mhuri menyu kana kutombosiyawo zviro zve kunyama ngekuti maida kukanda Umambo wa Mwari pa mbuto ye kutanga. (Mat. 6:33) Kana zvakadaro, mungagara no rugondo rekuti Djehovha anozviziya zvese zvamakamuitira. (Aheb. 6:10) Pamweni matozwisisa kuti masoko aya a Djesu ngee cokwadi: “Apana munhu akasiya nyumba, hama, hanzvadzi, mai, baba, ana, kana minda, nge ndaa yangu uye nge ndaa ye masoko akanaka asikatambiri mu nguwa ino zvakapethwa ka 100—nyumba, hama, hanzvadzi, mai, ana, uye minda, uku ecitambudzwa—uye mune ramangwana, upenyu usikaperi.” (Mark. 10:29, 30) Apana mubvunzo kuti makomborero amatambira akawanda maningi, kudarika zviro zvipi hazvo zvamakasiya.—Pis. 37:4. w24.03 paji. 9 ndi. 5

Akristu e Cidjudha paakabatana no cinetso ce nzara, hama dze ku ungano ye Antiyokiya “akasanangura kuti umwe na umwe, maererano no zvaanokwanisa atumire rubetso ku hama dzaigara ku Djudhiya.” (Zvii. 11:27-30) Kunyazi hama dzaibatana no nzara dzaigara kure maningi, Akristu e ku Antiyokiya ainga akashinga kuabetsera. (1 Juau 3:17, 18) Nyamasi uno isusu tingapangidzawo usisi patinoziya kuti hama dzedu dzirikubatana no tsawana dzinoitika dzoga. Isusu tinoita ciito nokukasika, tingareketa no akuru kuti tidzipire kuti tibetsere pa basa, tingaita mipiro kuitira basa re mu nyika yese kana kuti tingatoita munamato tecireketa ngezve hama dziri kubatana no tsawana dzinoitika dzoga. Hama no hanzvadzi dzedu dzingazoda rubetso kuti akwanise kuona zviro zvokuzorarama nazvo. Mambo wedu Djesu Kristu paacazouya kuzotonga anhu tinoda kuti iyena aone kuti tiri kupangidza usisi uye atipike kuti ‘tigare nhaka ye Umambo.’—Mat. 25:34-40. w23.07 paji. 4 mandi. 9-10; paji. 6 ndi. 12

Djesu akateedzera muezaniso wa Djehovha uye akagara munhu unozwisisa. Iyena akatumwa pa nyika kuti “aparidzire basi mabira akapsveteka e nyumba ya Israeri.” Asi iyena akazwisisa uye akaparidzirawo anhu amweni. Ngo muezaniso, pa nguwa imweni, mwanakadzi umweni wainga asiripi Muisraeri wakadeketera kuti iyena arape mwana wake wainga “akabathwa no madhimoni uye aimushupha maningi.” No usisi Djesu akaita zviya zvainga zvakumbirhwa no mwanakadzi uu uye akarapa mwana wake. (Mat. 15:21-28) Onai muezaniso umweni. Paakatanga basa rake re kuparidzira, Djesu akati: “munhu wese anondiramba . . . , ininiwo ndicamuramba.” (Mat. 10:33) Asi Djesu aazi kuramba Pedru, kunyazi hazvo iyena akamuramba katatu kese. Iyena aiziya kuti Pedru wainga wacinyuka uye wainga ari mwanarume wakagondeka. Mumasure mekumutswa Djesu akadzionesa kuna Pedru uye pamweni iyena akabhuya kuti aimuda uye ainga akamurekerera. (Ruka 24:33, 34) Djehovha anoetsera kuti tiitewo zvimwezvo. w23.07 paji. 21 mandi. 6-7

Tingaitei kuti titende kuti nyika ino icagara Paraizo uye kuti tibvunze aya ari kudzibvunzisa kuti izvona zvicaitikadi? Cekutanga, Djehovha pacake ndiye anoita cipikirhwa ici. Bhuku ra Zvakapangidzwa rinoti: “Uya ainga akagara pa cigaro ce umambo akati: ‘Ona! Ndiri kuita kuti zviro zvese zvigare zvipsva.’” Djehovha ano uzii, simba uye cido cekudzadzisa zvese zvaakapikira. Cecipiri, mumaonero a Djehovha zvese zvaakapikira zvakaita hinga zvakatoitika. Ndiyo ndaa, iyena akabhuya kuti: “Masoko aya akatendeka uye ngee zvirokwazvo. . . . Zvaitika!” Cecitatu, Djehovha paanotanga kuita ciro, iyena anociita kuti cibudirire. Ndiyo ndaa, iyena akabhuya kuti: “Inini ndini Arfa uye Omega.” (Zvak. 21:6) Djehovha akacangidza pamhene kuti Sathani ndiye munyepi uye aana simba. Kana munhu umweni omubvunzai kuti: “Izvona zvakanaka maningi kuti zvigare zvezvirokwazvo,” mungaerenga uye mungapanganidza Zvakapangidzwa 21:5, 6. Mocedzesana kuti munhuwo anyase kuona pamhene kuti zvaiita hinga Djehovha wene kamare ndiye aasinari ecigondesa kuti acadzadzisa zvese zvaakapikira.—Isa. 65:16. w23.11 paji. 7 mandi. 18-19

Djehovha akaita gondeso ii kuna Abrahamu paainga ano makore anokwana kuita 75. Kodi Abrahamu wakakwanisadi kuona cipikirhwa ici cecidzadzika here? Nge dii rimweni honde. Mumasure mekudarika Murambo we Eufrati uye mumasure mekuetsera makore anokwana kuita 25, Abrahamu wakaona kubarhwa ke mwana wake Izaki, ici cainga ciri cishamiso cakakura. Uye paapadarikazve makore 60 iyena wakaona kubarhwa ke azukuru ake airi Isau na Djakobo. (Aheb. 6:15) Asi Abrahamu aazi kuona ana ake ecigara dzinza guru uye aazi kuona anhu ecipinda mu Nyika Yakapikirhwa. Kunyazi zvakadaro, mwanarume uu wakagondeka wakarumbwa ano ushamwari we padhuze no Musiki wake. (Tig. 2:23) Abrahamu paacamutswa, ucapfara maningi ngokuziya kuti ngo ndaa yekutenda kake madzinza ese akakomborerhwa! (Gen. 22:18) Tinofundei? Pamweni atizooni zvipikirhwa zvese zva Djehovha zvecidzadzika mu nguwa yedu ino. Asi tikagara no mwoyo unononoka kutsamwa hinga Abrahamu, tingagara no rugondo kuti Djehovha acatikomborera zvino uye acatikomborera zvakatunhudzirika munyika ipsva.—Mark. 10:29, 30. w23.08 paji. 24 ndi. 14

Mambo Uziya paainga aciri djaha, waidzidodosa. Iyena wakafundira “kuthya Mwari we cokwadi.” Uziya wakafa aano makore 68 uye pa makore akawanda e upenyu wake Djehovha akamukomborera. (2 Mak. 26:1-4) Uziya wakanyisa madzinza akawanda uye wakaita kuti Djerusarema rigare rakanyasa kudziirirhwa. (2 Mak. 26:6-15) Zvezvirokwazvo, Uziya wakapfara maningi no zviro zvese zvaakakwanisa kuita no rubetso ra Djehovha. (Mup. 3:12, 13) Mambo Uziya wainga adjaira kubvunza amweni zviro zviya zvaaidikana kuita. Kodi izvi zvakaita kuti iyena atange kurangarira kuti waikwanisa kuita zvese zvaaida? Zuwa rimweni, Uziya wakapinda mu tempro ya Djehovha uye wakada kuedza kupisa cibairo pa artari, zviro zvekuti zvainga zvisikadikani kuizwa no madzimambo. (2 Mak. 26:16-18) Mupristi Mukuru Azariya wakaedza kumubvunza kuti asaite izvona, asi Uziya wakadzara no shungu. Zvinotsukwarisa kuti Uziya aazi kurumbwa wakagondeka kuna Djehovha uye wakaphanicwa na Djehovha nge mapere. (2 Mak. 26:19-21) Zviro zvingadai zvakahamba zvakanaka kudai wakarumbwa ecidzidodosa! w23.09 paji. 10 mandi. 9-10

Kunyazi mumasure mekugara mu Kristu wakadzodzwa, muphostori Pedru waidikana kurhwisana no kutama kukwana. Mu gore 36 K.A., Mwari akatuma Pedru kuti aende kuna Korneriyo uwo wainga asiripi mu Djudha. Pedzepo, Korneriyo wakadzodzwa no mwiya mucena uye zvakagara pamhene kuti “Mwari aasananguri” nge kuita kuti aya ainga asiripi Adjudha agare nhengo ye ungano ye Cikristu. (Zvii. 10:34, 44, 45) Mumasure mazvo Pedru wakatanga kurhya no Adjudha, zviro zvekuti iyena wainga asati akambozviita mu upenyu wake. Asi Akristu amweni e Cidjudha airangarira kuti Adjudha no aya ainga asiripi Adjudha ainga asikadikani kurhya pamwepo. Uye Akristu amweni airangarira kudaro paakaenda ku Antiyokiya, Pedru wakaima kurhya no hama dzimweni dzainga dzisiripi Adjudha, pamweni nge kuthya kukuhunyisa hama dze Cidjudha. Muphostori Pauro wakaona kuti Pedru wainga oogara mucengedzi uye wakamusumurura pamberi pe anhu akawanda. (Aga. 2:13, 14) Kunyazi no cishaishi ici, Pedru aazi kuima kupeta masimba kuti acinje. w23.09 paji. 22 ndi. 8

Pamweni imwimwi maona kuti muno matii amweni amunodikana kugadzirisa, kana zvakadaro musaore mwoyo. “Tenzi akanaka,” uye iyena acamubetserai kuita cinjo dzinodikanwa. (1 Ped. 2:3) Muphostori Pedru wakatigondesa kuti: “Mwari . . . acapedzesa kumufundisai. Iyena acamubambisai.” Pedru waidziona hinga wainga asikazi kusisira kugara na Djesu. (Ruka 5:8) Asi no rubetso re rudo ra Djehovha na Djesu, Pedru wakashingirira uye wakarumbwa ari muteeri wa Kristu. Mubairo wakhona ngewe kuti Pedru wakatenderhwa na Mwari “kupinda mu Umambo usikaperi wa Tenzi wedu uye Muponesi wedu Djesu Kristu.” (2 Ped. 1:11) Uu mubairo wakanaka maningi! Kana imwimwi mukaita hinga Pedru, moshingirira uye motenda kufundiswa na Djehovha, mucatambira mubairo we kurarama nokusikaperi. Imwimwi mungakwanisa kugumira cinangwa “pamunonga meciona ruponeso renyu, nge kutenda kenyu.”—1 Ped. 1:9. w23.09 paji. 31 mandi. 16-17

Tabhernakuro yokare yainga ino ruwanze. Ruwanze irona rainga rakakura, rakadziirirhwa uye apristi aikwanisa kuita basa rawo ipona. Artari ye kobre yekupira cibairo cakapiswa yaigara pa ruwanzepo pamwepo no basiya ro kobre rakadzara no mvura yaiseenzeswa no apristi kuti adzicenese asati aita basa rawo cena. (Eki. 30:17-20; 40:6-8) Nyamasi uno, Akristu akadzodzwa aciri pa nyika arikuseenzera Djehovha akatendeka, kana kuti, mu ruwanze re mukati ro tempro ye ku mwiya. Basiya rakakura rino mvura riri pa ruwanze, i ciedzuriro cekuti Akristu akadzodzwa pamwepo no Akristu ese anodikana kurumbwa akacena pa marangariro awo uye maitiro awo e ku mwiya. Hino “anhu akawanda maningi” arikunamata kupi Djehovha? Muphostori Juau wakaona grupo rakakura “rakaima pamberi pe cigaro ce umambo,” mu tempro kamare zvecida kureya ruwanze re kunza, umo “maanoitira [Mwari] basa rakacena usiku no masikati mu tempro yake.” (Zvak. 7:9, 13-15) Isusu tinokoshesa maningi makomborero atakapaswa na Djehovha e kumunamata ngo mushobo wakacena! w23.10 paji. 28 mandi. 15-16

Mushobo umweni unoseenzeswa na Djehovha kuti atipase simba, akuru. (Isa. 32:1, 2) Hino, kana imwimwi mukatanga kudzirhya mwoyo panganidzirai akuru zviro zviri kumunetsai. Paanonga ecida kumubetserai, musarambe. Eciseenzesa akuru, Djehovha angamubambisai. Kariro yedu inobva mu Bhaibheri yekurarama nokusikaperi—mu Paraizo zvingadai kurarama pa nyika pano mu Paraizo kana kuti mu Umambo we kudenga ingatipasa cido simba simba rakakura. (Aro. 4:3, 18, 19) Kariro yedu inotibetsa kuti tishingirire zvinetso, tiparidzire masoko akanaka uye tiite basa ripi haro ratinonga tapaswa mu ungano. (1 Ate. 1:3) Kariro ii ndiyo yakabambisa muphostori Pauro. Iyena “wakabambidzirhwa,” “wakapererhwa no mazano,” “wakateererhwa,” uye “wakawisirhwa pasi.” Uye kakawanda kakhona wakatoshota padoko kuti auraiwe. (2 Ako. 4:8-10) Pauro wakagara no simba raaida kuti ashingirire ngekuti wakakanda ndangariro dzake pa kariro. (2 Ako. 4:16-18) Pauro waikanda ndangariro dzake mune ramangwana pa kariro yake ye kurarama nokusikaperi kudenga. Pauro wainyasa kurangarira ngezve kariro ii uye ndiyo ndaa iyena nge cemukati “waizwa wakabamba zuwa no zuwa.” w23.10 mapaji. 15-16 mandi. 14-17

Pamunoita munamato, rangarirai kuti i nguwa here yekuti Djehovha andipase zvandiri kumukumbira. Pamweni imwimwi mungarangarira kuti munoda mhinduro ciriporipoco. Cokwadi ngece kuti, Djehovha anoiziya nguwa yakasisira kuti atibetsere. (Aheb. 4:16) Zvikumbiro zvedu zvikatama kudairhwa, tingarangarira kuti mhinduro ya Djehovha ngeyekuti: ‘Haiwa.’ Asi pamweni mhinduro ngeyekuti: ‘Azvisati zvaita.’ Ngo muezaniso, rangariraizve ngezve mudjaha wainamata kuti aporeswe pa nhenda yake. Asi uthongo wake auzi kugara zviri nani. Kudai Djehovha aita cishamiso uye omurapa, Sathani waida kubhuya kuti hama iya iri kuseenzera Djehovha basi nge ndaa yekuti yaraphwa. (Djobo 1:9-11; 2:4) Kusiya izvona, Djehovha akatotigondesa kuti mune ramangwana anhu ese acaporeswa pa nhenda dzawo. (Isa. 33:24; Zvak. 21:3, 4) Dakara ikona atidikani kuetsera kuraphwa nge mushobo unoshamisa. Hino hama ii yaidikana kukumbira kuti Djehovha aipase simba uye runyararo mundangariro kuti irumbwe yecishingirira. Kunyazi yecirhwara, irumbwe yeciseenzera Djehovha yakagondeka. w23.11 paji. 24 ndi. 13

Samusoni wakaita ciro cakashata maningi, asi iyena aazi kuhwirira sure pakuseenzera Djehovha. Iyena wakapsvaka mukana umweni kuti akwanise kuita zvaidiwa na Djehovha kana kuti kurhwisa Afiristiya. (Ato. 16:28-30) Samusoni wakadeketera kuna Djehovha eciti: “Ndisiyei kuti ndihwirinzire Afiristiya.” Djehovha akadaira cikumbiro ca Samusoni uye, hinga pakutanga, akamupasa simba risikaezaniswi nge mushobo unoshamisa. Izvi, zvakaita kuti Samusoni akwanise kuuraya Afiristiya akawanda pa nguwa iyona kudarika pa nguwa dzese mu upenyu wake. Izvirokwazvo kuti Samusoni waidikana kubatana no migumisiro ye zvishaishi zvake, asi iyena aazi kuedza kusiya kuita zvinodiwa na Djehovha. Izvi ndizvo zvinoitikawo katiri. Kana tikaita cishaishi uye tobetserhwa kana kuti kuruza ubaba watinawo, atidikani kusiya kuseenzera Djehovha. Edzurirai kuti Djehovha aazombotisii. (Pis. 103:8, 9) Kunyazi no zvishaishi zvedu, tingakwanisa kurumbwa tecikosha pamberi pa Djehovha kuita hingana Samusoni. w23.09 paji. 6 mandi. 15-16

Izvi zvinoda kureya kuti paya pamunoshingirira, imwimwi munotenderhwa na Djehovha. Izvi azvidi kureya kuti paya pamunosongana no matambudziko Djehovha anopfara ndizvo. Asi Djehovha anopfara na imwimwi ngekushingirira kenyu. Kushingirira kenyu ndikona kunoita kuti imwimwi mutenderhwe. Aya imakomborero anoshamisa! (Pis. 5:12) Edzurirai kuti Abrahamu wakashingirira kunyazi paaisongana no matambudziko akawanda uye Djehovha akapfara maningi nge ndaa yazvo. Djehovha aimuona hinga shamwari Yake uyewo hinga munhu munatsi. (Gen. 15:6; Aro. 4:13, 22) Izvona zvingaitikawo katiri nyamasi uno. Kutenderhwa katingaizwa na Djehovha akubvi pa zviya zvatinoita pa basa rake uye pa ubaba watinawo. Djehovha anotitendera ngekuti tinoshingirira nokutenda. Azvinei no thunga redu, mugariro wedu kana zviya zvatinokwanisa kuita, tese isusu tingakwanisa kushingirira. Imwimwi muno dambudziko ramuri kushingirira zvino here? Kana zvakadaro, edzurirai kuti murikuita kuti Djehovha apfare. Patinozwisisa kuti tinotenderhwa na Djehovha, kariro yatinayo ye kuti iyena acadzadzisa zvese zvaakapikira inotunhudzira kubamba. w23.12 paji. 11 mandi. 13-14

Mukristu unodikana kufundira kucedzesana zvakanaka no amweni. Mwanarume unokwanisa kucedzesana zvakanaka unonyasa kupurutana uye unokwanisa kuzwisisa marangariro uye mazwiro e amweni. (Zvie. 20:5) Iyena unokwanisawo kuzwisisa mushobo we kureketa we anhu, zvakaita hope yawo uye mushobo urikuita mwiri wawo. Imwimwi amungakwanisi kufunda zvese izvi kana mukatama kupedza nguwa no amweni. Kana mukagara mecicedza nguwa dzese meciseenzesa zvigadzirhwa zve magetsi zvakaita hinga email no mamesaji, zvicapungura kukwanisa kenyu kucedzesana no amweni hope no hope. Hino edzai kupsvaka mikana kuti mugare no anhu uye mukwanise kucedza nawo. (2 Juau 12) Mukristu wakakura pakunamata unodikana kufundira kudziriritira pacake uye kuriritirawo mhuri yake. (1 Ti. 5:8) Zvakanaka maningi kufundira zviro zvinozomubetserai kuona basa. (Zvii. 18:2, 3; 20:34; Aef. 4:28) Psvakai kuziikanwa hinga munhu unoseenza no simba uye unopedzesa zviya zvaatangisa. Kana mukaita kudaro zvicagara nyore kuti muone basa uye murumbwe muri pa basepo. w23.12 paji. 27 mandi. 12-13

Mu Bhaibheri soko rokuti “zuwa ra Djehovha,” rinoreya nguwa yekuti Djehovha anotonga azondi ake uye ounzisa ruponeso ku anhu ake. Izvona zvakamboitika mu nguwa yokare. (Isa. 13:1, 6; Ezek. 13:5; Zef. 1:8) Mu mazuwa edu ano, “zuwa ra Djehovha” ricatanga atungamiriri e nyika paacarhwisa Bhabhironi Guru uye ricapedzesera no hondo ye Amagedhoni. Kuti tipone pa “zuwa” irona, tinodikana kudzigadzirira zvino. Djesu akafundisa kuti tinodikana kurumbwa takagadzirira kuitira “dambudziko guru,” uye izvona zvinodikana “kurumbwa zveciizwa.” (Mat. 24:21; Ruka 12:40) Mutsamba yake yekutanga yakafemerhwa yaakatarira Atesaronika, Pauro wakaseenzesa miezaniso yakawanda kuti abetsere Akristu kuti arumbwe akagadzirira kuitira zuwa guru rokutonga ka Djehovha. Pauro waizviziya kuti zuwa ra Djehovha rainga risikazouyi pa nguwa iyona. (2 Ate. 2:1-3) Kunyazi zvakadaro, iyena wakakohomedzesa hama dzake kuti dzigare dzakagadzirira kuitira zuwa irona hingana kuti raadhuze, uye isusu tingaseenzesawo zano iri. w23.06 paji. 8 mandi. 1-2

Mukupera ke makore 1970, predhiyo imweni ino maandari 60 yakatanga kuwakwa kuthaundi re Tóquio, Japão. Anhu airingira ciwakwa ici aishamisika, aidzibvunzisa kuti predhiyo ii yakakwanisa kurumbwa yakaima paiitika zvigidhigidhi zvinonyanya kuitika muthaundi iri. Zvakakwanisika kudini? Mainjinyero akagadzira predhiyo ii kuti igare yakabamba uye pa nguwa imweyo yaikwanisa kuthurudza kutekenyeka kaikonzerhwa no cigidhigidhi. Akristu e mazuwa ano akaita hinga predhiyo ii yakareba maningi. Nge mushobo upi? Mukristu unodikana kugara pakati no pakati pa nyaya yekugara akabamba uye kukasika kucinja. Iyena unodikana kugara akabamba uye asikazununguki pakutsigira no kutondoedza mutemo unodiwa na Djehovha. Iyena unodikana kugara “akagadzirira kuteerera” uye aasii kuti ciro cipi haco cimucinje marangariro ake. Nge dii rimweni, iyena unodikana “kuzwisisa” kana kuti kukasika kucinja nguwa dzese pazvinotodiwa kuti adaro. (Tig. 3:17) Mukristu unofundira kugara pakati no pakati kakadaro aazonyanyi kubambidzira, kana kuti aazosii kuti zviro zviitike nge mushobo usiriwopi. w23.07 paji. 14 mandi. 1-2

Djesu akakunda miedzo ya Sathani Dhiyabhurosi ngokuti Sathani waida kuti Djesu atame kuzwira Djehovha. (Mat. 4:1-11) Sathani wainga akashinga kuti Djesu aite citema kuitira kuti Djesu asakwanise kuripa rusudzunuro. Djesu paaiita basa rake re kuparidzira pa nyika pano, iyena akasonganazve no zvitsinzwa zvimweni. Azondi ake akamuteerera uye akatoedza kumuuraya. (Ruka 4:28, 29; 13:31) Uyewo, iyena aidikana kushingirira kutama kukwana ke ateeri ake. (Mark. 9:33, 34) Djesu paainga ecitongwa, iyena akatambudzwa uye akapsveruswa. Pakupedzesera, iyena akafa nge mushobo wakashata uye unorhwadza. (Aheb. 12:1-3) Iyena aidikana kushingirira dii rekupedzesera re upenyu wake ari ega, asikadziirirhwi na Djehovha. (Mat. 27:46) Zvezvirokwazvo, Djesu akashuphika maningi kuti apase upenyu wake katiri. Patinorangarira kushinga kainga kakaita Djesu pakudzipira katiri, isusu tinozwa rudo rakakura kaari.w24.01 mapaji. 10-11 mandi. 7-9

Mwoyo unononoka kutsamwa unotibetsera kuti tigarisane zvakanaka no amweni uye tinyase kuapurutana paanonga ecireketa. (Tig. 1:19) Mwoyo unononoka kutsamwa unotibetsera kuti tigare murunyararo no amweni. Atizoiti zviro tisikazi kurangarira, kureketa zviro zvaizokuwadza amweni uye atizoitiwo zviro no shungu kana amweni akatinyangadzisa. Pano kuita zviro kuti tihwirinzire cakashata no cakashata, ticapeta masimba kuti “tishingirire zvishaishi zvaizwa no amweni edu uye torekerera umwe na umwe wedu.” (Ako. 3:12, 13) Mwoyo unononoka kutsamwa unngatibetsera patinonga tecida kuita cisananguro. Pane kuti tikasikire uye kuita zviro tisikazi kunyasa kurangarira, tinodikana kutora nguwa toona zviro zvatingaita kuti tikwanise kuita cisananguro cakanaka. Ngo muezaniso, patinonga tecipsvaka basa, pamweni tingazotenda basa rekutanga ratinonga taona. Asi tikagara no mwoyo unononoka kutsamwa, ticatanga kurangarira kuti izvona zvicabata-bata kudini mhuri yedu no ukama wedu na Djehovha. Tikagara anhu ano mwoyo unononoka kutsamwa, ticakwanisa kuita zvisananguro zvakanaka. w23.08 paji. 22 mandi. 8-9

Imwimwi mungaora mwoyo ngo ndaa ye zvishaishi zvenyu. Kuedzurira gondeso yamakaitira Djehovha pamakadzipira kaari, ndizvona zvinomupasai simba kuti murhwisane no miedzo ipi hayo. Kuita kudini? Pamunodzipira kuna Djehovha imwimwi munonga mecidziramba. Izvona zvinoreya kuti imwimwi mucaramba zvese zvisikapfadzi Djehovha. (Mat. 16:24) Ndiyo ndaa, pamunonga meciedzwa imwimwi amutori nguwa mecirangarira kuti munodikana kuitei. Ngekuti imwimwi munonga meciziya kuti cinyi camunodikana kuita—kurumbwa makatendeka kuna Djehovha. Mucarumbwa mecipfadza Djehovha uye pamugariro uwona imwimwi mucagara hinga Djobo. Kunyazi paakabatana no mugariro unoshupha maningi, iyena wakati: “Dakara dafa, andizosiyi kugondeka kangu kuna Mwari!”—Djobo 27:5. w24.03 paji. 9 mandi. 6-7

Djehovha, “Mwari we rudo,” anesu! (2 Ako. 13:11) Iyena anorangarira ngezve munhu umwe na umwe pacake. Isusu tingagara no rugondo rekuti “takatenderedzwa no rudo Rake rakagondeka.” (Pis. 32:10) Patinorumbwa tecinyasa kurangarira ngezve rudo ra Djehovha raanotipangidzira, tinotunhudzirawo kuzwa tiri padhuze naye uye Djehovha anotunhudzirawo kugara we zvirokwazvo katiri. Isusu tingaita munamato kuna Djehovha nguwa ipi hayo uye tomubvunza mushobo watinoda rudo rake. Uyewo tingabvunza Djehovha zvese zvirikutinetsa, tecigara no rugondo rekuti iyena anotizwa uye anoda maningi kutibetsera. (Pis. 145:18, 19) Kuitawo hingana kupfarira katinoita kukhwederera muriro kuti tiugote pakunonga kecitonhora, isusu tinodawo kukhwedera dhuze no rudo ra Djehovha. Kunyazi rudo ra Djehovha rino simba, irona rinotidziirirawo. Hino funungurai mwoyo wenyu kuti muzwe rudo ra Djehovha mu upenyu wenyu. Tese isusu tingabhuya no rugondo rese kuti: “Inini ndinoda Djehovha”!—Pis. 116:1 w24.01 paji. 31 mandi. 19-20

Djesu akaita zvakawanda pano kubvunza anhu basi kuti zina ra Mwari ndi Djehovha. Adjudha aireketa na Djesu ainga aakuziya zina ra Mwari, asi Djesu ndiye akatanga kupangidza kuti “Mwari ndiani kamare.” (Juau 1:17, 18) Ngo muezaniso, Matarhwa e Cihebheru anobhuya kuti Djehovha ano nyasha uye ano usisi. (Eki. 34:5-7) Djesu akanyasa kupangidza izvona paakaseenzesa muezaniso we mwana wakapsveteka. Patinoerenga ngezva Baba anoona mwana wawo nge “cekure,” ogogoma kuti asongane naye uye ecimukhumbatira, omurekerera no mwoyo wese, isusu tinonyasa kuona pamhene nyasha uye usisi wa Djehovha. (Ruka 15:11-32) Djesu akabetsera amweni kuti azwisise kuti Djehovha munhu akaita kudini kamare. w24.02 paji. 10 mandi. 8-9

Djehovha anotinyaradza uye anotipasa simba paya patinonga tecibatana no matambudziko. Tingateedzera kudini Djehovha nge kuzwira usisi amweni uye kuanyaradza? Umwe we mushobo wekuita izvona, ngewe kusakurira mawara mu mwoyo wedu, anotibetsera kunyaradza amweni. Ndiapi mawara manganani akhona? Cinyi cicatibetsera zuwa no zuwa “kurumbwa” tecida uye kunyaradza umwe na umwe wedu? (1 Ate. 4:18) Tinodikana kupangidza mawara manganani akaita hingana usisi, unaki uye kudanana hinga hama. (Ako. 3:12; 1 Ped. 3:8) Mawara aya angatibetsera kudini? Kana tikapangidza usisi ku hama dzedu uye toapangidzira kuti zvezvirokwazvo tinoakoshesa, ticagara no cido cakakura cekuanyaradza paanosongana no matambudziko. Hingana zvakabhuiwa na Djesu paakati: “Muromo unobhuya zvakadzara mu mwoyo. Munhu wakanaka unobudisa zviro zvakanaka pa upfumi wake wakanaka.” (Mat. 12:34, 35) Kunyaradza hama no hanzvadzi dzedu padzinosongana no matambudziko, zvezvirokwazvo ndi mushobo wakanaka wekupangidza kuti tinoada. w23.11 paji. 10 mandi. 10-11

Kana tecida kuzwisisa uphorofita we Bhaibheri, tinodikana kubetswa no anhu amweni. Rangaridzai ngezve muezaniso unoteera. Ngatimboti muri kuvhakacira mbuto yamusikazii asi imwimwi muno shamwari yekuti inonyasa kuziya kamuri kuenda. Iyena unoziya pamuri zvino, uye kuti gwanza rimwe na rimwe rinoenda koobudira papi. Zvezvirokwazvo kugara no shamwari ii padhuze kaizobetsera maningi! Ngo mushobo umwewo, Djehovha akaezana no shamwari ii, iyena anoziya nguwa yatiri zvino uye anoziya zvicaitika mune ramangwana. Hino kana tecida kuzwisisa uphorofita we Bhaibheri tinodikana kudzidodosa uye tokumbira rubetso ra Djehovha. (Dha. 2:28; 2 Ped. 1:19, 20) Kuita hingana madzibaba anoda zvakanakira ana awo, Djehovha anoda kuti ana ake agare no ramangwana rakanaka. (Djer. 29:11) Asi mukusiyana no abereki e kunyama, Djehovha anoziya zvicaitika mune ramangwana. Uye zviro zvese zvinoitikadi, ndiyo ndaa Djehovha akaita kuti uphorofita wakaringana no ramangwana utarhwe mu Bhaibheri uye izvona zvinoita kuti tiziye pacino nguwa zviro zvicaitika mune ramangwana.—Isa. 46:10. w23.08 paji. 8 mandi. 3-4