MUSORO WE KUFUNDA 21
Zvakapangidzwa—Zvinoreyei Kune Ramangwana Renyu
“Ameni! Uyai, Tenzi Djesu.”—ZVAK. 22:20.
NGOMA 142 Kariro Inotipasa Ushingi
ZVATICAFUNDAa
1. Cisananguro cipi cinokosha cinodikana kuizwa no munhu wese?
MUNHU umwe na umwe unodikana kuita cisananguro cinokosha maningi. Unodikana kuita cisananguro cekuti ucatsigira Djehovha Mwari Mutongi mukuru here kana kuti ucagara ku dii ra Sathani Dhiyabhorosi muzondi wa Mwari? Pandori no zvisananguro zviiri izvi basi. Uye umwe na umwe unodikana kusanangura dii raacatsigira. Mugumisiro wecisananguro icona i upenyu usikaperi kana kuti rufu. (Mat. 25:31-33, 46) Pakati pe “kutambudzika kukuru,” anhu acaparadzaniswa kuti ararame kana kuti aparadzwe.—Zvak. 7:14; 14:9-11; Ezek. 9:4, 6.
2. (a) Ahebheru 10:35-39 inotikohomedzesa kuti tiitei? (b) Bhuku ra Zvakapangidzwa ringatibetsera kudini?
2 Erengai Ahebheru 10:35-39. Kana imwimwi masanangura kutsigira utongi wa Djehovha, maita cisananguro cakanaka. Uye zvezvirokwazvo imwimwi munoda kubetsera amweni zvino kuti aite cisananguro cakanaka. Kuti mudaro, imwimwi mungaseenzesa zvinorekethwa mu bhuku ra Zvakapangidzwa kuti mubetsere anhu. Bhuku iri rinoshamisa rinopangidza zvicaitika no azondi a Mwari, asi irona rinobhuyawo nge zve makomborero ese acatambirhwa nge aseenzi akagondeka a Djehovha. Idzi i nyaya dzinokosha maningi dzatinodikana kufunda, ngekuti dzicatibetsera kuti tibambise ushingi wedu uye kugondeka kedu kuna Djehovha. Kupinda izvona, isusu tingakwanisa kuseenzesa zvatafunda kuti tibetsere anhu kuti aite zvisananguro zvakanaka uye kurumbwa eciseenzera Djehovha.
3. Ticaonei mu fundo ino?
3 Mu fundo ino, ticaona mhinduro dze mibvunzo dzinoti: Makomborero api acatambirhwa no aya anotsigira utongi wa Mwari? Uye cinyi cicaitika no aya anotsigira cikara cekupsvuka cinorekethwa mu bhuku ra Zvakapangidzwa?
CINYI CICAITIKA NO AYA AKAGONDEKA KUNA DJEHOVHA
4. Muphostori Juau wakaona grupu ripi rina Djesu kudenga?
4 Muphostori Juau wakaoneswa magrupu mairi anotsigira utongi wa Djehovha uye anotambira upenyu usikaperi. Grupu rekutanga rinoumbwa nge anhu anokwana kuita 144 000. (Zvak. 7:4) Awona akasanangurhwa kuti araramire kudenga uye agare dii re Umambo wa Mwari pamwepo na Djesu Kristu. Awona acatonga nyika ari kudenga. (Zvak. 5:9, 10; 14:3, 4) Pa cioneso icona, Juau wakaona anokwana kuita 144 000 kudenga akaima pamwepo na Djesu pa Dunhu re Zioni.—Zvak. 14:1.
5. Cinyi cicaitika no akadzodzwa anonga aciri pasi pano mu mazuwa e kupedzesera?
5 Kubvira mu mazuwa e aphostori dakara mu mazuwa edu ano, anhu akawanda akasanangurhwa kuti agare dii re anokwana kuita 144 000. (Ruka 12:32; Aro. 8:17) Pa cioneso cake, Juau wakaziya kuti ashomanani basi kana kuti numero doko re anokwana kuita 144 000 anonga aciri pa nyika mu mazuwa e kupedzesera. “Ashomanani anosara” aya acatambira “cinamiro” cekutenderhwa na Djehovha dambudziko guru risati ratanga. (Zvak. 7:2, 3; 12: 17) Pedzepo, panguwa yekutambudzika kukuru, ashomanani aya acaendeswa kudenga kuti abatane no akadzodzwa amweni akarumbwa akagondeka kuna Djehovha dakara pakufa. Ari ikona, awona acatonga pamwepo na Djesu mu Umambo wa Mwari.—Mat. 24:31; Zvak. 5:9, 10.
6-7. (a) Juau wakaona grupu ripizve mu masure me 144 000, uye isusu tingafundei nge zvaro? (b) Ngei akadzodzwa kubatanidzawo no “grupu rakakura re anhu” anodikana kuziya zvinorekethwa mu bhuku ra Zvakapangidzwa kapituro 7?
6 Mu masure mekuona akadzodzwa acaenda kudenga, Juau wakaona “grupu rakakura re anhu.” Kusiyana no anokwana kuita 144 000, Bhaibheri aribhui kuti anhu angana anobatanidzwa mu grupu rakakura re anhu. (Zvak. 7:9, 10) Asi tinoziyei nge zve grupu rakakura re anhu? Juau unobvunzwa kuti: “Aya ndiwo ari kubva mu kutambudzika kukuru, awona akaphadza macira awo akareba uye akaacenesa mu ngazi ye Bira.” (Zvak. 7:14) Mu masure mekudarika no upenyu pa kutambudzika kukuru, “grupu rakakura re anhu” ricararamira pasi pano uye ricaona makomborero akawanda nokusikaperi.—Pis. 37:9-11, 27-29; Zvie. 2:21, 22; Zvak. 7:16, 17.
7 Kunyazi makasanangurhwa kuti mutonge na Djesu kudenga kana kuti kurarama pasi pano nokusikaperi, imwimwi munokwanisa kudziona mecitambira cikomborero cakatarhwa mu bhuku ra Zvakapangidzwa 7? Tinodikana kuzviita. Ii icagara nguwa inopfadza maningi ku magrupu ese mairi anoseenzera Djehovha! Zvezvirokwazvo, ticapfara maningi ngekusanangura katakaita kutsigira utongi wa Djehovha. Asi ngazvipizve zvinorekethwa mu bhuku ra Zvakapangidzwa nge zve kutambudzika kukuru?—Mat. 24:21.
ZVINYI ZVICAITIKA KU AZONDI A MWARI
8. Cinyi cicaitisa kuti kutambudzika kukuru kutange, uye anhu akawanda acaita cisananguru cipi?
8 Hingana zvatakafunda mu fundo yakadarika, utongi uno simba we nyika ino ucarhwisa Bhabhironi Guru iro rinoimirira magereja ese e kunyepa. (Zvak. 17:16, 17) Kurhwisa ikona kucaita kuti kutambudzika kukuru kutange. Izvona izvi zvicaita kuti anhu akawanda anamate Djehovha here? Haiwa. Kusiyana na izvona, Zvakapangidzwa kapituro 6 inopangidza kuti pa nguwa iyona inoshupha anhu asikaseenzeri Djehovha acapsvaka kudziirirhwa no utongi we nyika uye no ekutengeserana e nyika ino awo anoezaniswa no matunhu. Ngekutama kawo kutsigira Umambo wa Mwari, awona acagarawo azondi a Djehovha.—Ruka 11:23; Zvak. 6:15-17.
9. Ngei anhu a Mwari acanyasa kubuda pamhene pa nguwa yekutambudzika kukuru, uye ngaupi mugumisiro wakhona?
9 Pa nguwa inoshupha yekuti kutambudzika kukuru kunonga keciitika, aseenzi a Djehovha acanyasa kuoneka pamhene. Awona acagara grupu rimwe basi pasi pano ricarumbwa reciseenzera Djehovha uye risikatsigiri “cikara.” (Zvak. 13:14-17) Kugondeka kawo kuna Djehovha kucaita kuti azondi awo anyangadzwe maningi. Nge ndaa yazvo, madzinza ese acaungana kuti arhwise anhu a Mwari mu pasi rese. Bhaibheri rinodaidza ciitiko icona kuti kurhwisa ke Gogi we Magogi.—Ezek. 38:14-16.
10. Maererano na Zvakapangidzwa 19:19-21, Djehovha acaitei paacaona anhu ake ecirhwiswa?
10 Djehovha acaitei paacaona anhu ake ecirhwiswa? Ayena anoti: “Shungu dzangu dzicakwira.” (Ezek. 38:18, 21-23) Zvakapangidzwa kapituro 19 inoreketa zviro zvicaitika mu masure mazvo. Djehovha acatuma Mwana Wake kuti adziirire anhu ake uye atsakatise azondi ake. “Masurudado e kudenga”—awo anoumbwa no ngirozi dzakagondeka uye no akadzodzwa anokwana kuita 144 000, acabatana pamwepo na Djesu kuti arhwise azondi a Mwari. (Zvak. 17:14; 19:11-15) Asi ngaupi mugumisiro we hondo iyona? Masangano ese, kutobatanidzawo anhu ese asikatsigiri Djehovha acatsakatiswa!—Erengai Zvakapangidzwa 19:19-21.
MUCATO MU MASURE ME HONDO
11. Ngaipi fundo ye pamusoro ye bhuku ra Zvakapangidzwa?
11 Edzai kurangarira mupfaro ucazogara no aseenzi a Mwari akagondeka pasi pano paacapukunyuka mu masure mekutsakatiswa ke azondi a Mwari! Zvezvirokwazvo, ii icagara nguwa inopfadza maningi! Kuparadzwa ke Bhabhironi Guru kucaita kuti kudenga kugare no mupfaro wakakura maningi. (Zvak. 19:1-3) Asi cicanyanya kuita kuti kudenga kugare no mupfaro wakakura maningi—“mucato we Bira,” ngekuti iyona ndiyona fundo ye pamusoro ye bhuku ra Zvakapangidzwa.—Zvak. 19:6-9.
12. Maererano na Zvakapangidzwa 21:1, 2, mucato we Bira ucaitika rini?
12 Mucato uwona ucaitika rini? Akadzodzwa ese anokwana kuita 144 000, anonga ari kudenga hondo ye Amagedhoni isati yatanga. Asi nguwa iyona andiyopi icazoitika mucato we Bira. (Erengai Zvakapangidzwa 21:1, 2.) Mucato we Bira ucaitika mu masure mekupera ke hondo ye Amagedhoni uye mu masure mekutsakatiswa ke azondi ese a Mwari.—Pis. 45:3, 4, 13-17.
13. Cinyi cicaitika pa mucato we Bira?
13 Cinyi cicaitika pa mucato we Bira? Mucato unobatanidza mwanarume no mwanakadzi. Hino nge gwanza rimwero, mucato we Bira ucabatanidza Mambo Djesu Kristu ne “mukadzi wake” anokwana kuita 144 000. Ciitiko icona cinokosha maningi cicaita kuti utongi upsva utange kutonga pasi pano ke makore anokwana kuita 1000.—Zvak. 20:6.
THAUNDI RINOKUDZWA RINOBATANA KUDINI NO RAMANGWANA RENYU
Zvakapangidzwa kapituro 21 inopanganidza thaundi Ripsva re Djerusarema hingana “ririkucita kudenga recibva kuna Mwari.” Pa nguwa yekutonga ka Kristu, ricaunzisa makomborero ku anhu anopurutana (Onai mandima 14-16)
14-15. Zvakapangidzwa 21 inoezanisa akadzodzwa anokwana kuita 144 000 no cinyi? (Onai foto ye pa kapa.)
14 Mu masure me mucato we Bira, Zvakapangidzwa 21 inoezanisa akadzodzwa anokwana kuita 144 000 no thaundi rakanyasa kurungama maningi rinozwi “Djerusarema Ripsva.” (Zvak. 21:2, 9) Thaundi irona rainga rakawakirhwa mu mapuwe anokwana kuita 12 reciimirira “mazina e aphostori 12 e Bira.” Asi ngei izvona zvakashamisa Juau? Ngekuti iyena wakaona zina rake rakatarhwawo pa rimwe re mapuwe awona. Zvezvirokwazvo, icona cainga ciri cikomborero cakakura kaari!—Zvak. 21:10-14; Aef. 2:20.
15 Thaundi irona rekuezanisira rakasiyana maningi no mathaundi amweni. Gwanza rinopinda mu thaundi irona ngere ouro yakanyasa kugadziriswa, rino misiwo inokwana kuita 12 yakagadzirhwa no maperola, ukutira uye fundasau zvakaizwa no mapuwe anokosha, uye midida yese ye thaundi irona yakanyasa kukwana. (Zvak. 21:15-21) Asi Juau wakaona kuti pano ciro caishota! Onai zvaakareketa: “Andizi kuona tempro mukati maro, ngekuti Djehovha Mwari we Masimba Ese ndiyena tempro yakhona pamwepo no Bira. Uye muthaundimo mainga musikadikani zuwa kana mwedzi, ngekuti munovhenekwa no rukudzo ra Mwari uye Bira ndiro ruvheneko rakhona.” (Zvak. 21:22, 23) Ese aya anobatanidzwa pa Djerusarema Ripsva acaona Djehovha. (Ahe. 7:27; Zvak. 22:3, 4) Ngo kudaro, Djehovha na Djesu ndiwona tempro ye thaundi irona.
Ndiani acatambira makomborero anoezaniswa no “murambo” uye no “miti”? (Onai mandima 16-17)
16. Cinyi cicaitika ku anhu mu nguwa ye Kutonga ke Makore Ciuru ke Umambo wa Mwari?
16 Zvezvirokwazvo, aya akadzodzwa ngekurangarira basi zvakaita thaundi iri zvinoabata-bata maningi. Asi kunyazi aya ano kariro yekuzorarama pasi pano, anodikana kuona thaundi iri hingana ciro cinokosha maningi. Ngekuti mukati Mekutonga ke Makore Ciuru ke Umambo wa Mwari, Djerusarema Rispva ricaunzisa makomborero akawanda maningi pasi pano. Juau wakaona “murambo we mvura ye upenyu” uyo unoimirira makomborero awona. Ku matii ese mairi e murambo, kakadzara no “miti ye upenyu” inobudisa masakani “anorapa madzinza.” (Zvak. 22:1, 2) Anhu ese e panyika acagara no mikana yekutambira makomborero awona. Uye padoko no padoko, anhu ese e panyika acagara anhu akakwana. Akucazoonekizve nhenda, kana kurhwadziwa uye kana kucema nge ndaa ye matambudziko.—Zvak. 21:3-5.
17. Maererano na Zvakapangidzwa 20:11-13 ndiani acatambira makomborero e Kutonga ke Makore Ciuru?
17 Ndianani acatambira makomborero awona? Ese aya acapukunyuka pa hondo ye Amagedhoni uye pamweni no ana aacazobara mu nyika ipsva. Asi Zvakapangidzwa kapituro 20 inogondesa kuti anhu akafa acazomutswa. (Erengai Zvakapangidzwa 20:11-13.) Aseenzi a Djehovha “akagondeka” awo akararama mu nguwa yakadarika acamutswa kuti ararame nokusikaperi pasi pano, kutobatanidzawo no aya “aiita zviro zvakashata” kuti akwanise kufundira nge zva Djehovha. (Zvi. 24:15; Juau 5:28, 29) Asi izvi zvirikuda kubhuya here kuti anhu ese akafa acazomutswa kuti araramezve pasi pano pa nguwa ye Kutonga ke Makore Ciuru? Haiwa. Ese aya akagara no mukana wekuseenzera Djehovha asi aazi kuzviita aamutswi. Awona akagara no mukana asi akapangidza kuti aazi kusisira kuzorarama mu Paraizo pasi pano.—Mat. 25:46; 2 Ate. 1:9; Zvak. 17:8; 20:15.
MUEDZO WEKUPEDZESERA
18. Mu masure me makore 1000, anhu acagara no upenyu wakadini?
18 Mu masure me makore 1000, anhu ese ari pa nyika anonga ari anhu akakwana. Citema catakagara nhaka kuna Adhamu cinonga capera, uye apana ucabatana no matambudziko anobarhwa no citema. (Aro. 5:12) Mu masure me makore 1000, anhu ese anonga ari pa nyika acahwirirazve pa “kugara no upenyu” wakakwana.—Zvak. 20:5.
19. Pa muedzo wekupedzesera, anhu akakwana acagara no mukana upi?
19 Isusu tinoziya kuti Djesu akarumbwa akagondeka uye aazi kutendera miedzo ya Sathani. Kunyazi paaisongana no miedzo yakakura maningi, ayena akarumbwa akagondeka. Asi anhu ese akakwana acaita zvimwezvo here? Awona acarumbwa akagondeka kuna Djehovha kunyazi paacasongana no miedzo ya Sathani here? Umwe na umwe ucagara no mukana wekupangidza kugondeka kake kuna Djehovha paacaedzwa na Sathani mu masure mekuti iyena wabviswa mu rindi rakadzikisisa mu masure me makore anokwana kuita 1000. (Zvak. 20:7) Aya acarumbwa akagondeka pa muedzo iwona wekupedzesera acatambira upenyu usikaperi uye acagara no rusununguko re zvirokwazvo. (Aro. 8:21) Asi aya acapandukira Djehovha acatsakatiswa zvacose pamwepo na Sathani uye no madhimoni ake.—Zvak. 20:8-10.
20. Munozwa kudini no uphorofiti unokosha watinogumira mu bhuku ra Zvakapangidzwa?
20 Munozwa kudini mu masure mekufunda mafundo manganani e bhuku ra Zvakapangidzwa? Azvipfadzi here kubatanidzwawo pakudzadzika ke uphorofiti uu? Mune cido here cekubetserawo amweni kuti abatane na isusu pakunamata Mwari wedu? (Zvak. 22:17) Zvezvirokwazvo, mafundo aya adzadza mwoyo wedu no mupfaro ngekurangarira makomborero atingagara nawo mune ramangwana. Kuita hingana muphostori Juau, no cido tinobhuyawo kuti: “Ameni! Uyai, Tenzi Djesu.”—Zvak. 22:20.
NGOMA 27 Kupangidzwa ke Ana a Mwari
a Fundo ino ngeye citatu uye yekupedzesera inoreketa nge zve bhuku ra Zvakapangidzwa. Mu fundo ino, ticaona kuti anhu aya anoseenzera Djehovha akagondeka acagara no ramangwana rakanaka uye ecipfara, asi kuno aya asikatsigiri utongi wa Mwari acaparadzwa.