Kugadzirisa Mishobo Yatinoita Minamato Yedu

1. Djehovha anoda kuti aseenzi ake aitei? (Onai mufanikiso.)

IMWIMWI munopsvaka rubetso rani pamunonga mecida kunyaradzwa uye kutungamirirhwa? Isusu tinoziya mhinduro ye mubvunzo uu. Tingareketa na Djehovha teciseenzesa munamato. Iyena anotipika kuti tiite izvona kamare. Iyena anoda kuti tiite munamato nguwa dzese, kana kuti ‘kurumbwa teciita munamato.’ (1 Ate. 5:17) Isusu takasudzunuka kuti tiite munamato kuna Djehovha uye kumukumbira nhungamiriro mu migariro upi hawo we upenyu wedu. (Zvie. 3:5, 6) Zvezvirokwazvo, Djehovha ndi Mwari ano rupo. Ciro cinopangidza izvona, ngecekuti iyena anoda kuti tiite munamato pese paya patinonga tecida.

2. Ticaonei mu fundo ino?

² Munamato icipo cinokosha maningi katiri. Asi nge ndaa ye zviro zvakawanda zvatinoita zuwa no zuwa, zvingatishuphira kuona nguwa yekuita munamato. Imwimwi mungazwa mecida kugadzirisa maitiro amunoita munamato wenyu. Ngekudaro, zvinotipfadza kuziya kuti Bhaibheri rinotipasa rubetso ratinoda pakuita izvona. Mu fundo ino, ticafunda kuti tingaona kudini nguwa yekuita munamato ngekuteedzera muezaniso wa Djesu. Uyewo ticaona zviro zvishanu zvatingabatanidza pa minamato yedu kuti titunhudzire kunaka ke minamato yedu.

DJESU AKAPSVAKA NGUWA YEKUITA MUNAMATO

3. Djesu aiziyei ngezve munamato?

³ Djesu aizviziya kuti kuna Djehovha, munamato iciro cinokosha maningi. Asati auya pa nyika, iyena aiwona mushobo waidaira Baba ake minamato ye anarume no anakadzi akagondeka. Ngo muezaniso, Djesu ainga ari pa dii pa Baba ake paaidaira minamato yakaizwa no mwoyo wese ndi Ana, Dhavhidhi, Eriya no amweniwo akawanda. (1 Sam. 1:10, 11, 20; 1 Mad. 19:4-6; Pis. 32:5) Ndiyo ndaa Djesu akafundisa aseenzi ake kuti aite munamato nguwa dzese uye no rugondo!—Mat. 7:7-11.

4. Djesu akatisiira muezaniso wekuitei?

⁴ Djesu akatisiira muezaniso wekuti titeedzere kubva pa minamato yake kamare yaakaita kuna Djehovha. Paaiita basa rake re kuparidzira, Djesu aiita munamato nguwa dzese. Iyena aidikana kutodzipasa nguwa yekuita munamato ngekuti ainga akabatikana maningi uye ainga akatenderedzwa ngo anhu akawanda. (Mark. 6:31, 45, 46) Iyena aitomuka cemacibesi-besi kuti aone nguwa yekuita munamato. (Mark. 1:35) Zuwa rimweni, iyena akaita munamato usiku wese asati aita cisananguro cinokosha maningi. (Ruka 6:12, 13) Uye usiku asati afa, eciziya kuti ainga ari dhuze kuti abatane no dii rinoshupha re basa rake, Djesu akaita munamato kakawanda.—Mat. 26:39, 42, 44.

5. Tingateedzera kudini Djesu patinoita munamato?

⁵ Muezaniso wa Djesu unotifundisa kuti kunyazi takabatikana maningi tinodikana kupsvaka nguwa yekuita munamato. Kuita hingana Djesu tinodikana kuronga nguwa yekuita munamato—zvingaita cemacibesi-besi kana kuti tisati tawata. Patinoita izvona, tinonga tecipangidza kuna Djehovha kuti tinokoshesa maningi cipo ce munamato. Hanzvadzi imweni inozwi Lynne yakatenda maningi payakafunda kekutanga ngezve cikomborero cekuita munamato. Iyona inoti: “Pandakaziya kuti ndinokwanisa kubhuya na Djehovha nguwa ipi hayo, ndakatanga kuona Djehovha hinga Shamwari ye padhuze, ndiyo ndaa ndaidikana kugadzirisa mushobo wandaiita minamato.” Apana mubvunzo kuti akawanda edu tinozwawo kudaro. Ngationei zviro zvishanu zvatingabatanidza pa minamato yedu.

ZVIRO ZVISHANU ZVINOKOSHA ZVATINGABATANIDZA PA MUNAMATO WEDU

6. Maererano na Zvakapangidzwa 4:10, 11, Djehovha akasisira kutambirei?

⁶ Kudzai Djehovha. Juau wakaoneswa zviro zvinoshamisa. Iyena wakaoneswa akuru 24 kudenga ecinamata Djehovha. Awona aikudza Djehovha eciti iyena akasisira kutambira “rukudzo, rureremedzo uye simba.” (Erengai Zvakapangidzwa 4:10, 11.) Ngirozi dzakagondeka dzino zvikonzero zvakawanda zvekuti dzikudze uye dzireremedze Djehovha. Idzona dziri kudenga pamwepo na Djehovha uye dzinonyasa kumuziya. Idzona dzinoona mawara ake pa zviya zvaanoita. Idzona padzinonyasa kuona Djehovha eciita ciito zvinoita kuti dzide kumukudza.—Djobo 38:4-7.

7. Zvikonzero zvipi zvatinazvo kuti tikudze Djehovha?

⁷ Isusu tinodawo kukudza Djehovha mu minamato yedu tecimubvunza zvatinoda uye tecimubvunza kuti ngei tecishamisika naye. Pamunoerenga uye kufunda Bhaibheri, edzai kuzwisisa kuti mawara api a Djehovha amunonyanya kupfarira. (Djobo 37:23; Aro. 11:33) Pedzepo panganidzirai Djehovha kuti ngei munonyanya kupfarira mawara aya. Mushobo umweni watingakudza nawo Djehovha, ngewe kumutenda nge zvese zvaanotiitira uye zvaanoitira hama dzedu dze ku mwiya. Iyena anoticengeta nguwa dzese uye anotidziirira.—1 Sam. 1:27; 2:1, 2.

8. Zvikonzero zvipi zvatinazvo zvekuti titende Djehovha? (1 Atesaronika 5:18)

⁸ Tendai Djehovha. Isusu tino zvikonzero zvakawanda zvekuti titende Djehovha patinoita munamato. (Erengai 1 Atesaronika 5:18.) Tingatenda Djehovha ngo zviro zvese zvakanaka zvatinazvo ngekuti zvipo zvese zvakanaka zvinobva kaari. (Tig. 1:17) Ngo muezaniso, tingamutenda ngo zviro zvese zvakarungama zvaakasika. Tingamutendawo maningi nge upenyu wedu, mhuri yedu, shamwari dzedu uye ngo kariro yatinayo ye ramangwana. Zviri pamhene kuti tinoda kutenda Djehovha ngo makomborero aakatipasa ekugara shamwari dzake.

9. Ngei tisikadikani kukanganwa kutenda Djehovha?

⁹ Pamweni zvingada kupeta masimba kuti tirangarire ngezve zvikonzero zvese zvatinazvo zvekuti titende Djehovha. Anhu akawanda mazuwa ano aatendi. Anopedza nguwa yakawanda ecipeta masimba kuti aone zviya zvaanoda pano kuti atende ngo zviya zvaanazvo. Kana tikapingaidzwa ngo marangariro aona, minamato yedu ingagara basi iya yekukumbira zviya zvatinoda. Kuti izvona zvisaitike, tinodikana kuedzurira kutenda ngo zvese zvakanaka zvatinoizirhwa na Djehovha.—Ruka 6:45.

10. Kutenda kakabetsera kudini hanzvadzi imweni yakabatana no migariro inoshupha? (Onai mufanikiso.)

¹⁰ Kupangidza kutenda kunobetsera kuti tishingirire matambudziko. Onai muezaniso we hanzvadzi Kyung-sook, uri mu Murindiri wa 15 ya Janero wa 2015. Iyena wakabvunzwa no mamedhiko kuti wainga ano kankro ye mazazu yainga isikacarapiki. Iyena unoti: “Kuziya ngezve nhenda ii kakandirhwadza maningi. Zvaiita hingana kuti upenyu wangu waakupera uye ndakathya maningi.” Cinyi cakabetsera hanzvadzi ii pa mugariro uu? Iyona yakabhuya kuti isati yawata yaikhwira pamusoro pe nyumba pa teraso uye yainamata kuna Djehovha no izwi guru yecitenda Djehovha ngo zviro zvishanu zvainga zvaitika pa zuwa. Pedzepo, iyona yaizwa yakaterama uye izvona zvaiita kuti iyona ide kubvunza Djehovha kuti aimuda. Iyona yakazwisisa kuti Djehovha anobetsera aseenzi ake akagondeka paanobatana no migariro inoshupha, uye yakaona kuti tino makomborero akawanda mu upenyu wedu kupinda miyedzo yatinosongana nayo. Kuita hingana hanzvadzi Kyung-sook, tino zvikonzero zvakawanda zvekuti titende Djehovha, kunyazi pa nguwa yekuti tirikutosongana no miyedzo kamare. Kunamata kuna Djehovha tecitenda kungatibetsera kuti tishingirire uye tirumbwe takaterama mu ndangariro.

11. Ngei afundi a Djesu aidikana kugara no ushingi mumasure mekuti Djesu ahwirira kudenga?

¹¹ Kumbirai Djehovha kuti amupase ushingi wekuparidzira. Nguwa doko asati ahwirira kudenga, Djesu akaedzurira afundi ake kuti aidikana kupasa upupuri ngezvake mu “Djerusarema, mu Djudhiya mwese ne mu Samariya, uye dakara ku mbuto dziri kure dze nyika.” (Zvii. 1:8; Ruka 24:46-48) Mumasure me cinguwa, atungamiriri e Cidjudha akasunga Pedru na Juau uye akaaendesa ku Sinedhriyo, uye aona akarambidzwa kuparidzira uye akaathyisidzira. (Zvii. 4:18, 21) Hino Pedru na Juau akaitei?

12. Maererano na Zviito 4:29, 31, afundi akaitei?

¹² Paainga ecithyisidzirhwa nge atungamiriri e Cidjudha, Pedru na Juau akati: “Kudai mecirangarira kuti zvino unatsi pamberi pa Mwari kuti tipurutane imwimwi pane kupurutana Mwari, zviri kamuri. Asi kana tiri isusu, atingasii kureketa ngezve zviro zvatakaona no zvatakazwa.” (Zvii. 4:19, 20) Pedru na Juau paakasudzunurhwa, afundi akaita munamato kuna Djehovha ecikumbira rubetso rake kuti arumbwe eciita kuda kake. Awona aiti: “Itai kuti aranda enyu arumbwe ecireketa soko renyu no ushingi.” Djehovha akadaira munamato uu wakaizwa no mwoyo wese.—Erengai Zviito 4:29, 31.

13. Tinofundei kubva pa muezaniso wa hama Jin-hyuk?

¹³ Isusu tingateedzera afundi aya ngekurumbwa teciparidzira kunyazi anyautongi ecitirambidza kuti tizviite. Ndizvona kamare zvakaitika na hama Jin-hyuk. Iyona yakasungwa ngekusama kugara no dii raaitsigira. Payainga iri mukaraboso, iyona yakapaswa basa rekucengeta asungwa amweni ainga akafungirhwa ku mbuto yawo ega. Masurudado akabvunza hama ii kuti waikwanisa kureketa no asungwa aona ngezve nyaya yakaringana no basa rayo basi uye kuti yainga isikatenderhwi kuti icedze no asungwa aya ngezve Bhaibheri. Hama ii yakanamata kuna Djehovha yecikumbira ushingi no uzii kuti ikwanise kuparidzira pa mukana upi hawo waaizoona. (Zvii. 5:29) Iyona inoti: “Djehovha akadaira munamato wangu ngekundipasa ushingi no ungwaru kuti nditange kuitisa fundo dzakawanda dze Bhaibheri dze miseswa mishanu pa musuwo we karaboso. Pedzepo, ce usiku ndaitara tsamba dzandaizopasa asungwa zuwa raizoteera ce macibesi akhona.” Isusu tingagondawo kuti Djehovha acatibetsera kuti tiite basa redu re kuparidzira. Kuita hingana Jin-hyuk, tingaitawo munamato tecikumbira ushingi no ungwaru.

14. Cinyi cingatibetsera kushingirira matambudziko? (Pisarema 37:3, 5)

¹⁴ Kumbirai Djehovha rubetso kuti mukwanise kushingirira matambudziko. Akawanda edu tirikusongana no zvinetso zvo mwiri, zve mu ndangariro, kufirhwa ngo munhu watinoda, migariro inoshupha mu mhuri, kuteererhwa kana kuti dambudziko rimweniwo. Uye zviro zvimweni zvinoita kuti upenyu ubambirire kushupha i hondo no matenda. Hino fungurai mwoyo wenyu kuna Djehovha. Bhuyai zvese zvamuri kusongana nazvo kuita hingana kuti murikucedza no shamwari. Gondai Djehovha uye iyena “acagadzirisa zviro.”—Erengai Pisarema 37:3, 5.

15. Munamato ungatibetsera kudini kuti “tishingirire pa kutambudzika”? Pasai muezaniso.

¹⁵ Kurumbwa teciita munamato ndizvona zvicatibetsera kuti “tishingirire pa kutambudzika.” (Aro. 12:12) Djehovha anoziya zvirikuitika no anamati ake—“iyena anozwa kukumbira kawo kubetserhwa.” (Pis. 145:18, 19) Mupionera umweni uno makore 29 unozwi Kristie, wakazwisisa kuti izvona izvirokwazvo. Asikakariri, iyena wakatanga kubatana no zvinetso zvakakura zve uthongo. Izvona zvakaita kuti abatane no depressão. Nokuhamba ke nguwa, iyena wakaziya kuti mai ake ainga ano nhenda isikarapiki. Kristie unoti: “Inini ndaigara ndecinamata kuna Djehovha ndecikumbira simba kuti ndikwanise kushingirira zuwa rimwe na rimwe. Kusiya izvona, ndaigara ndecipinda musangano nguwa dzese uye kuita fundo ye munhu ega.” Iyena unotunhudzira eciti: “Munamato ndiwo wakandibetsera kuti ndishingirie mu nguwa dziya dzaishupha. Ndainga ndino rugondo rekuti Djehovha aneni uye kurangarira izvona kaiita kuti ndigare ndakaterama. Kunyazi matambudziko angu e uthongo asikazi kugadziriswa nokukasika, Djehovha akadaira minamato yangu ngekundipasa runyararo re mukati no mwoyo wakaterama.” Atidikani kumbokanganwa nariini kuti “Djehovha anoziya gwanza rekununura naro anhu akadzipira kaari.”—2 Ped. 2:9.

16. Ngei tecida rubetso ra Djehovha kuti tisaite zviro zvakashata?

¹⁶ Kumbirai rubetso ra Djehovha kuti mukwanise kukunda muedzo. Isusu tiri anhu asikazi kukwana, ndiyo ndaa tinodikana kupeta masimba nguwa dzese kuti tisaite zviro zvakashata. Asi Sathani ucaedza kuita zviri zvese kuti apingaidze upenyu wedu. Ciro cimwe caanoseenzesa, ikuwaraidzwa no zviro zvakashata. Kuwaraidzwa no zviro zvakadaro, kungadzadza ndangariro dzedu ngo zviro zvisikazi kucena—ndangariro dzinotisvipisa ngo cemukati uye dzinoita kuti tiite citema cakakura.—Mark. 7:21-23; Tig. 1:14, 15.

17. Tinodikana kuitei mumasure mekuita munamato tecikumbira Djehovha kuti atibetsere? (Onai mufanikiso.)

¹⁷ Isusu tinoda rubetso ra Djehovha kuti tirhwise muedzo wekuita zviro zvakashata. Djesu akabatanidza cikumbiro icona paaiita munamato wekuezanisira. Iyena akati: “Musatirekere tecipinda mu muedzo, asi tinunurei pano Wakashata.” (Mat. 6:13) Djehovha anoda kutibetsera, asi isusu tinodikana kukumbira rubetso rake. Isusuwo tinodikanawo kuita maererano no zviya zvatinonga takumbira pa munamato wedu. Tinodikana kuita zvese zvatinokwanisa kuti tisagare no marangariro asikazi kunaka, uye tisagare no marangariro e nyika ya Sathani. (Pis. 97:10) Patinofunda uye kuerenga Bhaibheri, tinodzadza ndangariro dzedu ngo marangariro akanaka uye akacena. Kupinda misangano uye kuparidzira kunotibetsera kuti ticengetedze ndangariro dzedu. Ngokudaro, Djehovha acadzadzisa cipikirhwa cake ngekusama kutendera kuti tisaedzwe kupinda paya patisikakwanisi kushingirira.—1 Ako. 10:12, 13.

18. Isusu tese tinodikana kurumbwa teciitei?

¹⁸ Umwe na umwe wedu unodikana kuita munamato kupinda zvataiita kare kuti tirumbwe takagondeka kuna Djehovha mazuwa ano atirikurarama anoshupha. Dzipasei nguwa zuwa no zuwa kuti muite munamato no mwoyo wese. Djehovha anoda kuti ‘tidurure mwoyo yedu pamberi pake’ teciseenzesa munamato. (Pis. 62:8) Kudzai uye tendai Djehovha ngo zvese zvaanoita. Kumbirai rubetso rake kuti mugare no ushingi mu basa re kuparidzira. Itai munamato nguwa dzese mecikumbira rubetso kuti mukwanisane no matambudziko amunobatana nawo uye kuti mushingirire muedzo upi hawo wamungasongana nawo. Musasiye kuti munhu upi hake, kana kuti ciro cipi haco cecimuitisai kuti musaite munamato kuna Djehovha. Asi Djehovha anodaira kudini minamato yedu? Ticaona mhinduro we mubvunzo uu unokosha mu fundo inoteera.