Ephesia
Te Episetole i to Ephesia ra
TE FAAITE NEI PAULO E, O TE MAITIRAA AROHA O TE ATUA, O TE TUMU ÏA O TE ORA.
1 Paulo, e aposetolo na Iesu Mesia i te hinaaro o te Atua ra, i te feia moˈa, i tei faaroo i te Mesia ra ia Iesu i Ephesia na: 2 ei ia outou te aroha mau e te hau, no ǒ mai i te Atua i to tatou Metua ra, e no ǒ i te Fatu ra ia Iesu Mesia.
3 Ia haamaitaihia te Atua te Metua o to tatou Fatu ra o Iesu Mesia, o tei haamaitai mai ia tatou nei, i te mau maitai atoa o te varua i te ao ra, i te Mesia nei: 4 oia i maiti ia tatou i roto ia ˈna hou te tumu o teie nei ao ra, ia riro tatou ei feia moˈa e te hapa ore i mua i tana aro ma te aroha: 5 e ua haapao atea noa ia tatou, ia riro ei tamarii tavai na ˈna iho ia Iesu Mesia ra, i te haapaoraa i te hamani maitai o to ˈna ihora aau: 6 ia haamaitaihia to ˈna aroha mau hanahana ra, i riro ai tatou ia ˈna ei feia itehia mai i roto i ta ˈna Tamaiti here ra: 7 no ˈna i noaa ˈi te ora ia tatou i to ˈna ra toto, i te hara i faaorehia nei no te rahi o to ˈna ra aroha mau: 8 o tei faarahi-roa-hia e ana ia tatou nei, ma te paari rahi, e te haapao maitai. 9 E ua faaite mai ia tatou i te parau aro ra o to ˈna ra hinaaro, to ˈna ra manaˈo hamani maitai i opuahia e ana i roto ia ˈna iho, 10 e ia tae i te tuuraa parau i te hoperaa mau o te mau tau ra, e amui ai oia i te mau mea atoa i te Mesia ra, to te raˈi, e to te ao nei, ei ia ˈna. 11 E e tufaa hoi ta matou i noaa ia ˈna, o matou i oti i te haapao-atea-hia i te opua no ˈna no tei rave i te mau mea atoa nei, ia au i te opua a to ˈna iho aau: 12 ia riro matou nei ei arueraa i to ˈna ra maitai, o matou o tei tiaturi i te Mesia i mutaa ihora: 13 o ta outou atoa hoi i tiaturi, i te iteraa ˈˈe outou i te parau mau, i te evanelia ra o to outou ora: e outou atoa hoi i faaroo, i tapaohia outou e ana i te Varua Maitai i parauhia maira, 14 o te faaite ïa i ta tatou tufaa e tae noa ˈtu i te ora mau o to ˈna ra taata i hoohia ra, ia haamaitaihia to ˈna hamani maitai.
15 No reira atoa vau, no te mea i ite aˈenei au, i to outou faaroo i te Fatu ra ia Iesu, e to outou aroha i te feia moˈa atoa ra, 16 i ore i faaea ˈi i te haamaitai i te Atua ia outou; i te faahitiraa ia outou i roto i ta ˈu nei pure, 17 ia horoa mai te Atua o to tatou Fatu ra o Iesu Mesia, te Metua no ˈna te hanahana, i te Varua no ˈna te paari e te parau, i faaitehia ra ia outou, ia ite â outou ia ˈna; 18 ia maramarama te mata o to outou aau, ia ite outou i te maitai o ta ˈna parauraa mai, e te rahiraa hoi o te hinuhinu o te tufaa e te feia moˈa ia ˈna ra, 19 e te rahi hau ê atu hoi o to ˈna ra mana ia tatou i tei faaroo nei, mai to ˈna puai rahi uˈana, 20 ta ˈna i rave i te Mesia ra, a faatia ˈi oia ia ˈna mai te pohe maira, e i haaparahi ihora ia ˈna i to ˈna iho rima atau i te basileia ra i te ao; 21 i nia ê roa i te mau arii, e te feia mana, e te puai, e te rahi, e te mau iˈoa atoa i faahitihia nei, eiaha i teie nei ao anaˈe ra, i te ao atoa râ a muri atu: 22 e ua tuu hoi i te mau mea atoa nei i raro aˈe i tana avae, e ua haapao hoi ia ˈna ei upoo i nia iho i te mau mea atoa i te ekalesia nei, 23 o to ˈna ïa tino, o te nehenehe-roa-raa ïa no ˈna no tei faaî i te mau melo atoa i te mau mea atoa nei.