Te faatiaraa a Mareko

12 Paraparau atura Iesu ia ratou na roto i te mau faahohoˈaraa: “Ua tanu te hoê taata i te vine,+ aua ˈtura, ô ihora i te hoê apoo taataahiraa vine, faatia aˈera i te hoê pare,+ horoa tarahu atura i ta ˈna faaapu i te tahi feia faaapu, e reva ˈtura i te ara.+ 2 I te tau ootiraa vine, tono ihora oia i te hoê tavini i te feia faaapu ra ia horoa mai ratou i ta ˈna tuhaa vine. 3 Haru aˈera râ te feia faaapu i te tavini, rutu ihora ia ˈna e faahoˈi maira ia ˈna ma te ore e horoa mai i te vine. 4 Tono faahou atura te fatu i te tahi atu tavini, tupai ihora ratou i to ˈna upoo e faahaama ˈtura ia ˈna.+ 5 Tono atura oia i te tahi â tavini, e taparahi pohe atura ratou ia ˈna. Mea rahi â ta ˈna i tono atu, ua rutuhia vetahi e ua haapohehia te tahi atu. 6 E i te hopea, tono atura te fatu vine i ta ˈna tamaiti here+ i te feia faaapu ra, a na ô ai: ‘E faatura ratou i ta ˈu tamaiti.’ 7 Na ô aˈera râ taua feia faaapu ra te tahi i te tahi: ‘Teie te taata o te fatu i teie faaapu.+ Mai, haere anaˈe e haapohe ia ˈna, a fatu atu ai tatou i teie faaapu.’ 8 Haru aˈera ïa ratou ia ˈna, haapohe ihora e faarue atura ia ˈna i rapae i te faaapu vine.+ 9 Eaha ta te fatu vine e rave? E haere mai oia e haapohe i te feia faaapu, a horoa tarahu atu ai i te faaapu vine i te tahi atu feia faaapu.+ 10 Aita outou i taio aˈenei i teie parau tei papaihia: ‘Te ofai ta te feia patu fare i faarue, ua riro mai ïa ei ofai tihi.*+ 11 No ǒ mai te reira ia Iehova* ra, e mea faahiahia roa no tatou’?”+

12 Taa ihora i te mau papai parau e te mau tahuˈa tiaau e o ratou ta Iesu e manaˈo ra a faahiti ai oia i te faahohoˈaraa, e hinaaro aˈera e haru ia ˈna, ua mǎtaˈu râ i te nahoa. Vaiiho maira ratou ia ˈna e reva ˈtura.+

13 I muri iho, tono maira ratou i te tahi mau Pharisea e vetahi o te pǔpǔ a Heroda ia Iesu ra, ia noaa oia ia ratou na roto i ta ˈna mau parau.+ 14 Tae maira ratou e na ô maira: “Orometua, ua ite matou e e taata parau mau oe, eita atoa oe e imi i ta te taata farii maitai, eita hoi oe e haapao i te huru rapaeau o te taata. Te haapii nei râ oe ia vetahi ê i te eˈa o te Atua ma te parau mau: Mea tano* anei ia au i te Ture ia aufau i te tute* ia Kaisara aore ra eita? 15 Ia aufauhia anei aore ra eiaha?” Taa ihora ia Iesu to ratou huru haavarevare e na ô atura: “Eaha outou e râmâ mai ai ia ˈu? Horoa mai na i te hoê denari* ia hiˈo atu vau.” 16 Horoa maira ratou e na ô atura Iesu: “No vai te hohoˈa e te iˈoa i nia iho?” Parau maira ratou: “No Kaisara.” 17 Na ô atura Iesu: “A faahoˈi i ta Kaisara ia Kaisara ra,+ ta te Atua râ i te Atua ïa.”+ Maere roa ihora ratou i ta ˈna parau.

18 Haere maira te mau Sadukea, o te parau ra e aita e tia-faahou-raa,+ e ui maira ia Iesu:+ 19 “Orometua, ua papai mai Mose e ia pohe te hoê taata, a vaiiho mai ai i ta ˈna vahine faaipoipo ma te tamarii ore, ia faaipoipo ïa to ˈna taeae ia ˈna e tia ˈi e ia fanau mai ta ˈna ei tamarii na to ˈna taeae tei pohe.+ 20 I vai na e hitu taeae, faaipoipo ihora te matahiapo i te vahine, i to ˈna râ poheraa, aita e tamarii ta ˈna. 21 Faaipoipo ihora te piti ia ˈna, pohe atura râ ma te tamarii ore, na reira atoa te toru. 22 O na hitu atoa tei pohe ma te tamarii ore. Pohe atoa ˈtura te vahine. 23 I te tia-faahou-raa, ei vahine oia na vai? I faaipoipo na hoi na hitu atoa ia ˈna.” 24 Na ô atura Iesu: “E ere anei no to outou ite ore i te mau Papai e e nafea te mana o te Atua e ohipa ˈi i hape ai outou?+ 25 Ia tia mai hoi ratou mai te pohe mai, eita te mau tane e faaipoipo e te mau vahine e horoahia ia faaipoipo, e riro râ ratou mai te mau melahi i te raˈi.+ 26 No te feia pohe râ o te faatia-faahou-hia mai, aita outou i taio i roto i te buka a Mose no nia i te raau taratara e ura ra, ua parau te Atua ia Mose: ‘O vau te Atua o Aberahama e te Atua o Isaaka e te Atua o Iakoba’?+ 27 E Atua oia no te feia ora, eiaha no te feia pohe. Ua hape roa outou.”+

28 E papai parau atoa to reira e faaroo ra i ta ratou paraparauraa. A faaroo ai oia i ta Iesu faataaraa tano i taua mau taata ra, ui maira oia: “Teihea te faaueraa rahi roa ˈˈe?”*+ 29 Pahono atura Iesu: “Te faaueraa rahi roa ˈˈe, teie ïa: ‘A faaroo mai, e Iseraela, o Iehova* to tatou Atua, hoê anaˈe ïa Iehova,* 30 e ia here oe ia Iehova* to oe Atua ma to oe aau atoa, ma to oe ora* atoa, ma to oe manaˈo atoa e ma to oe puai atoa.’+ 31 Teie te piti: ‘Ia here oe i to oe taata tupu mai ia oe iho.’+ Aita ˈtu e faaueraa rahi aˈe i teie e piti.” 32 Na ô maira te papai parau: “Orometua, o te parau mau ta oe e faahiti mai nei: ‘Hoê anaˈe Atua, aita ˈtu maori râ o ˈna anaˈe,’+ 33 e te hereraa ia ˈna ma te aau atoa, ma te feruriraa atoa e ma te puai atoa, e te hereraa i to oe taata tupu mai ia oe iho, ua hau aˈe ïa i te mau tusia taauahi e te mau tusia animara atoa.”+ 34 Taa ihora ia Iesu te paari o ta ˈna pahonoraa e na ô atura: “Aita oe i atea roa i te Faatereraa arii a* te Atua.” Taiâ ihora râ ratou paatoa i te ui faahou ia ˈna.+

35 A haapii noa ˈi râ Iesu i te taata i roto i te hiero, na ô atura oia: “No te aha te mau papai parau e na ô ai e huaai te Mesia no Davida?+ 36 Arataihia e te varua moˈa,+ ua parau Davida iho: ‘Ua parau Iehova* i to ˈu Fatu: “A parahi i to ˈu rima atau nei e ia tuu roa vau i to oe mau enemi i raro aˈe i to oe avae.”’+ 37 O Davida iho tei parau i te Mesia e Fatu, mea nafea ïa e huaai ai oia no ˈna?”+

Ua au roa te nahoa rahi i te faaroo i ta ˈna parau. 38 A haapii ai oia i te taata, parau atura Iesu: “A ara i te mau papai parau, mea au na ratou e hahaere ma te ahu roa, ia arohahia ratou ma te faatura na te mahora+ 39 e e parahi i mua roa* i roto i te mau sunago e i te mau vahi faataahia no te mau manihini tiaraa teitei i te mau tamaaraa.+ 40 E rave haapau ratou i te faufaa a te mau vahine ivi e e faaroa i te pure ia hiˈohia mai ratou. E faautuahia ratou ma te etaeta ˈtu â.”

41 Parahi ihora Iesu i te vahi e ite ai oia i te mau afata*+ moni e mataitai atura i te taata ia tuu i te moni i roto. Mea rahi te moni ta te feia taoˈa rahi e tuu ra i roto.+ 42 Haere maira te hoê vahine ivi veve e tuu maira e piti moni huˈa haihai roa.*+ 43 Pii ihora Iesu i ta ˈna mau pǐpǐ ia tapiri mai e na ô atura: “Oia mau ta ˈu e parau atu: Mea rahi aˈe ta teie vahine ivi veve i tuu i ta tera mau taata atoa i roto i te mau afata moni.+ 44 Ua tuu hoi ratou paatoa i ta ratou moni hau, o ˈna râ, noa ˈtu to ˈna veve, ua tuu pauroa ïa i ta ˈna moni e ora ˈi oia.”+