Pure

Auraa: Parau haamoriraa faataehia ma te reo puai aore ra ma te mamû i roto i te feruriraa, i te Atua mau aore ra i te mau atua haavare.

Te manaˈo ra anei oe e, mai e rave rahi, aita e faaroohia ra ta oe mau pure?

Eaha te mau pure ta te Atua i ineine i te faaroo?

Sal. 65:2; Ohi. 10:34, 35: “E tei faaroo i te pure ra, e tae atoa mai te taata atoa ia oe ra.” “E ore te Atua e haapao i te huru o te taata. O tei mǎtaˈu ra ia ˈna, e o tei rave i te parau-tia i te mau fenua atoa ra, o te itehia mai ïa e ana.” (Aita ïa e faufaaraa to te aiˈa, to te û o te iri aore ra to te tiaraa totiale o te taata iho. Te mea faufaa, o te mau manaˈo hohonu o te mafatu e te huru oraraa o te taata iho.)

Luka 11:2: “E na ô outou ia pure, E to matou Metua i te ao ra, ia raa to oe iˈoa.” (Te faatae ra anei oe i ta oe mau pure i te Metua, tei mairihia te iˈoa Iehova i roto i te Bibilia? Aore ra te pure ra oe i te mau “peata”?)

Ioa. 14:6, 14: “Ua parau atura Iesu ia ˈna, O vau te eˈa, e te parau mau, e te ora, aore roa e taata e tae i te Metua ra, maori râ ei ia ˈu. O ta outou i ani ma to ˈu ra iˈoa, na ˈu ïa e rave.” (Te pure ra anei oe na roto i te iˈoa o Iesu Mesia, ma te farii e ei taata hara e titau oe i to ˈna arai?)

Ioa. 1, 5:14: “Teie taua taiâ ore no tatou i noaa ia ˈna ra, ia ani noa ˈtu tatou i te mau mea atoa i au ia ˈna ra, te faaroo maira ïa oia ia tatou.” (Ia noaa mai teie huru tiaturiraa, e tia ia ite oe na mua i te hinaaro o te Atua. I muri iho ia papu ia oe e te tuea ra ta oe mau aniraa e to ˈna hinaaro.)

Pet. 1, 3:12: “Tei te feia parau-tia hoi to te Fatu ra mata, e tei ta ratou pure hoi to ˈna tariˈa; e mata ê râ to te Fatu i te feia i rave i te ino ra.” (Ua rave anei oe i te taime no te hiˈopoa i te Bibilia ia ite i ta Iehova e manaˈo ra e mea tia e e mea ino?)

Ioa. 1, 3:22: “E ta tatou e ani atu ia ˈna ra, e noaa ïa ia tatou, no te mea, te haapao nei tatou i ta ˈna parau, e te rave nei i te mau mea e mauruuru ai oia ra.” (E hinaaro mau anei oe e faaoaoa i te Atua e e tutava ra anei oe i te haapao maite i ta ˈna mau faaueraa ta oe i ite aˈena?)

Isa. 55:6, 7: “E imi outou ia Iehova, oi itea ˈi oia, e tiaoro outou ia ˈna, oi fatata mai oia: e faarue te paieti ore i to ˈna haerea, e te taata parau-tia ore i to ˈna manaˈo: a hoˈi ai oia ia Iehova, e na ˈna oia e aroha mai; e hoˈi i to tatou Atua, te rahi ra hoi ia ˈna te faaore i te hara.” (Na roto i to ˈna aroha, ua tae roa te Atua i te ani i te feia e rave ra i te ino ia tiaoro ratou ia ˈna na roto i te pure. Ia noaa râ te farii maitai o te Atua, e tia ia ratou ia tatarahapa ma te haavare ore i ta ratou mau ohipa e mau manaˈo iino, e ia taui i to ratou haerea.)

No teihea mau tumu e ore ai te Atua e faaroo i te mau pure a te hoê taata?

Mat. 6:5: “E ia pure hoi oe ra, eiaha mai ta te feia haavare, o te hinaaro i te pure tia noa i te mau sunago, e te poro aroâ ra, ia hiˈohia ratou e te taata. Oia mau ta ˈu e parau atu ia outou na, Ua noaa ta ratou utua.” (Hiˈo atoa Luka 18:9-14.)

Mat. 6:7: “E ia pure outou ra, eiaha ia rahi te parau rii faufaa ore mai ta te mau Etene ra; o tei manaˈo e tei te rahi o te parau e itehia mai ai ratou.”

Mas. 28:9: “O tei fariu ê i to ˈna tariˈa eiaha ia ite i te ture [a te Atua], e riro ta ˈna pure ei mea faufau.”

Mika 3:4: “Ei reira ratou e pii atu ai ia Iehova, e ore râ oia e faaroo mai ia ratou; e purou oia i to ˈna mata ia ratou ia tae i taua mahana ra, no te mea ua ino ta ratou parau.”

Iak. 4:3: “Te ani ra hoi outou, e aore a outou i noaa, no te mea te hapa na ta outou aniraa, ia pau i te puhurahia e outou i to outou hinaaro tia ore ra.”

Isa. 42:8, V.C.J.S.; Mat. 4:10: “O vau, o te Fatu [“Yahvé,” Jé; “Iehova,” MN], o toˈu ïa ioa; e ore au e horoa i toˈu hanahana ia vetahi è, e i taˈu haamaitairaa i te mau hohoa tarai hia.” “O to Atua o Iehova ta oe e haamori, e oia anaˈe ra ta oe e faaroo.” (Hiˈo atoa Salamo 115:4-8, aore ra 113B:4-8 i roto i te V.C.J.S.) (E huru haamoriraa te pure. Ia pure oe i mua i te mau idolo aore ra te mau hohoˈa, ia manaˈo oe e, e oaoa anei te Atua i te reira?)

Isa. 8:19: “E ia parau mai ratou ia outou e, E imi tia i te taura e te hiˈohiˈo; i te feia tei roto te parauraa ra, o tei mutamuta ra; eiaha te taata e imi i to ratou iho Atua? e imi tia ˈtu ratou i tei pohe i te parau o te taata ora?”

Iak. 1:6, 7: “E ani . . . oia ma te faaroo, eiaha e feaa, o tei feaa ra, e au ïa i te aru miti i patuhia e te mataˈi e fetoitoi aˈera. Eiaha hoi te reira taata e manaˈo e, e faufaa ta ˈna e noaa i te Fatu ra.”

E tia ia pure no teihea mau tumu tano?

Mat. 6:9-13: “E na ô outou ia pure: [1] E to matou Metua i te ao ra, ia raa to oe iˈoa. [2] Ia tae to oe ra hau. [3] Ia haapaohia to oe hinaaro i te fenua nei, mai tei te ao atoa na. [4] Ho mai i te maa e au ia matou i teie nei mahana. [5] E faaore mai i ta matou hara, mai ia matou atoa e faaore i tei hara ia matou nei. E [6] eiaha e faarue ia matou ia roohia-noa-hia e te ati, e faaora râ ia matou i te ino.” (A tapao na e e tia ia anaanatae na mua roa i te iˈoa e te opuaraa a te Atua.)

Sal. 25:4, 5: “E faaite mai oe ia ˈu i to mau eˈa, e Iehova; e haapii mai oe ia ˈu i to mau haerea: e faaite mai oe ia ˈu i te parau mau na oe ra, e haapii mai hoi ia ˈu; o oe hoi te Atua o to ˈu ora.”

Luka 11:13: “E tena na, te ite na outou i te horoa i te mea maitai na ta outou tamarii, ino noa ˈi outou na, e rahi atu ïa to outou Metua i te ao ra i te horoa i te [varua moˈa] i te feia i ani atu ia ˈna ra.”

Tes. 1, 5:17, 18: “Eiaha e tuutuu i te pure. E haamaitai i te Atua i te mau mea atoa ra.”

Mat. 14:19, 20: “Ua rave ihora [Iesu] i na pane e pae ra e na iˈa e piti ra, hiˈo atura i nia i te raˈi, haamaitai ihora, vavahi ihora i te mau pane, tuu atura i te mau pǐpǐ ra; e na ratou i opere na te mau taata atoa ra. Amu anaˈe ihora ratou e paia aˈera.”

Iak. 5:16: “E pure . . . te tahi i te tahi.”

Mat. 26:41: “E ara e e pure hoi, ia ore outou ia roohia e te ati.”

Phil. 4:6: “Eiaha outou e ahoaho noa ˈtu i te mau mea atoa nei; e faaite hua râ i to outou hinaaro i te mau mea atoa nei i te Atua, i te pure, i te aniraa ˈtu ma te haamaitai.”

Ia parau mai te hoê taata e:

‘A pure na mua, e i muri iho a horoa mai i ta oe poroi’

E nehenehe oe e pahono e: ‘Te oaoa nei au i te iteraa e te haafaufaa rahi nei oe i te pure. Te pure pinepine atoa nei te mau Ite no Iehova. Aita paha oe i ite i te mau faaueraa a Iesu no nia i te mau taime e tia ˈi ia pure e i te huru raveraa i te reira. Ua ite anei oe e ua faaue o Iesu i ta ˈna mau pǐpǐ eiaha e pure i mua i te taata no te faaite i to ratou paieti? . . . (Mat. 6:5)’ E nehenehe oe e parau i muri iho e: ‘A tapao na e te faahiti ra o Iesu i muri iho i te mau mea e tia ia haapao na mua roa e ta tatou e tuu i te parahiraa matamua i roto i ta tatou mau pure. O ta ˈu ïa e haere maira e faaite ia oe i teie mahana. (Mat. 6:9, 10)’

Aore ra e nehenehe oe e parau e: ‘Ua ite au e te rave nei te mau melo o te tahi mau pǔpǔ faaroo i te reira. Aita râ te mau Ite no Iehova e na reira ra no te mea ua faaue o Iesu ia rave ratou i ta ratou ohipa pororaa na roto i te hoê ravea ê atu. Aita oia i parau e, “Ia tomo atu outou i roto i te hoê fare, a pure na mua,” aita, ua parau râ oia i te mea ta tatou e nehenehe e taio i roto i te Mataio 10:12, 13. . . . Te faaite ra te irava 7 i te tumu parau o ta ratou mau tauaparauraa. . . . Nafea teie Basileia e nehenehe ai e tauturu i te taata mai ia oe aore ra ia ˈu? (Apo. 21:4)’