Июнь

Бирги векте христианнар өскерлиишкиннерге чаңчыгып өөренип алырга, Иегова оларны йөрээген. Оларны манаваан үезинде бо-ла истеп сүре бээр турган. Варнава биле Павел элчин Листрага суртаалдап турда, чүү болган? Эгезинде улус оларны аажок чылыг-чымчак уткуп алган. Ынчалза-даа оларның чамдыызы удурланыкчыларның салдарынга алыскаш, Павелди даштар-биле соп-соп, каапкаш чорупкан (Аж.-ч. 14:19). Варнава биле Павел суртаалын өске черге уламчылаан. Түңнели кандыг болган? Олар хөй өөреникчилерни белеткеп, чугаа-сөзү болгаш үлегер-чижээ-биле акы-угбаларны быжыктырып турганнар (Аж.-ч. 14:21, 22). Павел биле Варнаваның хенертен болган истеп сүрүүшкүннерге дүжүп бербээни хөй улуска ажыктыг болган. Бир эвес Иегованың даалгазын күүседип тургаш, дүжүп бербес болзувусса, эңмежок хөй йөрээлдерни алыр бис. w23.04 ар. 16—17, абз. 13, 14

Давид дыка хөй дайзыннарлыг турган болгаш, Иеговадан үргүлчү дуза дилеп чораан. Иегова ооң мөргүлдерин дыңнап, оларга харыылап турар деп, ыр күүседикчизи Давид чигзинмес турган. Силер база аңаа бүзүреп болур силер. Библия Иегова биске бергелерни ажып эртер күштү база мерген угаанны албан бээр деп бүзүредип турар. Ол кады бүзүрээн ха-дуңмавыс база аңаа бараалгавайн турар улус таварыштыр дузалап болур. Ийе, Иегова чамдыкта мөргүлдеривиске күзээнивис дег харыылавас. Ынчалза-даа ол оларга албан харыылаар деп билир бис. Ол биске өй-шаанда херек чүүлдү бээр. Ынчангаш Иеговага бүзүрел-биле улаштыр мөргүүрүн уламчылаңар. Амгы үеде Иегова силер дээш сагыш салып чоруур база чаа делегейге бүгү амылыгларның күзээн чүвезин хандырар деп чигзинмес бис (Ыд. ыр. 144:16). w23.05 ар. 8, абз. 4; ар. 13, абз. 17, 18

Сорулгаңарны чедип алгаш, кандыг йөрээлдер алырыңарны боданыңар. Бир эвес сорулгаңар Библияның номчулгазы азы мөргүл-биле холбашкан болза, Иегова-биле найыралыңар кайы хире быжыг апаарын боданыңар (Ыд. ыр. 144:18, 19). А бир эвес кандыг-бир шынарны сайзырадып алыксап турар болзуңарза, өске улус-биле хамаарылгаңар кайы хире экижип болурун боданыңар (Кол. 3:14). Сорулганы чедип алыксап турар шупту чылдагааннарыңарны саазынга чүге тодаргай бижип ап болбас деп? Ынаар үргүлчү бакылап туруңар. Оон ыңай силерни деткиптер улус-биле аралажыңар (У. ч. 13:20). Ынчалза-даа шыны херек, бистиң шуптувустуң сорулгаже чүткүүр хөңнүвүс чок үелер турар. Ынчаарга олче чүткүп шыдавас бис бе? Чок. Бурунгаар чүткүүр дээш, чеже-даа күзеливис чок болза, өске аргаларны ажыглап болур бис. Ындыг үелерде бот-сагылга чуруму херек апаар, ынчалза-даа түңнели бисти чөгендирбес. w23.05 ар. 27—28, абз. 5—8

Харыысалга чүктээрин билири бачыттарывысты, частырыгларывысты миннип, ону катаптавазын кызып, чарышка улаштыр киржиринге дузалаар. Чазыпканда база ону өскертири канчап-даа болдунмас болганда байдалды хүлээп алыңар. Бодуңарны, өске улусту буруудадып, агартынып, сагыш-сеткилиңерниң, угаан-бодалыңарның күжүн үндүрбеңер. Ооң орнунга частырыыңарны миннип, амгы үеде кылып шыдаар чүүлче кичээнгейни салыңар. Бодуңарны буруулуг деп санаар болзуңарза, Иеговага биче сеткилдиг мөргүп, өршээлден дилеңер (Ыд. ыр. 24:11; 50:5, 6). Аарышкы чедирген кижиге бурууңарны минниңер. Херек болза, хуралдың удуртукчуларындан дузадан дилеңер (Иак. 5:14, 15). Частырыыңардан өөренип, ону катаптавазын кызыңар. Ынчан Иегова силерни өршээп, херек деткимчени бээри чигзиниг чок (Ыд. ыр. 102:8—13). w23.08 ар. 28—29, абз. 8, 9

Иодай Иоас хаанны чагып сургап турда, ол шын алдынып турган. Аныяк хаан дээди бараалгакчының эки салдарынга алзып, Иегованы өөртүксеп чораан. Ынчалза-даа Иодай чок апаарга, Иоас Иегованы каапкан нояннарны дыңнап эгелээн (2 Чыл. 24:4, 17, 18). Ол чүүл Бурганны хомудадыпкан. Ынчангаш «Иегова оларны Бодунче ээлдирер дээш медээчилерин чорудуп турган... ынчалза-даа олар тооп дыңнавас болган». Олар безин Иодайның оглун Захарияны дыңнавайн турган. А ол болза, Иегованың медээчизи болгаш өргээ бараалгакчызы чораанындан аңгыда, Иоас-биле кады төрээннер оолдары турган. Иоас хаан Захарияны өлүрерин дужааган (2 Чыл. 22:11; 24:19—22). Иоас Иеговадан кортпас турган. Иегова: «Мээң ат-алдарымны базар улус куду көрдүртүр!» — деп чугаалаан болгай (1 Хаан. 2:30). Соонда эвээш санныг сирий аг-шериг Иоастың «дыка хөй санныг иудей аг-шеригни» кыра шаап каапкаш, «аар балыглаттырган Иоасты чыттырзын арттырып каан» (2 Чыл. 24:24, 25). Иоастың чалчалары аңаа удур сүлчээ кылгаш, Захарияның ханын төккени дээш, ону өлүрүп каан. w23.06 ар. 18—19, абз. 16, 17

Павел элчин өөреникчилер белеткеп, буянныг медээни суртаалдап, Эфеске элээн хөй үени эрттирген (Аж.-ч. 19:1, 8—10; 20:20, 21). Акы-угбаларга Павел дыка ынак болгаш, оларның Иеговага шынчы артарын күзеп турган. Эфесчилер алыс шын христианнар апаарының мурнунда меге чүдүлгеге болгаш бүдүүлүк чоруктуң кулданыышкынынга турган. Оон аңгыда, Эфестиң чурттакчыларының мөзү-шынары кудулаанындан, меге шажынның байырлалдарынга болгаш театр көргүзүглеринге бужар сөстер бо-ла дыңналыр турган (Эф. 5:3). Хөй эфесчилер «арын-нүүрүн артынга» кагган (азы «аарышкы миннивес апарган») (Эф. 4:17—19). Иегованың чүнү эки-багай деп санаар чүүлүн билбес болгаш, арын-нүүрү дашталып калган. Ынчангаш Павел оларны «угааны караңгылаан... болгаш, Бурганның... бээри амыдыралдан оспаксыраан» деп бижээн. Чамдык эфесчилер ол дүмбей караңгыдан үне берген. w24.03 ар. 20, абз. 2, 4; ар. 21, абз. 5, 6

Гедеонга даалгазын күүседиринге хөй күжениишкиннер херек турган. Кажан мадианнар дүнеки тулчуушкун соонда дезиптерге, Гедеон оларны сүрүп чорупкан. Олар дайзыннарын Изреел шынаазындан Иордан хемге чедир сүрүп келген (Башт. 7:22). Гедеон Иорданның чанынга доктаап турупкан бе? Чок! Ол 300 дайынчызы-биле шылап калган-даа болза, хемни кешкеш, дайзыннарын сүрерин уламчылаан. Түңнелинде олар мадианнарга чыпшыр четкеш, оларны кыра шаап каапкан (Башт. 8:4—12). Иегова күштү бээр деп, Гедеон бүзүреп турган. А ол ону чөгендирбээн (Башт. 6:14, 34). Гедеон шерии-биле мадиан хааннарны сүрүп турда, демгилери тевелерге олурупкаш, дезип бар чыткан. А израильчи шериглер оларны чадаг сүрүп чораан (Башт. 8:12, 21). Ындыг-даа болза, израильчилер Бурганның дузазы-биле дайзыннарынга четкеш, оларны кыра шаап кааннар. Амгы үеде удуртукчулар Иегова херек үеде оларга күштү бээр деп чигзинмес, чүге дизе, «Ол могавас, шаа төнмес» болгай (Иса. 40:28, 29). w23.06 ар. 6, абз. 14; ар. 7, абз. 16

Кандыг-даа шенелдеге таварышсывысса, бистиң чүрээвис бердинген артып болур. Ынчангаш Иеговага бүзүреңер. Иегованың айтыышкыннарынга бүзүрел Варакка тиилеп алырынга канчаар дузалаанын көрүптээлиңер. Израильчилерниң дозуг-камгалалдары, чыдалары чок-даа болза, Иегова Варакка Ханаанның шериг баштыңчызының чепсегленген аг-шерии-биле тулчурун дужааган (Башт. 5:8). Девора медээчи Сисараже болгаш ооң 900 дайынчы тергелеринче уткуштур шынааже бадып кээр кылдыр Варакка чугаалаан. Дайзынның тергелеринге ажык черге дайылдажыры эптиг-даа болза, Варак дыңнангыр болган. Ооң дайынчылары Фавор дагдан дүжүп кел чыдырда, Иегова дайзыннарже дээрден чаъс-чайыкты кудупкан. Сисараның дайынчы тергелери малгашка кадалып каарга, Бурган Варакка тиилелгени хайырлаан (Башт. 4:1—7, 10, 13—16). Бис база Иеговага болгаш ооң төлээлери таварыштыр берген айтыышкыннарынга бүзүрээр болзувусса, тиилелгени алыр бис. w23.07 ар. 19, абз. 17, 18

Шыдамык чорук камгалалывыс-биле сырый харылзаалыг. Бурунгу үениң бараалгакчылары Бурганның аазаашкыннарының күүсеттинерин шыдамыы-биле манап чораан. Бис база ынчаар манаар ужурлуг бис (Евр. 6:11, 12). Библия христианнарны тараачыннарга дөмейлээн (Иак. 5:7, 8). Тараачын кижи черин кызып тарааш, суггарып турар-даа болза, өзүмнерниң кажан үнерин билбес. Ынчалза-даа ол дүжүт ажаап аарынга чигзинмейн, шыдамыы-биле манаар. Бистиң база ажыл-херээвис хөй. Христостуң «кандыг хүнде чедип кээрин» билбес-даа болзувусса, даалгазын кызымаккай күүседип турар бис (Мф. 24:42). Иегова аазаашкыннарын шуптузун үезинде күүседиптер деп чигзинмейн, шыдамыы-биле манап турар бис. Шыдамык эвес болзувусса, манаашкын аар чүък апаар, ынчан Иеговадан ырап эгелээр азы кезек таалал сүрүп чоруптар бис. Төнчүзүнге чедир шыдашкаш, камгалалды алыр бис (Мих. 7:7). w23.08 ар. 22, абз. 7

Даниил 2:41—43-те өттүр билген медеглелдерни Ажыдыышкын, Даниил номнарында медеглелдер-биле деңнептерге, ооң таваңгайлары делегейни баштаан Англи-Америк күрүне деп түңнелге кээп болур. Даниил ол күрүнениң «хааннаашкынын чамдыкта быжыг, бир чамдыкта бустуучал болур-дур» дээн. Чүге? Дой-биле деңнээн бөдүүн чон ол күрүнеге демир күжүн көргүзеринге шаптыктап турар. Даниилдиң көжээни канчаар бижээнинден каш чугула алыс шынны билип ап болур бис. Бирээде, Англи-Америк делегей чергелиг күрүне улуг күжүн каш-даа көргүскен. Чижээ, ийи делегей дайыннарын тиилээринге ол улуг салдарлыг болган. Ынчалза-даа ол делегей чергелиг күрүнени бодунуң-на хамаатылары чазаанга удурланып, боттарының аразында демисели-биле кошкадып турар. Ол байдал өскерилбес. Ийиде, Бурганның Чагыргазы шупту кижи чазактарын узуткап каар үеде шак ол делегей чергелиг күрүне турар. w23.08 ар. 10—11, абз. 12, 13

Бергелер чүдүрлүп кээрге, Давид бодун күш чок кылдыр миннир турган (Ыд. ыр. 17:5, 6). Ынчан Иегова аңаа күш кирип алырынга дузалажып, харыксыраан эжин «хөлбең ногаан шынааларга одарладыр», суг чанынга дыштандырар чораан. Ооң ачызында Давид күш кирип, улаштыр бараалгап шыдаан (Ыд. ыр. 17:29—33; 22:2). Чуртталгавыска бисти чуура базып кээр байдалдар турар. Ынчалза-даа Иегованың ачызында шыдажыптар бис (Ыы. 3:22; Кол. 1:11). Давидтиң дайзыннары хөй болгаш, ооң амы-тыны хыл кырынга турган. Ынчалза-даа Иегованың ынакшылы аңаа айыыл чок минниишкинни берген. Байдал бүрүзүнде Иегова чанында деп билири Давидти коргуушкундан эмнеп турган, ынчангаш ол мынчаар ырлаан: «Ол мени... коргар бүгү чүүлдеримден камгалап кагды» (Ыд. ыр. 33:5). Иегованың күштүг ынакшылының ачызында ол коргуштарын тиилеп алган. w24.01 ар. 30, абз. 15—17

Иоас кандыг багай үлегер көргүскен? Дээди бараалгакчы Иодай чок апаарга, Иоас багай салдарлыг Иудеяның нояннары-биле каттыжып, оларны дыңнап эгелээн (2 Чыл. 24:17, 18). Ындыг эш-өөр-биле эдеришпээни дээре турган. Багай нояннарның аайынче киргеш, ону чагып сургап турган төрел акызы Захарияны өлүрер кылдыр, Иоас дужаал үндүрген (2 Чыл. 24:20, 21; Мф. 23:35). Кандыг кончуг угаан чок чорук боор! Эки эгелээн-даа болза, төнчүзүнде Иоас ойталакчы, өлүрүкчү апарган. Түңнелинде ол бодунуң-на чалчаларының холундан өлген (2 Чыл. 24:22—25). Бир эвес ол Иеговага база аңаа ынак улуска дыңнангыр чораан болза, ооң чуртталгазы көңгүс өске боор турган. w23.09 ар. 9, абз. 6

Иисус Пётрну Бурганга шынчы артып шыдаар деп билгеш: «Кортпа» — деп чымчаа-биле оожургаткан. Дээргиниң бүзүрелдиг сөстери Пётрнуң чуртталгазын өскертипкен. Соонда ол акызы Андрей-биле балыктаар ажылын каггаш, чагдырган Чагырыкчыны эдерип чорупканнар. Иегова оларны элбээ-биле йөрээген (Мк. 1:16—18). Пётр Иисусту эдерип чорааш, дыка хөй кайгамчыктыг болуушкуннарны көрген. Дээргизи ооң караанга аарыг улусту экиртип, аза-буктарны сывырып, өлген улусту безин диргизип чораан (Мф. 8:14—17; Мк. 5:37, 41, 42). Оон аңгыда, Пётр Иисустуң алдарын көстүүшкүнге көргеш, бүгү чуртталгазында сактып алган (Мк. 9:1—8; 2 Пет. 1:16—18). Пётр Иисустуң өөреникчизи апарбаан болза, ол хуулгаазыннарны көрбес турган ийик. Коргуштарга база багай бодалдарга алыспайн, йөрээлдер алганын сактып келгеш, ол аажок өөрүүр турган чадавас. w23.09 ар. 21, абз. 4, 5

Пётр элчин бирги чагаазында күштүг ынакшыл бир-ийи эвес, а «хөй... бачытты» өршээринге дузалаар деп бижээн (1 Пет. 4:8). Хөй чылдар бурунгаар Иисустуң өршээринге өөреткенин ол сактып келген чадавас. Хирези ол үеде Пётр акызын 7 катап өршээри дыка эки деп санап чораан. А Иисус аңаа база шуптувуска 77 катап, азы төнчү чок, өршээрин чугаалаан (Мф. 18:21). Ынчаар өршээри берге апарза, муңгараваңар! Шупту бачыттыг болганывыста, чамдыкта өршээри белен эвес. Ынчалза-даа багай минниишкиннерден адырлып, тайбыңны тургузар дээш, болдунар-ла чүвени кылыры чугула. w23.09 ар. 29, абз. 12

Иона балык иштинге Бурган ооң буруузунганын көрүп, дилээнге албан харыылаар база албан дузалажыр деп чигзинмээн. Иона черге үнүп келгеш, Иеговадан чаа даалга алырынга белен болган (Иона 2:10—3:4). Сагышсыралдар дээш мөргүүрү берге апаар-дыр бе? Азы шинчилел кылыр күжүңер чок боор-дур бе? Иегова силерни кымдан-даа артык эки билип турар деп утпаңар. Ынчангаш мөргүлүңер бөдүүн-даа болза, Иегова силерге херек чүүлдү бээр (Эф. 3:20). Бир эвес мага-бот азы сагыш-сеткил аарышкызы номчуттунарынга, шинчилел кылырынга шаптыктаар болза, Библияның база ном-дептерлерниң аудиозун дыңнаарын шенеп көрүңер. JW.ORG сайтыдан ырыны дыңнап азы видеону көрүп болур. Мөргүүр, организациявыстың берип турар бүгү чүүлүн ажыглаар болзуңарза, Бурган-биле найыралыңар быжыгып база ол силерни күш киирер. w23.10 ар. 13, абз. 6; ар. 14, абз. 9

Иерусалимге өргээлер биле ыдыктыг майгынның тургузуу дөмей: ыдыктыг өрээл биле эң ыдыктыг өрээлди көжегелей аңгылаан (Евр. 9:2—5; Хост. 26:31—33). Ыдыктыг өрээлге алдын чырыткы, фимиам өрттедир бедигээш болгаш өргүл далганы салыр стол турган. Ынаар хүлээлгезин күүседирде чүгле «шилип чаап каан» бараалгакчылар кирип болур турган (Сан. 3:3, 7, 10). Эң ыдыктыг өрээлде Иегованың ында барын илереткен ыдыктыг алдын аптара салган (Хост. 25:21, 22). Көжеге артынче чүгле Өндүр улуг арыглаашкын хүнүнде дээди бараалгакчы кирер эргелиг турган (Лев. 16:2, 17). Дээди бараалгакчы бодунуң болгаш бүгү чоннуң бачыттарын дуглаар дээш, дириг амытан ханы эккээр турган. Үе эрткенде, Иегова өргээ-майгынның кезектери чүнү илереткенин бараалгакчыларынга тайылбырлап берген (Евр. 9:6, 7). w23.10 ар. 27, абз. 12

Бот-боттарывыска ынак болурунче Бурганның Сөзү хөй катап кыйгырып турар (Ин. 15:12; Рим. 13:8; 1 Фес. 4:9; 1 Пет. 1:22; 1 Ин. 4:11). Ынакшыл кымга-даа көзүлбес чүректе болганда, акы-угбалар ону канчаар билип каар? Ынакшылды аксы-сөзүвүс болгаш ажыл-херээвис-биле көргүзүп болур бис. Ынакшылды көргүзер аргалар аңгы-аңгы. «Бот-боттарыңарга шынны чугаалаңар» (Зах. 8:16). «Эп-найыралдыг амыдыраңар» (Мк. 9:50). «Бирээңер өскеңерни бодундан артык хүндүткеп көрзүн» (Рим. 12:10). «Бот-боттарыңарны [эп-сеткил-биле]... хүлээп алыңар» (Рим. 15:7). «Ак сеткилдии-биле өршээңер» (Кол. 3:13, Чаа делегей). «Аар-бергелерни ажып эртеринге бот-бодуңарга дузалажыңар» (Гал. 6:2). «Бот-бодуңарны аргалап чоруңар» (1 Фес. 4:18). «Бот-боттарыңарны... быжыглаңар» (1 Фес. 5:11). «Бот-боттарыңар дээш мөргүңер» (Иак. 5:16). w23.11 ар. 9, абз. 7, 8

Быжыг бүзүрел херек шиитпирлерни хүннүң-не хүлээп турар бис. Чижээ, аралажырынга, оюн-тоглаага, эртем-билигге, өг-бүле тударынга, ажы-төлге, ажыл-агыйга хамааржыр айтырыгларны. Бодувуска мындыг айтырыгларны салыры чугула: «Бо делегейниң төнчүзү мыя бо келген база ону удавас Бурганның чаа делегейи солуптар деп чүүлге быжыг бүзүрелим шиитпирлеримден көскү бе? Келир үеже идегел чок азы чаңгыс чурттаар чуртталгавыс бо-дур деп бодап чоруур улустуң салдарынга алзып турар мен бе?» (Мф. 6:19, 20; Лк. 12:16—21). Бир эвес чаа делегей мыя бо келген деп ыяк бүзүрээр болзувусса, эң-не мерген угаанныг шиитпирлерни хүлээр бис. Шенелделерге, истеп сүрүүшкүннерге, хоочураан аарыгларга азы холувусту сула салып болур өске-даа бергелерге таваржы бээривиске, биске быжыг бүзүрел херек. Эгезинде бис шенелдени чоргаар хүлээп аар бис. Ынчалза-даа ол узамдыгып туруп бээрге, (а ол колдуунда ындыг боор) туруштуг артар дээш база Иеговага улаштыр-ла бараалгаарынга биске быжыг бүзүрел херек апаар (1 Пет. 1:6, 7). w23.04 ар. 27, абз. 4, 5

Иегова мөргүлдеривиске дүүштүр алдынарывысты манаар. Чижээ, бир акывыс регион шуулганы баарда, ажылындан айтыртынып аар дээш, Иеговадан дуза дилеп турар. Бурган бараалгакчызынга канчаар харыылаар? Чугаа кылырынга дидим чорукту бээр. Ынчалза-даа акывыс даргазынга боду баргаш чугаалажыр. Баштай чөпшээрешпеске, ол катап-катап баар апаар. Өске ажылчын-биле солчур азы төлевир чок шөлээ алыр чадавас. Иегова мөргүлге соксаал чок болурувусту күзээр. Иисустуң сөстеринден алырга, чамдык мөргүлдерниң харыызын дораан албас бис (Лк. 11:9). Ынчангаш дүжүп бербеңер! Катап-катап мөргүңер (Лк. 18:1—7). Ынчан дилээңер түр када күзел эвес, а силерге чугула чүүл деп Иеговага көргүзер силер. Оон аңгыда, Иегова силерге дузалап шыдаар деп бүзүрээриңерни ол көрүп каар. w23.11 ар. 22, абз. 10, 11

Иегова өңнүү Авраамга ооң салгалындан шупту чоннар йөрээттирер деп аазаан (Э. д. 15:5; 22:18). Ол күштүг бүзүрелиниң ачызында Бурганның аазаашкынынга чигзинмээн. Ынчалза-даа Авраам барык 100 харлыг, а кадайы 90 хар чеде бээрге безин ажы-төл чок турганнар (Э. д. 21:1—7). Библияда: «Авраам дөмей-ле... эңдерик хөй чоннарның адазы» апаарынга бүзүрээнин бижээн (Рим. 4:18). Авраамның идегели бүде бергенин билир силер — дыка үр манаан оглу, Исаак төрүттүнүп келген. Авраамның идегелиниң үндезини чүде? Авраам Иегованы дыка эки билир болгаш, Бурган аазаашкынын албан күүседир деп бүзүреп турган (Рим. 4:21). Иегова Авраамны бүзүрели дээш чөптүг-шынныг деп санааш, аңаа ээ көрүнген (Иак. 2:23). w23.12 ар. 8, абз. 1, 2

Бүзүрелдиг акывыс даанган ажылын арын-нүүрлүг кылыр. Иисустуң тергиин үлегерин көрээлиңер. Ол ажыл-херекти харыысалга чок, хол дашты-биле кылбас турган. Чеже-даа берге болза, Иисус Иегованың шупту даалгаларын күүсеткен. Ол кижилерге, өөреникчилеринге ынак болгаш, чуртталгазын берипкен (Ин. 13:1). Иисусту өттүнүп, сеңээ бүзүреп дааскан ажыл-херек бүрүзүн сеткилиңден кыл. А бир эвес ону канчаар кылырын билбес болзуңза, дуржулгалыг акылардан дузаны биче сеткилдиг диле. Немей ажыл кылбас, чүгле дүрүм сагыыр кижилер бар. Кажан-даа ындыг болба! (Рим. 12:11). Даалга бүрүзүн кижилер дээш эвес, а Иеговага дег күүседип, эгелээн чүүлүңнү эчизинге чедир (Кол. 3:23). Тергиин эвес болгай сен, ынчангаш бурууң миннип, биче сеткилдиг бол (У. ч. 11:2). w23.12 ар. 26, абз. 8

Иегованың өг-бүлезиниң кезии болуру дыка улуг өөрүшкү! Ооң өңнүү болуру — улуг хүндүткел. Давидтиң: «[Иегова] сээң шилип, чоокшуладып алган улузуң амыр-чыргалдыг! Ол улус Сээң өргээң чанынга чурттаар» — дээн сеткилин үлежир-дир бис (Ыд. ыр. 64:5). Иегова өргээзинче кымны чалап турар? Бурганче чоок болуксаан улуска ол чоокшулаар (Иак. 4:8). Чуртталгаңарны Бурганга бараалгаткаш, сугга суктуруп алырыңарга, Иегова «ачы-буянын сыңырар чер чок кылдыр» бээринге бүзүреп болур силер (Мал. 3:10; Иер. 17:8). Ынчалзажок сугга суктурары — оруктуң чүгле эгези. Кандыг-даа күткүлдерге база шенелделерге алыспайн, улаштыр Бурганга шынчы артып, даңгыраавыска дүүштүр чурттаар ужурлуг бис. (Эккл. 5:3, 4). Иисустуң өөреникчизи апаргаш, ооң үлегерин чандыр баспайн, айтыышкыннарын күүседири чугула (Мф. 28:19, 20; 1 Пет. 2:21). w24.03 ар. 8, абз. 1—3

Бир эвес өөңер ээзи-биле (ишти-биле) үени кады эрттирер хөңнүңер чок болза канчаар? Одагның дугайында сактып келиңер. От дораан хып келбес болгай. Баштай ынаар бичии-бичии чээргеннерни салгаш, чүгле ооң соонда улуг-улуг токпактарны киир октаар. Шак ынчаар хүннүң-не кады үени бичиилеп эрттирерин кызыңар. Кайыңарга-даа солун чүүлдү кады кылып эгелеп алыңар (Иак. 3:18). Бичии чүүлден эгелеп аар болзуңарза, чоорту ынакшылыңарның оду катап хып кээр. Өг-бүлеге хүндүткел отка кислород-биле дөмей. От кислород чокка дораан өжүп каар. Ынакшыл база хүндүткел чокта дораан соой бээр. Бир эвес ашак-кадай улус бот-боттарынга хүндүткелди илередирин кызар болза, олар ынакшылының одун өжүрбес. Силер эжиңерге ынакшылды илередип турар мен деп бодаар болзуңарза, ол херек кырында ону миннип турар бе деп бодуңардан айтырыңар. w23.05 ар. 22, абз. 9; ар. 24, абз. 14, 15

Библияда берге байдалдарда азы дайзыннарынга истедип сүрдүрүп тургаш коргуп, сирилеп чораан Бурганның шынчы бараалгакчыларының сөстерин бижээн (Ыд. ыр. 17:5; 54:2, 6). Бис база школага, ажылга, өг-бүлевиске азы чазактың талазындан дайынзырак хамаарылганы көрүп болур бис. Азы өлүмге чедирер аарыглыг апарып болур бис. Ол ышкаш үелерде бодувусту чүнү-даа канчап шыдавас чаш төл ышкаш миннип болур бис. Ындыг байдалдарда Иегова чүнү кылырыл? Ол бисти аргалап, сеткиливисти сергедип турар. Ынчангаш Иегова-биле кады үени үргүлчү эрттириңер. Аңаа үргүлчү мөргүп, ооң Сөзүн номчуңар (Ыд. ыр. 76:2, 13—15). Ынчаар чаңчыга бергеш, стресстиг байдалда дузаны бир дугаарында дээрде Адаңардан дилээр силер. Иеговага шупту дүвүрелдериңерни, коргуушкуннарыңарны чугаалап бериңер. Ооң соонда Библияның арыннарындан ол чүнү чугаалап турарын дыңнаңар. Ынчан Иегованың аргалалын, оожургалын билип каар силер (Ыд. ыр. 118:28). w24.01 ар. 24—25, абз. 14—16

Бараалгалга сорулганы чедип алыр дизе, күштүг күзелдиг болуру чугула. Күштүг күзелдиг кижи сорулгазын чедип аар дээш, бар шаа-биле кызар. Сорулганы чедип алыр дээн күзеливис күштүг-ле боор болза, ону чедип алыры магатчок. Сорулганы чедип алыр күзелди сайзырадып алырынга чүү дузалаар? Сорулганы чедип алыр күзелиңер оон-даа күштүг боор кылдыр мөргүңер. Ындыг күзелди Иегова силерге ыдыктыг сүлдези таварыштыр берип шыдаар. Чамдыкта бис бир-ле чүүлдү кылыр ужурлуг деп билип турар болгаш, ону сорулга кылдыр салып алыр бис. Ындыг хөөн макталга төлептиг. Ынчалза-даа ону кылыр күштүг күзелиңер чок болза канчаар? Иегованың силерге кылып турар чүүлдериниң дугайында ханы боданыңар (Ыд. ыр. 142:5). Павел элчин Бурганның авыралының дугайында ханы бодангаш, аңаа оон-даа хөйнү кылыксап турган (1 Кор. 15:9, 10; 1 Тим. 1:12—14). Иегованың биске кылып турар чүүлдериниң дугайында хөй боданган тудум, сорулгавысты чедип алыр күзеливис улам күштелир (Ыд. ыр. 115:3). w23.05 ар. 27, абз. 3—5

Бис дээрде Адавыстың адын алдаржыдып, ону өөртүп турар бис (Ыд. ыр. 118:108). Оон алырга, күчү-күштүг Бурган тергиин эвес кижилер ышкаш макталдан база ынакшылдың бүзүредиинден хамааржыр бе? Чок. Дээрде Адавысты алдаржыдарывыска, бисти нүгүлдээн Эрликтиң мегези ажыттынып турар. А Эрлик чаңгыс-даа кижи Иегованың адын бердингени-биле камгалавас дээр. Оон аңгыда, Бургандан ажык чок деп санаар болзувусса, бисти шуптувусту оон хая көрнү бээр кылдыр чугаалаар (Иов 1:9—11; 2:4). Ынчалза-даа Иов Бурганга шынчызы-биле Эрлик — мегечи деп бадыткаан. А биске хамаарыштыр чүнү чугаалап болур? Бис дээрде Адавыстың адын камгалап, шынчы бараалгап, ону өөртүп болур бис (У. ч. 27:11). Ол дээрге кижи бүрүзүнге улуг хүндүткел! w24.02 ар. 8—9, абз. 3—5

Моисей биле Нуннуң оглу Иисустуң соонда, чонун башкарарда Иегова баштыңчыларны томуйлаан. Оон хааннар үезинде айтыышкыннарны Бурган медээчилер таварыштыр берип турган. Шынчы хааннар медээчилерни дыңнап чораан. Чижээ, Давид хаан Нафан медээчиниң сөзүн биче сеткилдиг хүлээп турган (2 Хаан. 12:7, 13; 1 Чыл. 17:3, 4). Иосафат хаан Яхазиил медээчини дыңнаар болгаш, Иудеяның чурттакчыларын медээчилерге бүзүрээринче кыйгырган (2 Чыл. 20:14, 15). Айыылга таварышкаш, Эзекия хаан Исайя медээчиден дуза дилээн (Иса. 37:1—6). Кажан хааннар айтыышкыннарны сагыырга, Иегова чонну йөрээп, камгалаар чораан (2 Чыл. 20:29, 30; 32:22). Иегова чонун медээчилер таварыштыр башкарып турары билдингир турган. w24.02 ар. 21, абз. 8

Иеговага ынак эвес улус-биле харылзажыр болзувусса, Эрликти өөртүр бис. Ынчан биске библейжи дүрүмнер-биле чурттаары берге болур. Улус социал четкилер таварыштыр харылзажыр апарган болгаш, биске оон-даа серемчилелдиг болуру чугула. Бо делегей куду деңнелдиг дүрүмнерин сыгаарга-даа, аңаа мегелетпес бис (Эф. 4:19, 20). Оон камгаланыр дээш, бо айтырыгларны бодуңарга салыңар: «Ажылга, школага болгаш Иегованың дүрүмнерин сагывас өске-даа улус-биле харылзааны эвээжедирин кызып турар мен бе? Улус мени чүдүлгеже эмин эрттир кире берген дээр-даа болза, Иегованың негелделерин камгалаарынга белен мен бе?» Христиан чыыштан безин эш-өөр шилиирде оваарымчалыг болуру чугула. Павел элчин 2 Тимофейге 2:20—22-де ооң дугайында чугаалап турган. Бисти куду баспас, харын-даа Иеговага шынчы бараалгаарынга дузалаар эш-өөрлүг болуксаар бис. w24.03 ар. 22—23, абз. 11, 12

Иегова сагыжыңарга канчаар кирер-дир? Бурган көзүлбес-даа болза, ооң дугайында Библиядан хөйнү билип ап турар бис. Чижээ, ында Иегованы — хүн, дозуг-камгалал, өрттендир чиир от дээн (Ыд. ыр. 83:12; Евр. 12:29). Иезекиилдиң көстүүшкүнүнде Бурган үнелиг даштарның чырыы үнген челээш дег чайынналган сапфир дүжүлгеде олурган (Иез. 1:26—28). Иегованы көрүп шыдавас болгаш, ооң ынакшылынга бүзүрээри биске берге чадавас. Өг-бүлезинге безин ынакшылды көрбээн улус, Иегованың ынакшылынга төлеп чок бис деп санаарлар. Бурган ындыг минниишкинни база аңаа бүзүрээри биске берге боорун билир. Ынчалза-даа Иегова бис-биле чоок, чылыг-чымчак хамаарылгалыг болурун күзээр. Ынчангаш энерелдиин, эргелиг ынакшылын ол Библия таварыштыр көргүзүп турар. Ынакшыл деп сөс Иегованы эң-не дээре кылдыр тайылбырлаан (1 Ин. 4:8). Ооң бүгү ажыл-херектеринден күштүг ынакшыл көскү. Аңаа тоомча чок улуска безин ынакшылды ол көргүзүп турар (Мф. 5:44, 45). w24.01 ар. 26, абз. 1—3

Иегова Моисейге чонун Египеттен хостаар даалганы берген. Бурган боду башкарып турарын хүндүс булут чагы-биле, а дүне от чагы-биле көргүзүп турган (Хост. 13:21). Моисей ол чагыны эдерип, Кызыл далайга чонну эккелген. Ынчалза-даа мурнунда далай, а соонда Египеттиң шерии сүрүп чоруп органын көргеш, олар девидеп, дузакта бис деп бодааннар. Ынчалза-даа кандыг-даа частырыг чок. Моисей чонну Иегованың айыткан черинче эккелген (Хост. 14:2). А соонда Бурган оларны хуулгаазын арга-биле камгалаан (Хост. 14:26—28). Дараазында 40 чыл дургузунда, Иегова чонун булут чагы дузазы-биле эдертирин Моисей чигзинмээн (Хост. 33:7, 9, 10). Ол чагы таварыштыр Иегова Моисей-биле чугаалажып, айтыышкыннарын чонга дамчыдып турган. Иегова удуртулганы Моисейни таварыштыр берип турар деп израильчилер тода көрүп кааннар. w24.02 ар. 21, абз. 4, 5