Июль

Иисустуң шупту чугаалап, кылып турган ажыл-херээ база бүгү хуулгаазыннары ооң Адазының бодалдарын болгаш минниишкиннерин кара олчаан көргүзүп турган (Ин. 14:9). Иисустуң хуулгаазыннарындан чүнү өөренип ап болур бис? Иисус биле ооң Адазы биске дыка ынак. Иисустуң кижилерге ханы ынакшылын, ооң хуулгаазынныг күжүн улустуң хилинчек-човалаңын чиигедир дээш ажыглап турганындан көрүп болур. Бир катап ийи согур кижи Иисустан дуза дилеп чаннып турган (Мф. 20:30—34). Эскерип көрүңер, Иисус мында оларны «кээргей бергеш», экиртип каан дээн. «Кээргей берген» деп грек кылыг сөзү кижиниң баары ажый бээр дээн бодалды илередип турар. Ындыг ханы кээргээчел чорук Иисустуң ынакшылын көргүзүп турган. Ынчангаш ол аштап-суксаан улусту чемгерип, кеш аарыглыг улусту экиртип чораан (Мф. 15:32; Мк. 1:41). Кээргээчел Иегова Бурган болгаш ооң оглу Иисус биске дыка ынак. Оларга бистиң хилинчектенип турарывысты көөрү аарышкылыг деп чигзинмейн барып болур бис (Лк. 1:78; 1 Пет. 5:7). Кижилерни хилинчек-човалаңдан хостаптар үени олар аажок манап турар! w23.04 ар. 3, абз. 4, 5

Бо делегейниң шын эвес үзел-бодалы биске салдар чедирбезин дээш, бүгү чүүлдү кылыылыңар. Ону канчаар кылып болур? Библияны номчуп, шинчилеп тургаш, угаан-бодалывысты арыг бодалдар-биле долдурар бис. Ол ышкаш чыыштарже барып, суртаалдап тургаш, угаан-бодалывысты камгалап аар бис. А Иегова силерге күш чедер шааңардан ажа бээр күткүлге эртерин чөпшээревес (1 Кор. 10:12, 13). Бо берге сөөлгү хүннерде Иеговага шынчы артар дизе, кажангызындан-даа артык хөй мөргүүр болзувусса эки. Сеткилиңерни аңаа ажыдып бээриңерни Иегова күзеп турар (Ыд. ыр. 61:9). Иегованы алгап-мактаңар база ооң кылган шупту чүүлү дээш өөрүп четтириңер. Суртаалга эрес-дидим болурунга база дузалаар кылдыр, оон дилеңер. Ол ышкаш бергелерге азы шенелделерге таварышкаш, Бургандан дузаны дилеңер. Иеговага мөргүүрүнге силерге кым-даа, чүү-даа шаптыктавазын. w23.05 ар. 7, абз. 17, 18

Чүге чыыштарже кээп турар бис? Бистиң кол сорулгавыс дээрге Иегованы алдаржыдары-дыр (Ыд. ыр. 25:12; 110:1). Оон ыңай бо берге үелерде бот-боттарывысты деткижер дээш, чыыштарже кээп турар бис (1 Фес. 5:11). Кажан холувус көдүргеш, харыылаарывыска, бо ийи сорулганы чедип ап турар бис. Ынчалза-даа харыыларны берип турувуста, кезек бергелер тургустунуп болур. Чижээ, харыылаарындан коргуп болур бис азы аажок харыылаксаарывыска-даа, күзээнивис дег, бисти хөй айтырбайн турар. Ол бергелерни канчаар ажып эртип болурул? Павел элчин христианнарны «бот-боттарывысты деткип көрээли» деп кыйгырган. Бүзүрелди илереткен каш борбак бөдүүн сөстер безин ха-дуңмавысты деткип болур деп сактыр болзувусса, хол көдүрери биске коргунчуг болбас. А бир эвес, күзээнивис дег, бисти хөй айтырбас болза, өске улустуң харыылап турарынга өөрүүр бис (1 Пет. 3:8). w23.04 ар. 20, абз. 1—3

Хаанның чарлыы үнген! 70 чыл Вавилонга кулданыгга турган еврейлер ам Израильче чанып болур апарган (Эзра 1:2—4). Ол чүгле Иегованың ачызында болдунган. Вавилончулар кулданыгга турган улузун кажан-даа салбас турган (Иса. 14:4, 17). Ынчалза-даа Вавилон империя буурап каарга, чаа чагырыкчы еврейлерге төрээн черинче чоруп болурун чарлаан. Кижи бүрүзү, ылаңгыя өг-бүлениң баштыңнары, Вавилондан чоруур-чорбазын шииптирлээр ужурлуг турган. Ындыг шиитпирни хүлээри белен эвес. Чамдык улуг назылыг улус ол аян-чорукту айыылдыг деп бодап турган. Еврейлерниң хөй кезии Вавилонга төрүттүнген болгаш, оон өске чер билбес турган. Израиль оларның ада-өгбезиниң чурту турган. Оон аңгыда, чамдык еврейлер Вавилонга бай апарган. Ынчангаш эптиг чараш бажыңнарын азы чедиишкинниг садыг-саарылгазын каггаш, танывазы черже көжери оларга берге болган. w23.05 ар. 14, абз. 1, 2

Бурганның Сөзү ынакшылды, туруштуг болгаш кээргээчел чорукту сайзырадырынче кыйгырып турар. «Чаа делегей» очулгазында Лука 21:19-та мынча дээн: «Туруштуг чоруктуң ачызында амы-тыныңарны камгалап алыр силер». А Колосчуларга 3:12-де: «Кээргээчел... чорукту... кедип алыңар» — дээн. 1 Фессалоникчилерге 4:9, 10-да: «Бурган силерни бот-бодуңарга ынак боорунга өөредип каан болгай. [...] Ха-дуңма, бот-бодуңарга оон-даа күштүг ынак бооруңарны дилеп тур бис» дээнин номчаан бис. Ол сөстерни туруштуг, кээргээчел чорукту, ынакшылды илередип билир христианнарга чугаалаан. Ындыг-даа болза, олар ол шынарларны улаштыр сайзырадыр ужурлуг турган. Биске база ону кылыры чугула. Биске чүү дузалаар? Бирги векте христианнар ол шынарларны канчаар илередип турганын көрээлиңер. Оон ол акы-угбаларның чижээн канчаар эдерерин көөр бис. Ынчан коргунчуг хилинчекке белениңерни хынап болур силер. А коргунчуг хилинчек эгелей бээрге, шенелделерни ажып эртер дуржулгаңар бар боор. Оон аңгыда улаштыр-ла туруштуг артар хөөннүг болур силер. w23.07 ар. 2, абз. 4; ар. 3, абз. 8

Шилип чагдырганнарга-даа азы «өске хойларга-даа» хамааржыр болзувусса, «Ыдыктыг орукка» артары чугула (Ин. 10:16). Чүге дизе ол орук доора уткалыг дываажаңны таварыштыр эртип, Бурганның Чагыргазының келир үеде йөрээлдеринче бисти аппар чыдар. 1919 чылдан эгелеп, сая-сая эр-херээжен улус база ажы-төл меге шажыннарның делегей чергелиг империязындан, Өндүр улуг Вавилондан, үнгеш, ол орукче туруп алган. Вавилондан үнген еврейлерниң оруунга моондактар турбас кылдыр, Иегова сагыш човаан (Иса. 57:14). Амгы үеде «Ыдыктыг оруктуң» дугайында чүнү чугаалап болур? 1919 чылдың мурнунда каш чүс чылдар дургузунда Иегова ону хүндүлээр чамдык эр улусту Өндүр улуг Вавилондан үнген орукту белеткээр кылдыр ажыглап турган (Деңнеңер: Исайя 40:3). Ак сеткилдиг улус соонда Өндүр улуг Вавилондан үнгеш, арыг чүдүлгени катап тургускан доора уткалыг дываажаңче кирер кылдыр, олар орукту белеткеп кылган. w23.05 ар. 15—16, абз. 8, 9

Иегова бисти аңаа өөрүшкүлүг болгаш сеткиливис ханызындан бараалгаарывысты күзеп турар (2 Кор. 9:7). Ол дээрге бараалгалга сорулгаларны салыр күзеливис чок болза, ону салган ажыы чок дээни ол бе? Павел элчинниң чижээн көрүптээлиңер. Ол мынча дээн: «Мага-бодумну „чула шаап“, ону бодумга чагыртып чор мен» (1 Кор. 9:25—27). Павел бодунуң күзелинге чагыртпайн, шын чүүлдү кылыр дээш, бодун албадап турган. Иегова ооң бараалгалынга чүүлзүнген бе? Ийе! Ол ону кызымак чоруу дээш шаңнаан (2 Тим. 4:7, 8). Павел элчинниң ышкаш, күзеливис чок-даа болза, сорулганы чедип аар дээш кызар болзувусса, Иегова өөрүүр. Кылып турар ажыл-херээвиске ынакшыл эвес, а Бурганга ынакшыл турар болза, Иегова өөрүүр. Павел элчинни йөрээгени дег, Иегова бистиң күжениишкиннеривисти база йөрээр (Ыд. ыр. 125:5). Ол йөрээлдерни көргеш, сорулганы чедип аар дээн күзеливис улам күштелир. w23.05 ар. 29, абз. 9, 10

Иегованың хүнүнде камгаланып шыдавас улусту Павел удаан улус-биле деңнээн. Олар долгандыр чүү болуп турарын билбес база кайы хире үениң эрткенин эскербес боор. Ынчангаш чугула болуушкуннар үезинде олар серемчилелдиг болуп шыдавас. Амгы үеде кижилерниң хөй кезии доора уткалыг ханы уйгуда (Рим. 11:8). «Сөөлгү хүннерде» чурттап турарывысты база удавас коргунчуг хилинчек эгелээр деп бадыткалдарны олар тоовайн турар (2 Пет. 3:3, 4). Ынчалзажок Иегованың хүнү чоокшулаан тудум, серемчилелдиг артары дыка чугула деп билип турар бис (1 Фес. 5:6). Ынчангаш дүвүрелге алыспайн, бодамчалыг артар ужурлуг бис. Чүге дээрге хамык улус бисти политиктиг болгаш хөй-ниити айтырыгларынга кандыг-бир таланы ээлээринче албадап болур. Иегованың хүнү чоокшулаан тудум, ындыг базыышкын дам күштелир. Ындыг-даа болза, чүнү харыылаарының дугайында сагыш човавас ужурлуг бис. Бурганның сүлдези биске дүвүревейн, бодамчалыг болуп, мерген угаанныг шиитпирлерни хүлээринге дузалаар (Лк. 12:11, 12). w23.06 ар. 9—10, абз. 6, 7

Самсон деп атты дыңнааш, чүнү бодаар-дыр силер? Бурганның кайгамчык күштүг бараалгакчызын сактып кээр чадавас силер. Самсоннуң бир шын эвес шиитпири ону өлүмге чедирген. Ынчалза-даа Иегова ону шынчы бараалгакчызы деп санап чораан. Бурган ооң дугайында төөгүнү биске ажыктыг болзун дээш, Библияда бижидип каан. Шилип алган чону израиль дээш, Иегова Самсонну таварыштыр кайгамчыктыг херектерни кылган. Чүс-чүс чылдар эрткенде, Иегова ооң адын бүзүрели быжыг бараалгакчыларының аразынче киирерин Павел элчинге чагаан (Евр. 11:32—34). Берге үелерде безин Самсон Иеговага идегеп чораан. Бис ол бараалгакчыдан ажыктыг кичээлдерни өөренип ап болур бис база ооң чижээ бисти деткиир. w23.09 ар. 2, абз. 1, 2

Иеговага дүвүрелдеривисти сеткиливистен үргүлчү чугаалаар болзувусса, бис оон-даа туруштуг апарып болур бис (1 Фес. 5:17). Бо үеде шыңгыы шенелделерге таварышпайн турар чадавас силер. Ынчалза-даа бодуңардан айтырыңар: «Муңгарай бергеш азы чүнү канчаар аайын тыппайн баргаш, Иеговадан дузаны дилээр-дир мен бе?» Кандыг-даа бергелерде Бурганга мөргүп өөренген болзуңарза, шыңгыы шенелделер үезинде оон дуза дилеп чаңчыга бээр силер. Ынчан ол силерге кажан база канчаар дузалаарын билир деп чигзинмес силер (Ыд. ыр. 26:1, 3). Амдан эгелеп, шенелделерге туруштуг артар болзувусса, коргунчуг хилинчекти шыдажып эртиптер бис (Рим. 5:3). Чүге ындыг түңнел кылып болур? Хөй акылар бир шенелдени ажып эртиптерге, дараазындазы чиик болур деп эскерген. Ол чүүл Иегова чанында база дузалажырынга белен деп оларның бүзүрелин быжыктырган. А бүзүрел өске-даа шенелделерге туруштуг артарынга дузалап турган (Иак. 1:2—4). w23.07 ар. 3, абз. 7, 8

Бодамчалыг болурунче Иегованы биче сеткил болгаш кээргээчел чорук оттуруп турар. Чижээ, Содом хоорайның узуткаашкынындан ону көрүп болур. Бурган төлээлери таварыштыр шынчы Лотка дагларже дезерин айыткан. Лот корткаш, өг-бүлези-биле Сигор деп узуткадыр ужурлуг бичии хоорайжыгашче дезиптерин Иеговадан дилээн. Бурган айтыышкынын күүседирин негеп болур турган-даа болза, ооң дилээн күүсеткен (Э. д. 19:18—22). Чүс-чүс чылдар эрткенде, Иегова Ниневияның чонун кээргеп каан. Ол хоорай бүрүнү-биле узуткадыр деп Бурганның медээчизи Иона чарлаптарга, Ниневияның чурттакчылары буруузун билинген. Ынчангаш Иегова оларны кээргээш, узуткаваан (Иона 3:1, 10; 4:10, 11). w23.07 ар. 21, абз. 5

Иоастың чижээнден чүнү өөренип ап болур бис? Ол ханы эвес дазылдарлыг, чөлеңгииш чокка туруп шыдавас ыяшка дөмей турган. Кажан ооң чөлеңгиижи, Иодай, чок апаарга база ойталакчыларның талазындан «хат-шуурган» хадый бээрге, Иоас кээп ушкан. Бургандан коргуш акы-угбаларның болгаш чоок улузувустуң эки салдарындан хамаарышпас ужурлуг деп, бо чижек көргүзүп турар. Бүзүреливис быжыг артсын дизе, Бурганга бердинген чоруувусту болгаш ооң мурнунга коргушту хууда боттарывыс быжыглаар ужурлуг бис. А ону кылыр дизе, Библияны доктаамал өөренип, ооң дугайында ханы боданып, мөргүүр болзувусса эки (Иер. 17:7, 8; Кол. 2:6, 7). Иегова бистен хөлүн эрттир хөйнү негевейн турар. Ооң негелделерин Экклесиаст 12:13-те бижээн: «Бургандан коргуп, Ооң айтыышкыннарын сагып чор, чүге дээрге кижиге херек-ле чүве ол». Бургандан коргуп чоруур болзувусса, келир үеде шенелделерни ажып эртип, аңаа шынчы артып каап болур бис. Иегова-биле найыралывысты кым-даа, чүү-даа үреп шыдавас. w23.06 ар. 19, абз. 17—19

Ажыдыышкын номунда Иегова ангелди азы Иисусту таварыштыр эвес, а бодунуң чугааланганы үш таварылганы бижээн. Бирээзиниң эгезинде: «Дүжүлгеде саадаан Бурган» дээн (Ажыд. 21:5а). Ол сөстер улаштыр чугаалаан чүүлдүң кайы хире бүзүрелдиин көргүзүп турар. Чүге дизе Иегова «кажан-даа мегелеп көрбээн» (Тит. 1:1—2). Ынчалдыр 5-ки шүлүктүң эгези Ажыдыышкын 21:5, 6-да бижээн чүүлге долузу-биле бүзүреп болурун бадыткаан. Ажыдыышкын номунда хөй катап таваржып турар: «Көр» деп очулдурган грек сөстү сайгарыптаалыңар. Иегова кичээнгейни хаара туткаш: «Хамык чүвени чаартып тур мен!» — дээн. Бурган келир үениң өскерлиишкиннерин ам болуп турар дег чугаалаан. Оон алырга, ооң аазаашкыны албан күүсеттинер (Иса. 46:10). w23.11 ар. 3, абз. 7; ар. 4, абз. 8

Пётр элчинниң четпес талалары бо-ла көстүп кээр турган. Каш чижекти көрүптээлиңер. Иисус хилинчектенип өлгеш, библейжи медеглелдерни күүседирин чугаалаарга, Пётр ону чемелээн (Мк. 8:31—33). Пётр болгаш өске-даа элчиннер аразында кайызы эң чугула деп бо-ла маргыжар турганнар (Мк. 9:33, 34). Иисусту тудуп хоругдап турда, Пётр хылыш-биле бир кижиниң кулаан одура шаапкан (Ин. 18:10). Ол-ла дүне коргуушкунга алзып, чоок өңнүү Иисустан үш катап ойталааш, Пётр ишкирнигип ыглай берген (Мк. 14:66—72). Иисус өөреникчизинге чөгенмээн. Пётрнуң сеткили өскерилбээн деп билгеш, аңаа ынакшылын бадыткаар арганы берген. Иисус дирлип келгеш, Пётрдан: «Мээң хойларымче сагыш салып көр» — деп дилээрге, ол күзелдии-биле чөпшээрешкен (Ин. 21:15—17). Иерусалимге Беженги хүннүң байырлалында Иисустуң өөреникчилери бир дугаар ыдыктыг сүлдеге чагдырган үеде Пётр база аңаа турган. w23.09 ар. 21—22, абз. 6, 7

«Бурганның кодан хойларын кадарыңар» — деп, Пётр элчин хуралдың удуртукчуларын кыйгырган (1 Пет. 5:1—4). Эргим удуртукчу, акы-угбаларга ынааңны, сагыш човангырыңны билир бис. Чамдыкта чай чогуңдан азы могап-шылааныңдан хүлээлгелериңни күүседип шыдавас мен деп бодаар-дыр сен бе? Ийе болза, чүнү канчап болур? Сеткилиңни Иеговага чугаалап бер. «Кижи бүрүзү бараан болуушкунга херектиг күштү Бургандан ап турзун» — деп, Пётр бижээн (1 Пет. 4:11). Акы-угбаларның чамдык бергелери чүгле чаа делегейге шиитпирлеттинер. Ынчалза-даа дээди кадарчы Иисус Христос сээң шыдавазың чүүлдү кылып болурун утпа. Ам безин ол дузалаар, а келир үеде оон-даа хөйнү кылыр. Удуртукчулардан Бурганның манаар чүүлү — акы-угбаларга ынакшыл, олар дээш сагыш човаары база үлегерлиг болуру. w23.09 ар. 29—30, абз. 13, 14

Кижилер ышкаш боданырындан ойталаар ужурлуг бис. Бо делегейде улус ышкаш боданыр болзувусса, Иегованы болгаш ооң негелделерин чоорту уттуптар айыыл бар (1 Кор. 3:19). «Бо делегейниң улузунуң мерген угааны» Бурганны дыңнавазынче бо-ла ыдалаар. Пергамда, Фиатирада чамдык христианнар дүрзү-бурганнарга чүдүп, мөзү-шынар чок улустуң салдарынга алзыпкан. Иисус ол ийи чыышка дорт сүме берген, чүге дизе олар самыырап турган улусту соксатпааннар (Ажыд. 2:14, 20). Амгы үеде бисче база шупту талазындан халдаашкыннар чоруп турар. Өг-бүлевистиң кежигүннери база таныыр улузувус бисти күзелдерге алзып, арын-нүүрүвүстү херекке албазынче ыдалап болур. Чижээ, олар библейжи дүрүмнер эргижирээн, бодунуң күзээшкиннеринге алзырында багай чүве чок дээр. Чамдыкта Иегованың айтыышкыннарын чедишпес деп бодай бээр бис. Безин «бижээн чүүлдүң кызыгаарын ажыр» базар күзел тыптып кээп болур (1 Кор. 4:6). w23.07 ар. 16, абз. 10, 11

Бурганның күзел-соруун күүседирде, Марияга ооң күжү херек турган. Ашакка барбайн-даа, иштели бээрин аңаа Гавриил чугаалаан. Мария Чагдырган чагырыкчыны өстүрер даалга алган, а ооң ажы-төл кижизидер дуржулгазы чок турган! Душтуу Иосиф-биле нарын чугаа база кылыр апарган. Эр-херээжен харылзаа чокка иштели бергенин аңаа канчаар тайылбырлаар? (Лк. 1:26—33). Мария күштү канчаар алган? Ол дузаны өскелерден дилеп турган. Чижээ, Гавриилден даалга дугайында хөйнү чугаалап бээрин Мария дилээн (Лк. 1:34). Удатпаанда Мария «Иудеяның даглыг черинде турар [төрели] Елисаветаның чурттаан хоорайынче» чорупканы эки болган! Елисавета Марияны мактааш, ыдыктыг сүлде таварыштыр ооң төрүттүнер оглунуң дугайында медеглээн (Лк. 1:38—45). Иегова «Бодунуң холунуң күчүзүн көргүс[кенин]» Мария чугаалаан (Лк. 1:46—51). Иегова Марияны Гавриил биле Елисаветаны таварыштыр деткээн. w23.10 ар. 14—15, абз. 10—12

144 000 чагдырган христианнар Иисус-биле дээрге бараалгаар (Ажыд. 14:1). Бурган оларны черге чурттап турда, ыдыктыг сүлде-биле шилип чаггаш, ажы-төлү кылдыр азырап ап турар. Ыдыктыг өрээл оларның аразында тускай харылзааны илереткен (Рим. 8:15—17). Эң ыдыктыг өрээл Иегованың чурттап турар дээри. Ыдыктыг өрээлди эң ыдыктыг өрээлден аңгылаан «көжеге» Иисустуң кижи мага-бодун көргүскен. Ынчангаш ол кижи тургаш, дээрже кирип шыдавас турган. Иисус кижи мага-бодун кижилер дээш өргээш, дээрже үне бергени-биле чагдырган христианнарга дээрге чуртталгаже орукту ажыткан. Дээрде шаңналын алырда, олар база кижи мага-бодундан адырлыр ужурлуг (Евр. 10:19, 20; 1 Кор. 15:50). w23.10 ар. 28, абз. 13

Гедеонну эфремчилер шүгүмчүлеп эгелээрге, ол чылыг-чымчак харыылаан (Башт. 8:1—3). Гедеон хорадавайн, биче сеткилдии-биле оларны дыңнап, оожургаткан. Мерген угаанныг удуртукчулар Гедеонну өттүнүп турар. Олар шүгүмчүлелди кичээнгейлиг дыңнап, чылыг-чымчак харыылап турар (Иак. 3:13). Шак ынчаар олар чыышка амыр-тайбыңны тургузуп турар. Мадианнарны удуп каапканы дээш, ону алгап-мактап эгелээрге, Гедеон кичээнгейни Иеговаже углаан (Башт. 8:22, 23). Удуртукчулар Гедеонну канчаар өттүнүп болур? Олар бир-ле чүүлдү дыка эки кылып турар болза, Иегованы алдаржыдар ужурлуг (1 Кор. 4:6, 7). Чижээ, удуртукчу акывыс өөредир арга-мергежили дээш мактадып болур. Ынчан удуртукчу: «Бис шуптувус өөредилгени Бурганның Сөзүнден болгаш ооң организациязындан ап турар болгай бис» деп харыылап болур. «Бодумче хөй кичээнгей салып турар мен бе?» деп, удуртукчу бодун өйлеп-өйлеп хынаар болза эки. w23.06 ар. 4, абз. 7, 8

Мөргүлүвүстүң харыызын албайн баргаш, бодувуска үш айтырыгны салып болур бис. Бирээде: «Шынап-ла херек чүүл дээш мөргүп турар мен бе?» Чамдыкта чүү эки боорун бодувус билир бис деп бодаар бис. Иегова байдалды эки билир, ынчангаш ооң шиитпири дээре. Бистиң чамдык дилеглеривис Бурганга шуут дүүшпес (1 Ин. 5:14). Чижээ, бир ада-ие оглунга алыс шынга артып каарынга дузалаар кылдыр Иеговадан дилеп мөргүп турар. Бодаарга ол дыка эки дилег ышкаш. Ынчалза-даа Иегова аңаа бараалгаарынга кымны-даа албадавас. Бурган аңаа бараалгаарын ажы-төл-даа, улуг-даа кижи боду шиитпирлезин деп күзээр (Ы. х. к. 10:12, 13; 30:19, 20). Ынчангаш ада-иелер ажы-төлү Бурганның өңнүү болуп, аңаа ынак апаарынга дузалаар дээштиг сөстерден база канчаар алдынарын көргүзерин Иеговадан дилеп мөргүңер (У. ч. 22:6; Эф. 6:4). w23.11 ар. 21, абз. 5; ар. 23, абз. 12

Аргалал таварыштыр өске улуска ынакшыл көргүзерге чүге эң-не дээштиг? Бир библейжи справочниктен алырга, «аргалаар» деп очулдурган сөс, дошкун шылгалдаларга таварышкан кижиниң чанынга турары дээн уткалыг. Бергелерге таварышкан кижини аргалааш, ону сорук киирип, улаштыр шынчы бараалгаарынга дузалаар бис. Акывыс азы угбавыс ишти-хөңнүн ажыдарга, ыы-сыызын үлежип чоруур болзувусса, ынакшылывысты көргүзер бис (2 Кор. 7:6, 7, 13). Аргалал кээргел-биле сырый харылзаалыг. Кээргээчел кижи өске улусту аргалап, оларның сеткилинде аарышкызын чиигедирин кызар. Өскээр чугаалаар болза, баштай кээргелди миннир, оон аргалаар бис. Ону Иегованың чижээнге көрээлиңер. Библияда ону «Өршээлдиг Ада, бисти аргалап, деткип чоруур Бурган» деп адаан (2 Кор. 1:3). w23.11 ар. 9—10, абз. 8—10

Чаңгыс-даа христиан кижини хилинчек-човалаң оя бербес. Павел элчиннииң чижээн көрээлиңер. Фессалоникада акыларга ол мынча дээн: «Бисти истеп-сүре бээри чайлаш чогун... кады турар үевисте-ле чугаалап шаг болган бис. Ол ынчалдыр болган-даа деп, силер ам билир силер» (1 Фес. 3:4). А Коринфичилерге: «Ол.. кижи шыдажыр аргажок аар-берге байдалдар болган, амы-тынныг артар идегеливис-даа чок турган» деп бижээн (2 Кор. 1:8; 11:23—27). Христиан кижиниң оруунда бергелер янзы-бүрү (2 Тим. 3:12). Иисустуң өөреникчизи апаргаш, эштериңерниң, төрелдериңерниң талазындан каржы-хажагай хамаарылгага таварышкан силер бе? Азы шынчы чорууңар дээш, ажылыңарга бергелер тургустунган бе? (Евр. 13:18). Азы идегелиңерни улус-биле үлежириңерге эрге-чагырга удурланып турар бе? Хууда кандыг-даа бергелерге таварышкаш, Павелдиң чугаалааны ышкаш өөрүшкүлүг болуру чугула. w23.12 ар. 10—11, абз. 9, 10

Иаков хөй бергелерге таваржып чораан. Ооң Симеон биле Левий деп оолдары өг-бүлезиниң эки адын баксырадып, Иегованың адын бужартатканнар. Муңгаранчыг чүүл, Иаковтуң ынак кадайы Рахил хеймер оглун божуп чыткаш, шыдашпайн барган. Оон ыңай улуг аш-чут болу бээрге, Иаков кыраан назынында Египетче көжер ужурга таварышкан (Э. д. 35:16—19; 37:28; 45:9—11, 28). Ынчалза-даа Иаков Иеговага болгаш ооң аазаашкыннарынга кажан-даа чигзинмейн турган. А Иегова деткимчезинге ону бүзүредип чораан. Чижээ, Иегова Иаковту өнчү-хөреңги талазы-биле йөрээп турган. А кажан Иаков шагда-ла чок апарган деп бодап чораан оглунга, Иосифке, ужуражып келгеш, Иеговага кайы хире өөрүп четтирген деп бодаар силер? Иаковка ол шенелделерни төлептиг ажып эртеринге чүү дузалаан? Иегова-биле чоок найырал (Э. д. 30:43; 32:9, 10; 46:28—30). Иегова-биле чоок найыралывысты үнелээр болзувусса, чуртталгавыска хенертен тургустунуп кээр бергелерни чедиишкинниг ажып эртиптер бис. w23.04 ар. 15, абз. 6, 7

22-ги Ырының одуруг бүрүзү Иегованың ынакшылынга, эргелиг сагыш човаашкынынга Давидтиң бүзүрелин илереткен. Ыр күүседикчизи Иегова-биле найыралының күштүүн чугаалап, ону Кадарчым дээн. Давид Бурганынга бүзүрээр болгаш, ооң айыткан оруун дыңнангыр эдерип чораан. Ынчангаш ол айыыл чок минниишкинниг турган. Иегованың ынакшылы бүгү чуртталгазында кады боорун Давид билген. Ол чүге аңаа чигзинмээнил? Хүн бүрүде хереглээн бүгү чүүлдү Иегова берип, ооң сагыш човаашкынын Давид көрүп чораан. Иегова мээң өңнүүм, чуртталгам-биле ону өөртүп чоруур мен деп, Давид билип турган. Ынчангаш чүү-даа болур болза, Бурганы ону кагбас деп бүзүрелин ышкынмаан. Иегованың эргелиг ынакшылынга бүзүрели кандыг-даа коргуштан күштүг болгаш, ол аас-кежиктиг, сеткил ханып чурттап чораан (Ыд. ыр. 15:11). w24.01 ар. 28—29, абз. 12, 13

Ийиги делегей чергелиг дайын соонда, Иегованың бараалгакчылары хөй чурттарга суртаалдаар аргалыг апарган. Ооң ачызында дыка хөй улус Иегованы билип алган, Чагырганың медээзи бүдүн делегейде тараттынып турар. Амгы үеде Удуртукчу чөвүлел Иисуска чагыртып турар. Олар айтыышкыннарын Иегова биле Иисустуң көрүжүнге даянган болурун күзээрлер. Бодунуң ээлчээнде, кожуун хайгааракчылары биле тус черниң удуртукчулары айтыышкыннарны чыыштарга берип турар. А чагдырган удуртукчулар, долу утказында чыыштың шупту удуртукчулары, Иисустуң «оң холунда». (Ажыд. 2:1). Ийе, олар тергиин эвес болгаш, чазып болур. Моисей биле Нуннуң оглу Иисус база элчиннер ышкаш бо-ла чазыптар турганнар (Сан. 20:12; Иис. 9:14, 15; Рим. 3:23). Иисус Христос сарыылдыг чалчаны болгаш удуртукчуларны сагыш човангыр башкарар. Ынчангаш Иисустуң харыысалгалыг акылар таварыштыр айтыышкыннарынга бүзүрээр шупту үндезиннер бар. w24.02 ар. 23—24, абз. 13, 14

Иегованың дугайында чылыг-чымчак, өөрүп четтирип, ынакшылдыг чугаалаар болзувусса, ону өөртүр бис. Суртаалывыстың кол сорулгазы — Иеговаже кижилерни хаара тудуп, бис ышкаш көрүштүг болурунга дузалажыр бис (Иак. 4:8). Библиядан Иегованың ынакшылын, чөптүг-шынныын, мерген угаанын, күжүн болгаш өске-даа кайгамчыктыг шынарларын улуска көргүзеринге ынак бис. Чуртталгавыска Иегованы өттүнерин кызар болзувусса, ону өөртүр бис. Ооң ачызында улус бисти бо делегейден аңгы деп эскерип кааш, чүге ылгалып турарывысты билип алыксай бээр чадавас. Ынчан ону тайылбырлап бээр арга тыптып кээр (Мф. 5:14—16). Түңнелинде ажык чүректиг улустуң Бурган-биле чоокшулажыр аргазы тыптып кээр. Бараалгалывыс болгаш алдынып турарывыс-биле Иегованы алдаржыткаш, ооң Ада чүрээн өөртүп турар бис (1 Тим. 2:3, 4). w24.02 ар. 10, абз. 7

Чедишкен христиан кижи болурда, ажыктыг мергежилге өөренири чугула. Ол мергежил чыышта хүлээлгелерни күүседиринге, өске кижилер-биле эки хамаарылгалыг болурунга дузалаар. Оон аңгыда, бодун база өг-бүлезин азыраар ажыл тып алырынга херек. Чижээ, эки номчуп, бижип өөрен. Бурганның Сөзүн хүннүң-не номчуп, ооң дугайында боданып чоруур кижини Библияда аас-кежиктиг болгаш чедиишкинниг кылдыр көргүскен (Ыд. ыр. 1:1—3). Библияны хүннүң-не номчуп турар болзуңза, угаан-бодалың Иегованың ышкаш апаар. Ынчан шиитпирлер хүлээрде, бодуңнуң угаан-бодалыңга эвес, а библейжи дүрүмнерге даяныр сен (У. ч. 1:3, 4). Акы-угбаларга библейжи өөредилге, чагыг-сүме херек. Эки номчуп, бижип билир болзуңза, чыыштарга тодаргай харыыларың, илеткелдериң-биле өске улустуң бүзүрелин быжыктырып болур сен. Оон аңгыда, ажыктыг демдеглелдерни кылып болур сен. Ол демдеглелдер сээң бүзүрелиңни быжыктырар, өске улусту деткииринге дузалаар. w23.12 ар. 26—27, абз. 9—11

Коргуушкунга алысканда Иегованың Эрлик чок делегейге чүнү кылыр дээнин боданыңар. 2014 чылдың регион шуулганынга ачазы өг-бүлезинге 2 Тимофейге 3:1—5-те сөстер дываажаңга мындыг болур деп чугаалажып турган: «Чаа делегейге дыка аас-кежиктиг үелер кээр. Улус чаагай сеткилдиг, Бурган-биле найыралга хамааржыр чүүлдерге ынак, биче сеткилдиг, томаанныг, Бурганны алдаржыдар, ада-иезинге дыңнангыр, өөрүп четтирер, шынчы, кижилерге ынак, чугаакыр, өске кижилер дугайында экини чугаалаар, бодун туттунуп билир, чымчак, буянга ынак, ынаныштыг, чайлап бээринге белен, өрү көрдүнмес, таалалга бодаарга Бурганга ынак база бердинген чорукка башкартыр апаар. Олар-биле эдержип чор». А силер өг-бүлеңерге азы эш-өөрүңер-биле чаа делегейге чуртталганы чугаалажыр-дыр силер бе? w24.01 ар. 6, абз. 13, 14

Иегова шупту бараалгакчыларынга ниитизи-биле ээ көрнүрү чигзиниг чок. Библияда мынча дээн: «Чонун көргеш, Иегованың сеткили өөрүп турар» (Ыд. ыр. 149:4, Чаа делегей). Ынчалза-даа бир кижи: «Иегованың хууда меңээ ээ көрнүрү берге» — деп муңгарап болур. Муңгарап, муңчулуп чораан шынчы бараалгакчыларның дугайында база Библияда бижээн (1 Хаан. 1:6—10; Иов 29:2, 4; Ыд. ыр. 50:13). Тергиин эвес кижилерге Иегова ээ көрнүрүн Библия көргүскен. Аңаа чүү херек? Иисуска бүзүрелди сайзырадып, сугга суктурары чугула (Ин. 3:16). Ол базымнар бачыттарывыс дээш буруувусту билингенивисти база Бурганның күзел-соруун күүседирин аазаанывысты көргүзер (Аж.-ч. 2:38; 3:19). Ооң-биле найыралга уткуштур базымнар кылырывыска, Иегова дыка өөрүүр. Даңгыраавыска шынчы болзувусса, ол биске ээ көрнүр, бисти чоок өңнүктери деп санаар (Ыд. ыр. 24:14). w24.03 ар. 26, абз. 1, 2

Иисустуң өөреникчилери дег, эрге-чагыргалар суртаал ажылын хоруп-даа каан болза, суртаалдаарын соксатпас бис. Бараалгалывысты долузу-биле күүседиринге Иегова дузалаар деп ыяк билир бис. Ынчангаш Иеговадан эрес-дидим чорукту, мерген угаанны база бергелерни ажып эртеринге дузалаар кылдыр, мөргүп дилеңер. Бистиң хөй кезиивис багай кадыкшылдан хинчектенип азы сагыш-сеткили дүвүреп чоруур. Чамдык улус чоок кижизин чидиргеш, кажыыдап турар. А өскелер өг-бүлезинде берге байдалдыг. Чамдык улус истеп сүрдүрүп, өске-даа бергелерге таваржып чоруур. А ол бүгү хамчык аарыгларның, дайынның, бойдус халаптарының ужундан улам берге апарган. Ынчангаш Иеговага сагыш-сеткилиңер тө каап бериңер. Чоок эжиңерге байдалыңарны чугаалап турарыңар дег, аңаа база шуптузун чугаалап бериңер. Иегова силерге дузалаар дээш хөделир деп, бичии-даа чигзинмеңер! (Ыд. ыр. 36:3, 5.) Үргүлчү мөргүүр болзувусса, «аар-бергелерге таварышкаш, туруштуг» болур бис (Рим. 12:12). Иегова бараалгакчыларының чүнү ажып эртип турарын билир. Библияда Иегова «оларның дуза дилээн кыйгызын дыңнап» турар дээн болгай (Ыд. ыр. 144:18, 19). w23.05 ар. 5—6, абз. 12—15

Чугула шиитпирлер үндүрер мурнунда Иегованың «күзел-соруун билип аарын оралдажыңар», аңаа дүүштүр алдыныңар (Эф. 5:17). Бурганның көрүжүн канчаар билип алырыл? Бистиң байдалывыска хамаарышкан библейжи дүрүмнерни тып алыры чугула. Ону ажыглаар болзувусса, шиитпирлеривис эки түңнелдиг болур чадавас. Бурганга үевис чок кылдыр бо делегейниң ажыл-херээ-биле бисти чүдүрүптерин Эрлик күзээр (1 Ин. 5:19). Христиан кижи эртем-билигни, ажыл-агыйны база акша-төгерикти Иеговага бараалгалдан чугула деп шиитпирлээр болза, бо делегейниң какпазынга алзып ап болур. Ол бүгү чүүл багай эвес, ынчалза-даа ону чуртталгага бирги черге салыры шын эвес. w24.03 ар. 24, абз. 16, 17