Август

Бо шүлүкте ийи чугула бодалче кичээнгейиңерни салып көрүңер: 1) Чөптүг-шынныг улус база бергелерге таваржыр; 2) Иегова бисти шенелделерден камгалап турар. Канчаар? Ол биске чуртталгаже шын көрүштүг боорунга дузалап турар. Бараалгал биске өөрүшкү эккээр деп, Иегова аазап турар-даа болза, бо каржы делегейге бергелер шуут турбас деп магадылавайн турар (Иса. 66:14). Ол бисти келир үеже көрүжүвүстү углаарынче деткип турар. Чүге дизе чаа делегейге бисти мөңге аас-кежиктиг чуртталга манап турар болгай (2 Кор. 4:16—18). Амдыызында Иегова биске дүжүп бербейн, улаштыр чурттаарынга хүннүң-не дузалажып чоруур (Ыы. 3:22—24). Эрткен болгаш амгы үеде Иегованың шынчы бараалгакчыларының үлегерлери бисти чүү чүвеге өөредип турар? Бис хенертен бергелерге таваржып болур бис. Ынчалза-даа аңаа ынаныр улусту Иегова албан деткиир (Ыд. ыр. 54:23). w23.04 ар. 14—15, абз. 3, 4

Чеже-даа берге болза, Иосиф биле Мария кижи чазактарынга дыңнангыр чоруктуң эки үлегерин көргүскеннер (Лк. 2:1—6). Марияның божуур айы үнүп келгенде, олар белен эвес шиитпир үндүрер апарган. Август император Рим империяның чурттакчылары шупту чизе эртер ужурлуг деп чарлык үндүрген. Иосиф биле Мария 150 хире километр ыракта Вифлеемче чизеледир дээш, белен эвес даглыг оруктап чорупканнар. Мария орук ара божупса канчаар деп, олар коргуп турган чадавас. Чүге дизе Мессияның амы-тыны оон хамааржып турган! Ол байдал оларны чазакка чагыртырындан хостаар бе? Иосиф биле Марияның дүвүрелдери турган-даа болза, олар дөмей-ле хоойлуга чагыртканнар. Оларның дыңнангырын Иегова йөрээген. Иосиф Мария-биле Вифлеемге менди-чаагай чедип алганнар. Ол кадык оолду божааш, өттүр билген медеглелдиң күүсеттинеринге дузалашкан (Мих. 5:2). w23.10 ар. 8, абз. 11; ар. 9, абз. 12

Чыышка харыылаар деп бодап кээриңерге безин, балдырыңар сириңейнип эгелээр болза канчаар? Эки белеткениңер (У. ч. 21:5). Материалды эки билген тудум, холуңарны дидим көдүрер апаар силер. Оон аңгыда, кыска харыыларны бериңер (У. ч. 15:23; 17:27). Кыска харыылаар болзуңарза, ынча дыка дүвүревес силер. Бодуңарның сөстериңер-биле кыска харыылаар болзуңарза, эки белеткенип алганыңарны база материалды ханы билип турарыңарны көргүзер силер. Ол сүмелерни ажыглаан-даа болзуңарза, дөмей-ле дүвүреп, бир-ийиден хөйнү харыылап шыдавас болзуңарза канчаар? Иегова күжениишкиннериңерни үнелеп турар деп чигзинмеңер (Лк. 21:1—4). Ол силерниң кылып шыдавас чүүлүңерни негевес (Флп. 4:5). Баштай чүнү кылып шыдаар силер, боданыңар. Чедип ап шыдаар сорулганы салып алгаш, дүвүревес кылдыр мөргүп алыңар. Эгезинде чаңгыс борбак кыска харыыны бээр деп сорулганы салып ап болур силер. w23.04 ар. 21, абз. 6—8

Дайынчы кижи кайы-даа үеде тулчурунга белен боор. Бистиң дугайывыста база ынча деп болур. Бир эвес бүзүрелдиң болгаш ынакшылдың куяк хевин база идегелдиң куяк бөргүн кедип алыр болзувусса, Иегованың хүнүнге белен боор бис. Бүзүрел, ынакшыл болгаш идегел биске эргежок чугула. Куяк хеп дайынчының чүрээн камгалап турганы дег, бүзүрел болгаш ынакшыл бистиң доора уткалыг чүрээвисти камгалап турар. Ол шынарлар үргүлчү Бурганга бараалгап, Иисустуң үлегерин эдереринге дузалаар. Бүзүреливис бар болза, бүгү чүрээвистен олче чүткүп чоруурувус дээш Иегова бисти шаңнаар деп чигзинмес бис (Евр. 11:6). Бергелерге таварышкаш-даа, Баштыңывыс Иисуска бердинген артарынче бүзүрел бисти оттурар. Амыдыралдың бергелерин ажып эртеринге база-ла бүзүрел биске дузалаар. Истеп сүрүүшкүннерге база акша-төгерик бергелеринге таварышкаш-даа, Бурганга бердинген арткан акы-угбаларның чижээнге өөренип болур бис. Оон аңгыда, быжыг бүзүрел акша-төгерикке хандыкшылдан камгалаар. Ону кылыр дизе, Бурганның Чагыргазын бирги черге салыр дээш, чуртталгазын бөдүүнчүдүп алган акы-угбалардан үлегерни алыр болзувусса эки. w23.06 ар. 10, абз. 8, 9

Бодун туттунуп билири дээрге бодалдарын тудуп, шын алдынып билир арга-шинек-тир. Ол шынар сорулгавысты чедип алырда, ону кылыр күзел чокта база ону кылыры берге турда чугула. Бодун туттунуп билири дээрге ыдыктыг сүлдениң үре-түңнели деп утпаңар. Ынчангаш ол чугула шынарны сайзырадып алырынга дузалаар кылдыр, Иеговадан ыдыктыг сүлдени дилеңер (Лк. 11:13; Гал. 5:22, 23). Таарымчалыг байдалдарны манаваңар. Бо делегейде ындыг байдалдар турбас боор. Оларны манаар болзувусса, сорулгавысты кажан-даа чедип ап шыдавас бис. Сорулгавысты чедип аары дыка берге ышкаш болза, күзеливис кошкай берип болур. Силерниң байдалыңарда база ындыг болза, сорулгаңарны бичии-бичии кезектерге чүге чарып ап болбас деп? Бир эвес кандыг-бир шынарны сайзырадып алыксап турар болзуңарза, ону бичиилеп илередиңер. А бүдүн Библияны номчуур сорулгалыг болзуңарза, эге дээреде бичиилеп-бичиилеп чүге номчуп болбас деп? w23.05 ар. 29, абз. 11—13

Иегова бо сөөлгү хүннерниң дургузунда бисти «Ыдыктыг оруктан» чандыр баспазын дээш, организациязы таварыштыр үзүк-соксаал чок «аъш-чем-биле» хандырып турар (Иса. 35:8; 48:17; 60:17). Кижи Библияны өөренип эгелээрге, «Ыдыктыг орукче» туруп алыр аргазы тыптып кээр. Чамдык улус ол орук-биле чоруп оргаш, ону кааптар, а өскелери чедер черинге четпээн шаанда, шиитпирлиг чоруп орар. А чедер ужурлуг черивис кайда? Дээрге чурттаар идегелдиг улусту «Ыдыктыг орук» дээрде «Бурганның дываажаң-сесерлиинге» эккээр (Ажыд. 2:7). Черге чурттаар идегелдиг улусту ол орук Христостуң Муң чыл башкарылгазының соонда тергиин чорукка чедирер. Силер ам ол орук-биле чоруп орар болзуңарза, хая көрүнмеңер. Чедер чериңерге, чаа делегейге, четпээн шааңарда, ол оруктан чандыр баспаңар. w23.05 ар. 17, абз. 15, 16; ар. 19, абз. 18

Иегованың силерге кылган шупту чүүлдерин бодап кээр болзуңарза, аңаа бараалгаарда бодуңарны албадавас силер. Ындыг күзел ала чайгаар тыптып кээр. (Ыд. ыр. 115:3—5). Библияда Иегованы «шупту буянныг болгаш тергиин белектер» бээр Ада деп кончуг шын адаан (Иак. 1:17, Чаа делегей). Ол белектерниң эң-не улуу — ооң Оглунуң, Иисустуң өргүлү-дүр. Ол төлевир Бурганның чоок өңнүү болурунга база мөңгеде чурттаар арганы ажытканын бодап көрүңер даан! (1 Ин. 4:9, 10). Иеговага чуртталгаңарны бараалгаткаш, кайгамчыктыг белектер дээш өөрүп четтиргениңерни көргүзер силер (Ы. х. к. 16:17; 2 Кор. 5:15). w24.03 ар. 5, абз. 8

Амгы үениң ниитилели улам баксыраан, ону көргеш, шынчы Лот дег минниишкиннерлиг бис, а ол дээрде Адавыс бужар херектерге хөңнү чогун билир болгаш, «улустуң бужар аажызындан баш муңгаш хинчектенген» (2 Пет. 2:7, 8). Лотка ол үениң кижилери ышкаш кудуку деңнелче батпазынга Бурганга ынакшыл болгаш оон коргар чорук дузалаан. Бис база Иегованың дүрүмнерин билбес, ону сагывас кижилерниң аразында чурттап турар бис. Ынчалза-даа Бурганга ынакшылдыг болгаш хүндүткелдиг коргушту сайзырадыр болзувусса, мөзү-шынар талазы-биле арыг артып болур бис. Иегова биске шын алдынарынга дуза кылдыр Чугаалар номун берген. Эр-херээжен-даа, кырган-чалыы-даа христианнарга ол номнуң мерген угаанныг сүмелериниң дугайында боданыры ажыктыг. Бир эвес Иеговадан коргар болзувусса, мөзү-шынар чок ажыл-херектерни агартпас бис. w23.06 ар. 20, абз. 1, 2; ар. 21, абз. 5

Чоок улузуңар силерге удурланып турар чадавас. Бурганның ажыл-херээнче хөй үеңерни, күжүңерни үндүрер дээш, хөй чүүлдерден ойталап, бөдүүн чурттап турар чадавас силер (Мф. 6:33). Чигзиниг чок, Иегова бүгү ажыл-херээңерни эскерип турар (Евр. 6:10). Иисустуң сөстерин бодуңарга көрген чыгыы силер: «Мен дээш болгаш Буянныг Медээ дээш бажыңын, ха-дуңмазын, ава-ачазын, ажы-төлүн база черлерин каапкаш барган кижи бүрүзү, истедип-сүрдүрер-даа болза, амгы бо амыдыралынга-ла оон чүс катап хөй бажыңны, ха-дуңманы, аваларны, ажы-төлдү база черлерни... а келир үеде — мөңге амыдыралды алыр» (Мк. 10:29, 30). Иегованың йөрээлдери шупту чидирииңерни долузу-биле, харын-даа артыр дуглаар (Ыд. ыр. 36:4). w24.03 ар. 9, абз. 5

Иудеяга улуг аш-чут эгелээрге, Антиохияда христианнар «шыдаар шаа-биле Иудеяда ха-дуңмаларынче дузаламчы чорударын шиитпирлээн» (Аж.-ч. 11:27—30). Иудея чеже-даа ырак болза, Антиохияда христианнар акы-угбаларынга дыка дузалажыксаан (1 Ин. 3:17, 18). Амгы үеде айыыл-халапка таварышкан кады бүзүрээн ха-дуңмавыска кээргелди көргүзүп болур бис. Оларга ол дораан дузалаарынга белен бис. Чижээ, дуза кадарынга беленивисти удуртукчуларга дыңнадып, делегей чергелиг ажыл-чорудулгавысче өргүп, когараан улус дээш мөргүп турар бис. Оон ыңай акы-угбаларның кол хереглелдери безин чедишпейн барып болур. Ынчангаш оларга кээргээчел чорукту илередип билири дыка чугула. Ынчан Хаанывыс Иисус Христос, Бурганның шииткелин күүседир дээш чедип келгеш, биске: «Дээрниң Чагыргазын салгап алыңар» — дээр (Мф. 25:34—40). w23.07 ар. 4, абз. 9, 10; ар. 6, абз. 12

Иисус база, ачазы ышкаш, бодамчалыг чораан. Иегова ону черже «израиль чоннуң читкен хойларынга» суртаалдаар кылдыр чоруткан. Иисус даалгазын бодамчалыг күүсеткен. Бир катап өске сөөк херээжен кижи хинчектени берген букшуураан уруу дээш чаннып дилээрге, Иисус кээргээш, ооң уруун экиртип каан (Мф. 15:21—28). Өске чижекти көрээли. Иисус элчиннерин сургап тургаш: «Менден... ойталаар кижиден Мен база... ойталаар мен» — дээн (Мф. 10:33). Пётр Иисусту үш катап билбес мен дээн. Ынчаарга ол оон хая көрнү берген бе? Чок. Ол Пётрнуң бүзүрелин база буруузун миннип турарын көрген. Дирлип келген соонда, Иисус Пётрга келгеш, аңаа ынаан база өршээп турарын бүзүреткен чадавас (Лк. 24:33, 34). Иегова биле Иисус бодамчалыг. А бистиң дугайывыста чүнү чугаалап болур? Бодамчалыг болурувусту Иегова күзеп турар. w23.07 ар. 21, абз. 6, 7

Чер дываажаң апаар деп быжыг бадыткалдар бар. Бирээде, Иегова боду аазаашкын берген. Ажыдыышкын номунда: «Дүжүлгеде саадаан Бурган ынчан меңээ: „Көр! Хамык чүвени чаартып тур мен!“» дээн. Бурган мерген угаанныг, күштүг база аазаашкынын күүседир күзелдиг. Ийиде, Иегова бодунуң сөзүнге бүзүрелдиг болгаш: «Ол болза шынныг болгаш бүзүрелдиг сөстер-дир» база «Боттанган-дыр!» дээн. Үште, Иегова бир-ле ажыл-херек эгелээн болза, ыяап-ла төнчүзүнге чедирер. Чүге дизе ол бодун «Альфа болгаш Омега» деп адаар болгай (Ажыд. 21:6). Эрликтиң мегечизин база Бурганның күзел-соруунуң күүсеттинеринге ол канчап-даа шаптыктап шыдавазын Иегова бадыткаан. Бир кижи: «Тоол-даа ышкаш» дээр болза, Ажыдыышкын 21:5, 6 дугаар шүлүктерни номчааш, тайылбырлап болур силер. Иегованың аазаашкыннары ыяап-ла күүсеттинер, чүге дизе ол адын салган болгай (Иса. 65:16). w23.11 ар. 7, абз. 18, 19

Иегова 75 харлыг ажы-төл чок Авраамга бо аазаашкынны берген. Авраам ол аазаашкынның күүсеттингенин көрген бе? Долузу-биле эвес. Ол Евфрат хемни кешкен соонда 25 чыл эрткенде, чүгле ынчан оглу Исаак төрүттүнүп келген. Ол чүүл ёзулуг хуулгаазын болган. А 60 чыл эрткенде, уйнуктары Исав биле Иаков төрүттүнген (Евр. 6:15). Авраам салгалдары өндүр улуг чон апарганын, Аазаттынган черже киргенин көрбээн. Ынчалза-даа ол чуртталгазының төнчүзүнге чедир Иегова-биле чоок хамаарылгалыг чораан (Иак. 2:23). Авраам дирлип келгеш, ооң бүзүрелиниң болгаш шыдамыының ачызында йөрээттиргенин билип кааш, дыка-ла амыраар боор! (Э. д. 22:18). Мында кандыг кичээл барыл? Иегованың кандыг-бир аазаашкыннарының күүсеттинерин манаар апаар чадавас бис. Ынчалза-даа шыдамык болзувусса, Авраам ышкаш Иегова бисти амдан эгелеп, шаңнаар база келир үеде оон-даа эки шаңнал манап турарынга чигзинмес бис (Мк. 10:29, 30). w23.08 ар. 24, абз. 14

Элээди үезинде Озия биче сеткилди база Бурганга хүндүткелдиг коргушту сайзырадып турган. Ол 68 хар чурттаан. Иегова ол хаанның чуртталгазының хөй кезиин йөрээген (2 Чыл. 26:1—4). Озия Иудеяның дайзыннарын хөй катап чылча шапкаш, Иерусалимниң камгалалын быжыглаан (2 Чыл. 26:6—15). Бурганның дузазы-биле ол дыка хөй чүүлдү чедип алган. Озия ону бодап келгеш, дыка өөрүп турган боор (Эккл. 3:12, 13). Озия хаан айтыышкыннар берип өөренген болгаш, шупту чүве ооң эргезинде деп бодаан чадавас. Ол шынчы бараалгап чораан-даа болза, бир катап менээргенип, чаагай чыттыг чүүл кыпсыр дээш, Иегованың өргээзинче кире берген. А хааннар ону кылып болбас турган. Дээди бараалгакчы Азария соксадырга-даа, хаан килеңнеп ону кылгаш, кеш аарыы-биле кезеттирген (2 Чыл. 26:16—18; 19—21). Биче сеткилдиг арткан болза, Озияның чуртталгазы көңгүс өске боор турган! w23.09 ар. 10, абз. 9, 10

Шилип чагдырткаш безин Пётр элчинниң четпес талалары турган. Ол б. э. 36 чылда кыртыжатпаан еврей эвес Корнилий ыдыктыг сүлде-биле чагдырган үеде чанынга турган. «Бурган улусту ылгай көрбес», ынчангаш шупту чоннардан улус христиан чыыштың кезии апарып болурун ол болуушкун көргүскен (Аж.-ч. 10:34, 44, 45). Ону көргеш, Пётр өске чоннар улузу-биле кады чемненип эгелээн. Мооң мурнунда ол ынчанмас турган. Ынчалза-даа чамдык еврей христианнар өске сөөк улус-биле кады чемненип болбас дээр турган. Антиохияга ындыг үзел-бодалдыг улус кээрге, Пётр еврей эвес акыларын оюп эгелээн. Ол еврей христианнарның сеткилин хомудатпас дээш ынчанган хевирлиг. Павел элчин Пётрнуң ийи арынныг чоруун көргеш, улус мурнунга шыңгыы чемелээн (Гал. 2:13, 14). Чазыпкан-даа болза, Пётр Иеговага шынчы бараалгаарын соксатпаан. w23.09 ар. 22, абз. 8

Хуралдың удуртукчулары, Иегованың хойларын күзелдии-биле, кызымаккай кадарарын уламчылаар силер бе? Ажыы-биле хынангаш, четпес талаңарны эскерип кааш, муңгараваңар! Бистиң буянныг Дээргивис эттинип аарынга дузалаар (1 Пет. 2:3). «Бурган [өөредилгеңерни эчизинге чедирер]... шыдамык чорукту силерге бээр» — деп, Пётр элчин бисти бүзүреткен. Бурганның Оглунуң чанынга бараалгаарынга төлеп чок мен деп, Пётр миннип турган (Лк. 5:8). Ынчалза-даа ол Иегова биле Иисустуң деткимчезиниң ачызында дүжүп бербейн, Христосту шынчы эдерип чораан. Түңнелинде, Пётр «Дээргивис болгаш Камгалакчывыс Иисус Христостуң мөңге Чагыргазынга» кирер хүндүткелди алган (2 Пет. 1:11). Дүжүп бербейн, силерни өөредир кылдыр Иеговага чөпшээреп, Пётрдан үлегерни алыр болзуңарза, мөңге амыдыралды шаңналга ап, «камгалалыңар чедип» алыр силер (1 Пет. 1:9). w23.09 ар. 30, абз. 14; ар. 31, абз. 16, 17

Бурунгу үеде бараалгакчылар хүлээлгезин ыдыктыг өргээ-майгынның хериминиң иштинге күүседир турган. Аңаа бүрүн өрттедир өргүл салыр улуг бедигээш биле чунар сава турган. Бараалгаарының мурнунда савада суг-биле бараалгакчылар чунуп аар турган (Хост. 30:17—20; 40:6—8). Амгы үеде чагдырган христианнар Бурганның өргээзиниң иштики хериминде шынчы бараалгап чоруур. Чагдырган-даа, өске-даа христианнарга улуг суглуг сава мөзү-шынарның болгаш чүдүлгениң арыг болурунуң чугулазын сагындырып турар. «Мөөң чон» кайда бараалгап турар? Олар «дүжүлгениң... баарында» — өргээниң даштыкы хериминде Бурганга «дүн-хүн дивейн... бараан болуп» турарын Иоанн элчин көрген (Ажыд. 7:9, 13—15). Өндүр улуг өргээзинге чүдүүрүн чөпшээрээни дээш, Иеговага дыка-ла өөрүп четтирер-дир бис! w23.10 ар. 28, абз. 15, 16

Иегова бисти хуралдың удуртукчулары таварыштыр база сорук киирип, быжыктырып болур (Иса. 32:1, 2). Ынчангаш силерни бир-ле чүве дүвүредип турар болза, удуртукчулар-биле чугаалажыңар. Дуза кадарга ойталавайн, өөрүп четтирип хүлээп алыңар. Шак ынчаар Иегова силерни күштүг кылып каар. Библияга үндезилээн мөңге чурттаар кайгамчыктыг идегел бар: бир кижи дываажаң черге чурттаар, а өскези дээрге Бурганның Чагыргазынга. Идегелдиң ачызында шенелделерни шыдажыр, өөрүшкүлүг медээни суртаалдаар база чыышка янзы-бүрү даалгалар күүседир күжүвүс бар (Рим. 4:3, 18, 19; 1 Фес. 1:3). Ол-ла идегел Павел элчинни быжыктырып турган. Ол кызагдалды, истеп сүрүүшкүннү, аай-бажы тывылбас азы амы-тыны безин хыл кырынга келген байдалдар көргенин бижээн (2 Кор. 4:8—10). Павел шенелделерни ажып эртер күштүг турган, чүге дизе кичээнгейни идегелинче салып чораан (2 Кор. 4:16—18). Павел элчин келир үеде дээрге чурттаар идегелин үнелеп, ол дээш кандыг-даа хилинчекти ажып эртеринге белен чораан. Павел күжүнүң үндезини боор идегелиниң дугайында ханы боданып турган. w23.10 ар. 15—16, абз. 14—17

«Мээң дилээмни күүседири ам Иеговага таарымчалыг үе бе?» Иегова мөргүлүвүске дораан харыылапкан болза деп күзээр бис. Ынчалза-даа харыылаарынга таарымчалыг үени ол эки билир (Евр. 4:16). Күзээн чүүлүвүстү дораан албайн баргаш, «чок» дээн деп бодаар бис. Ынчалза-даа Иегова «бичии мана» дээн чадавас. Чижээ, аныяк акывыс аарыындан дыка эттинип алыксаан. Ынчалза-даа ооң кадыы экиживээн. Бир эвес Иегова акывысты хуулгаазын арга-биле экиртиптер болза, Эрлик ону чемелээр арга кылып аар. Акывысты ол чүгле экирий бергени дээш Бурганга бараалгап турар деп болур (Иов 1:9—11; 2:4). Шупту аарыгларны экиртиптер үени Иегова шагда-ла шилип каан (Иса. 33:24; Ажыд. 21:3, 4). Амдыызында хуулгаазын эмнээшкин манавас бис. Ынчангаш акывыс аарыгга бастырбайн, улаштыр шынчы бараалгаар дээш, Иеговадан күштү болгаш сагыш-сеткилге оожургалды дилеп болур. w23.11 ар. 23, абз. 13

Самсон улуг частырыгны кылган-даа болза, дүжүп бербейн, Бурганның даалгазын күүседир хөөнүн чидирбээн (Башт. 16:28—30). Ынчангаш ол Иеговадан: «Филистимнерден өжээнимни негеп алыйн» — деп дилээн. Бурган Самсоннуң мөргүлүнге харыылап, кайгамчыктыг күжүн эгидип берген. Ол удаада Самсон кажангызындан артык хөй филистимнерни узуткаан. Частырыы дээш аар өртек төлээн-даа болза, Самсон Иегованың күзелин күүседиксеп турган. Биске база эдип-чазаашкын херек апарганда азы хүндүткелдиг даалганы чидирип алган болзувусса, дүжүп бербес ужурлуг бис. Бурган өршээринге белен деп утпаңар (Ыд. ыр. 102:8, 9). Эрткен үеде чазыпкан-даа болзувусса, Самсонга ышкаш, Иегова биске чаа даалгаларны бүзүреп, күш киирип болур. w23.09 ар. 6, абз. 15, 16

Туруштуг чорууңар Бурганның ээ көрүүшкүнүн эккээр. Ынчаарга бергелерге таваржырывыска Иегова өөрүүр дээни ол бе? Чок. Шенелделер үезинде шынчы болзувусса, Иегова бис дээш өөрүүр, биске ээ көрнүр. Туруштуувусту көргеш, Иегова бис дээш чоргаарланыр деп билири дыка-ла өөрүнчүг! (Ыд. ыр. 5:13). Авраамны сактып келиңер. Ол дыка улуг шенелделерге таварышкаш, төлептии-биле шыдашкан. Ынчангаш Иегова ону өңнүү деп санааш, чөптүг-шынныг деп чарлаан (Э. д. 15:6; Рим. 4:13, 22). Бурганның мурнунга шак ындыг аттыг болурун күзээр чадавас силер. Ону чедип ап болур. Кайы хире бараалгаарывыстан, кандыг даалга алганывыстан Бурганның ээ көрүүшкүнү хамаарышпас. Берге үелерде безин шынчы артарывыс аңаа чугула. Кижи бүрүзү туруштуг болуп шыдаар. Ол шынар назы-хардан, салым-чаяандан база байдалдан хамаарышпас. Бо үеде шенелде эртип турар силер бе? Иегова кайы хире бердингениңерни үнелээрин утпаңар. Бурганның мурнунга шын кылып турарывысты тода билир болзувусса, ол биске ээ көрнүр деп канчап-даа чигзинмес бис. Ынчаарга шаңнал чок артпас бис, идегеливис оон-даа быжыгар. w23.12 ар. 11, абз. 13, 14

Христиан кижиге улус-биле эки чугаалажып билири чугула. Ол өске улусту дыңнап, оларның бодалдарынга, сеткил сагыжынга кичээнгейлиг болур ужурлуг (У. ч. 20:5). Ону кылырда кижилер-биле хөй үе эрттирип, арнының болгаш үнүнүң аянынга база мага-бодунуң шимчээшкиннеринге кичээнгейлиг болуп өөренири чугула. Улус-биле чүгле мессенджер, СМС таварыштыр чугаалажыр болзуңза, оон анаа чугаалажыры берге апаар. Ынчангаш интернеттен үнүп, кижилер-биле хууда харылзажыр аргаларны диле (2 Ин. 12). Бүзүрели быжыг христиан кижи бодун болгаш өг-бүлезин азырап шыдаар ужурлуг (1 Тим. 5:8). Таарымчалыг ажыл тып алырынга дузалаар мергежилди өөренип алыры чугула (Аж.-ч. 18:2, 3; 20:34; Эф. 4:28). Ажылгыр кежээ болуп, эгелээн чүүлүң төндүрүп өөрен. Ынчан идегелдиг база үлегерлиг ажылчын болур сен. w23.12 ар. 27, абз. 12, 13

Иегованың хүнү дээрге чүл ол? Күчүлүг Бурган дайзыннарын узуткап, бараалгакчыларын камгалаар үе-дир деп Библияда көргүскен. Бурунгу үеде Иегова чамдык чоннарны база кезедип турган (Иса. 13:1, 6; Иез. 13:5; Соф. 1:8). Бистиң үевисте Иегованың хүнү Өндүр улуг Вавилонче халдаашкындан эгелээш, Армагеддон дайыны-биле төнер. Иегованың хүнүнде дириг артар дизе, амдыгааштан эгелеп, аңаа белеткенир болзувусса эки. Бис коргунчуг хилинчекке белен болур ужурлуг бис деп, Иисус өөредип турган болгай (Мф. 24:21; Лк. 12:40). Павел элчин Иегованың өндүр улуг шииткел хүнүнге белен болурунга дузалаар дээш, элээн каш чижекти 1 Фессалоникчилерге чагаазында ажыглаан. Иегованың хүнү элээн үе эрткенде кээр деп, ол билир турган (2 Фес. 2:1—3). Ындыг турбуже, ол кады бүзүрээн ха-дуңмазын баш удур белеткенип, ол хүн даарта дүжер ышкаш кылдыр бодаарынче оттурган. w23.06 ар. 8, абз. 1, 2

Токиога 1970 чылдарның төнчүзүнде 60 каът бажыңны тудуп каан. Бо-ла чер шимчээшкини боор черге ол бажың бузулбайн, туруп шыдаар бе дээш, улус кайгап турган. Ол бажыңның быжыг болган чажыды чүде? Инженерлер ону кадыг-быжыг, чер силгиирге-даа шимчээш, эвинче туруп аар кылдыр чогаадып каан. Бурганның бараалгакчылары база шак ындыг бедик бажыңга дөмей. Кандыг уткалыг? Христиан кижи кайы хире кадыг-быжыг боорун база байдал ёзугаар канчаар алдынарын билир болза эки. Ол Иегованың хоойлуларынга болгаш негелделеринге хамаарыштыр чайгылыш чок боор ужурлуг. Христиан кижи Бурганның дүрүмнеринге чагыртырынга белен, оларны күүсетпес чылдагаан дилевес. Оон ыңай болдунар-ла болза, азы байдал негеп кээрге, «чайлап бээринге белен» болуру чугула (Иак. 3:17, Чаа делегей). Өйүн билир кижи эмин эрттир чымчак-даа, кадыг-даа болбас. w23.07 ар. 14, абз. 1, 2

Иисус Эрликтиң күткүлгелеринге удурланып турган. Ол дайзын Бурганны садыптарынче Иисусту ажыы-биле ыдалаан (Мф. 4:1—11). Эрлик Иисустуң бачыт кылыптарын дыка күзээн. Ол албадап шыдапкан болза, Иисус амы-тынын өргүлге эккеп шыдавас турган. Иисус черге бараалгалын эгелей бээрге, шенелделер соксаваан. Дайзыннары ону истеп сүрүп, каш-даа катап өлүрерин оралдашкан (Лк. 4:28, 29; 13:31). Ол өөреникчилериниң частырыгларын шыдажып турган (Мк. 9:33, 34). Иисусту шиидип турда улус ону кочулап, шоодуп турган. Оон бак атка киирип, хилинчектеп шаажылаан (Евр. 12:1—3). Шенелдениң сөөлгү кезээн Иегованың камгалалы чокка Иисус чааскаан эрткен (Мф. 27:46). Ийе, төлевирни бээр дээш Иисус дыка хилинчектенген. Ооң бис дээш күзелдии-биле кылган чүүлүн бодап кээривиске, чүрээвис ынакшыл болгаш өөрүп четтириишкин-биле долуп кээр. w24.01 ар. 10—11, абз. 7—9

Шыдамык чоруктуң ачызында өске улус-биле эки хамаарылгалыг болуру белен. Өске кижиниң чугаазын кичээнгейлиг дыңнаарынга ол шынар дузалаар (Иак. 1:19). Оон аңгыда, шыдамык чорук улус-биле тайбың болурунга дузалаар, бодал чокка харыы бээринден оваарындырар. Маргыштыг байдалда безин багай чүүл чугаалавас бис. Шыдамык болгаш, бир-ле кижи хомудадыптарга, изигленмес, өжээн негевес бис. Ооң орнунга: «Бот-боттарыңарның четпестерин шыдажып, бот-боттарыңарны ак сеткилдии-биле өршээңер» — деп библейжи айтыышкынга чагыртыр бис (Кол. 3:12, 13, Чаа делегей). Шыдамык чорук эки шиитпирлер эккээр. Болдунар аргаларны сайгаргаш, минниишкиннерге алыспайн, деңзигүүрлүг шиитпирни үндүрер бис. Ажыл дилеп турган дижик бис. Чыыштар үзер, бараалгалга эвээш үе үндүрер ажылга чөпшээрежиптер айыыл бар. Шыдамык болзувусса, аңгы-аңгы талаларны көөр бис. Чижээ, өг-бүлевиске база Бурган-биле найыралывысче кандыг салдарлыг болур? Шыдамык болзувусса, шын эвес шиитпирлеривис дээш, сөөлүнде хомудавас бис. w23.08 ар. 22, абз. 8, 9

Бодуңарга шын эвес күзел эскерип кааш, дыка муңгараваңар! Иеговага аазаашкыныңар дугайында боданыңар. Бараалгадыышкын даңгыраа күткүлгелер-биле демисежир күзелиңерни быжыктырар, херек кырында дуза болур. Кандыг уткалыг? Иеговага чуртталгаңарны бергеш, бодуңардан ойталаан силер. Ол аазаашкын Иегованы хомудадып болур күзелдерге, сорулгаларга чок дээниңерни көргүскен (Мф. 16:24). Ынчангаш берге байдалдарда аайын тыппайн, ону сайгарар үе үндүрүп турбас силер. Чүге дизе Иеговага шынчы болурундан аңгыда, өске оруктарны дуглааш, ону өөртүр деп быжыг хөөнненип алган силер. Шыдажыр аргажок байдалда силерде: «Буруу чогумдан ойталавас мен» — дээн, Иов ышкаш чаныш-сыныш чок хөөннүг боор силер (Иов 27:5). w24.03 ар. 9, абз. 6, 7

Ынакшылдыг Бурганывыс Иегова кезээде бис-биле кады! (2 Кор. 13:11). Ол бисти бердинген ынакшылы-биле бүргеп, кижи бүрүзүн сеткилинден сонуургап чоруур (Ыд. ыр. 31:10). Бурган ынакшылын канчаар көргүзүп турарын эки боданыр болзувусса, ол биске көскү болгаш чоок апаар. Дидими-биле мөргүп, ооң ынакшылы биске кайы хире херегин чугаалап болур бис. Сагыш сеткиливистиң дүвүрелдерин үлежип, ол бисти билир база албан дузалажыр деп чигзинмес бис (Ыд. ыр. 144:19). Кижи соок хүнде одаг чанынга чыннып туруксаары ышкаш, Иегованың ынакшылынга чоок болуксаар бис. Ооң ынакшылы — эрге-чассыг, күштүг. Иегованың эргим ажы-төлү болуру дыка-ла улуг аас-кежик-тир! Ыр күүседикчизи ышкаш, ооң ынакшылынга харыы кылдыр: «[Иеговага] ынак-тыр мен» деп ыыткыр чугаалаалыңар (Ыд. ыр. 114:1). w24.01 ар. 31, абз. 19, 20

Еврейлер Бурганның ады — Иегова деп билир турган, ынчангаш Иисус оларга Бурганны эки билип алырынга дузалажып турган (Ин. 1:17, 18). Чижээ, Еврей Бижилгелер Иегованың энерелин, кээргээчелин ажыткан (Хост. 34:5—7). Иисус ону будалып читкен оглун уткуп алган аданың дугайында угаадыглыг төөгүнүң дузазы-биле тайылбырлаан. Буруузунган оглун ырактан-на көрүп кааш, «ачазы оглунга маңнап чеде бергеш, ону кужактааш», сеткилиниң ханызындан өршээп каанын номчуурга, Иегованың энерели, кээргээчели каракка чуруттунуп кээр (Лк. 15:11—32). Иисус кижилерге Адазының херек кырында кандыызын билип алырынга дузалашкан. w24.02 ар. 10, абз. 8, 9

Иегова дуза дилээн улусту сорук киирип, аргалап турар. Өске улусту кээргеп, аргалаар болзувусса, Иегованың үлегерин эдерер бис. Ону кылырда чүрээвиске херек шынарларны сайзырадыры чугула. Хүнден хүнче бот-боттарывысты аргалаарда ээ көрүүшкүннү, буянны илередип өөренир ужурлуг бис (Кол. 3:12; 1 Фес. 4:18; 1 Пет. 3:8). Кээргелди, ээ көрүүшкүннү болгаш буянны сайзыраткан тудум, муңгараан улусту аргалаар күзеливис дам күштелир. Иисус мынча дээн: «Кижиниң чүрээнде чүү бар болдур, ол ооң аксындан үнер болгай. Буянныг кижи буян шыгжаан черинден буянын уштуп кээр» (Мф. 12:34, 35). Бергелерге таварышкан акы-угбавысты аргалаарывыска, олар ынакшылывысты миннир. w23.11 ар. 10, абз. 10, 11

Библейжи медеглелдерниң утказын дуза чокта билип ап шыдавас бис. Чижээ, танывазыңар черге ону эки билир эжиңер-биле дыштанып чоруур дижик силер. Кайда турарыңарны база орук бүрүзүн ол билир. Иегова шак ындыг өңнүкке дөмей. Төөгүнүң кайы үезинде чурттап турарывысты база келир үеде чүү болурун ол билир. Ынчап кээрге, медеглелдерниң утказын билип аар дээш, Иеговадан дузаны биче сеткилдиг дилээр ужурлуг бис (Дан. 2:28; 2 Пет. 1:19, 20). Эки ада-ие ышкаш, Иегова ажы-төлүнге аас-кежиктиг келир үени күзээр (Иер. 29:11). Кижилерге бодаарга, Бурган келир үени бирден-бирээ чокка өттүр сөглеп шыдаар. Ол чамдык эр улусту келир үеде кандыг чугула болуушкуннар болурун бисти билип алзын дээш, өттүр билген медеглелдерни бижииринче оттурган (Иса. 46:10). w23.08 ар. 8, абз. 3, 4