Kumbuka Kusali kwa Ajili ya Wengine

1. Tunajuaje kwamba sala zetu ni za muhimu kwa Yehova?

SALA ni uandalizi mzuri sana. Fikiria jambo hili: Yehova amewapatia malaika migawo fulani. (Zab. 91:11) Pia, amempatia Mwana wake majukumu muhimu sana. (Mt. 28:18) Hata hivyo, vipi kuhusu kusikiliza sala zetu? Hilo ni jambo ambalo Yehova anafanya mwenyewe. Yehova akiwa “Msikiaji wa sala,” yeye binafsi anatusikiliza.—Zab. 65:2.

2. Mtume Paulo alituwekea mfano gani inapohusu kusali kwa ajili ya wengine?

² Ingawa tunaweza kumfikia Yehova kwa uhuru na kumweleza kuhusu mambo yanayotuhangaisha, tunapaswa kusali kwa ajili ya wengine pia. Mtume Paulo alifanya hivyo. Kwa mfano, aliliandikia hivi kutaniko katika jiji la Efeso: “Ninaendelea kuwataja katika sala zangu.” (Efe. 1:16) Pia, Paulo alisali kwa ajili ya mtu mmoja-mmoja. Kwa mfano, alimwambia Timotheo hivi: “Ninamshukuru Mungu, . . . siachi kamwe kukukumbuka katika dua zangu usiku na mchana.” (2 Tim. 1:3) Paulo alikuwa na mahangaiko yake mwenyewe ambayo alisali kuhusu. (2 Kor. 11:23; 12:​7, 8) Hata hivyo, alitenga wakati ili kusali kwa ajili ya wengine.

3. Kwa nini huenda tukasahau kusali kwa ajili ya wengine?

³ Nyakati fulani huenda tukasahau kusali kwa ajili ya wengine. Kwa nini? Dada Mkristo anayeitwa Sabrinaa anataja sababu moja. Anasema hivi: “Maisha katika mfumo huu ni yenye shughuli nyingi. Matatizo yetu yanaweza kutukengeusha sana hivi kwamba tukasali tu kuhusu mahitaji yetu wenyewe.” Je, umegundua kwamba pindi fulani wewe pia unakuwa na mwelekeo huo? Ikiwa ndivyo, makala hii inaweza kukusaidia. Makala hii (1) itafafanua kwa nini ni muhimu kusali kwa ajili ya wengine na (2) itatoa mapendekezo ya jinsi unavyoweza kufanya hivyo.

KWA NINI TUSALI KWA AJILI YA WENGINE?

4-5. Sala zetu kwa ajili ya wengine zinawezaje kuwa na “nguvu nyingi”? (Yakobo 5:16)

⁴ Sala zetu kwa ajili ya wengine zina “nguvu nyingi.” (Soma Yakobo 5:16.) Je, kweli kusali kwa ajili ya wengine kunaweza kubadili matokeo ya hali wanazopitia? Ndiyo. Yesu, akijua kwamba baada ya muda mfupi mtume Petro angemkana, alisema hivi: “Nimeomba dua kwa ajili yako ili imani yako isidhoofike.” (Luka 22:32) Paulo alijua pia kwamba sala inaweza kuboresha hali. Alipofungwa isivyo haki jijini Roma, alimwandikia hivi Filemoni: “Ninatumaini kwamba kupitia sala zenu nitarudishwa kwenu.” (Flm. 22; tazama habari za utafiti “for I am hoping that through your prayers,” nwtsty.) Matokeo ni kwamba muda mfupi baadaye Paulo aliachiliwa huru na aliweza kuendelea kuhubiri.

⁵ Bila shaka, hilo halimaanishi kwamba tunaweza kumshinikiza Yehova kupitia sala zetu. Anaona jinsi watumishi wake wanavyohangaishwa na jambo wanalosali kuhusu, na pindi fulani anachagua kutenda kulingana na maombi yao. Kujua hilo kunaweza kutusaidia kusali kwa Yehova kutoka moyoni kuhusu jambo fulani, kisha kuliacha mikononi mwake tukiwa na uhakika kwamba atalishughulikia.—Zab. 37:5; tazama 2 Wakorintho 1:11 na habari za utafiti, nwtsty.

6. Kusali kwa ajili ya wengine kunaweza kufanya tuhisije kuwahusu? (1 Petro 3:8)

⁶ Kusali kwa ajili ya wengine kunatusaidia kusitawisha “huruma nyororo.” (Soma 1 Petro 3:8.) Mtu mwenye huruma anatambua mateso ya mtu mwingine na anatamani kumsaidia. (Marko 1:​40, 41) Mzee anayeitwa Michael anasema hivi: “Ninaposali kwa ajili ya mahitaji ya wengine, ninaelewa vizuri zaidi changamoto wanazopitia na hilo linanifanya niwapende zaidi. Ninahisi nikiwa karibu zaidi nao, ingawa huenda wasitambue jambo hilo. Mzee wa kutaniko anayeitwa Richard anaeleza faida nyingine. Anasema hivi: “Tunaposali kwa ajili ya mtu mwingine, tunachochewa zaidi kutaka kumsaidia.” Anaongezea hivi: “Tunapotoa msaada hususa kwa mtu tunayesali kwa ajili yake, kwa njia fulani ni kana kwamba tunasaidia kujibu sala zetu kwa ajili yake.”

7. Kusali kwa ajili ya wengine kunatusaidiaje kuwa na mtazamo unaofaa kuhusu matatizo yetu? (Wafilipi 2:​3, 4) (Tazama pia picha.)

⁷ Kusali kwa ajili ya wengine kunatusaidia kuwa na mtazamo unaofaa kuhusu matatizo yetu. (Soma Wafilipi 2:​3, 4.) Sisi sote tunakabiliana na hali ngumu zinazotokana na kuishi katika ulimwengu ulio chini ya Ibilisi. (1 Yoh. 5:19; Ufu. 12:12) Tunapokuwa na zoea la kusali kwa ajili ya wengine tunakumbushwa kwamba “mateso yaleyale yanaupata ushirika mzima wa ndugu [zetu].” (1 Pet. 5:9) Painia anayeitwa Katherine, anasema hivi: “Kusali kwa ajili ya wengine kunanikumbusha kwamba wengine pia wanakabili changamoto. Jambo hilo linanisaidia kutokazia fikira kupita kiasi matatizo yangu.”

WANAHITAJI SALA ZETU

8. Toa mifano ya wale unaoweza kusali kwa ajili yao.

⁸ Tunaweza kusali kwa ajili ya nani? Tunaweza kusali kwa ajili ya vikundi vya watu—kwa mfano, wale walio na matatizo ya afya, vijana wanaodhihakiwa na wanaoshinikizwa na wanafunzi wenzao kufanya mambo mabaya, au wale wanaokabili changamoto zinazosababishwa na kuzeeka. Waamini wenzetu wengi wanakabili upinzani kutoka kwa watu wa familia au serikali. (Mt. 10:​18, 36; Mdo. 12:5) Baadhi ya ndugu zetu wamehitaji kuacha nyumba zao kwa sababu ya machafuko ya kisiasa. Wengine wanateseka kwa sababu ya majanga ya asili. Huenda hatuwajui ndugu na dada hao kibinafsi. Lakini tunaposali kwa ajili yao, tunaonyesha kwamba tunatii amri ya Yesu ya ‘kupendana.’—Yoh. 13:34.

9. Kwa nini tunapaswa kusali kwa ajili ya wale wanaoongoza katika tengenezo la Yehova na wake zao?

⁹ Tunaweza pia kusali kwa ajili ya wale wanaoongoza katika tengenezo la Yehova. Wanatia ndani washiriki wa Baraza Linaloongoza na wasaidizi wao, washiriki wa Halmashauri za Tawi, waangalizi katika ofisi za tawi, waangalizi wa mizunguko, wazee wa kutaniko, na watumishi wa huduma. Wengi kati ya ndugu hao wanapambana na mahangaiko yao wenyewe wanapoendelea kutumiwa kabisa kwa ajili yetu. (2 Kor. 12:15) Kwa mfano, mwangalizi wa mzunguko anayeitwa Mark anasema hivi: “Mojawapo ya changamoto kubwa ninayokabili ni kuwa mbali na wazazi wangu wanaozeeka. Wote wawili wana matatizo ya afya. Ingawa mahitaji yao yanashughulikiwa na dada yangu na mume wake, ninaumia sana kwa sababu siwezi kufanya mengi kibinafsi ili kuwasaidia.” Iwe tunajua mahangaiko ambayo ndugu hao wenye bidii wanakabili au la, itafaa sana tukiendelea kusali kwa ajili yao. (1 The. 5:​12, 13) Tunaweza pia kusali kwa ajili ya wake wa ndugu hao, kwa kuwa wanawaunga mkono waume zao kwa ushikamanifu ili waweze kuendelea katika migawo yao.

10-11. Je, sala ambazo si za kihususa kwa ajili ya ndugu na dada zetu zinampendeza Yehova? Eleza.

¹⁰ Kama tulivyotaja awali, mara nyingi sisi husali kwa ajili ya vikundi vya ndugu na dada. Kwa mfano, bila kumfikiria mtu hususa akilini, tunaweza kumwomba Yehova awasaidie wale waliofungwa gerezani au awafariji wale waliopoteza wapendwa wao katika kifo. Mzee wa kutaniko anayeitwa Donald, anasema hivi: “Tuna ndugu na dada wengi wanaopitia changamoto mbalimbali hivi kwamba nyakati nyingine tunatoa sala ya ujumla ili tuweze kuwahusisha wale wote wanaoteseka.”

¹¹ Je, sala hizo zinampendeza Yehova? Ndiyo! Ukweli ni kwamba hatujui mahitaji hususa ya waamini wenzetu wote. Hivyo, inafaa kutoa sala ambazo si za kihususa kwa ajili vikundi vya ndugu na dada zetu. (Yoh. 17:20; Efe. 6:18) Sala hizo zinathibitisha kwamba ‘tunaupenda ushirika mzima wa akina ndugu.’—1 Pet. 2:17.

TUNAPOSALI KWA AJILI YA MTU MMOJA-MMOJA

12. Kuwa na utambuzi kunawezaje kutusaidia kutaja mambo hususa zaidi katika sala zetu?

¹² Uwe na utambuzi. Zaidi ya kusali kwa ajili ya vikundi vya ndugu na dada, ni jambo linalofaa kutaja majina ya watu tunaposali kwa ajili yao. Je, kuna mtu katika kutaniko lenu mwenye ugonjwa wa muda mrefu? Je, kuna kijana aliyevunjika moyo kwa sababu wanafunzi wenzake wanamshinikiza kufanya mambo mabaya? Je, kuna mzazi ambaye hana mwenzi anayejitahidi kumlea mtoto wake “katika nidhamu na maagizo ya Yehova”? (Efe. 6:4) Ukiwa mtambuzi, utakuwa na hisia mwenzi zaidi, jambo ambalo litakuchochea kusali kwa ajili yao.b—Rom. 12:15.

13. Tunawezaje kusali kwa ajili ya wale ambao hatuwajui kibinafsi?

¹³ Sali kwa ajili ya wengine ukitaja majina yao. Tunaweza kufanya hivyo hata ikiwa hatujawahi kuonana nao. Kwa mfano, wafikirie ndugu na dada waliofungwa gerezani katika maeneo kama vile Crimea, Eritrea, Singapore, na Urusi. Kwenye jw.org, unaweza kupata majina ya wale waliofungwa gerezani.c Mwangalizi mmoja wa mzunguko anayeitwa Brian, anasema hivi: “Nimejionea kwamba kuandika jina la mwamini mwenzangu aliyefungwa gerezani, kisha kulitaja kwa sauti, kunanisaidia kumkumbuka na kumtaja katika sala zangu za kibinafsi.”

14-15. Tunawezaje kumwomba Yehova mambo hususa?

¹⁴ Mwombe Yehova mambo hususa. Michael, aliyenukuliwa awali, anapendekeza hivi: “Ninaposoma masimulizi ya ndugu waliofungwa gerezani kwenye jw.org, ninajaribu kuwazia ningehisije kama ningekuwa katika hali yao. Ninajua kwamba ningekuwa na wasiwasi kuhusu mke wangu na ningetaka kuhakikisha kwamba atatunzwa. Kufanya hivyo kunanipa jambo hususa la kutaja katika sala zangu kwa ajili ya ndugu zetu waliofungwa gerezani ambao wana wenzi wa ndoa.”—Ebr. 13:​3, maelezo ya chini.

¹⁵ Tunapofikiria kuhusu maisha ya kila siku ambayo ndugu zetu wanapitia huko gerezani, tunaweza kupata mambo mengine hususa ya kutaja katika sala zetu. Kwa mfano, tunaweza kusali kwamba walinzi wa gereza wawatendee kwa fadhili na kwamba wenye mamlaka wawaruhusu ndugu zetu waabudu kwa uhuru. (1 Tim. 2:​1, 2) Tunaweza kusali kwamba kutaniko ambalo ndugu huyo anashirikiana nalo litatiwa moyo na mfano wa ndugu yao mwaminifu aliyefungwa gerezani au kwamba watu wasio waamini waone mwenendo mzuri wa ndugu aliyefungwa na kusikiliza ujumbe wetu. (1 Pet. 2:12) Bila shaka, kanuni hizohizo zinaweza kutusaidia tunaposali kwa ajili ya ndugu na dada zetu wanaopitia majaribu mengine. Kwa kuonyesha utambuzi, kusali kwa ajili ya wengine tukitaja majina yao, na kumwomba Yehova mambo hususa, tunaweza kuonyesha kwamba ‘tunapendana zaidi.’—1 The. 3:12.

UWE NA USAWAZIKO INAPOHUSU SALA ZAKO

16. Tunawezaje kuwa na usawaziko inapohusu sala zetu? (Mathayo 6:8)

¹⁶ Kama tulivyoona, sala zetu zinaweza kubadili matokeo ya hali ambazo mtu anapitia. Hata hivyo, tunahitaji kuwa na usawaziko. Tunaposali, hatumwambii Yehova kuhusu jambo ambalo yeye hajui; wala hatupaswi kumshauri kuhusu jinsi ya kushughulikia hali fulani vizuri zaidi. Yehova anajua watumishi wake wanahitaji nini hata kabla ya wao—au sisi kutambua. (Soma Mathayo 6:8.) Basi, kwa nini tunapaswa kusali kwa ajili ya wengine? Mbali na sababu ambazo tayari tumetaja katika makala hii, hilo ni jambo ambalo watu wanaojali hufanya. Upendo hutuchochea tusali kwa ajili ya wengine. Yehova anafurahi anapoona watumishi wake wakiiga upendo wake.

17-18. Toa mfano unaofafanua sala zetu kwa ajili ya waabudu wenzetu?

¹⁷ Hata ikiwa inaonekana sala zetu hazibadili matokeo ya hali fulani, zinaonyesha upendo wetu kwa ndugu na dada zetu, na Yehova anaona jambo hilo. Tunaweza kutumia mfano huu kufafanua jambo hilo: Wazia familia yenye watoto wawili—mvulana na msichana. Mvulana ni mgonjwa na amelala kitandani. Msichana anamsihi hivi baba yake: “Tafadhali msaidie ndugu yangu. Ni mgonjwa sana!” Tayari baba alikuwa anashughulikia hali hiyo; anampenda mwana wake na anamtunza vizuri. Hata hivyo, ni lazima baba yake anafurahi sana anapoona binti yake mdogo akimjali sana ndugu yake hivi kwamba anamsihi baba yake amsaidie.

¹⁸ Yehova anatutia moyo tufanye vivyo hivyo—tuwajali ndugu na dada zetu na kusali kwa ajili yao. Tunapofanya hivyo, sala zetu zinafunua ni kwa kadiri gani tunawahangaikia bila ubinafsi wengine, na Yehova anaona hilo. (2 The. 1:3; Ebr. 6:10) Pia, kama tulivyozungumzia, katika visa fulani sala zetu zinaweza hata kubadili matokeo ya hali fulani. Hivyo, acheni tufanye yote tunayoweza ili kusali kwa ajili ya wengine.