Yehova “Huwaponya Waliovunjika Moyo”

1. Yehova anahisije kuhusu watumishi wake?

YEHOVA anaona nini anapowatazama watumishi wake duniani? Anajua tunapokuwa na shangwe au huzuni. (Zab. 37:18) Anafurahi sana anapoona kwamba tunamtumikia kwa uwezo wetu wote licha ya kupambana na maumivu ya kihisia! Zaidi ya hilo, yuko tayari kututegemeza na kutufariji.

2. Yehova anawafanyia nini wale waliovunjika moyo, na tunawezaje kunufaika kutokana na utunzaji wake?

² Zaburi 147:3 inasema kwamba Yehova “huyafunga majeraha” ya waliovunjika moyo. Hapo Yehova anafafanuliwa kuwa anawatunza kwa wororo wale wenye majeraha au walioumizwa kihisia. Tunapaswa kufanya nini ili tunufaike na utunzaji wa Yehova? Fikiria mfano huu. Daktari mwenye ustadi anaweza kufanya mengi ili kumtibu mtu aliyejeruhiwa. Hata hivyo, ili mtu aliyejeruhiwa apone, ni lazima afuate kwa uangalifu maagizo ya daktari. Katika makala hii, tutaona kile ambacho Yehova anawaambia wale wenye maumivu ya kihisia katika Neno lake na tutachunguza jinsi tunavyoweza kutumia ushauri wake wenye upendo.

YEHOVA ANATUHAKIKISHIA KWAMBA SISI NI WENYE THAMANI

3. Kwa nini baadhi ya watu wanahisi hawana thamani?

³ Tunaishi katika ulimwengu ambao hauna upendo, na kwa kusikitisha, watu wengi wamefanywa wahisi kwamba hawana thamani. Dada anayeitwa Helena anasema hivi: “Nililelewa katika familia ambayo haikuwa na upendo. Baba yangu alikuwa mkatili na alitukumbusha kila siku kwamba hatukuwa na thamani.” Kama Helen, huenda wewe pia umetendewa kwa njia isiyofaa, umechambuliwa mara kwa mara, au kufanywa ujihisi hustahili kupendwa. Ikiwa ndivyo, huenda ukaona ni vigumu kuamini kwamba mtu yeyote anaweza kukujali kwa unyoofu.

4. Kulingana na Zaburi 34:​18, Yehova anatupatia uhakikisho gani?

⁴ Hata ikiwa wengine wamekutendea kwa njia isiyofaa, unaweza kuwa na uhakika kwamba Yehova anakupenda na anakuthamini. Yuko “karibu na wale waliovunjika moyo.” (Soma Zaburi 34:18.) Ikiwa unahisi ‘umepondeka roho,’ kumbuka kwamba Yehova aliona mambo mazuri moyoni mwako na alikuvuta kibinafsi kwake. (Yoh. 6:44) Sikuzote yuko tayari kukusaidia kwa sababu wewe ni mwenye thamani kwake.

5. Tunaweza kujifunza nini kutokana na jinsi Yesu alivyowatendea wale waliodharauliwa na wengine?

⁵ Tunaweza kujifunza kuhusu hisia za Yehova kwa kuchunguza mfano wa Yesu. Wakati wa huduma yake duniani, Yesu aliwaonyesha fadhili wale ambao walidharauliwa na wengine, naye aliwatendea kwa huruma. (Mt. 9:​9-12) Wakati mwanamke aliyetamani kuponywa ugonjwa wake mbaya alipogusa vazi lake, Yesu alimfariji na kumpongeza kwa sababu ya imani yake. (Marko 5:​25-34) Yesu anaiga kikamilifu utu wa Baba yake. (Yoh. 14:9) Hivyo, unaweza kuwa na uhakika kwamba Yehova anakuthamini na anaona sifa zako nzuri, kutia ndani imani yako na upendo wako kwake.

6. Unaweza kufanya nini ikiwa una hisia za kujiona kwamba hufai?

⁶ Unaweza kufanya nini ikiwa shaka ulizo nazo kuhusu thamani yako zinaendelea kukusumbua au kurudi tena? Soma mistari ya Biblia ambayo inakuhakikishia thamani yako kwa Yehova na uitafakari.b (Zab. 94:19) Ikiwa umeshindwa kufikia lengo fulani au umevunjika moyo kwa sababu huwezi kufanya mengi kama wengine, usijihukumu vikali. Yehova ana matarajio yaliyosawazika. (Zab. 103:​13, 14) Ikiwa ulitendewa kwa njia isiyofaa wakati uliopita, usijilaumu kwa sababu ya mambo ambayo mtu huyo alikutendea. Hukustahili kutendewa hivyo! Kumbuka kwamba waliotenda mabaya ndio watatoa hesabu mbele za Yehova, si waliotendewa mabaya. (1 Pet. 3:12) Sandra, ambaye alitendewa kwa njia isiyofaa alipokuwa mtoto, anasema, “Mara kwa mara ninamwomba Yehova anisaidie nione sifa nzuri ambazo yeye anaona ndani yangu.”

7. Tunawezaje kutumia mambo tuliyopitia maishani katika utumishi wetu kwa Yehova?

⁷ Kamwe usitilie shaka kwamba Yehova anaweza kukutumia ili uwasaidie watu wengine. Amekupa pendeleo la kuwa mfanyakazi mwenzi unaposhiriki katika huduma ya Kikristo. (1 Kor. 3:9) Inaelekea mambo uliyopitia maishani yamekusaidia uwaonyeshe wengine hisia mwenzi na utambue jinsi ambavyo huenda wanahisi. Unaweza kufanya mengi ili kuwasaidia. Helen, aliyetajwa mapema, alipata msaada na sasa anaweza kuwasaidia vizuri zaidi wengine. Anasema hivi: “Yehova amemfanya ‘mtu asiyefaa kitu’ kuwa mtu anayehisi anapendwa na msaada kwa wengine.” Helen anafurahia kutumikia akiwa painia wa kawaida.

YEHOVA ANATAKA TUKUBALI MSAMAHA WAKE

8. Tunapata uhakikisho gani katika Isaya 1:18?

⁸ Baadhi wa watumishi wa Yehova wanahuzunishwa sana na dhambi ambazo walitenda wakati uliopita, iwe ni kabla au hata baada ya kubatizwa. Lakini ni vema tukumbuke kwamba Yehova aliandaa fidia kwa sababu ya upendo wake mkubwa kutuelekea. Bila shaka, anataka tukubali zawadi hiyo. Yehova anatuhakikishia kwamba baada ya ‘kunyoosha mambo’c pamoja naye, hatatuhukumu kwa sababu ya dhambi hizo. (Soma Isaya 1:18.) Tunashukuru sana kwamba Baba yetu mwenye upendo hakumbuki dhambi tulizofanya wakati uliopita! Wakati uleule, hasahau kamwe mambo mazuri tuliyofanya.—Zab. 103:​9, 12; Ebr. 6:10.

9. Kwa nini tunapaswa kufanya yote tuwezayo ili kukazia fikira wakati huu na wakati ujao badala ya wakati uliopita?

⁹ Ikiwa unahuzunishwa na dhambi ambazo ulitenda wakati uliopita, jitahidi kadiri uwezavyo kukazia fikira mambo ambayo unafanya sasa na mambo ambayo unaweza kufanya wakati ujao, badala ya mambo ambayo ulifanya wakati uliopita. Fikiria mfano wa mtume Paulo. Alijutia kwamba awali aliwatesa vikali Wakristo, lakini alijua kwamba Yehova alikuwa amemsamehe. (1 Tim. 1:​12-15) Je, aliendelea kufikiria dhambi alizofanya wakati uliopita? Bila shaka alikataa kufanya hivyo, kama tu ambavyo alikataa kukazia fikira mambo aliyotimiza wakati aliposhikamana na dini ya Kiyahudi. (Flp. 3:​4-8, 13-15) Badala yake, kwa bidii Paulo alitimiza huduma yake na kukazia fikira wakati ujao. Kama Paulo, huwezi kubadili mambo ya zamani. Lakini unaweza kumsifu na kumfurahisha Yehova sasa na kutazamia wakati ujao mzuri sana ambao amekuahidi.

10. Tunaweza kufanya nini ikiwa matendo yetu ya zamani yamewaumiza wengine?

¹⁰ Huenda unahangaishwa na baadhi ya mambo uliyofanya wakati uliopita ambayo yaliwaumiza wengine. Ni jambo gani linaloweza kukusaidia? Fanya yote unayoweza ili kurekebisha hali, kutia ndani kuomba msamaha kutoka moyoni. (2 Kor. 7:11) Mwombe Yehova awasaidie wale ambao waliumizwa na mambo uliyofanya. Anaweza kukusaidia wewe na wale uliowaumiza ili mvumilie na kupata tena amani.

11. Tunaweza kujifunza nini kutokana na mfano wa nabii Yona? (Tazama pia picha.)

¹¹ Jifunze kutokana na makosa yako ya zamani, na uwe tayari kutumiwa na Yehova kwa njia yoyote ambayo anachagua. Fikiria mfano wa nabii Yona. Badala ya kwenda Ninawi kama Mungu alivyokuwa amemwagiza, Yona alikimbilia upande tofauti kabisa. Yehova alimtia nidhamu Yona, naye alijifunza kutokana na kosa lake. (Yona 1:​1-4, 15-17; 2:​7-10) Yehova hakukatishwa tamaa na Yona. Mungu alimpa fursa nyingine ya kwenda Ninawi, na pindi hii Yona alitii mara moja. Hakuruhusu hatia ya makosa yake ya zamani, imzuie kukubali mgawo huo kutoka kwa Yehova.—Yona 3:​1-3.

YEHOVA ANATUFARIJI KUPITIA ROHO TAKATIFU

12. Yehova anatupatiaje amani tunapopitia hali yenye kutaabisha? (Wafilipi 4:​6, 7)

¹² Kupitia roho yake takatifu, Yehova hutufariji tunapopitia hali yenye kutaabisha. Fikiria kisa cha Ron na Carol. Kwa kusikitisha, mwana wao alijiua. Wanasema hivi: “Tulikuwa tumepitia majaribu makali wakati uliopita, lakini jaribu hili lilizidi hayo yote. Mara nyingi tulikosa usingizi usiku, hivyo tulisali kwa Yehova na kwa kweli tulipata amani ambayo inatajwa katika Wafilipi 4:​6, 7.” (Soma.) Ikiwa unakabiliana na jaribu linalokuvunja moyo, unaweza kummiminia Yehova moyo wako katika sala mara nyingi upendavyo na kwa muda mrefu utakavyo. (Zab. 86:3; 88:1) Mwombe Yehova tena na tena akupatie roho yake takatifu. Hatapuuza kamwe ombi lako.—Luka 11:​9-13.

13. Roho takatifu inawezaje kutusaidia kuendelea kumtumikia Yehova kwa uaminifu? (Waefeso 3:16)

¹³ Je, hali yenye kutaabisha imekuacha ukiwa huna nguvu? Roho takatifu inaweza kukupa nguvu ili uendelee kumwabudu Yehova kwa uaminifu. (Soma Waefeso 3:16.) Fikiria mfano wa dada anayeitwa Flora. Yeye na mume wake walikuwa wakitumikia wakiwa wamishonari, kisha mume wake akakosa kuwa mwaminifu kwenye ndoa, nao wakatalikiana. Anasema hivi: “Maumivu na huzuni niliyohisi kwa sababu ya usaliti wake ilinilemea. Nilimwomba Yehova anipatie roho yake takatifu ili niweze kustahimili. Yehova alinipatia kile nilichohitaji ili kupona na kukabiliana na jambo ambalo mwanzoni nilidhani siwezi kulishinda.” Flora anahisi kwamba Mungu amemsaidia kuwa na uhakika zaidi na kujua kwamba atamtegemeza katika majaribu yake yote. Anaongezea hivi: “Maneno haya ya Zaburi 119:32 yalinihusu mimi: ‘Nitaifuata kwa bidii njia ya amri zako kwa sababu wewe huufanya moyo wangu uwe na nafasi kwa ajili yake.’”

14. Tunawezaje kuiruhusu roho takatifu itende juu yetu?

¹⁴ Unawezaje kutenda kulingana na sala yako ya kumwomba Yehova roho yake takatifu? Shiriki katika utendaji ambao utaruhusu roho ya Mungu itende juu yako. Utendaji huo unatia ndani kuhudhuria mikutano na kuhubiri. Ijaze akili yako mawazo ya Yehova kwa kusoma Neno lake kila siku. (Flp. 4:​8, 9) Unaposoma Biblia, kazia uangalifu wahusika wa Biblia ambao walikabili majaribu na utafakari kuhusu jinsi Yehova alivyowasaidia kuvumilia. Sandra, aliyenukuliwa awali, alikabiliana na mfuatano wa matatizo magumu sana. Anasema hivi: “Simulizi la Yosefu linanitia moyo sana. Hakuruhusu majaribu na ukosefu wa haki aliokabili udhoofishe uhusiano wake na Yehova.”—Mwa. 39:​21-23.

YEHOVA HUTUFARIJI KUPITIA WAABUDU WENZETU

15. Tunaweza kupata faraja kutoka kwa nani, na wanawezaje kutusaidia? (Tazama pia picha.)

¹⁵ Tunapopitia hali ngumu, waabudu wenzetu wanaweza kuwa “chanzo cha faraja nyingi.” (Kol. 4:11) Kwa kweli, ndugu na dada zetu ni njia moja ambayo Yehova anaonyesha upendo wake kutuelekea. Waabudu wenzetu wanaweza kutufariji kwa kutusikiliza kwa hisia mwenzi, au kutumia wakati pamoja nasi. Wanaweza kututia moyo kwa kushiriki nasi mstari wa Biblia au kusali pamoja nasi.d (Rom. 15:4) Pindi fulani, huenda ndugu au dada akatukumbusha kuhusu njia ya Yehova ya kufikiri na hivyo kutusaidia kudumisha usawaziko wetu. Pia, Wakristo wenzetu wanaweza kutupatia msaada hususa, kama vile kutuandalia mlo tunapopitia hali ngumu.

16. Huenda tukahitaji kufanya nini ili wengine watusaidie?

¹⁶ Ili tupate msaada kutoka kwa wengine, huenda tukahitaji kuwaomba watusaidie. Ndugu na dada zetu wanatupenda na wanataka kutusaidia. (Met. 17:17) Lakini huenda hawajui tunahisije au mambo tunayohitaji. (Met. 14:10) Ikiwa una maumivu ya kihisia, uwe tayari kuwaeleza rafiki zako wakomavu hisia zako. Wajulishe jambo litakalokusaidia. Huenda ukaamua kuzungumza na mzee mmoja au wawili ambao unajihisi uko huru kuzungumza nao. Baadhi ya akina dada wamefarijika wanapozungumza na dada mkomavu.

17. Ni baadhi ya changamoto gani zinazoweza kutuzuia kupata kitia moyo, na tunawezaje kuzishinda?

¹⁷ Epuka mwelekeo wa kujitenga na wengine. Kwa sababu ya kuumia kihisia, huenda usitamani kutumia muda pamoja na wengine. Nyakati nyingine, huenda ndugu na dada zako wasikuelewe vizuri au wakakosa kutumia maneno yanayofaa. (Yak. 3:2) Usiruhusu changamoto hizo zikuzuie kupata kitia moyo unachohitaji. Mzee wa kutaniko anayeitwa Gavin, ambaye ana ugonjwa wa kushuka moyo, anasema hivi: “Mara nyingi sitamani kuzungumza au kutumia wakati pamoja na rafiki zangu.” Ingawa hivyo, Gavin haruhusu hisia hizo zimwongoze, naye ananufaika kwa kushirikiana na wengine. Dada anayeitwa Amy anasema hivi: “Kwa sababu ya mambo niliyopitia maishani, inakuwa vigumu kwangu kuwatumaini watu. Lakini ninajifunza kuwapenda na kuwatumaini ndugu na dada zangu kama Yehova anavyofanya. Ninajua jambo hilo linamfurahisha Yehova, na mimi ninafurahi pia.”

PATA FARAJA KATIKA AHADI ZA YEHOVA ZA KUTUPONYA

18. Tunaweza kutazamia nini wakati ujao, na tunaweza kufanya nini sasa?

¹⁸ Tunaweza kutazamia wakati ujao kwa uhakika, tukijua kwamba hivi karibuni Yehova atatuponya kikamili kutokana na maumivu ya kimwili na kihisia. (Ufu. 21:​3, 4) Wakati huo, mambo yenye kuumiza ambayo tumepitia maishani “hayataingia tena moyoni.” (Isa. 65:17) Kama tulivyoona, hata sasa Yehova ‘huyafunga majeraha yetu.’ Tumia kikamili maandalizi yenye upendo ya Yehova ya kukuletea faraja na kitulizo. Kamwe usitilie shaka kwamba ‘anakujali wewe.’—1 Pet. 5:7.