Enero

Li ta epal tsobobbailetike li jkʼelvanejetik ta sirkuitoe yakʼojik venta ti muʼyuk chchʼak skʼakʼalik li moletik sventa xchanubtasik li yan ermanoetike. Jkʼeltik kʼu yuʼun. Ta skoj ti molot ta tsobobbaile anaʼoj ti tsots skʼoplal skʼan xichʼik chapanel li yan ermanoetike. Anaʼoj xtok ti chtun mas ermanoetik li ta tsobobbailetik avie xchiʼuk li ta tsobobbailetik chtale (Is. 60:22). Li ta Vivliae chal ti skʼan xchanubtasik yan ermanoetik li moletike. Xuʼ van tsots chavaʼi ti xachʼakbe yorail ta sventa taje. ¿Kʼu yuʼun? Yuʼun skʼan xa-abtej xchiʼuk skʼan xakʼel li avutsʼ avalale. Jech xtok, skʼan xapas li kʼusitik abainoj ta tsobobbaile xchiʼuk li kʼusitik yantik ti tsotsik skʼoplale. Pe tsots skʼoplal xtok ti xachʼakbe yorail sventa xachanubtas o xachapan li yan ermanoetike. Pe sventa spas yuʼunike persa skʼan xichʼik chanubtasel yuʼun li moletike. Li tsobobbailetike ep me tstabeik sbalil kʼalal oy ep ermanoetik ti lek chapalike. w15 15/4 1:2, 3

Mi la avichʼ akʼbel mas abtelaletik ta tsobobbaile mu me xanop ti skʼan xa xajel ta anil ti kʼutik yelan skʼan pasel li abtelaletik cha-akʼbate. Vuleso ta ajol ti jaʼ noʼox skʼan xajel kʼusitik mi jech tskʼan chavil li ta tsobobbaile o mi laj yal s-organisasion Jeova ti jech skʼan pasele. Mu me xapas ta skoj ti jech chakʼan atuke. Jaʼ yuʼun, mi jaʼ la apas li kʼusitik chal Vivlia ti jaʼ tstunesik li moletik kʼalal chchanubtasoxuke, chavakʼ ta ilel ti chavichʼanan ta mukʼe. Jech xtok, ta me spat yoʼontonik ta atojolal li ermanoetik ta tsobobbaile. Mi laj xa ox achan leke xuʼ me oy kʼusitik xajel sventa lekuk oy li tsobobbaile jech kʼuchaʼal chal li organisasione. Vaʼun ta me skoltaot li Jeovae. Ta melel, xuʼ mas ep kʼusitik xapas ti jaʼ jutuk li kʼusitik la spasik li buchʼutik la xchanubtasoxuke (Juan 14:12). w15 15/4 2:17

Li Pabloe laj yal ti laj yichʼ «koltael lokʼel ta ye leon[e]» (2 Tim. 4:17). ¿Kʼusi skʼan xapas mi oy anuptanoj tsots vokol xchiʼuk jech chavaʼi aba kʼuchaʼal li Pabloe? Tsots skʼoplal ti xapat avoʼonton ta stojolal li Jeovae. Jech kʼuchaʼal liʼe, ¿mi yakal chachabi jun avutsʼ avalal ti tsots ipe? Mi jeche, oy xa la akʼanbe Jeova ti xakʼbot atsatsale xchiʼuk ti lekuk kʼusitik xkʼot ta nopel avuʼune. Xuʼ jun noʼox avoʼonton chavaʼi aba, yuʼun li Jeovae snaʼoj li avokole. Pato avoʼonton ti tskoltaot sventa xkuch batel avuʼune xchiʼuk sventa tukʼ-o xavakʼ aba ta stojolal. Akʼo mi jech, bateltike xuʼ van muʼyuk tskoltaot yilel li Jeovae. Li doktoretike xuʼ van mu xchap skʼopik kʼuxi ta skʼelik li avajchamele. Moʼoj xtoke, xuʼ ox van amalaoj tspat avoʼonton li avutsʼ avalale, pe ti kʼusie mas to chakʼik avokol. Kʼalal jech chkʼot ta pasele, tsots me skʼoplal ti xakʼanbe atsatsal li Jeovae xchiʼuk ti xanopaj-o batel ta stojolale (1 Sam. 30:3, 6). Mi la avakʼ venta ta tsʼakal ti kʼu yelan la skoltaot li Jeovae, mas to me lek chavil aba xchiʼuk. w15 15/4 4:10, 11

Li yajtunelutik Jeovae jnaʼojtik ti oy ta melel li Satanase. ¿Kʼuxi jnaʼojtik? Yuʼun li Vivliae chal ti la skʼopon Eva ta jkot kiletel chone (Gén. 3:1-5). Jech xtok, li Satanase la xchiʼin ta loʼil Jeova kʼalal la xchibal kʼopta ti kʼu yuʼun chtun ta stojolal Dios li Jobe (Job 1:9-12). Maʼuk noʼox taje, yuʼun la xchiʼin ta loʼil Jesus xtok kʼalal laj yakʼ ta prevae (Mat. 4:1-10). Kʼalal och ta Ajvalil ta 1914 li Jesuse, li Satanase lik «stsak ta kʼop» li buchʼutik tʼujbil chbatik ta vinajel ti liʼ to oyik ta Balumile (Apok. 12:17). Jech-o tspas li avie, yuʼun tstsakutik ta kʼop jkotoltik li yajtunelutik Diose. Jaʼ yuʼun sventa jtsaltik komele skʼan jpoj jbatik xchiʼuk tsotsuk li xchʼunel koʼontontike. Li buchʼu mas xtoyet chaʼi sba ta spʼejel Balumile jaʼ li Satanase. ¿Kʼu yuʼun jech chkaltik taje? Yuʼun mu xkʼexav laj yal ti muʼyuk la sderecho tspasutik ta mantal li Jeovae. Jech xtok, laj yakʼ persa sventa jaʼ x-ichʼat ta mukʼ yuʼun li krixchanoetike, ti jaʼ mu xichʼik ta mukʼ li Jeovae. Lek xvinaj ti jtoyba tajek li Satanase. Jaʼ yuʼun, mi ta jkʼan ta jtsaltik li Satanase skʼan mu jchanbetik li stalelale (1 Ped. 5:5). w15 15/5 2:3, 4

Toj lek kʼusi yaloj tspas Dios sventa jkʼupintik ta jelavel li kuxlejale. Mi la jnopbetik skʼoplal taje mas me xijmuyubaj yuʼun xchiʼuk mas me oy kipaltik sventa chijtun-o batel ta stojolal li Diose. Mi apatoj avoʼonton chanaki ta Balumile, ¿mi xnop avuʼun ti yakal xa chakʼupin li kʼusitik yaloj tspas Diose? Mi amalaoj chabat ta vinajele, ¿mi xnop avuʼun ti yakal xa chapas li kʼusitik yalojbot Diose? Mi amalaoj chanaki ta Balumile, nopbo xa noʼox skʼoplal ti koʼol cha-abtej xchiʼuk avamigotak sventa chakʼatajesik ta jun alakʼ sba nichimaltik li Balumile. Li abtelal taje jaʼ tsbeiltas krixchanoetik ti oyot ta yoʼontonike. Li vaʼ kʼakʼale skotol krixchanoetik tskʼanik Jeova jech kʼuchaʼal voʼote. Jech xtok lek xa noʼox akuxlejal, muʼyuk xa cha-ipaj xchiʼuk muʼyuk xa chavul avoʼonton. Ta skoj ti chatunes li kʼusitik xatojob spasel sventa chakolta li yantike xchiʼuk sventa chamuyubta li Jeovae, xamuyubaj xa noʼox. Kʼalal mi chaʼkuxi li animaetike, xuʼ van xakolta sventa xojtikinik li Jeovae (Juan 17:3; Ech. 24:15). Li kʼusitik taje jnaʼojtik ti melel chkʼotanuk ta pasele, yuʼun jech chal li Vivliae, jech oxal toj lek ti jnopbetik skʼoplale (Is. 11:9; 33:24; 35:5-7; 65:22). w15 15/5 3:15

Koliyal li sjuʼel Jeovae, la skʼatajes ta lekil vino epal voʼ li Jesuse. Jaʼ yuʼun, oy xa ox ep vino sventa sta li epal krixchanoetike (Juan 2:6-11). Li Jesuse muʼyuk la stunes sjuʼel sventa stuk noʼox stabe sbalil. Jun skʼelobile jaʼ liʼe, ¿kʼusi la spas kʼalal albat yuʼun Satanas ti akʼo skʼatajes ta pan li tonetike? Muʼyuk la xchʼun (Mat. 4:2-4). Li Jesuse la stunes sjuʼel sventa lek kʼusitik tspas ta stojolal li yantike. ¿Kʼuxi xuʼ jchanbetik taje? Li Jesuse laj yal ti skʼan jnopes jbatik sventa «oyuk me kʼusi [xkakʼbetik] li yantike» (Luk. 6:38). ¿Kʼusitik xuʼ jpastik? Xuʼ xkikʼtik ta veʼel ta jnatik. Kʼalal mi laj junuk tsobajele xuʼ van oy buchʼu tskʼan chchan kʼuxi xuʼ tsjelubtas junuk sparte, jech oxal xuʼ jchʼakbetik yorail. Xuʼ van jkoltatik ek li buchʼutik jaʼ to chlik xcholik mantale. Kʼalal jech-o chkakʼtik ta ilel slekil koʼontontik xchiʼuk ta jkoltatik li yantike, jaʼ jech chkakʼtik ta ilel ti ta jchanbetik li Jesuse. w15 15/6 1:3, 4, 6

Mi ta jchʼunbetik-o smantal li Diose, xuʼ me kuxul xijkom mi tal li Armajedone. Li kʼusi chkʼot ta pasel taje, jaʼ me li skʼelobil juʼelal ti mas mukʼ chkʼot ta pasele. Ta tsʼakal jutuk xtoke, ta to xkiltik chkʼot ta pasel yan skʼelobiltak juʼelal. Skotol li buchʼu chkuxiike ta kʼunkʼun chlekub batel xkuxlejalik (Is. 35:5, 6; Apok. 21:4). Muʼyuk xa tstunesik nenal satil, namteʼal, siya de rueda mi jaʼuk aparato sventa pakʼchikinetik. Li buchʼutik kuxul chkomik ta Armajedone chkoltaatik yuʼun Jeova sventa stsatsubik xchiʼuk ti muʼyuk xa ch-ipajike. Chtun yuʼunik taje, yuʼun jaʼ tskʼatajesik ta Paraiso li Balumile (Sal. 115:16). Li skʼelobiltak juʼelal la spas Jesuse, tstsatsubtas xchʼunel koʼontontik li ‹epal krixchanoutik› ti muʼyuk xa chij-ipaj mi jsetʼuk ta jelavele (Apok. 7:9). Li skʼelobiltak juʼelal la spase, chakʼ kiltik xtok ti ep skʼanojutik li Jesuse (Juan 10:11; 15:12, 13). Li xkʼuxul yoʼonton laj yakʼ ta ilele, jaʼ tsvules ta joltik xtok ti kʼu to yepal skʼanoj yajtuneltak li Jeovae. w15 15/6 2:16, 17

Leʼ xa ta 1914, li ta Europae lik jun paskʼop ti puk batel ta sjunul balumile. Ta 1918 ep buchʼutik laj yil svokolik ta viʼnal. Jech xtok, ep buchʼutik lajik ta chamel ti gripe española sbie. Ta skoj li chamel taje ep xa noʼox buchʼutik lajik ti jaʼ xkom to ti kʼu yepal lajik li ta paskʼope. Skotol li kʼusitik taje jaʼ junantik «senyail» ti laj yalbe skʼoplal Jesuse (Mat. 24:3-8; Luk. 21:10, 11). Li senyail taje laj yakʼ ta ilel ti lik spas mantal ta vinajel ta 1914, ti jaʼo «kuch batel yuʼun sventa tstsutses li [paskʼope]» (Apok. 6:2). Li Jesuse la sjip yalel tal ta Balumil li Satanas xchiʼuk li pukujetike. Ta tsʼakal une lik kʼotuk ta pasel li albil kʼop kʼuchaʼal chal li teksto avie. w15 15/6 4:13

Li jtakbol Pabloe laj yalbe skʼoplal ti oy buchʼutik chlik skontrainik li melel relijione, vaʼun maʼuk xa melel chanubtasel chakʼik ta chanel li ta tsobobbaile (Ech. 20:28-30; 2 Tes. 2:3, 4). Taje jech kʼot ta pasel kʼalal mu toʼox sta sien jabil ti lik ayanuk li stsobobbail yajtsʼaklomtak Kristoe. Ta skoj taje mu kʼunuk ta naʼel buchʼu jaʼik li melel yajtuneltak Diose. Pe kʼalal echʼ xa ox jayibuk sienal jabil xtoke, li Jesuse tunesat yuʼun Jeova sventa xakʼ ta naʼel buchʼutik ti ta melel chtunik li ta stemplo ta mantale. Lek vinaj ta 1919 ti buchʼutik te chtunik ta melel li ta stemplo ta mantale. Li buchʼutik taje oy kʼusitik la sjel talel ta xkuxlejalik sventa jech chtunik kʼuchaʼal tskʼan li Jeovae (Is. 4:2, 3; Mal. 3:2-4). Kʼalal jech taje lik kʼotuk ta pasel li kʼusi akʼbat yil yuʼun Dios li Pabloe (2 Kor. 12:1-4). w15 15/7 1:6-8

Epal krixchanoetike xchʼunojik ti chil ta satik kʼalal chtal spas mantal ta Balumil li Jesuse xchiʼuk ti ta la x-ikʼatik muyel ta vinajel xchiʼuk li sbekʼtalike. ¿Mi jech chichʼik ikʼel batel li buchʼutik tʼujbil chbatik ta vinajel ti liʼ to oyik ta Balumile? Moʼoj, yuʼun li Vivliae chal ti mu xkil ta jsatik kʼalal mi tal li Jesuse, ti «chvinaj ta vinajel li senyail Xnichʼon krixchanoe» xchiʼuk ti «chtal ta ba tok ta vinajel» li Jesuse (Mat. 24:30). Jech xtok, li Vivliae chal ti «mu xuʼ xuʼunin Ajvalilal yuʼun Dios li bekʼtalile xchiʼuk li chʼichʼe». Mi jech taje, ¿kʼuxi ch-ikʼatik batel ta vinajel li buchʼutik tʼujbilik ti liʼ to oyik ta Balumile? Li Vivliae chal ti «[chichʼik] jelel ta anil, jech kʼuchaʼal ta jvikʼel ta jmutsʼel noʼox jsatik, jaʼo kʼalal chichʼ tijel li slajeb okʼese» (1 Kor. 15:50-53). Jaʼ yuʼun, li buchʼutik tʼujbilik ti tukʼ yakʼoj sbaik ti liʼ to oyik ta Balumile koʼol ta xichʼik ikʼel batel ta vinajel ta anil noʼox, pe mu xa xvinaj ta kʼelel li sbekʼtalike. w15 15/7 2:14, 15

Li Salon sventa Tsobobbaile chtun sventa xkichʼtik ta mukʼ li Diose. Xkoʼolaj kʼuchaʼal jmotontik li tsobajeletike. ¿Kʼu yuʼun? Yuʼun jaʼ jech tstsatsub mas ti kʼu yelan xkil jbatik xchiʼuk li Diose. Jech xtok, koliyal taje li s-organisasion Jeovae tstsatsubtas koʼontontik xchiʼuk chakʼbutik li chanubtaseletik ti chtun kuʼuntike. Jaʼ jun mukʼta matanal ti chikʼutik li ‹ta xmexae› (1 Kor. 10:21). Li Jeovae chalbutik ta Vivlia ti skʼan xijbat ta tsobajeletik sventa xbat kichʼtik ta mukʼe xchiʼuk sventa jpatbe jba koʼontontik ta jujuntal (Evr. 10: 24, 25). Ta skoj ti chkichʼtik ta mukʼ li Jeovae, mu jkʼan jchʼaytik mi junuk tsobajel, jaʼ noʼox mi oy kʼusi toj tsots xa noʼox tsmakutike. Kʼalal ta jchapan jbatik sventa chkakʼ jloʼiltik tee, chkakʼtik ta ilel ti ta jtojtik ta vokol li tsobajeletike. w15 15/7 4:3, 4

Li s-organisasion Jeovae nopoltik noʼox chalilanbutik ti skʼan ‹jmalatik xchiʼuk ti teuk tajek ta joltik li skʼakʼalil Jeovae› xchiʼuk ti tsots skʼoplal ti jaʼuk jkʼeltik-o batel li Paraiso yaloj chakʼ Diose (2 Ped. 3:11-13). Li yajtsʼaklomtak Kristo ta baʼyel sigloe skʼan vikʼiluk satik xchiʼuk chapalikuk sventa li skʼakʼalil Jeovae. Pe li voʼotike mas to oy srasonal kuʼuntik ti skʼan chapalukutik sventa li slajeb kʼusitike. ¿Kʼu yuʼun? Yuʼun lik spas mantal ta 1914 li Jesuse xchiʼuk te lik talel li slajebal kʼakʼale. ¿Kʼu yuʼun lek jchʼunojtik taje? Yuʼun yakal chkʼotanuk ta pasel li senyailtak laj yal Jesuse. Jun skʼelobile jaʼ ti mas xa tsok batel li balumile xchiʼuk ti ta spʼejel xa noʼox Balumil chichʼ cholel batel li aʼyej ta sventa Ajvalilal yuʼun Diose (Mat. 24:3, 7-14). Li Jesuse muʼyuk laj yal kʼu sjalil chjalij li slajebal kʼakʼale. Jaʼ yuʼun, ta skoj ti mu jnaʼtik kʼusi ora chtal li slajeb kʼusitike, skʼan chapalukutik. w15 15/8 2:4, 5

Li kʼusi mas xijmuyubaj-o li ta Paraisoe jaʼ ti lek tajek xkil jbatik xchiʼuk li Jeovae (Mat. 5:3). Jaʼ xa noʼox mas tsots skʼoplal chkaʼitik ti chijtun ta stojolal li Jeovae xchiʼuk xkuxet xa noʼox koʼontontik yuʼun. Jech oxal, mi ta jkʼan ta jchapan jbatik sventa li kuxlejal ta Paraisoe, skʼan jaʼuk mas tsots skʼoplal xkiltik avi ti chijtun ta stojolal Jeovae (Mat. 6:19-21). ¿Kʼuxi xuʼ jkʼupintik mas li yabtel Jeovae? Jaʼo kʼalal mas chijtun ta stojolale. Jaʼ yuʼun, mi kerem tsebot toe nopo kʼuxi xuʼ xatunes akuxlejal sventa chapasbe li yabtel Diose. Xuʼ van xatun ta tsʼakal ora. Li ta jvuntike xuʼ xatabe jeltos skʼelobiltak ti kʼusitik xuʼ xapase. Jech xtok, xuʼ xachiʼin ta loʼil ermanoetik ti jal xa tunemik ta tsʼakal orae. Mi chatunes xa noʼox akuxlejal ta sventa li yabtel Jeovae, ep kʼusitik chachan ti chchapanot sventa li kuxlejal ta Paraisoe. w15 15/8 3:13, 14

Li buchʼutik yijik ta mantale ta xkʼanvanik, stakʼik noʼox chiʼinel ta loʼil, chʼanxiik noʼox xchiʼuk oy smalael yuʼunik (Gal. 5:23). Mu sokesatik yuʼun li kʼopetike xchiʼuk tstsʼik yuʼunik li kʼusitik xuʼ chakʼ chibajele yuʼun oy lek spatobil yoʼontonik. Kʼalal ta xchan Svivliaike ta saʼik tojobtaseletik sventa tsnaʼik li kʼusi leke xchiʼuk li kʼusi chopole, ta tsʼakal une, ta stunesik li kʼusi la xchanik sventa lekuk li kʼusi chkʼot ta nopel yuʼunike. Bikʼit chakʼ sbaik xchiʼuk mu xchʼay ta sjolik ti jaʼ lek ti xchʼunik-o batel li tojobtaseletik xchiʼuk mantaletik chakʼ Jeovae. Jech xtok, ta sjunul yoʼontonik ta xcholik mantal xchiʼuk chakʼik persa sventa junuk yoʼonton li tsobobbaile. Mi jal xa o mi muʼyuk to jal ti chijtunutik ta stojolal Jeovae, jkotoltik skʼan xi jakʼbe jbatike: «¿Kʼusi to skʼan jlekubtas ta jkuxlejal sventa mas xikoʼolaj kʼuchaʼal li Jesuse xchiʼuk ti xijyijub ta mantale?». w15 15/9 1:6, 7

Kʼalal akʼobal xa oxe li jchankʼopetike laj yilik te chanav talel ta ba nab ta Galilea li Jesuse. Li Pedroe la sjakʼbe batel Jesus mi xuʼ xanav batel jech kʼuchaʼal chanav li stuke. Albat ti xuʼe. Jaʼ yuʼun li Pedroe yal li ta varkoe, vaʼun lik xanavuk sventa chbat sta li Jesuse. Pe kʼalal xanavem xa ox kʼuk snamale, lik ochuk yalel ta yut nab. ¿Kʼu yuʼun? Yuʼun xiʼ ta skoj ti la skʼel li ikʼaloʼe. Vaʼun li Pedroe la skʼanbe koltael li Jesuse. Li Jesus une la stsakbe skʼob xchiʼuk jech laj yalbe kʼuchaʼal chal li teksto avie (Mat. 14:24-32). Li Pedroe lik xanavuk ta ba nab kʼalal takat ta ikʼel yuʼun li Jesuse. ¿Kʼu yuʼun xanav li ta ba nabe? Yuʼun xchʼunoj lek ti chkoltaat yuʼun Jeova jech kʼuchaʼal koltaat li Jesuse. Li yajtsʼaklomutik Kristoe oy kʼusi koʼol jech jpasojtik ek. Laj kakʼ jkuxlejaltik ta stojolal Dios xchiʼuk laj kichʼtik voʼ kʼalal la jchantik ta Vivlia ti tstakutik ta ikʼel sventa xijkʼot ta yajtsʼaklom li Jesuse. ¿Kʼu yuʼun jech la jpastik taje? Yuʼun jchʼunojtik lek ti tskoltautik Jeova xchiʼuk li Jesuse (Juan 14:1; 1 Ped. 2:21). w15 15/9 3:1, 3

Li jun lekil totile ta skʼel ti mu kʼusi xibal sba snuptan li xnichʼnabtake. Taje jaʼ jech tspas ta jtojolaltik li Jeova eke. Nopbo skʼoplal liʼe: ¿Mi mu jechuk ti ta jmak ta anil sbekʼ jsatik kʼalal oy kʼusi ch-oche? Ta skoj ti skʼanojutik li Jeova eke, jaʼ jech anil tspojutik sventa mu kʼusi chopol jnuptantik (Zac. 2:8). Ta melel oy onoʼox chamem ermanoetik ta skoj ti tukʼ yakʼoj sbaik ta stojolal Diose. Jech kʼot ta stojolal li jchankʼop Esteban xchiʼuk yan yajtuneltak Diose. Kʼuchaʼal chkiltike mu skotoluk velta tspoj yajtuneltak Jeova sventa mu xichʼik milel. Pe li kʼusi tspase jaʼ ti tspʼijubtas skotol yajtuneltak sventa mu stsʼujik li ta spetsʼtak Satanase (Efes. 6:10-12). Li pʼijubtaseletik taje, te ta jtatik ta Vivlia xchiʼuk li ta vunetik tslokʼes j-organisasiontike. Jech kʼuchaʼal liʼe, li Jeovae tspʼijubtasutik ti xibal sba ti jkʼeltik li kʼusitik oy ta Internete, ti jpichʼ oʼontatik takʼine. Jech xtok tspʼijubtasutik ta sventa li livroetik, pelikulaetik, videojuegoetik ti chakʼ ta ilel majbail xchiʼuk chiʼinejbail ta vayele. Lek xvinaj ti skʼanojutik xchiʼuk ti tskʼan chchabiutik li Jeovae. w15 15/9 4:15, 17

Li Jeovae skoltaoj yajtuneltak yoʼ spakbeik skʼoplal sventa oyuk sderechoik ta xcholel li lekil aʼyejetike (Filip. 1:7). Kʼalal oy mu xakʼik jcholtik mantal li jlom ajvaliletike, jkʼanojtik parte ta nail chapanobbailetik. Li avie oy xa jpasojtik kanal 268 ta velta li ta snail chapanobbailetik ti mas tsotsik skʼoplal ta spʼejel Balumile. Xi jun skʼelobile: li ta sjabilal 2000 kʼalal to avie jpasojtik kanal 24 ta velta li ta Tribunal Europeo de Derechos Humanos. Lek xvinaj ti kʼalal chkoltavan li Jeovae, mi junuk krixchano xuʼ xmakvan (Is. 54:17). ¿Kʼusi yan sprevailtak oy ti yakal tskoltautik li Diose? June jaʼ ti yakal ta jcholtik mantal ta spʼejel Balumile (Mat. 24:14; Ech. 1:8). Yan xtoke jaʼ ti jmoj tsobolutik jkotoltik li yajtunelutik Dios akʼo mi jelel jlumaltike. Muʼyuk bu yan jech xvinaj ti jmoj tsobolik li krixchanoetike. Taje lek chakʼik venta li buchʼutik maʼuk yajtuneltak Jeovae, yuʼun xi chalike: «Te oy ta atojolalik ta melel li Diose» (1 Kor. 14:25). Kʼuchaʼal chkiltike, oy ep sprevailtak kuʼuntik ti tskoltautik li Diose (Is. 66:14). w15 15/10 1:13, 14

Mu me tsʼakaluk jtunestik li kʼusitik ta sba balumile (1 Kor. 7:29-31). Jaʼ yuʼun, skʼan jkʼel jbatik sventa mu jaʼuk xbat ta koʼontontik li kʼusitik chakʼ jkʼupintik li balumil avie. Melel onoʼox ti mu chopoluk skotole. Pe mi muʼyuk ta jchʼuntik li tojobtasel laj yakʼ Pabloe, xuʼ me jecheʼ noʼox ta jchʼay jkʼakʼaltik yuʼun li kʼusitik oy ta balumile. Mi jeche, xuʼ van mu xa xkakʼtik ta venta li kʼusi mas tsots skʼoplale: ti chijtun ta stojolal Jeovae (Efes. 5:15-17). ¿Kʼusitik xuʼ xbat-o ora kuʼuntik? Ta chʼayob oʼontonaletik, skʼelel livroetik, skʼelel television, svulaʼanel kʼupil sba lumetik, ta manolajel, stakel mensajeetik, skʼelel notisia o ti kʼuxi komik li jtajimoletike, ti chbat jkʼeltik li kʼusitik achʼ chlokʼanuk kʼuchaʼal selular, komputadora o yan kʼusitik ti toyolik stojole. Jlome mu xa noʼox xkom yuʼun chaʼiik li kʼusitik taje (Ecl. 3:1, 6). Li Satanase tskʼan ti akʼo xchʼaybutik koʼontontik li kʼusitik oy ta balumile xchiʼuk ti mu xa xijtun ta stojolal li Jeovae. Yuʼun jech onoʼox la spas ta stojolal li baʼyel yajtsʼaklomtak Kristoe, jaʼ yuʼun jech tspas ta jtojolaltik ek (2 Tim. 4:10). Jech oxal, skʼan me jchʼuntik li kʼusi chal teksto avie. w15 15/10 3:7, 8

Li Manoa xchiʼuk yajnile xmuyubajik tajek ta skoj ti ta xil skeremike. Akʼo mi jech, li Manoae la snopbe skʼoplal ti oy xa kʼusi tsots skʼoplal chlik sbaine, yuʼun toj ep kʼusitik chopol tspasik li j-israeletik li vaʼ kʼakʼale. Jaʼ yuʼun chaʼa, ¿kʼuxi van xuʼ xchanubtas yuni keremik li Manoa xchiʼuk yajnil sventa xlik skʼan Jeova xchiʼuk ti xlik tunuk ta stojolale? Li Manoae laj yalbe Jeova ti akʼo stak tal yan velta li anjel sventa x-albat ti kʼu yelan xuʼ stsʼites li skeremike (Juec. 13:1-8). Mi oy avalab anichʼnabe xavaʼibe smelolal ti kʼu yelan laj yaʼi sba li Manoae. Yuʼun voʼot abainoj ta xchanubtasel li avalab anichʼnab sventa skʼanik Jeova xchiʼuk ti xtunik ta stojolale (Prov. 1:8). ¿Kʼusi van tskoltaot sventa spas avuʼun taje? Jtos ti kʼusi tskoltaote jaʼ ti xavetʼes jujun xemana li yichʼel ta mukʼ Jeova ta avutsʼ avalale. Taje jaʼ me tskoltaot sventa xachanubtas ta Vivlia li akʼox kerem o atseb yoʼ xtunik ta stojolal li Jeovae (Deut. 6:6-9). Pe ¿kʼusi van yan tskoltaot? Jaʼ li slekil talelal Jesuse. w15 15/11 1:1, 2

Melel onoʼox ti mu xavil kʼusi tsnop li avalab anichʼnab jech kʼuchaʼal li Jesuse, pe xuʼ me xavakʼ persa sventa xavaʼibe smelolal ti kʼu yelan chaʼi sbaike. Xakʼel avil, ta me skoltaot Jeova sventa jaʼuk xakʼelbe li slekil talelalike. Mi oy bu chopol kʼusi bat yuʼunike, mu me xiuk xavalbee: «Jtoyba kerem» o «jsaʼkʼop tseb», mu me jsetʼuk jech xanop. Jaʼ albo li kʼusitik lek tspase xchiʼuk albo ti anaʼoj ti jaʼ oy ta yoʼonton spasel li kʼusi leke. Akʼo venta ti yakal chakʼbe yipale xchiʼuk kʼupil kʼoptao. Jech xtok, mi xuʼ chavile akʼbo yan yabtel sventa xchan batel mas. Jaʼ jech la spas ta stojolal yajchankʼoptak li Jesuse. Kʼalal lokʼ xa ox jun jabil xchiʼuk oʼlol xojtikin Natanael li Jesuse, la stʼuj sventa xtun ta yajtakbol. Ta melel, toj lek bat ta pasel yuʼun li kʼusi la sbain Natanaele (Luk. 6:13, 14; Ech. 1:13, 14). Jaʼ yuʼun chaʼa, chanbo me stalelal li Jesuse. Mu me xavakʼ ta aʼiel ti muʼyuk kʼusi lek chbat yuʼunik ta pasel li avalab anichʼnabe. Moʼoj, jaʼ lek patbo me yoʼontonik xchiʼuk kʼupil kʼoptao. Albo yaʼi ti xamuyubaj yuʼunike xchiʼuk ti xmuyubaj li Jeova eke. Jech xtok, albo yaʼiik ti xuʼ stunes spʼijilik sventa spasbeik yabtel li Jeovae. w15 15/11 2:15, 16

Kʼalal lik ta 1914 li «slajebal [...] kʼakʼale», kʼajomal toʼox oy voʼmil yajtuneltak Dios ti tʼujbil chbatik ta vinajele. Akʼo mi toj ep vokolil la snuptanik, la xcholik-o batel mantal ta skoj ti skʼanoj li xchiʼiltakike xchiʼuk ti koltabilik yuʼun li chʼul espiritue. Li avie oy xa mas ta vaxakib miyon li stestigotak Jeovae. Tstsob sbaik ta mas ta 115,400 tsobobbailetik ta spʼejel Balumil. Pe ¡yakal-o ch-epajik batel! Yuʼun li ta septiembre ta 2013 kʼalal ta agosto ta 2014 laj yichʼik voʼ mas ta 275,500 krixchanoetik. Taje jaʼ skʼan xal ti te van 5,300 krixchanoetik laj yichʼik voʼ jujun xemanae. Ta skoj ti oy xchʼunel koʼontontik ta stojolal li Diose xchiʼuk ti jchʼunoj ta sjunul koʼontontik ti jaʼ yakʼoj ta naʼel li Vivliae, yantik x-epaj batel jujun kʼakʼal li yajtuneltak Jeovae (1 Tes. 2:13). Akʼo mi tskontrainutik ta jyalel li Satanase xchiʼuk ti tstsakutik ta kʼope, jech-o lek xkil jbatik xchiʼuk li Jeovae (2 Kor. 4:4). w15 15/11 4:12, 14, 16

Ep buchʼutik xchanojbeik lek skʼoplal li voʼneal tsʼibetike xchiʼuk li kʼusitik voʼne xa jelubtasbile. ¿Kʼusi yakʼojik venta un? Jaʼ ti jutuk noʼox tajek jelel li ta jayibuk versikuloetik ti muʼyuk chchʼaybe sbalil li Vivliae. Jaʼ yuʼun, li buchʼutik oy ta yoʼontonik xchanele xchʼunojik ti jaʼ Skʼop Dios ta melel li Vivliae. Akʼo mi laj yichʼ kontrainel li Vivliae, li avie xuʼ xa xichʼ kʼelel ta mas ta 2,800 jeltos kʼopetik. Stuk xa noʼox jech yepal yichʼoj jelubtasel ta yan kʼopetik. Manchuk mi ep buchʼutik muʼyuk xchʼunojik li Diose, li Vivliae jaʼ li livro ti mas yichʼoj pukel ta spʼejel Balumile. Melel onoʼox ti junantik Vivliaetike oy butik ti mu tukʼuk batem ta jelubtasel xchiʼuk ti mu kʼunuk ta kʼelele. Akʼo mi jech, te ta jta spatobil koʼontontik xchiʼuk te chalbutik kʼuxi xuʼ jtatik li kuxlejal sbatel osile. w15 15/12 1:13, 14

Li kʼusi chkaltike xuʼ me lek chaʼi sbaik o chopol chaʼi sbaik kuʼuntik li krixchanoetike. Jaʼ yuʼun skʼan jnoptik lek li kʼusi chkaltike. Junantik krixchanoetike muʼyuk xkʼuxul yoʼontonik, tsyayijesbeik yoʼonton yantik kʼalal chkʼopojike, yuʼun tstunesik kʼuchaʼal espada o flecha li skʼopojelike (Sal. 64:3). Chchanik ta pelikulaetik o ta programaetik ta television ti jech chkʼopojike. Pe li yajtsʼaklomutik Kristoe muʼyuk ta jyayijes ta jkʼopojeltik li yantike o ti muʼyuk xa xkʼuxul koʼontontik chijkʼopoj ta stojolalik akʼo mi ixtol loʼil noʼox li kʼusi chkaltike. Mu chopoluk ti chkaltik ixtol loʼile, yuʼun bakʼintike jaʼ chakʼbe smuil li jloʼiltike. Pe mu me xkaltik mi jsetʼuk ixtol loʼil sventa ta jchopol kʼoptatik o jlabantik yantik sventa stseʼinik li yantike. Li Vivliae chalbutik ti mu jtunestik chopol kʼopetik o bol kʼopetike, chalbutik ti jaʼ jtunestik li kʼopetik ti chkoltavane xchiʼuk ti tspatbe yoʼonton yantike (Efes. 4:29, 31). w15 15/12 3:10

Xi sjelubtasojik ta jeltos kʼopetik ti kʼu yelan tsuts yuʼunik li karta taje: «Lekuk oyoxuk» o xi van skʼan xal xtoke: «Tsotsanik me». Jech nopem xaʼi chalik kʼalal tstsuts sloʼilike. Taje chakʼ kiltik ti stalel onoʼox ti oy ta koʼontontik ti lekuk noʼox oyutike. Ta onoʼox xij-ipaj ta skoj ti jmulavilutike, yuʼun muʼyuk chpoxtautik ta skʼelobil juʼelal avi li Jeovae. Pe jnaʼojtik ti chpoxtautik ta mas jelavele, muʼyuk xa chij-ipaj. Li jtakbol Juane laj yalbe skʼoplal «ukʼum sventa kuxlejal» xchiʼuk «teʼetik sventa kuxlejal» ti jaʼ ‹sventa xpoxtaobil lumetike› (Apok. 22:1, 2). ¿Mi jaʼ laj yalbe skʼoplal jtosuk tsʼiʼlel ti xuʼ xpoxtautik li ta Paraisoe? Maʼuk. Jaʼ laj yalbe skʼoplal ti xuʼ skoltautik Jeova xchiʼuk Jesus sventa xijkuxi sbatel osile (Is. 35:5, 6). w15 15/12 4:17, 18

Xi laj yalbe skʼoplal Jeova ti kʼusi chkʼot ta pasel ta jkʼakʼaliltike: «Cʼalal me la sta scʼacʼalil leʼe, lajuneb viniquetic ta jujuchop cʼop ta scotol banamil chbat stsacbeic yoc scʼuʼ jun judá vinic, jech chalbeic: ‹Ta xbat jchiʼinotcutic ec, yuʼun laj caʼicutic ti te oy ta atojolic li Diose›» (Zac. 8:23). Li ‹juda vinike› jaʼ skʼoplal li yajtsʼaklomtak Kristo ti tʼujbilik ta chʼul espiritue, ti ‹Israel yuʼun Dios› sbi xtoke (Gal. 6:16). Yan li ‹lajuneb viniketike› jaʼ skʼoplal li buchʼutik spatoj yoʼonton chkuxiik sbatel osil liʼ ta Balumile. ¿Kʼu yuʼun ti tskʼan chbat xchiʼinik li buchʼutik tʼujbile? Yuʼun snaʼojik ti lek ilbilik yuʼun li Jeovae xchiʼuk ti jaʼ jun matanal chilik ti jmoj chichʼik ta mukʼ Dios xchiʼukike. Li Jesus eke jaʼ jech laj yal kʼuchaʼal li Sakariase, ti jmoj oyik li yajtuneltak Diose. «Uni jtsop chij» la sbiiltas li buchʼutik spatoj yoʼonton chbatik ta vinajele. Yan li buchʼutik spatoj yoʼonton chkuxiik ta Balumile, xi la sbiiltase: «Yan jchijtak». Vaʼun laj yal ti «jtsop noʼox chkʼotik [xchiʼuk ti] jun jchabichij chkʼot yuʼunik[e]» (Luk. 12:32; Juan 10:16). w16.01 4:1, 2

Kuxulutik ta sbalumil Satanas li avie xchiʼuk jpasmulilutik. Jech oxal, mi mu jchabi jbatike jaʼ xa jech chlik jnoptik kʼuchaʼal li krixchanoetike xchiʼuk ti jchanbetik stalelalike. Toj tsots me skʼoplal ti jchabitik ti kʼu yelan lek xkil jbatik xchiʼuk li Jeovae. Yuʼun li sbalumil Satanase xkoʼolaj kʼuchaʼal ukʼum ti tsots yoke. Mi mu jkʼan xkuchutik batele, skʼan me tsots xkakʼbetik yipal ta stsalel. Jtos ti kʼusi tskoltautik sventa lek-o xkil jbatik xchiʼuk li Jeovae, jaʼ li cholmantale. ¿Kʼu yuʼun? Yuʼun kʼalal chkalbetik skʼoplal Dios xchiʼuk li kʼusi chal Vivliae, jaʼ me chakʼ-o lek yibel ta koʼontontik li kʼusitik tsots skʼoplale xchiʼuk ti lekike. Vaʼun maʼuk me ta jnoptik li kʼusi tskʼunibtas xchʼunel koʼontontike. Kʼalal ta jcholtik mantale jaʼ me tstsatsubtas li xchʼunel koʼontontike, yuʼun tsvules ta joltik li kʼusi yalojbutik Diose xchiʼuk li smantaltak ti skʼan jchʼuntike. Jech xtok jaʼ tskoltautik sventa lekuk tsʼakal jlaptik li kabtejebtik ta mantale (Efes. 6:14-17). Kʼalal ta jcholtik mantal, ta jchan Jvivliatik xchiʼuk kʼalal ta jkoltatik li kermanotaktike, jaʼ me tskoltautik xtok sventa mu jnopbetik skʼoplal li jvokoltike. w16.01 5:12, 13

Kʼuchaʼal chkiltike, li Rute, skʼanoj tajek li Jeovae. Jaʼ yuʼun li Boas ti jaʼ jun j-israelal vinike lek laj yalbe skʼoplal li Rute, yuʼun la saʼ koltael ta stojolal li Jeovae. Jech kʼuchaʼal chal ta Traducción del Nuevo Mundo, li Boase chal ti laj la saʼ chabiel ta yolon xikʼ Jeova li Rute (Rut 2:12). Taje tsvules ta joltik ti xkoʼolaj kʼuchaʼal uni vich o neneʼ kaxlan ti chbat stikʼ sba ta yolon xikʼ smeʼ sventa xchabiate (Sal. 36:7; 91:1-4). Taje jech la spas li Rute. La saʼ chabiel ta stojolal Jeova xchiʼuk ti akʼo xkʼanate, ta skoj ti laj yakʼ xchʼunel yoʼontone koltaat. Li Rute muʼyuk chopol laj yaʼi ta tsʼakal ti jech la spase. Li avie ep buchʼutik yakal xa chchanik ta sventa li Jeovae, pe muʼyuk ta yoʼonton tsaʼik li chabiel yuʼune. Jaʼ yuʼun mu xkʼot ta nopel yuʼunik ti xakʼ xkuxlejalik ta stojolale xchiʼuk ti xichʼik voʼe. ¿Kʼusi xuʼ skoltaot mi jech chanop eke? Baʼyel, nopo ti kʼu yuʼun mu to xkʼot ta nopel avuʼun ti chavakʼ aba ta stojolal Jeovae. Xchibal, nopo ti buchʼu chakʼan chatun ta stojolale, mi jaʼ li Jeovae o mi jaʼ li jecheʼ diosetike. Li kʼusi toj leke jaʼ ti xijtun ta stojolal li melel Diose (Jos. 24:15). Yoxibal, nopo ti kʼalal chavakʼ aba ta stojolal Jeovae, jaʼ jech chavakʼ ta ilel ti achʼunoj ti xuʼ xchabiote xchiʼuk ti tskoltaot kʼalal chanuptan vokolile. Taje jaʼ jech koltaat yuʼun Jeova li Rute. w16.02 2:6, 7

Ta skoj ti tskʼan tukʼ yoʼonton chakʼ sba ta stojolal David li Abisaie, tsmil xa ox yaʼi li Saule. Pe mu xaʼibe smelolal ti muʼyuk tukʼ yoʼonton chakʼ sba ta stojolal Jeova mi la smil li «ajvalil ti tʼujbil yuʼun Mucʼul Diose». Yan li Davide xaʼibe smelolal, jaʼ yuʼun muʼyuk bu xakʼbe smil li Saule (1 Sam. 26:9-11). ¿Kʼusi chakʼ jchantik li kʼusi tskʼan ox tspas Abisaie? Jaʼ ti skʼan jnopbetik lek skʼoplal li beiltaseletik ta Vivlia kʼalal mu jnaʼtik lek buchʼu skʼan tukʼ chkakʼ jbatik ta stojolale. Stalel onoʼox ti tukʼ koʼontontik ta stojolal li kutsʼ kalaltik xchiʼuk li kamigotaktike. Pe skʼan me jkʼel jbatik ta skoj ti jpasmulilutike xchiʼuk ti lek snaʼ xloʼlavan li koʼontontike. ¿Kʼu yuʼun? Yuʼun xuʼ van mu xa tukʼuk xkakʼ jbatik ta stojolal li Jeovae (Jer. 17:9). Jaʼ yuʼun, mi la spas smul xchiʼuk mi la sten komel Jeova junuk kutsʼ kalaltik o junuk kamigotike, teuk me ta joltik ti jaʼ mas tsots skʼoplal ti tukʼ xkakʼ jbatik ta stojolal li Jeovae (Mat. 22:37). w16.02 4:5, 6

Taje jaʼ chakʼ ta aʼiel ti skʼan xavakʼ venta atuk ti jaʼ mas lek ti xapasbe li kʼusi tskʼan yoʼonton Diose. ¿Kʼu yuʼun? Kalbetik skʼoplal li kerem Timoteoe. Ta skoj ti chanubtasat yuʼun smeʼ xchiʼuk syayae, snaʼoj lek li chanubtaseletik ta Vivliae. Akʼo mi jech, xi albat yuʼun li Pabloe: «Jech-o me xapas batel li kʼusi la achane xchiʼuk ti kʼot ta avoʼonton ta xchʼunele» (2 Tim. 3:14, 15). Kʼalal albat yuʼun Pablo ti ‹kʼotuk ta yoʼonton xchʼunel› li Timoteoe, jaʼ chakʼ ta aʼiel xtok ti yuʼun jpʼel ta yoʼonton xchʼunoj ti melel li kʼusi akʼbat xchan ta Vivliae. Pe ¿kʼu yuʼun jpʼel ta yoʼonton xchʼunoj? ¿Mi jaʼ van ta skoj ti jech akʼbat xchʼun yuʼun smeʼ xchiʼuk syayae? Moʼoj, jaʼ ta skoj ti ‹tojob ta snopel› stuke. Jaʼ xkaltik, la snopbe lek skʼoplal stuk, vaʼun laj yakʼ venta ti melel li kʼusi xchʼunoje (Rom. 12:1). Ta melel, toj ep kʼusitik xuʼ xchanbeik Timoteo li kerem tsebetike. Mi xavaʼibe lek smelolal li kʼusi chachan ta Avivliae, ta me xtakʼ avuʼun li kʼusitik chajakʼbate, ta me xatabe stakʼobil li kʼusi chajakʼbe abae xchiʼuk mas me jpʼel ta avoʼonton li kʼusitik achʼunoje (Ech. 17:11). w16.03 2:3, 4, 7

Kʼalal chbatik ta jujun kʼin ta Jerusalen li j-israeletike, jmoj ch-abtejik. Koʼol chchapanik skotol li kʼusitik chtun yuʼunike xchiʼuk jmoj tskolta sbaik batel ta be. Vaʼun kʼalal chkʼotik ta temploe, jmoj chichʼik ta mukʼ li Jeovae xchiʼuk jmoj tskʼupil kʼoptaik. Yakal xa me ta jchapan jbatik sventa xijkuxi ta paraiso. Jaʼ yuʼun, toj tsots me skʼoplal ti akʼo jmojuk oyutike xchiʼuk ti junuk koʼonton xij-abteje. Jsetʼ-juteb noʼox ti kʼusi chlik-o skʼopik li krixchanoetike xchiʼuk xchʼakchʼak noʼox sbaik. Yan li voʼotike jun koʼontontik koliyal li Jeovae xchiʼuk ti xkaʼibetik smelolal li chanubtaseletik chakʼbutike. ¿Mi mu jechuk ti ta jtojtik tajek ta vokole? Ta spʼejel Balumil jaʼ jech chkichʼtik ta mukʼ Dios kʼuchaʼal tskʼan yoʼontone. Jech xtok, muʼyuk bu jech ilbil-o ti kʼu to yelan jmoj oyutike. Jech kʼuchaʼal laj yal li j-alkʼop Isaias xchiʼuk Miquease, yakal chijmuy batel li «ta vits yuʼun li Mucʼul Diose» (Is. 2:2-4; Miq. 4:2-4). Mi jmoj-o oyutike, ta xkiltik chkʼot skʼakʼalil ti jmoj tsobol chkichʼtik ta mukʼ Jeova ta spʼejel Balumile. ¡Toj echʼ xa noʼox lek li kʼusi ta jtatike! w16.03 3:16, 17

¿Kʼu yuʼun muʼyuk mas chchʼakbeik yorail sventa xchanubtasik yantik li junantik moletike? Yikʼaluk van tsnopik ti oy kʼusitik mas tsots skʼoplal ti jaʼ baʼyel skʼan xichʼ pasele. O ta van xalik ti muʼyuk kʼusi tspas tsobobbail mi muʼyuk chchanubtasik li yantik avie. Pe, ¿mi lek van ti jech tsnopike? Melel onoʼox ti oy kʼusitik ti persa jaʼ baʼyel skʼan xapase. Pe xuʼ xil svokol avuʼun tsobobbail mi muʼyuk chachapan avi li yantike. Junantik moletike xuʼ van tsnopik ti jaʼ mas tsots skʼoplal ti spasik noʼox ta anil li kʼusitik sbainojik ta tsobobbaile, yuʼun mi muʼyuk la spasike xuʼ la xil svokol li tsobobbaile. Pe, ¿kʼusi xuʼ xkʼot ta pasel mi mu noʼox xokobik li moletik sventa xchanubtasik li yantike? Jaʼ ti xuʼ muʼyuk ermanoetik ti lek chapalik sventa sbainik spasel li abtelaletik ta tsobobbaile. Mu xanop ti muʼyuk tsots skʼoplal ti skʼan xichʼik chanubtasel li yantike. Li moletik ti oy ta yoʼontonik li tsobobbaile, chchʼak skʼakʼalik sventa xchanubtasik li yantike. Kʼalal jech tspasike chakʼik ta ilel ti lek ch-abtejike xchiʼuk ti toj jtunelik li ta tsobobbaile (1 Ped. 4:10). w15 15/4 1:4, 6, 7