Marso

Ta skoj ti skʼanojik ermanoetik ta tsobobbail li moletike, chakʼ yipik sventa xakʼbeik xchan yantik li kʼusitik xchanojik xa stukike (Sal. 71:17, 18). Li moletik ti chchanubtasik yantike ep sbalilik xtok, yuʼun kʼalal jech tspasike tstsatsub mas li tsobobbaile. Kʼalal jech taje ch-ayan mas ermanoetik ti xuʼ skoltaik li tsobobbail sventa tukʼ chakʼ sbaik ta stojolal Jeova xchiʼuk ti jmoj oyikuke. Taje mas to tsots skʼoplal avi li ta slajebal kʼakʼale. Pe mas to tsots skʼoplal xtok li ta yorail mukʼta tsatsal vokolile (Ezeq. 38:10-12; Miq. 5:5, 6). Moletik, mi muʼyuk to achʼakojbeik yorail sventa xachanubtasik yantike jaʼ xa me yorail ti xlik apasike. Melel onoʼox ti jaʼ chbat-o ora avuʼun kʼalal chapas li kʼusitik abainoj ta tsobobbaile. Pe xuʼ van xajutukajesbe yorail sventa jaʼ xavakʼ ta avoʼonton xchanubtasel li yantike (Ecl. 3:1). Lek me chatunes akʼakʼal mi jech chapase xchiʼuk tstabe sbalil ta jelavel li tsobobbaile. w15 15/4 1:8-10

Jnaʼojtik lek ti xuʼ skolta skotol krixchanoetik li mantaletik ta Vivliae. Pe jnaʼojtik xtok ti xuʼ skoltautik sventa xijnopajutik ta jujuntal ta stojolal li Diose. Pe sventa jech xkʼot ta pasel taje, skʼan jkʼeltik kʼu yelan chaʼi koʼontontik kʼalal jaʼo ta jkʼeltik xchiʼuk kʼalal ta jchantik li Vivliae. Jech xtok, skʼan jnoptik kʼuxi xuʼ xkakʼ ta jkuxlejaltik li kʼusi ta jkʼeltike. Mi ta jpastik li kʼusitik taje, xkoʼolaj kʼuchaʼal yakal tskʼoponutik Jeova li ta Vivliae. Kʼalal chkiltik kʼu yelan tskoltautik li Jeovae, mas to tstsatsub ti kʼu yelan xkil jbatik xchiʼuke (Evr. 4:12; Sant. 1:23-25). Kalbetik jun skʼelobil, li ta Mateo 6:19 xchiʼuk 20 xi laj yal li Jesuse: «Mu xa xatsob akʼulejalik liʼ ta sba balumil[e]». Taje jaʼ skʼan xal ti skʼan jaʼuk mas tsots skʼoplal chkaʼi ta jkuxlejaltik li Jeovae. Kʼalal ta jkʼeltik li teksto taje, ¿kʼu yelan chkaʼi jbatik? Mi yakal xa ta jpastik li kʼusi chal tekstoe, xuʼ xkaltik ti jun yoʼonton kuʼuntik li Jeovae. Pe, ¿mi laj kakʼtik venta ti persa to skʼan jutukajestik li kʼusitik ta jkuxlejaltik xchiʼuk ti skʼan mas xijtun ta stojolal li Jeova une? Kʼalal jech taje skʼan jnoptik ti yakal tskoltautik Jeova sventa xkakʼtik venta kʼusi skʼan jpastik yoʼ xijnopaj mas ta stojolale. w15 15/4 3:3-5

Li Jeovae yalojbutik ti skʼan jcholtik mantal jech kʼuchaʼal la spas li Pabloe, yuʼun jaʼ jech ta jchiʼintik ta abtel (1 Kor. 3:9; 1 Tes. 2:4). Mi chkakʼtik persa ta jcholtik mantale, xuʼ jchʼuntik ta melel ti chakʼbutik Jeova skotol li kʼusitik chtun kuʼuntike (Mat. 6:33). Jech xtok, mu xa toj vokoluk chkaʼitik smalael stakʼobil li j-orasiontike. Jujun kʼakʼal akʼo persa sventa mas lek xavil aba xchiʼuk li Jeovae. Kʼalal jaʼo oy avokole nopo ti jaʼ tskoltaot sventa mas lek chavil aba xchiʼuke. Kʼelo xchiʼuk chano li Avivliae, sabo yorail sventa chanopbe skʼoplal li kʼusi chachane. Mu xavikta spasel orasion xchiʼuk tunan-o batel ta stojolal li Jeovae. Mi jech la apas skotol taje xuʼ xachʼun ta melel ti tskoltaot sventa xatsal li vokoliletik chanuptan avie xchiʼuk li ta mas jelavele. w15 15/4 4:17, 18

Melel onoʼox ti xuʼ xlaj yuʼun lekilal ta tsobobbail li toybaile. Mi muʼyuk lek chkiltik li yantike xchiʼuk mi mas xa mukʼ jkʼoplal chkaʼitike, xuʼ me oy kʼusi jpasbetik o xuʼ kʼusi xkalbetik ti toj kʼux tajek chaʼiike (Prov. 12:18). Li ta Vivliae tspʼijubtasutik sventa mu xlik jtoy jbatik xchiʼuk ti mu mukʼuk jkʼoplal chkaʼi jbatike. Jech kʼuchaʼal li ta Proverbios 16:5 chal ti «toj chopol chil» jtoybaetik li Jeovae. Ta Echos 17:26 chal ti «ta jun noʼox vinik la spas krixchanoetik ta spʼejel balumil» li Diose. Jech oxal xuʼ xkaltik ti jtos noʼox jtsʼunbaltik ti bu li jlik talele, yuʼun jkotoltik te likemutik talel ta Adan. Kʼuchaʼal chkiltike chʼabal srasonal chkaltik ti oy van mas lek junantik tsʼunbaletik la spas li Diose. Jaʼ yuʼun lek sta-o ti xi jakʼbe jbatike: «¿Mi mas van xitoyet ta skoj li jtsʼunbale o li jlumale?». Mi laj kakʼtik venta ti xijtoyete, li Satanase xuʼ me slajes li kʼanelal xchiʼuk ti jun koʼontontik li ta tsobobbaile (Juan 13:35). Mi ta jkʼan ta jtsaltik komel li Satanase, skʼan me xkakʼtik persa sventa mu jtoybautikuk o ti mukʼ xa jkʼoplal chkaʼi jbatike (Prov. 16:18). w15 15/5 2:8, 9

Li Jeovae yalojbe ti chkuxiik sbatel osil ta vinajel li buchʼutik tʼujbilike. Li yan chijetik xtoke yalojbe ti chkuxiik sbatel osil ta Balumile. Kʼalal mi kuxulutik xa ox sbatel osile chlaj me skʼoplal li kʼusitik chakʼ jvokoltike (Juan 10:16; 17:3; 1 Kor. 15:53). Pe li Diose snaʼoj ti oy to kʼusitik chakʼ jvokoltike. Taje kʼux tajek chaʼi. Yuʼun li ta Vivliae chal ti kʼux laj yaʼi kʼalal laj yil svokolik ta Ejipto li j-israeletike (Is. 63:9). Kʼalal echʼ xa ox jayibuk jabil ta tsʼakale, ti jaʼo la xchaʼmeltsanik li stemploike, li Jeovae snaʼoj ti ch-ilbajinatik yuʼun li yajkontraike. Yaloj onoʼox ti mi oy buchʼu ta x-ilbajinat li yajtuneltake, toj kʼux chaʼi ti xkoʼolaj kʼuchaʼal chpikbat ‹li yuninal sate› (Zac. 2:8). Toj echʼ noʼox skʼanojutik li Jeovae, jaʼ yuʼun tskʼan tskoltautik kʼalal chkil jvokoltike. Yuʼun skʼanojutik jech kʼuchaʼal skʼanoj yol li jun meʼile (Is. 49:15). ¿Kʼuxi van xuʼ jech jpastik kʼuchaʼal li Jeovae? Jaʼ ti jnopbetik skʼoplal kʼu van yelan chkaʼi jbatik ti voʼotikuk chkil jvokoltike (Sal. 103:13, 14). w15 15/5 4:2

¿Mi jaʼ van skʼan xal ti oy-o buchʼutik abol sbaik liʼ ta Balumile? Moʼoj. Li kʼusi tskʼan chale jaʼ ti oy-o povreal ti kʼu sjalil liʼ kuxulutik ta sbalumil Satanase. Ta smul li chopol ajvaliletike xchiʼuk ti jaʼ noʼox chakʼ ta yoʼonton li kʼusi tskʼan stukike, ep ta miyon krixchanoetik ti oyik ta povreale. Pe li Diose jamal yaloj ti tstupʼbe skʼoplal li povreale (Sal. 72:16). Ta skoj li skʼelobiltak juʼelal la spas li Jesuse chakʼ ta ilel ti tskʼan tstunes sjuʼel sventa tskoltautike. Jaʼ yuʼun, xuʼ jpat lek koʼontontik ti poʼot xa jech tspase (Mat. 14:14-21). Jech oxal, kʼalal ta jnopbetik skʼoplal taje jaʼ tstij koʼontontik sventa lek jtunes jkʼakʼaltik xchiʼuk kipaltik yoʼ jkoltatik li yantike (Sal. 45:1; 49:3). Melel onoʼox ti mu spas kuʼuntik skʼelobiltak juʼelal li voʼotike. Pe xuʼ xkalbetik krixchanoetik li kʼusitik lek chkʼot ta pasel chal Vivliae. Yuʼun jaʼ onoʼox me kabteltik (Rom. 1:14, 15). w15 15/6 1:7, 10, 11

Ta skoj ti tsots skʼoplal chkiltik ti jaʼ kamigotik li Jeovae, chkakʼtik persa sventa mu jpastik li kʼusitik muʼyuk lek chile xchiʼuk chkakʼtik persa ti jaʼuk noʼox jnoptik li kʼusitik lek sake (Sal. 24:3, 4; 51:6; Filip. 4:8). Melel onoʼox ti snaʼoj Jeova ti jpasmulilutike xchiʼuk bakʼintike oy onoʼox kʼusi chopol ch-ayan ta koʼontontik akʼo mi mu kolbajtikuk. Ta skoj ti mu jkʼantik ti chopoluk xaʼi sba kuʼuntik li Jeovae, chkakʼtik persa stsalel xchiʼuk ti jaʼuk noʼox jnoptik li kʼusitik sake (Gén. 6:5, 6). Mi ta jpasilantik orasione ta me skoltautik Jeova sventa jtsaltik komel li kʼusitik chopol oy ta koʼontontike. Li stuke ta xakʼbutik xchʼul espiritu xchiʼuk kipaltik sventa sakukutik. w15 15/6 3:4, 5

Kʼalal chanubtasvan ta spasel orasion li Jesuse, mu xiuk laj yal ti akʼo jkʼantike: «Akʼbun jpan», moʼoj, yuʼun laj yal ti xi akʼo jkʼantike: «Akʼbun jpankutik». Jkʼeltik kʼuxi jech-o tskʼan jun jkʼelvanej ta sirkuito ta África ti Victor sbie. Xi chale: «Li kajnil xchiʼuk li voʼone ta jtojbekutik ta vokol Jeova ti muʼyuk kʼusi ta jvul-o koʼontonkutik ta sventa li kʼusi ta jlajeskutike xchiʼuk ta sventa bu ta jtakutik takʼin sventa jtojkutik li bu nakalunkutike. Yuʼun li ermanoetike jaʼ chakʼbunkutik li kʼusitik chtun kuʼunkutik taje. Manchuk mi jech, ta jkʼanbe Dios ti akʼo skolta sventa xakʼbeik yipal li ermanoetik ti chil svokolik ta takʼine». Li voʼotike xuʼ van oy noʼox kʼusi jlajestik, pe oy epal kermanotik ti povreike o ti yakal chil yan tsots svokolike. Skʼan jpastik orasion ta stojolalik. Pe oy yan kʼusi xuʼ jpastik sventa jkoltatik. Jech kʼuchaʼal liʼe, xuʼ xkakʼbetik li kʼusitik oy kuʼuntike. Xuʼ xkakʼtik matanal takʼin ek ta sventa li abtelal ta spʼejel balumile. Jnaʼojtik xtok ti ta onoʼox xtun sventa xichʼik-o koltael kermanotaktik li matanal takʼin chkakʼtike (1 Juan 3:17). w15 15/6 5:4-6

Li ta jvokʼ s-organisasion Dios ti liʼ oy ta Balumile, ep kʼusitik jelem talel xchiʼuk ep kʼusitik lekubtasbil. Taje jech xa onoʼox yaloj chkʼot ta pasel li j-alkʼop Isaiase (Is. 60:17). Li kerem tsebetik ti jaʼik stestigotak Jeovae xchiʼuk li buchʼutik achʼik toe xuʼ van jaʼ noʼox yaʼiojbeik skʼoplal li kʼusitik jelem talel ta skoj ti oy buchʼu loʼiltabatik o la skʼelik ta jvuntike. Pe oy ep ermanoetik ti laj yil ta xkuxlejalik li kʼusitik jel taje, yuʼun jal xa yochelik ta mantal. Li ermanoetik taje lek xchʼunojik ti Diose yakal tstunes ajvalil Jesus sventa tsbeiltas li s-organisasione. Mi ta jchikintabetik sloʼilik li ermanoetik ti tukʼ yakʼoj sbaik taje, ta me xchʼi li spatobil koʼontontik ta stojolal Jeovae. Jkotoltik skʼan jloʼiltabetik yantik li kʼusitik kʼotem ta pasel ta s-organisasion Jeovae. Ta skoj ti oyutik ta jun balumil ti toj chopole toj labal sba ti jun xa noʼox koʼontontik oyutik xchiʼuk ti jmoj tsobolutik ta slumal Jeova akʼo mi jelel jlumaltike. w15 15/7 1:12, 13

Li paskʼop ta Armajedone jaʼ me tskʼupil kʼopta li xchʼul bi Jeovae. Li buchʼutik jaʼik «tentsunetike» ta me xichʼik lajesel (Mat. 25:31-33, 46). Ta me xlaj skʼoplal li choplejal oy ta Balumile, vaʼun kuxul chkom li epal krixchanoetike. Ta skoj ti jnaʼojtik ti jutuk xa skʼan xkʼot ta pasel li kʼusitik taje, ¿kʼusi skʼan jpastik? Li jtakbol Pedroe chalbutik tojobtasel ti kʼu yelan skʼan jpas li jtalelaltike. Skʼan sakuk li jkuxlejaltike, jkʼantik li Diose xchiʼuk tukʼuk xkakʼ jbatik. Jech xtok, mu xchʼay xkaʼitik ti jutuk xa tajek skʼan xvul «li skʼakʼalil Jeovae». Xi to laj yal li Pedroe: «Li voʼoxuk ti jkʼanojoxuk ti yakal xa onoʼox chamalaik li kʼusitik taje, pasik me ti bu kʼalal xuʼ avuʼunik ti chʼabaluk achopolalike, ti chʼabaluk apaltailik xchiʼuk ti junuk avoʼontonik staoxuke» (2 Ped. 3:11, 12, 14). Jaʼ yuʼun, lekuk xkichʼtik ta mukʼ li Jeovae, mu jkap jbatik xchiʼuk li jecheʼ relijionetike xchiʼuk ta sjunuluk koʼontontik kakʼ jbatik ta stojolal li Jesuse, ti jaʼ li Ajvalil ti chakʼ lekilale. w15 15/7 2:17, 18

Ep stestigotak Jeova tsots ch-abtejik ta svaʼanel salonetik ta spʼejel Balumil. Ta moton tskʼelik kʼu yelan skʼan pasel li salonetike, ta svaʼanik xchiʼuk ta xchaʼachʼubtasik. Ta skoj taje li ta svoʼlajunebal jabil tale voʼob salonetik vaʼanbil ta jujun kʼakʼal. Ta skotole vaʼanbil xa mas ta 28 mil salonetik. Li Vivliae chal ti buchʼutik mas oy yuʼunike jaʼ skʼan akʼo skoltaik li buchʼutik chʼabal mas kʼusi oy yuʼunike (2 Kor. 8:13-15). Jech oxal, li s-organisasion Jeovae tstunes ermanoetik ti chkoltavanik ta abtele xchiʼuk tstunes li matanal takʼin chkakʼtik sventa xichʼ vaʼanel salonetik ti bu jtunel tajeke. Koliyal taje yichʼoj vaʼanel epal salonetik sventa li ermanoetik ti chʼabal lek stakʼinik sventa xtoj yuʼunike. w15 15/7 4:9-11

Li senyailtak laj yalbe skʼoplal Jesus ti chakʼ ta ilel ti oyutik xa ta slajebal kʼakʼale, jaʼ noʼox sventa li buchʼutik vikʼil satike, yuʼun jaʼ jech chakʼik venta ti kʼot xa ox yorail li skʼakʼalil slajeb kʼusitike. Li yajtunelutik Diose lek onoʼox vikʼil talel jsatik (Mat. 24:27, 42). Jaʼ yuʼun, leʼ xa onoʼox ta 1914, kilojtik talel kʼuxi chkʼotanuk ta pasel li senyailtak taje. Jchʼunojtik lek ti oyutik xa ta slajebal li kʼusitik chopol ta sba balumile. Li Jeovae laj xa snop ti kʼusi ora chakʼbe slajebe. Jech kʼuchaʼal chkiltike, skʼan vikʼiluk-o jsatik xchiʼuk chapalukutik-o. ¿Kʼu yuʼun? Baʼyele, jaʼ ti ta jkʼan ta jchʼunbetik smantal li Kristoe. Li xchibale, jaʼ ti jchʼunojtik ti yakal xa chkʼot ta pasel li senyailtak ti chakʼ ta ilel ti oyutik ta slajebal kʼakʼale (Mat. 24:3). ¿Kʼu yuʼun jech jchʼunojtik taje? Maʼuk yuʼun ti jech noʼox ta jvovil chʼuntike, moʼoj, yuʼun oy lek sprevail kuʼuntik ti yakal xa chkʼot ta pasel li albil kʼopetik ta Vivliae. w15 15/8 2:8, 9

¿Mi xuʼ van jchʼay koʼontontik xchiʼuk jkuxtik li ta Paraisoe? Tana. Yuʼun kʼalal la spasutik li Jeovae, la spasutik sventa oyuk ta koʼontontik skʼupinel li kuxlejale. Jamal yalojbutik ti chakʼbutik li kʼusitik tskʼan koʼontontike (Ecl. 2:24). Pe jvules me ta joltik ti kʼalal mas lek xkil jbatik xchiʼuk li Jeovae, mas ta jkʼupintik ti ta jchʼay koʼontontike xchiʼuk ti ta jkuxtike. Jaʼ yuʼun, li ta Paraisoe ta jkux koʼontontik xchiʼuk ta jchʼay koʼontontik, pe li kʼusi mas tsots skʼoplale jaʼ ti ta jpasbetik yabtel li Jeovae. Jech oxal, jechuk xa noʼox xkil ta jkuxlejaltik taje xchiʼuk jaʼ kakʼ ta koʼontontik li bendisionetik ta jtatik ta skoj ti jech chijtun ta stojolale (Mat. 6:33). Li avie mu xa noʼox xnop kuʼuntik kʼu to yutsil li kuxlejal ta Paraisoe. Jaʼ yuʼun kakʼtik ta ilel ti ta xa noʼox jchapan jbatik sventa xuʼ jkʼupintike. w15 15/8 3:17, 18

Kʼalal liʼ toʼox oy ta Balumil li Jesuse tukʼil krixchano li stuke, yan li stot smeʼe, li xchiʼiltak ta vokʼele xchiʼuk li yan krixchanoetike mu jechuk, yuʼun jmulavil krixchano skotolik. Oy bateltik xtoke, li yajchankʼoptake la stoy sbaik xchiʼuk jaʼ noʼox la saʼ li kʼusi tskʼan stukike. Li ta yakʼobalil 14 yuʼun nisane ‹tsots lik svulilan sbaik sventa buchʼu junukal mas mukʼ skʼoplal ilbil yuʼunik› (Luk. 22:24). Akʼo mi jech, li Jesuse lek spatoj-o yoʼonton ta stojolalik ti xuʼ chyijubik ta mantale xchiʼuk ti tskolta sbaik sventa oyuk jun oʼontonal li ta tsobobbaile. Jaʼ yuʼun, li vaʼ akʼobale laj yalbe Jeova ti akʼo skolta sventa junuk yoʼontonik li yajchankʼoptake, ti jechikuk kʼuchaʼal li stukike. Xi laj yalbee: «Junuk oyik jech kʼuchaʼal jun oyutik eke» (Juan 17:21, 22). w15 15/9 1:10, 11

¿Kʼu yuʼun xiʼ kʼalal yakal xa ox chanav ta ba nab li Pedroe? Li Vivliae chal ti maʼuk xa la skʼel batel li Jesuse, jaʼ la skʼel ‹ti xjumet li tsatsal ikʼe› (Mat. 14:24-32). Jech lik kʼunibuk li xchʼunel yoʼontone xchiʼuk lik ochuk yalel ta yut nab. Li tsatsal ikʼ taje xchiʼuk li syukʼlajetel nabe xuʼ jkoʼoltastik li ta vokoliletik xchiʼuk li ta prevaetik ta jnuptantik jujun kʼakʼale. Akʼo mi toj tsots o vokolik tajek li kʼusitik ta jnuptantike, li Jeovae xuʼ chakʼ kipaltik sventa xkuch kuʼuntik. Pe mi jaʼ chkakʼ tajek ta koʼontontik li jvokoltike, xuʼ me xkʼunib li xchʼunel koʼontontike, vaʼun mu xa jchʼuntik ti tskoltautik li Jeovae. ¿Kʼu yuʼun buchʼuuk noʼox xuʼ xkʼunib li xchʼunel yoʼontone? Yuʼun li Vivliae chal ti kʼalal chkʼunib o chʼabal xchʼunel koʼontontike xkoʼolaj ta jun «mulil ti ta anil chchukutike» (Evr. 12:1). Mi jaʼ chkakʼ tajek ta koʼontontik li jvokoltik kʼuchaʼal la spas Pedroe, xuʼ me xlik kʼunibuk li xchʼunel koʼontontike. w15 15/9 3:1, 6, 7

Kʼalal oy buchʼu chakʼbutik junuk matanale, chkakʼtik persa yakʼel ta ilel ti ta jtojbetik ta vokole. ¿Kʼuxi ta jpastik taje? Veno, jaʼo kʼalal ta jtunestik li matanal laj kichʼtik akʼbele. Yuʼun li Jeovae chakʼbutik skotol li kʼusi chtun kuʼuntik sventa xijkuxie xchiʼuk sventa xijmuyubaj noʼoxe. Kʼuchaʼal chkiltike skʼanojutik tajek. ¿Mi mu tauk stij avoʼonton sventa chavakʼbe yil ti akʼanoj eke? Li Jeovae ep kʼusitik lekik laj yakʼbe li j-israeletike. Ta sienal xa noʼox jabil laj yakʼbe skotol li kʼusitik chtun yuʼunike. Laj yakʼanbe mantaletik xtok sventa snaʼik li kʼusitik skʼan spasike (Deut. 4:7, 8). Xi jun skʼelobile, li Mantale chal ti j-israeletike skʼan xakʼbeik Dios «li sba sat cʼusitic [stsʼunoj] ta [y]osilic ti toj lequique» (Éx. 23:19). Mi tskʼan jech-o ch-akʼbatik li kʼusitik lekike, skʼan xchʼunbeik smantal xchiʼuk xakʼbeik li kʼusitik mas lek oy yuʼunike. Jaʼ jech chakʼik ta ilel ti tstojbeik ta vokol li Jeovae (Deut. 8:7-11). w15 15/9 5:5, 6

¿Mi avakʼoj venta kʼu yelan yakal tskoltaot ta akuxlejal li Jeovae? Jlom ermanoetike jaʼo koltaat chaʼiik kʼalal la staik li melel relijione. Jlom xtoke tsnopik ti koltaatik yuʼun Jeova ta skoj li kʼusi laj yal ta tsobobbail li jun ermanoe. Oy buchʼutik chalik xtok ti koltaatik yuʼun Dios ta skoj ti takʼbat jun s-orasionike. Yantik xtoke, xuʼ van chalik ti koltaatik yuʼun Jeova ta stael li kʼusi onoʼox tskʼan tstaik ta mantal yoʼ xtunik mas li ta steklumale. Li buchʼutik laj yikta yabtelik ta skoj ti chmakatik toʼox sventa xbatik ta cholmantal o ta tsobajeletike chalik ti koltaatik yuʼun Jeovae, yuʼun akʼbatik li kʼusitik chtun yuʼunik jujun kʼakʼale (Evr. 13:5). Mi jaʼ kamigotik ta melel li Jeovae, xuʼ me xkakʼtik venta ti ep ta tos kʼu yelan tskoltautike. Taje jaʼ skʼan xal xtok ti skʼan jnopbetik skʼoplal li kʼusitik leke xchiʼuk ti xkiktatik spasel li kʼusitik chopole (2 Kor. 4:2). Jaʼ yuʼun skʼan lek xkamigointik Jeova yoʼ xkakʼtik venta ti kʼu yelan yakal tskoltautike. w15 15/10 1:17, 19

Junantik jgresiaetike batik ta Jerusalen, yuʼun koʼol tspasik kʼin Koltael xchiʼuk li judaetike. Toj labal laj yilik li kʼusi la spas Jesus te ta temploe. Jaʼ yuʼun la sjakʼbeik jtakbol Felipe mi xuʼ xchiʼinik ta loʼil li Jesuse. Pe muʼyuk la skʼan li Jesuse, yuʼun maʼuk oy ta yoʼonton yojtikinel krixchanoetik ti lek xa chaʼiik li kʼusitik chale o ti xpakbat skʼoplale. Li kʼusi mas tsots skʼoplal chaʼie jaʼ ti xcham ta jtojolaltike, ti jaʼ jech albat yuʼun Jeova akʼo spase. Vaʼun lik svulesbe ta sjol yajchankʼoptak ti poʼot xa xichʼ milele xchiʼuk ti skʼan tukʼ xakʼ sbaik akʼo mi xichʼik milel ek li yajchankʼoptake. Laj yalbe ti mi mu sjalan xkuxlejalike ta x-ichʼatik ta mukʼ yuʼun li Jeovae xchiʼuk ta x-akʼbatik kuxlejal sbatel osil kʼuchaʼal chal li teksto avie. Li aʼyej ti tspat oʼontonal taje, jaʼ jech laj yalbe jgresiaetik li Felipee (Juan 12:20-25). Akʼo mi jaʼ mas bat ta yoʼonton cholmantal li Jesuse, oy to kʼusitik yan la spas. w15 15/10 3:13, 14

Kʼalal laj yil Jesus ti yakal tsvulilan sbaik li yajchankʼoptak ta sventa ti buchʼu mas mukʼ skʼoplal yuʼunike, muʼyuk bu x-ilin. Moʼoj, yuʼun ep ta velta ta slekil yoʼonton la stukʼibtasan. Pe la skʼel lek bu xchiʼuk kʼusi ora xuʼ stukʼibtasan ta slekil yoʼonton (Mar. 9:33-37). Ta skoj ti akʼanojan li avalab anichʼnabe, skʼan me xatukʼibtas. Mi oy kʼusi chopol la spasike, xuʼ van xaʼibeik smelolal ti mu xtun li kʼusi la spasik mi la avalbe kʼu yuʼune. Pe ¿mi mu xchʼunik une? (Prov. 22:15). Veno, jaʼ jech xapas kʼuchaʼal la spas Jesuse. Mu xalubtsaj ta sbeiltasel, ta stojobtasel xchiʼuk ta stukʼibtasel. Kʼelo lek bu xchiʼuk kʼusi ora xuʼ xatukʼibtas ta slekil avoʼonton. Jun stestigo Jeova ta Sudáfrica ti Elaine sbie, xvul to ta sjol ti baʼyel onoʼox ch-albat ti kʼu yuʼun ch-akʼbat kastigoe xchiʼuk muʼyuk ta skapemal xa sjolik chtukʼibtasat. Taj une, jaʼ la spat-o yoʼonton ti kʼanbil yuʼun li stot smeʼe. w15 15/11 1:5, 6

¿Kʼusi van ta jtatik ta mas tsʼakal ti muʼyukuk skʼanojutik li Jeovae? Jaʼ ti sventainoj sba-o stukik jechuk li krixchanoetik ti jaʼ pasbilik ta mantal yuʼun li Satanase, li chopol diose (2 Kor. 4:4; 1 Juan 5:19; Apok. 12:9, 12). ¡Muʼyuk kʼusi lek chkʼot ta pasel ta jkuxlejaltik ti jechuke! Kʼalal la stoy sba ta stojolal Jeova li Satanase, la xchibal kʼoptabe li sderecho Dios sventa tspas mantal ta vinajelbalumile, laj yakʼ ta aʼyel ti jaʼ mas xtojob ta pasmantal li stuke (Gén. 3:1-5). Ta skoj ti jaʼ jun pʼijil Dios li Jeovae, laj yakʼ ti akʼo x-echʼ kʼuk sjalil sventa xakʼ ta ilel mi oy srason ta melel li Satanase. Pe jamal xa vinajem ti mu xtojobik ta ajvalil li Satanas xchiʼuk li krixchanoetike. w15 15/11 3:3, 4

Mi bikʼit kakʼoj jbatike ta me jchʼuntik li tojobtasel chal Jesus liʼe: «Avaʼiojik ti xi laj yichʼ alele: ‹Kʼano me li achiʼile, pe pʼajo me li avajkontrae›. Pe xi chkalboxuk li voʼone: kʼanik-o me li avajkontratakike xchiʼuk pasik-o me orasion ta stojolal li buchʼutik chilbajinoxuke, sventa jech chavakʼik ta ilel ti jaʼ xnichʼnaboxuk li Atotik ta vinajele, yuʼun li stuke chakʼ lokʼuk Kʼakʼal ta stojolal li buchʼutik chopolike xchiʼuk li buchʼutik lekike, xchiʼuk chakʼ taluk voʼ ta stojolal li buchʼutik tukʼike xchiʼuk li buchʼutik muʼyuk tukʼike» (Mat. 5:43-45). Jaʼ jech, li yajtunelutik Diose skʼan me jkʼantik li kajkontrataktike, mu ventauk ti kʼusi xalik o spasbutike. Skʼan me xkakʼtik ta ilel skotol ora ti jkʼanojtik li Jeovae xchiʼuk li jchiʼiltaktike. Manchuk mi skontrainojutik o mi mu skʼanik li mantal chkalbetike, ta me jkoltatik kʼalal chil svokolike. w15 15/11 4:17, 19, 20

Ta jkʼopojeltik ta jkʼupil kʼoptatik xchiʼuk chkalbetik batel skʼoplal li Diose. Maʼuk noʼox, yuʼun li avie ta jtunestik jeltos kʼopetik sventa xichʼ jelubtasel li Vivliae xchiʼuk ti jkoltatik yan krixchanoetik sventa xojtikinik li Jeovae. Oy ep ta tos Vivliaetik ti jelel kʼu yelan jelubtasbile, jlome jech tajek jelubtasbil kʼuchaʼal li orijinal tsʼibetike, pe li yantike mu toj masuk tukʼ jelubtasbil. Li kʼusi oy ta yoʼontonik li ermanoetik kʼalal la sjelubtasik li Traducción del Nuevo Mundo[e] jaʼ ti tukʼuk tajek xichʼ jelubtasele. Jaʼ yuʼun oy oxtos ti kʼusi oy ta yoʼontonike. Baʼyel, jaʼ ti xichʼ ichʼbel ta mukʼ sbi li Diose xchiʼuk ti xichʼ tsʼibael ti bu onoʼox oy ta orijinale (Mat. 6:9). Xchibal, jaʼ ti jujupʼeltik xa xichʼ jelubtasel mi sta-o chilike. Pe mi mu stakʼe jaʼ xa chalik ti kʼusi skʼan xale. Yoxibal, jaʼ ti kʼunuk ta chanel xchiʼuk ta aʼiel li kʼopetik tstunesike (Neh. 8:8). w15 15/11 2:1, 2

Mi mu xaʼibeik lek smelolal senyail okʼes li soltaroetike, xuʼ van mu snaʼ kʼusi tspasik. Jech chkʼot ta pasel ek kʼalal chijkʼopoje (1 Kor. 14:9). Li Vivliae chalbutik ti kʼunuk ta aʼibel smelolal li kʼusi chkaltike. Yuʼun mi moʼoje, xuʼ van mu xaʼibeik smelolal kʼusi chkaltik li krixchanoetike. Akʼo mi kʼun ta aʼibel smelolal li kʼusi chkaltike, oyuk me spʼisol li kʼusi chkaltike xchiʼuk ichʼvankutik me ta mukʼ. Kʼun ta aʼibel smelolal kʼalal kʼopoj li Jesuse. Jnopbetik skʼoplal li mantal laj yal ta Mateo kapitulo 5 kʼalal ta 7. Muʼyuk bu la stunes ep ta tos tsatsal kʼopetik ti vokol xa ta aʼibel smelolal sventa noʼox labal xa sba x-ilat yuʼun li krixchanoetike. Jech xtok, muʼyuk buchʼu chopol laj yaʼi sba yuʼun ta skoj li kʼusi laj yale. Kʼunik ta aʼibel smelolal li kʼusi laj yale, akʼo mi toj tsotsik skʼoplal. Li ta mantal laj yale la xchanubtas yajchankʼoptak ti mu svul yoʼontonik ti kʼusi tslajesik jujun kʼakʼale. Yoʼ xkom ta sjolik li mantale, laj yalbe yajchankʼoptak ti akʼo skʼelik kʼuxi chmakʼlinatik yuʼun Jeova li mutetike. Vaʼun xi la sjakʼe: «¿Mi mu jaʼuk mas tsots akʼoplalik li voʼoxuke, ti jaʼ mu sta li stukike?» (Mat. 6:26). Kʼun tajek ta aʼibel smelolal li kʼusi laj yale, pe la stsatsubtasbe-o yoʼonton xchiʼuk oy kʼusi tsots skʼoplal la xchanubtas li yajchankʼoptake. w15 15/12 3:13, 14

¿Kʼusi smelolal ti ta jkʼan kermanotaktik kʼuchaʼal jchiʼiltik ta vokʼele? Jaʼ skʼoplal ti kʼu yelan jkʼanojtik tajek li kutsʼ kalaltike o li kamigotaktike (Juan 11:36). Jech oxal chaʼa, li melel yajtsʼaklomutik Kristoe maʼuk noʼox naka chkaltik ti kermano jbatike, moʼoj, yuʼun jamal chkakʼtik ta ilel ti kermano jbatik ta melele (Mat. 23:8). Xi laj yal li Pabloe: «Skʼan me oyuk xkʼuxul avoʼontonik xchiʼuk skʼan me xakʼanik li achiʼilik ta chʼunolajele, jech kʼuchaʼal skʼanoj sbaik ta jujuntal li buchʼutik xchiʼil sbaik ta vokʼele. Ta sventa ti kʼu yelan chavakʼik ta ilel ti cha-ichʼvanik ta mukʼe, baʼyel me jech xapasik» (Rom. 12:10). Li teksto taje chakʼ ta ilel ti skʼan jkʼanojtikuk tajek li kermanotaktike. Mi jkʼanoj jbatik kʼuchaʼal jchiʼil jbatik ta vokʼele xchiʼuk mi jech jkʼanoj jbatik kʼuchaʼal chal Vivliae, ta me xkamigoin jbatik xchiʼuk jmoj me oyutik. Yan li melel yajtsʼaklomtak Kristoe naka jaʼ yermanotak chilik skotol li yajtuneltak Jeovae, manchuk mi jelel slumalik (Rom. 10:12). Jech oxal, jkʼanoj jbatik ta melel, yuʼun jaʼ jech yalojbutik Dios ti akʼo jpastike (1 Tes. 4:9). w16.01 1:5, 6

Oy kʼusi stakʼ jpastik mi jkʼanojtik li Jeova xchiʼuk Jesuse, jaʼ ti xijmuyubajuk noʼox kʼalal ta jcholtik mantale xchiʼuk kʼalal chijchanubtasvane (Mat. 28:19, 20; Luk. 4:43). Li ta yuilal Snaʼobil slajel Kristoe, ¿mi xuʼ van xijtun ta prekursor auksiliar sventa jcholtik mantal 30 o 50 ora? Kalbetik skʼoplal jun meʼon ermano ti 84 xa sjabilale. Ta skoj ti mol xa xchiʼuk ti ip noʼox chaʼie, la snop ti mu stsʼaki yuʼun li yorae. Pe li prekursoretik ti te noʼox nopol nakalike la skoltaik sventa xikʼik batel ta cholmantal xchiʼuk la stʼujbeik lek ti bu xuʼ xchol mantale. Koliyal ti laj yichʼ koltaele la xchol mantal 30 ora ta jun u. ¿Mi oy van buchʼu stakʼ jkoltatik sventa xtun ta prekursor li ta marso o avrile? Melel onoʼox ti mu jkotoltikuk xuʼ kuʼuntik xijtun ta prekursore, pe xuʼ jchʼak jkʼakʼaltik xchiʼuk xkakʼ kipaltik sventa masuk ep xij-abtej ta stojolal li Jeovae. w16.01 2:7, 11

Mi mu jnabetik sbi li buchʼutik liʼ to oyik ta Balumil ti tʼujbil chbatik ta vinajele, ¿kʼu yuʼun xi chkalbetike: «Ta xbat jchiʼinotcutic»? Veno, li Vivliae xi chalbe skʼoplal li lajunvoʼ viniketike: «Chbat stsacbeic yoc scʼuʼ jun judá vinic, jech chalbeic: ‹Ta xbat jchiʼinotcutic ec, yuʼun laj caʼicutic ti te oy ta atojolic li Diose›». Kʼuchaʼal chkakʼtik ventae, chalbe skʼoplal jun «judá vinic», ta tsʼakale «ta atojolic» xi. Jaʼ yuʼun chaʼa, kʼalal «judá vinic» xie, maʼuk skʼoplal jun krixchano, jaʼ skʼoplal skotol li buchʼutik chbatik ta vinajele. Snaʼoj yan chijetik maʼ taje, jech oxal kʼalal jmoj chtunik ta stojolal Jeova xchiʼuk li buchʼutik tʼujbile, xi chalbeik xkaltike: «Ta xbat jchiʼinotcutic». Pe mu persauk skʼan jnabetik sbi li buchʼutik chbatik ta vinajel sventa jtsʼaklitike. ¿Kʼu yuʼun? Yuʼun jech kʼuchaʼal chal li Vivliae jaʼ noʼox skʼan jtsʼaklitik li Jesuse (Mat. 23:10). w16.01 4:4

Li kʼusi ta jkʼantik kʼalal chij-ayan xchiʼuk kʼalal to chijchame, jaʼ ti xkichʼtik kʼanele. Melel onoʼox ti oy ta koʼontontik ti oyuk kamigotaktik ti skʼanojutike, ti maʼuk noʼox skʼanutik li jnup jchiʼiltike. Pe li kʼusi mas tsots skʼoplale, jaʼ ti xijkʼot ta yamigo Diose xchiʼuk ti skʼanutike. Pe ep buchʼutik chal ti mu la xkʼot ta pasel jeche, yuʼun toj ep tajek sjuʼel. Yan li voʼotike jnaʼojtik ti xuʼ xijkʼot ta yamigo li Jeovae. ¿Kʼuxi jnaʼojtik? Yuʼun li Vivliae chalbe skʼoplal ti oy buchʼutik kʼot ta yamigotak Diose, jech kʼuchaʼal li Abraane. Lek ti jchanbetik sloʼil xkuxlejalike. ¿Kʼu yuʼun? Yuʼun stuk noʼox jech ti xuʼ xkamigointik li Diose (Sant. 2:23). Li Abraane kʼot ta yamigo Dios ta skoj ti oy xchʼunel yoʼontone. Jech oxal li Vivliae chal ti kʼot «ta stotik li buchʼutik oy xchʼunel yoʼontonik[e]» (Rom. 4:11). w16.02 1:1, 2

Li stot Esekiase toj chopol tajek echʼ ta ajvalil li ta Judae, akʼo mi jech, li stuke lekil ajvalil echʼ (2 Rey. 18:6). Jaʼ yuʼun laj yakʼ persa stukʼibtasel li kʼusitik chopol la spas stote: la xchʼuba lek li temploe, la skʼanbe perton Jeova ta skoj li smul jteklume xchiʼuk la slilin skotol li lokʼoletik ti skuyoj ta sdiosike (2 Crón. 29:1-11, 18-24; 31:1). Ta mas tsʼakale oy jun ajvalil ti bat stsak ta kʼop li Jerusalene, kʼalal jech taje laj yakʼ ta ilel ti tsots xchʼunel yoʼontone xchiʼuk muʼyuk xiʼ li Esekiase. Jech xtok, laj yalbe jteklum ti akʼo spat yoʼontonik ta stojolal li Jeovae (2 Crón. 32:7, 8). Jun veltae la stoy sba li Esekiase, pe la xchʼam li tojobtasel akʼbat yuʼun Jeovae xchiʼuk bikʼit laj yakʼ sba yan velta (2 Crón. 32:24-26). Jech kʼuchaʼal chkiltike, li Esekiase muʼyuk laj yakʼ ti akʼo sokesbatuk xkuxlejal yuʼun li xchopol talelal yutsʼ yalale. Laj yakʼ ta ilel ti lek tajek xil sba xchiʼuk li Jeovae. ¡Toj echʼ noʼox lek ti jchanbetik stalelale! w16.02 2:11

Kʼalal oy slekil koʼontontik xtoke jaʼ me tskoltautik sventa tukʼ koʼontontik ta stojolal Jeova xchiʼuk ta stojolal li yantike. Kaltikuk noʼox ti anaʼoj ti oy kʼusi chopol la spas junuk ermanoe. Yikʼaluk van chakʼan ti tukʼuk xavakʼ aba ta stojolal li ermano taje, mas to mi jaʼ avutsʼ avalale o mi jaʼ avamigoe. Pe anaʼoj xtok ti jaʼ mas tsots skʼoplal ti tukʼuk avoʼonton ta stojolal li Jeovae. Vaʼun chaʼa, ¿kʼusi van chapas? Chʼunbo smantal li Jeovae xchiʼuk akʼo ta ilel slekil avoʼonton ta stojolal li avermanoe. Albo ti akʼo xbat noʼox yalbe li moletik ta tsobobbaile. Mi mu skʼan xbat yalbee, voʼot me skʼan xbat avalbe. Vaʼun jaʼ jech chavakʼ ta ilel ti tukʼ avoʼonton ta stojolal li Jeovae xchiʼuk ti akʼanoj li avermanoe. Yuʼun kʼalal chaʼiik li moletike, ta slekil me yoʼonton tstukʼibtasik li ermanoe xchiʼuk ti xlekub ta mantale (Lev. 5:1). w16.02 4:14

¿Kʼuxi chkakʼtik ta ilel ti ‹kichʼojtik lek ta mukʼ li Diose›? Jaʼo kʼalal ta jpastik li kʼusitik ta tsobobbaile, kʼalal chijbat ta tsobajeletike xchiʼuk kʼalal ta jcholtik mantale. Pe te smakojbe skʼoplal xtok li kʼusitik chapas atuke, jech kʼuchaʼal li orasione xchiʼuk li xchanel Avivliae. Ta melel, li buchʼu chakʼ xkuxlejal ta stojolal li Jeovae, ta skʼupin spasel li kʼusitik laj kaltike xchiʼuk muʼyuk bu sujbil chaʼi sba ta spasel. Jaʼ jech chaʼi sba kʼuchaʼal li ajvalil David ti xi laj yale: «Ximuyubaj ta spasel ti cʼusi oy ta avoʼntone, Dios; cʼotem ta coʼnton ti cʼu sʼelan lachanubtasvane» (Sal. 40:8, Ch). Kʼalal mi la avakʼbe akuxlejal li Jeovae xchiʼuk mi la avichʼ voʼe, jaʼo chlik avamigoin lek, vaʼun jaʼ xa chchapanot ti kʼu yelan chapas abae. Jaʼ yuʼun chaʼa, li kʼusi chapas ta stojolal Jeovae, jaʼ me avuʼun atuk, maʼuk me li kʼusitik tspas atot ameʼe mi jaʼuk li yan krixchanoetike. Mi ‹chʼul atalelal xchiʼuk mi avichʼoj lek ta mukʼ li Diose›, chavakʼ ta ilel ti achʼunoj lek ti jaʼ melel relijion liʼe xchiʼuk ti chakʼan chachʼunbe smantaltak li Jeovae. Vaʼun chapalot xa me sventa chavichʼ voʼ. w16.03 2:10, 12, 15

Li Smantal Moisese jaʼ koltavan sventa mu xmulivajik li j-israeletike xchiʼuk ti mu xichʼik ta mukʼ yan diosetik kʼuchaʼal tspas li jyanlumetike. Jech oxal mi tskʼan ch-akʼbatik bendision yuʼun Jeova li j-israeletike, skʼan me xchʼunbeik li smantale. Mi mu jechuk tspasike chopol me kʼusi tsnuptanik (Deut. 28:1, 2, 15). Pe akʼbatik yan mantaletik xtok li yajtuneltak Diose. ¿Kʼu yuʼun? Jaʼ sventa xkoltaatik kʼalal mi kʼot ta pasel li kʼusi toj tsots skʼoplal oy ta yoʼonton Dios kʼuchaʼal chal Smantal Moisese, jaʼ ti chvul ta lokʼel li Mesiase, li Jesukristoe. Koliyal li Mantale jaʼ laj yakʼik-o venta ti jpasmuliletike xchiʼuk ti skʼan xichʼik pojele. ¿Kʼuxi? Jaʼ ti xichʼ akʼel tukʼil matanal sventa xtupʼbat smulik ta sbatel osile (Gal. 3:19; Evr. 10:1-10). Jech xtok, li Mantale jaʼ sventa xchabi talel li utsʼ alaliletik ti bu chvul ta lokʼel li Mesiase xchiʼuk jaʼ koltaatik yoʼ xakʼik venta ti buchʼue. Jaʼ yuʼun chal Vivlia ti ‹jaʼ kʼot ta jchabivanej yuʼun j-israeletik li Mantal ti jaʼ beiltasatik batel ta stojolal li Kristoe›. w16.03 4:6, 7