Avril

Li ta slikebal kuxlejale oy toʼox jun anjel ti lek xil sbaik xchiʼuk li Jeovae. Pe ta tsʼakale lik ochuk ta yoʼonton ti akʼo ichʼatuk ta mukʼe, ti jaʼ mu xa x-ichʼat ta mukʼ li Diose. Ta skoj ti te xnopet-o ta sventa taje, tsots la spas smul ta stojolal Jeova (Sant. 1:14, 15). La stoy sba ta stojolal li Jeovae, vaʼun jech kʼataj ta «totil yuʼun li jutbil kʼope» (Juan 8:44). Akʼo mi mu jnaʼtik kʼusi toʼox sbi kʼalal muʼyuk toʼox stoyoj sba li anjel taje, Satanas xa sbi kuʼuntik li avie. Li bankilal yajkontra Jeova xchiʼuk li krixchanoetike jaʼ li Satanase. Li Vivliae chakʼbutik ta ilel bu to kʼalal li spukujale. Jun skʼelobile jaʼ ti Satanas chakʼbe sbie, ti «Jkontrainvanej» skʼan xale. Jech chalbe sbi yuʼun muʼyuk lek chil ti kʼu yelan tspas mantal li Jeovae, jech oxal tstsak ta kʼop. Li Satanase mu skʼan ti jaʼ tspas mantal li Jeovae. w15 15/5 1:1, 2

Kʼalal ta jchantik li Vivliae, chkakʼtik venta kʼusitik skʼan jpastik sventa mas lek xuʼ xijtunutik ta stojolal li Diose. Jech xtok, ta xkakʼtik venta kʼu yelan li stalelaltak ti alakʼik sbae xchiʼuk ti kʼutik yelan yakʼoj ta ilel ti chkʼanvane. Kʼalal ta jchantik skotol li kʼusitik taje mas to ta jkʼantik. Jech xtok, li stuke mas tskʼanutik ek. Ta skoj taje, mas tstsatsub ti kʼu yelan xkil jbatik xchiʼuke. Mi ta jkʼan chijnopaj ta stojolal Jeovae tsots skʼoplal ti oyuk lek srasonal kuʼuntik kʼalal ta jchantik li Vivliae. Li Jesuse laj yal ti sventa xijkuxi sbatel osile, skʼan xkojtikintik lek li Jeovae (Juan 17:3). Melel onoʼox ti ep kʼusitik labalik sba ta jchantik li ta Vivliae. Pe taje maʼuk li kʼusi mas oy ta koʼontontike. Li kʼusi skʼan oyuk ta koʼontontike jaʼ ti lekuk xkojtikintik li Jeovae (Éx. 33:13; Sal. 25:4). Mi jaʼ kamigotik chkiltik ta melel li Jeovae, muʼyuk ta jvul koʼontontik ti muʼyuk chal Vivlia ti kʼu yuʼun tsots stalelal yileluk la spas bakʼintike. w15 15/4 3:6-8

Epal moletik ta yantik lumetike tstabeik lek sbalil kʼalal chchanubtasik li yantike. Achʼtik toe laj yichʼik jakʼbel junantik kʼuxi laj yutik. Akʼo mi jelajtik tajek kʼusi tsnuptan ta stsobobbailik, toj labal sba ti koʼoltik li kʼusitik laj yalike. Taje chakʼ ta ilel ti toj jtunel ta buyuk noʼox lumal xchiʼuk ta buyuk noʼox tsobobbail li tojobtaseletik ta Vivliae. ¿Kʼu yuʼun skʼan baʼyel xchapanbe yoʼonton li buchʼu chchanubtas li mole? Jkʼeltik jun skʼelobil. Kʼalal oy kʼusi tskʼan tstsʼun li buchʼu ch-abtej ta osiltike, baʼyel skʼan xchapan li balumile. Yuʼun jaʼ mas lek ta xchʼi li kʼusi chichʼ tsʼunele. Jaʼ jech ek, kʼalal ta xchanubtas jun ermano li mole baʼyel skʼan xchapanbe li yoʼontone. ¿Kʼu yuʼun? Yuʼun mas anil xuʼ xchan li buchʼu chichʼ chanubtasele. ¿Kʼuxi xuʼ xchapanbe li yoʼontone? Xuʼ xchanbe li j-alkʼop Samuele, yuʼun lek jchanubtasvanej echʼ li ta voʼnee (1 Sam. 9:15-27; 10:1). w15 15/4 1:11, 12

Ep tajek li kʼusitik oy ta balumil liʼe toj chopolik. Melel onoʼox ti mu skotoluk ti chopolike. Pe li Satanase chakʼ persa stunesel kʼusitik oy ta balumil sventa tstij li koʼontontike xchiʼuk ti mu xa jchʼunbetik smantal li Diose. Tskʼan ti jaʼuk jkʼantik li kʼusitik ta sba balumile xchiʼuk ti mu xa masuk jchʼunbetik smantal li Jeovae (1 Juan 2:15, 16). Taje jech la snuptanik junantik yajtsʼaklomtak Kristo ta baʼyel siglo. Jun li taje jaʼ li yajkoltaobba jtakbol Pablo ti Demas sbie. Xi laj yal li Pabloe: «Laj yiktaun komel li Demas ta skoj ti jaʼ skʼanoj skotol li kʼusitik oy ta balumil avie» (2 Tim. 4:10). ¿Kʼusi van ti la skʼan tajek li Demase? Muʼyuk chal li Vivliae. Xuʼ van jaʼ mas la skʼan tajek li takʼine, ti jaʼ muʼyuk li abtelal akʼbat yuʼun Jeovae. Ta skoj taje, li Demase muʼyuk xa la skʼupin spasel li kʼusitik kʼupilik sba li ta yabtel Jeovae. ¿Mi oy van la stabe sbalil? Muʼyuk. Yuʼun muʼyuk onoʼox kʼusitik lek ta x-akʼbat yuʼun li kʼusitik oy ta sba balumile, pe jaʼuk li ta stojolal Jeovae oy ox kʼusitik lek ta sta (Prov. 10:22). w15 15/5 2:10, 11

Kʼalal liʼ toʼox oy ta Balumil li Jesuse, xuʼ laj yaʼibe smelolal kʼu yelan chaʼi sbaik li krixchanoetike, akʼo mi muʼyuk snuptanoj vokoliletik jech kʼuchaʼal li stukike. Jech kʼuchaʼal liʼe, li Jesuse snaʼoj ti chil svokol krixchanoetik ta skoj li jnitvanejetik ta relijione. Li stukike jaʼ noʼox tsloʼlaik li krixchanoetike xchiʼuk tsaʼik yan mantaletik ti maʼuk yakʼoj li Diose. Jaʼ yuʼun xiʼtabilik yuʼun li krixchanoetike (Mat. 23:4; Mar. 7:1-5; Juan 7:13). Li Jesuse muʼyuk ta xiʼ ta stojolal li jnitvanejetik ta relijione xchiʼuk mi jaʼuk chchʼun li kʼusi chalike. Pe xaʼibe smelolal kʼu yelan chaʼi sbaik li krixchanoetike xchiʼuk toj chopol tajek laj yil, laj yal ti xkoʼolaj kʼuchaʼal chijetik ti muʼyuk jchabichij yuʼunike (Mat. 9:36). Li Jesuse la xchanbe Stot kʼalal laj yaʼibe smelolal kʼu yelan chaʼi sbaik li krixchanoetike, jaʼ yuʼun la xkʼuxubinan kʼalal la xchiʼinan ta loʼile. Li Jesuse skʼanoj li krixchanoetike, jaʼ yuʼun la skolta kʼalal laj yil svokolike. Taje jaʼ la xchanbe li Stote. Jun veltae, kʼalal nom batik ta cholmantal li yajtakboltake, solel ep lubik, jaʼ yuʼun la saʼik bu xuʼ xkux yoʼontonik ti bu chʼabal krixchanoetike. Akʼo mi jech, li Jesuse laj yakʼ venta ti ep buchʼutik tskʼan chchanik mas ta stojolale. Laj yil ti tskʼanik koltaele, «jech oxal ep kʼusitik lik yakʼbe xchan» (Mar. 6:30, 31, 34). w15 15/5 4:3, 4

Li ta kapitulo 8 yuʼun Proverbiose, koʼol kʼuchaʼal jun krixchano chalbe skʼoplal li pʼijilale. Taje jaʼ skʼoplal Jesus kʼalal skʼan toʼox xtal ta Balumile. Li ta kapitulo taje chal ti kʼalal la spas skotol kʼusitik li Jeovae, li Jesuse te toʼox ta stsʼel Dios kʼuchaʼal jun «pʼijil j-abtel». Xuʼ jchʼuntik ta melel ti kʼupil tajek laj yil kʼalal jaʼo la spas vinajel xchiʼuk Balumil li Jeovae. Pe ta skotol li kʼusitik spasojan Jeovae, li Jesuse jaʼ mas skʼanoj tajek li krixchanoetike (Prov. 8:22-29; 8:30, 31, TNM). ¿Kʼuxi laj yakʼ ta ilel ti skʼanoj tajek Dios xchiʼuk krixchanoetik li Jesuse? Laj yakʼ ta ilel kʼalal lokʼ ta yoʼonton tal yakʼ xkuxlejal ta Balumil sventa spoj ta lajelal xchiʼuk ta mulil li epal krixchanoetike (Mat. 20:28; Filip. 2:5-8). w15 15/6 2:1, 2

¿Mi oy ta avoʼonton chatojbe ta vokol Jeova li kʼusi spasoj ta atojolale? Mi jeche, toj lek me ti xavakʼbe akuxlejale xchiʼuk ti xavichʼ voʼe. Kʼalal chkakʼ jbatik ta stojolal li Diose, jaʼ skʼan xal ti skʼan jpasbetik skotol kʼakʼal li kʼusi tskʼan yoʼontone. Pe mu me xaxiʼ ta skoj taje. Yuʼun li Jeovae jaʼ tskʼan ti lekuk xbat li akuxlejale xchiʼuk yaloj ti chakʼbe smoton li buchʼutik ta xchʼunbat smantale (Evr. 11:6). Jech oxal muʼyuk me bu tsok akuxlejal mi la avakʼ aba ta stojolal li Jeovae. Kʼuchaʼal laj kaltike, li kʼusi oy ta yoʼonton Jeovae jaʼ ti lekuk xbat li akuxlejale. Yan li Satanase mu kʼusi sventautik-o, yuʼun jaʼ noʼox tsots skʼoplal chaʼi sba stuk. Jaʼ yuʼun mi jaʼ chapasbe li kʼusi tskʼan yoʼontone, avokol noʼox me chasaʼ. ¿Mi yuʼun oy kʼusi lek chakʼbot avaloj ti muʼyuk kʼusi lek oy yuʼune? Muʼyuk kʼusi lek chalbutik mi jaʼuk chakʼ spatobil koʼontontik. w16.03 2:16, 18, 19

Sventa xkamigointik ta melel li Jeovae, skʼan jchʼuntik ta melel ti chaʼibutik kʼalal ta jkʼopontike. Jnoptik ta sventa li Jesuse. Kʼalal te toʼox oy ta vinajele, laj yakʼ venta kʼuxi tstakʼbe s-orasion krixchanoetik li Jeovae. Xchiʼuk kʼalal liʼ toʼox ta Balumile, la skʼopon Dios sventa xalbe li kʼusi tsnope xchiʼuk li kʼusi chaʼi ta yoʼontone. Jun veltae sjunul akʼobal la skʼopon li Diose (Luk. 6:12; 22:40-46). Jech xtok, la stijbe yoʼonton yajtsʼaklomtak ti akʼo spasik orasione. ¿Mi jech van la spas jechuk Jesus ti snaʼojuk ti muʼyuk chchikinta ta melel orasion li Diose? Mu jechuk. Lek xvinaj ti snaʼoj lek ti chchikinta ta melel orasion li Diose. Li voʼotik eke jnaʼojtik lek ti chchikinta j-orasiontik li Jeovae (Sal. 65:2). w15 15/4 3:11, 13

Kʼalal chaʼiik avalab anichʼnab ti bikʼit avakʼoj aba kʼalal chapas orasione, te me chakʼik venta ti skʼan spat yoʼontonik ta stojolal li Jeova eke. Jaʼ jech kʼot ta stojolal jun ermana ta Brasil ti Ana sbie. Xi chale: «Kʼalal tsnuptanik vokolil li jtot jmeʼe —jech kʼuchaʼal ti kʼalal ipaj li jmukʼtot xchiʼuk jyayae— la skʼanbeik Jeova ti akʼo x-akʼbat stsatsalik xchiʼuk spʼijilik sventa lekuk kʼusi xkʼot ta nopel yuʼunike. Akʼo mi solel tsots tajek li svokolike, spatoj yoʼontonik ta stojolal li Jeovae xchiʼuk chalbeik ti akʼo xkoltaatike. Jaʼ la skoltaun sventa jpat koʼonton ta stojolal li Jeovae». Xuʼ me jech xapas ek kʼalal chapas orasion xchiʼuk li avuni kʼoxtake. Kʼanbo vokol Jeova ti akʼo yakʼbot stsatsal avoʼonton yoʼ xacholbe mantal junuk alakʼna o xakʼanbe permiso apatron sventa xabat li ta asambleae. Kʼalal chilik ti apatoj avoʼonton ta stojolal li Jeovae, jaʼ me jech ta spasik ek. w15 15/11 1:7, 8

¿Kʼusi skʼan xapas sventa masuk to xakʼan li Jeovae? Jtos ti kʼusi toj lek xuʼ xapase, jaʼ ti xanopbe skʼoplal ti la spojutik li Jesuse (2 Kor. 5:14, 15; 1 Juan 4:9, 19). Jaʼ yuʼun mi la achʼakbe yorail sventa xanopbe skʼoplal li matanal taje, mas to ch-ayan ta avoʼonton stojel ta vokol. Sventa xkaʼibetik smelolale, jnoptik noʼox avaʼi ti yakal chajikʼav ta yut voʼe, pe oy buchʼu chbat skoltaot lokʼel ta anil. ¿Kʼusi van chapas? ¿Mi ta van xabat ta ora ta ana sventa xajelta aba, ti muʼyuk xa bu chatojbe komel ta vokol li buchʼu la skoltaote? Ta melel mu jechuk chapas, yuʼun chatojbe-o ta vokol ti kʼu sjalil kuxulote. Ta skoj ti skʼanojutik tajek li Jeova xchiʼuk Jesuse, ¡la spojutik lokʼel! Jaʼ yuʼun, ta jtojtik tajek ta vokol ti oy spatobil koʼontontik sventa xijkuxi sbatel osil ta jun paraisoe. w16.03 2:16, 17

Spatoj lek yoʼonton Jeova ti tukʼ chakʼ sba ta Balumil li Jesuse, yuʼun jal xa onoʼox jech laj yakʼ ta ilel ta vinajel. Yuʼun akʼo mi toj echʼ xa noʼox laj yil svokol li Jesuse xchiʼuk ti laj yichʼ milele, tukʼ laj yakʼ-o sba xchiʼuk la spakbe skʼoplal li sderecho sventa tspas mantal li Stote. ¿Kʼuxi tstabeik sbalil skotol krixchanoetik ti cham li Jesuse? Jaʼ ti xuʼ xijkuxiutik sbatel osil ta Paraisoe. Xi la stsʼiba ek li jtakbol Juane: «Laj yichʼ akʼel ta ilel ta jtojolaltik li kʼanelal yuʼun Diose, yuʼun la stak talel ta balumil li jun noʼox Xnichʼon sventa jtatik li kuxlejal ta stojolale. Xi yelan li kʼanelale, mu yuʼunuk voʼotik la jkʼantik li Diose, moʼoj, yuʼun jaʼ la skʼanutik xchiʼuk la stakbutik talel Xnichʼon kʼuchaʼal milbil matanal sventa jmultik yoʼ lek xkil jbatik xchiʼuk li Diose» (1 Juan 4:9, 10). w15 15/11 3:13, 14

Jkotoltik jpasmulilutik xchiʼuk chijchamutik ta skoj li Adane, jaʼ yuʼun muʼyuk buchʼu xuʼ xal ti muʼyuk chtun yuʼun ti laj yakʼ xkuxlejal li Jesuse. Manchuk mi solel tukʼ yakʼoj sba li jun yajtunel Diose ta onoʼox xtun yuʼun ek. Jaʼ yuʼun, skʼan me xkakʼtik venta jkotoltik ti xchʼayoj ep kiltik li Diose. Mi ta jtojtik ta vokol ti skʼanojutik xchiʼuk ti kʼuxutik ta yoʼontone, ¿kʼusi van skʼan jpastik? Mi oy junuk ermano ti chopol kʼusi spasojbutike, skʼan me jchanbetik stalelal li Jeovae, yuʼun li stuke «ta [xchʼay] ti mulil coloʼile» (Sal. 86:5, Ch; Neh. 9:17). Mi ta jtojtik ta vokol ti chakʼutik ta pertone, ta sjunul me koʼontontik chkakʼtik ta perton li yantike. Jech xtok, mi ta jkʼantik ti akʼo skʼanutik xchiʼuk ti akʼo xakʼutik ta perton li Jeovae, skʼan me jkʼantik xchiʼuk xkakʼtik ta perton li kermanotaktike (Mat. 6:14, 15). Kʼalal chkakʼtik pertone, melel onoʼox ti maʼuk chchʼay-o ti kʼux laj kaʼitik li kʼusi lijpasbate, pe jaʼ me tskoltautik sventa xijmuyubajuk noʼox ta mas tsʼakal. w16.01 2:5, 15-17

Li kʼusi albatik yuʼun Jesus li Pedro xchiʼuk li yan jchankʼopetike jaʼ chkoltaatik sventa kak snopbeik skʼoplal ti te xa tspasik mantal ta vinajel xchiʼuk li Jesuse xchiʼuk ti yakal xa tskoltaik krixchanoetik sventa spasik ta tukʼil krixchanoetik ti chʼabal xa smulike. Jlom yajtuneltak Jeovae jaʼ tsatsub xchʼunel yoʼontonik kʼalal la snopbeik skʼoplal kʼu yelan chkʼot ta pasel li kʼusitik yaloj tspas Jeovae. Jech kʼuchaʼal li Abele la snopbe skʼoplal li kʼusi laj yal Dios ti chkʼot ta pasel ta mas jelavele. Ta skoj ti la xchʼun ti chkʼot ta pasele, li Jeovae jun yoʼonton ta stojolal li Abele. Li Abraane la snopbe skʼoplal li skʼakʼalil kʼalal mi kʼot ta pasel ti laj yal Jeova li albil kʼop ta sventa nitilulale (Gén. 3:15, Ch). Koliyal taje la xchʼun mantal akʼo mi la snuptan svokol. Li Moises eke la snopbe skʼoplal li smoton albat ch-akʼbat yuʼun Diose, ta skoj ti jech la spase, mas to la skʼan li Jeovae xchiʼuk tukʼ laj yakʼ sba ta stojolal (Evr. 11:26). Mi la jnopbetik skʼoplal li kʼusitik yaloj tspas Jeovae, mas to me ta jkʼantik ek xchiʼuk mas to chchʼi xchʼunel koʼontontik. w15 15/5 3:17, 18

Skʼan jpastik kʼuchaʼal la spas Jesus mi ta jkʼan chijyijub ta mantale. Maʼuk noʼox skʼan xkojtikintik li kʼusi kʼunik noʼox ta aʼibel smelolal ta Vivliae. Skʼan jchantik batel li bu vokolik xtoke, yuʼun «jaʼ sventa yijil krixchanoetik li tsatsal veʼlile» (Evr. 5:14). Skʼan «xkojtikintik lek» kʼusi chal li Vivliae (Efes. 4:13). Sventa jech chkʼot ta pasel taje skʼan oyuk lek yorail kuʼuntik ta xchanel li Vivliae. Taje jaʼ skʼan xal ti skotol kʼakʼal skʼan jkʼel Jvivliatike, ti xijchanunaj jtuktike xchiʼuk jujunuk xemana xijchanunaj xchiʼuk li kutsʼ kalaltike. Kʼalal ta jkʼel Jvivliatike skʼan xkakʼtik persa jchantik snopel kʼu yelan tsnop li Jeovae xchiʼuk ti jkʼeltik kʼu yelan chaʼi sbae, vaʼun ti kʼusi la jchantik une, jtunestik kʼalal oy kʼusi ta jnop ta jpastike. Mi jech la jpastike, mas to lek ta xkil jbatik xchiʼuk li Jeovae. w15 15/9 1:5, 9, 10

Li Jesuse snaʼoj lek kʼu yelan ch-abtej li Balumile xchiʼuk snaʼoj kʼu yelan xuʼ spajesbe yip li ikʼe, li nabe xchiʼuk li yan kʼusitike. Kʼalal liʼ toʼox oy ta Balumil li Jesuse laj yakʼ ta ilel ti xuʼ spajesbe yip li ikʼe, li nabe xchiʼuk li yan kʼusitike. Nopbo avaʼi skʼoplal liʼe: li voʼe tsmaj li varkoe, jaʼ yuʼun chtal xbat yuʼun ta jujujot. Li ikʼaloʼe tsots tajek chbakʼ yuʼun li kʼusitike xchiʼuk chakʼ ochuk voʼ li ta yut varkoe. Akʼo mi jech, li Jesuse ochem tajek svayel yuʼun toj lubem. Pe li yajchankʼoptake xiʼemik tajek. Jech oxal tal stijik, xi laj yalbeike: «¡Kajval, koltaunkutik, yuʼun chichamkutik xa!» (Mat. 8:25). ¿Kʼusi la spas li Jesuse? Lik xchiʼuk xi tsots laj yalbe li ikʼe xchiʼuk li nabe: «¡Anchan!» (Mar. 4:39). Vaʼun, ¡paj li ikʼaloʼe! Lek xvinaj ti xuʼ spajesbe yip kʼusitik ta Balumil li Jesuse. w15 15/6 1:12-14

Kʼalal chanubtasvan xa ox Jesus ta sventa li padrenuestroe, laj yakʼ ta ilel jun skʼelobil sventa chakʼ jchantik ti skʼan mu jvul tajek koʼontontik ta sventa li kʼusitik chtun kuʼuntik jujun kʼakʼale. Li Jesuse laj yal ti muʼyuk tsvul yoʼontonik ta saʼel kʼusi chtun yuʼunik li nichimetike, yuʼun chabibilik yuʼun li Jeovae. Li voʼotik eke skʼan mu jvul koʼontontik kʼuxi ta jtatik li kʼusi chtun kuʼuntike (Mat. 6:30-34). Skʼan junuk noʼox koʼontontik yuʼun li kʼusitik oy kuʼuntik jujun kʼakʼale. Jech kʼuchaʼal liʼe, xuʼ jkʼanbetik Dios bu xuʼ xijnakiutik, xuʼ jkʼanbe kabteltik sventa jta stojol jveʼeltik xchiʼuk ti lekuk kʼusi xkʼot ta nopel kuʼuntik mi jaʼo lij-ipajutike. Pe oy kʼusi ti mas tsots skʼoplal skʼan jkʼantik li ta orasione. ¿Kʼusi jaʼ taje? Xi laj yal xtok li Jesuse: «Maʼuk noʼox ta pan kuxul li krixchanoe, yuʼun jaʼ kuxul-o skotol li kʼusitik chlokʼ ta ye Jeovae» (Mat. 4:4). w15 15/6 5:4, 7, 8

Jkʼanbetik Jeova ti akʼo skoltautik sventa mu xijmulivaje, mas to kʼalal chkichʼtik akʼel ta prevae. Kʼalal maʼuk toʼox stestigoutik Jeovae xuʼ van oy toʼox kʼusitik lek xkaʼitik spasel ti chopole. Jaʼ yuʼun, bakʼintike xuʼ van ch-ayan to ta koʼontontik spasel. Pe li Jeovae xuʼ skoltautik sventa stsal kuʼuntik. Taje jaʼ jech kʼot ta stojolal li ajvalil Davide. Yuʼun la xchiʼin ta vayel jun ants ti maʼuk yajnile. Pe la sutes yoʼonton xchiʼuk xi laj yalbe li Jeovae: «Mesbiluc tusbiluc ti coʼnton avuʼune». Jech xtok la skʼanbe ti akʼo jchʼunej mantaluk li yoʼontone (Sal. 51:10, 12, Ch). Jaʼ yuʼun, kʼanbo koltael Jeova mi yakal chatsal jtosuk kʼusi chopole. Yuʼun xuʼ skoltaot sventa oyuk ta avoʼonton xachʼunbe li smantaltake, jech xtok sventa xanop xchiʼuk xapas li kʼusitik lekike (Sal. 119:133). w15 15/6 3:5, 6

Li buchʼutik jal xa yochelik ta mantale laj yilik kʼalal oy toʼox jun siervo de congregación li ta jujun tsobobbaile. Li ta jujun Betele oy toʼox jun siervo de sucursal. Li ta Smeʼ nail abtelal ta Estados Unidose oy toʼox jun presidente de la Sociedad Watch Tower. Akʼo mi oy toʼox yajtuneltakik ti tukʼ chtunik li jujun ermanoetik taje, li kʼusi chkʼot ta pasel ta melele jaʼ ti oy noʼox jun buchʼu sbainoj ti chal kʼusi chichʼ pasel li ta jujun tsobobbaile, li ta jujun Betel o li ta Smeʼ nail abtelale. Pe ta sjelavel 1970 oy kʼusitik jel, maʼuk xa noʼox jun buchʼu chal kʼusi chichʼ pasel li ta tsobobbaile, moʼoj, jaʼ xa oy ta sba jtsop moletik. Li avi une, oy xa jtsop moletik li ta jujun tsobobbaile, oy xa jun komite li ta jujun Betele. Jech xtok, li stestigoutik Jeovae beiltasbilutik yuʼun jtsop moletik ti Jtsop Jbeiltasvanej sbi kuʼuntike. Yuʼun li kʼusitik jele jaʼ ta skoj ti mas xa xichʼ aʼibel smelolal li Vivliae. Ti maʼuk xa noʼox jun krixchano ta xal kʼusitik chichʼ pasele, ta stabe sbalil li s-organisasion Diose. Skotol li moletike, ti jaʼ ‹viniketik jech kʼuchaʼal matanal› yakʼoj li Jeovae, xuʼ skolta sbaik ta skoj ti oy lek stalelalike (Efes. 4:8). w15 15/7 1:14, 15

Li avie oy epal krixchanoetik ti chʼakalik ta jyalele, yuʼun xtoyet xa tspas sbaik ta skoj slumalik, stsʼunbalik o stalel xkuxlejalik. Pe li yajtunelutik Jeovae muʼyuk ta jtikʼ jbatik ta paskʼop o ta yan kʼusitik ti xuʼ chchʼak-o li krixchanoetike. ¿Kʼu yuʼun? Yuʼun jkʼanojtik li Jeovae xchiʼuk oy ta koʼontontik ta jchʼunbetik li smantaltake (1 Juan 5:3). Mu ventauk bu nakalutik o ti bu lij-ayanutike, jaʼ noʼox oy ta koʼontontik xchʼunbel li smantaltake. Li kʼusi mas oy tajek ta koʼontontike jaʼ ti tukʼ xkakʼ jbatik ta stojolal li Jeovae xchiʼuk ta stojolal li Ajvalilal yuʼune (Mat. 6:33). Jech oxal xuʼ xkaltik ti ‹muʼyuk te jkʼoplaltik ta balumile› (Juan 17:11, 15, 16; Is. 2:4). Epal krixchanoetike tsnopik ti jaʼ mas tsots skʼoplal li slumalike o li stalel xkuxlejalike. Li yantik xtoke xtoyet xa tspasik ta stojolal li s-ekipoik ti lek chilik kʼu yelan chtajine. Ta skoj taje ep buchʼutik chlik stsal sbaik, tspʼaj sbaik o moʼoj xtoke, xuʼ jaʼ xbat smilik-o li buchʼutik mu jechuk tsnopik kʼuchaʼal stukike. Kʼalal jech chkʼot ta pasel taje, ¿mi xuʼ kuʼun jpajtsan jbatik? w15 15/7 3:1, 2

Kʼalal chichʼ vaʼanel jpʼej salone skʼan lekuk noʼox sak xchiʼuk ti lekuk xchapet kuʼuntik skotole, yuʼun jaʼ jech chkakʼtik ta ilel stalelal li Dios ti chkichʼtik ta mukʼe, yuʼun lek xchapet yuʼun skotol li stuke (1 Kor. 14:33). Sventa chʼulukutik kʼuchaʼal li Jeovae skʼan lekuk sak li jnopbentike, li kʼusitik ta jpastike xchiʼuk ti kʼu yelan chkichʼtik ta mukʼe. Jech xtok, skʼan lekuk noʼox sak li jbekʼtaltike (Apok. 19:8). Mi lek noʼox sak li jsalontike muʼyuk chijkʼexav kʼalal chkikʼtik batel ta tsobajel li krixchanoetike. Jaʼ jech chakʼik venta ti oy ta koʼontontik ta melel chijnakiutik ta jun achʼ balumil ti lek noʼox sake. Jech xtok, chakʼik venta ti chkichʼtik ta mukʼ jun «Chʼul Dios» ti tspas ta jun kʼupil sba paraiso li Balumile (Is. 6:1-3; Apok. 11:18). Pe buuk noʼox nakalutik xchiʼuk kʼusiuk noʼox tsnopik li krixchanoetik ti bu nakalutike, skʼan lekuk sak xchiʼuk lekuk xchapet kuʼuntik li jsalontike. ¿Kʼu yuʼun skʼan jech jpastik? Yuʼun jaʼ te chkichʼtik ta mukʼ li Jeovae (Deut. 23:14). w15 15/7 4:13-15

Kʼalal laj yaʼibeik smelolal yajtsʼaklomtak Kristo ti lik spas mantal ta 1914 li Jesuse, laj yakʼik venta ti kʼusuk xa noʼox ora xuʼ xtal li slajeb kʼusitike. Jaʼ yuʼun, ¿kʼuxi la xchapan sbaik? Jaʼ laj yakʼ ta yoʼontonik li cholmantale. Ta Markos 13 laj yal Jesus ti xuʼ to xjalij li yajval nae, ti xuʼ xkʼot ta jun ora ti mu jechuk snopojik li mosoiletike. Jech oxal, ta skoj ti mu snaʼik kʼusi ora ta xvule skʼan vikʼiluk noʼox satik. Taje chchanubtasutik ti akʼo mi jal xa tajek jmalaojtik li slajeb kʼusitike, maʼuk skʼan xal ti jal to tajek skʼan xvule o ti mu xa bu chkiltike. Skʼan vikʼiluk-o jsatik. Kʼalal te xa ox oyutik li ta Paraisoe, laj xa ox kil ta jsatik ti kʼot ta pasel ta melel skotol li kʼusitik laj yal Jeova ti chkʼot onoʼox ta pasel li ta slajebal kʼakʼale. Jaʼ yuʼun, ¿kʼu van yelan chkaʼi jbatik? Ta jpat mas koʼontontik ta stojolal li Jeovae xchiʼuk mas to ta jchʼuntik ti chkʼot ta pasel yuʼun skotol li yan kʼusitik yaloj tspase (Jos. 23:14). Ta jtojbetik tajek ta vokol Jeova ti ta yorail noʼox laj yichʼ talel li slajeb kʼusitik xchiʼuk ti laj yalbe yajtuneltak ti akʼo vikʼiluk satik xchiʼuk ti chapalikuke (Ech. 1:7; 1 Ped. 4:7). w15 15/8 2:10, 11, 14

Li avie oy epal krixchanoetik ti lek xa chilik li kʼusitik spʼajoj tajek li Jeovae. Li ta Internet, ta television, ta novela, ta sine, ta livroetik xchiʼuk li ta revistaetike lek xa chakʼik ta ilel majbail, mulivajel xchiʼuk espiritismo o yan kʼusitik ti mu la bu chopol ta kʼelele. Li ta junantik lumetike jelem xa li mantaletik yuʼunike, yuʼun xuʼ xa spasik li kʼusitik chopol toʼox chilik li krixchanoetike. Pe jaʼuk li Jeovae muʼyuk sjeloj-o li mantaletik yuʼune, spʼajoj-o li kʼusitik taje (Rom. 1:28-32). Li ta baʼyel sigloe, li krixchanoetike tskʼupinik toʼox ek li majbaile xchiʼuk li mulivajele. Pe li yajtsʼaklomtak Kristoe mu jechuk la spasik taje, yuʼun chchʼunbeik li smantaltak Diose. Ta skoj taje toj yan-o ilatik yuʼun li epal krixchanoetike, jech oxal chopol kʼoptaatik xchiʼuk nutsatik (1 Ped. 4:4). w15 15/8 4:2, 3

Li yajtsʼaklomtak Kristo ti yijik ta mantale chakʼik persa tskolta sbaik sventa oyuk jun oʼontonal li ta tsobobbaile (Efes. 4:1-6, 15). Li kʼusi skʼan jpastike jaʼ ti koʼol xchiʼuk jun noʼox koʼontontik xij-abtej xchiʼuk li kermanotaktike. Skʼan bikʼit xkakʼ jbatik sventa spas kuʼuntik taje. Jnoptik: ¿kʼusi ta jpastik kʼalal oy kʼusi chopol tspasbutik o mi oy junuk spaltail ta jtojolaltik li jun ermanoe? ¿Mi ta van xkiktatik skʼoponel? ¿O mi chkakʼtik persa xchapanel li jkʼoptike? Mi yijutik ta mantale, ta me xkakʼtik persa xchapanel li jkʼoptike, maʼuk ti mas xa ta jtsanbetik skʼakʼale. ¿Kʼuxi xuʼ xavakʼ ta ilel ti chakʼan ti jmojuk oy li tsobobbaile? w15 15/9 1:12, 13

Li Jesuse snaʼoj lek ti te likem talel ta stojolal Dios li Vivliae xchiʼuk ti yichʼoj talel lekil mantaletike. Mi ta jkʼan ta jchanbetik stalelaltak li Jesuse xchiʼuk ti tsotsuk li xchʼunel koʼontontike, jujun kʼakʼal skʼan jkʼel Jvivliatik xchiʼuk skʼan jchantik xtok, pe maʼuk noʼox taje, skʼan jnopbetik skʼoplal li kʼusi ta jchantike. Skʼan jsabetik smelolal xtok li kʼusitik mu jnabetik smelolale. Jech kʼuchaʼal liʼe, ¿mi achʼunoj lek ti kuxulutik xa ta slajebal kʼakʼale? Sventa stsatsub li xchʼunel avoʼontone skʼan me xachanbe skʼoplal li albil kʼopetik ta Vivlia ta sventa li slajebal kʼakʼale. ¿Mi achʼunoj lek ti chkʼot ta pasel li kʼusi yaloj tspas ta jelavel li Jeovae? Sventa stsatsub li xchʼunel avoʼontone chanbo skʼoplal li albil kʼopetik ti kʼotemik xa ta pasele. ¿Mi achʼunoj lek ti jtunel kuʼuntik avi li mantaletik oy ta Vivliae? Sventa stsatsub li xchʼunel avoʼontone chanbo skʼoplal kʼuxi sjeloj xkuxlejalik li ermanoetike, kʼelo kʼuxi koltaatik yuʼun li tojobtaseletik ta Vivliae (1 Tes. 2:13). Nopbo skʼoplal kʼu xa noʼox yelan li kuxlejal ta Paraisoe. Xuʼ xatsʼiba o xalokʼta li kʼusitik chakʼan chapas tee. O moʼoje, xuʼ xatsak ta jun lista li buchʼutik chakʼan chachiʼin ta loʼil ti chchaʼkuxiik tale xchiʼuk ti kʼusi chakʼan chavalbee (Evr. 12:2). Nopo ti voʼot xa jech laj yalbot Dios li kʼusi laj yal tspas ta jelavele. w15 15/9 3:16, 17

¿Kʼuxi xuʼ xkakʼtik ta ilel ti jkʼanojtik li Diose? June, jaʼo kʼalal chkakʼtik matanal takʼin sventa jkolta jbatik li ta abtelal sventa Ajvalilal yuʼun Dios ti chichʼ pasel ta jtsobobbailtike xchiʼuk li ta spʼejel Balumile. Akʼo mi muʼyuk kʼusi mas x-ayan kuʼuntik, jkotoltik xuʼ jkolta jbatik sventa xkakʼtik ta ilel ti jkʼanojtik li Jeovae (2 Kor. 8:12). Taje maʼuk noʼox jech skʼan xkakʼtik ta ilel. Jkʼeltik to batel yan kʼuxitik xuʼ xkakʼtik ta ilel ti jkʼanojtike. Yan ti kʼuxi xuʼ xkakʼbetik ta ilel ti jkʼanojtik li Jeovae, jaʼ ti jpat koʼontontik ta stojolale. ¿Kʼu yuʼun jech chkaltik taje? Jvules ta joltik ti laj yal Jesus ti mu jvul tajek koʼontontik kʼuxi xuʼ jtatik li kʼusitik mas chtun kuʼuntik jujun kʼakʼale. Mi laj kakʼbetik sjunul jkuxlejaltik li Jeovae, chalbutik ta melel ti ta xakʼbutik li kʼusitik chtun kuʼuntike (Mat. 6:31-33). Jpatoj lek koʼontontik ti ta xkʼot ta pasel yuʼun li kʼusi yaloj tspase. Taje melel onoʼox, yuʼun kʼalal oy buchʼu jkʼanojtike, jpatoj lek koʼontontik ta stojolal. Mi mas la jpat koʼontontik ta stojolal li Jeovae, mas me chkakʼbetik ta ilel ti jkʼanojtike (Sal. 143:8). Jaʼ yuʼun xi skʼan jakʼbe jbatike: «Ta skoj ti kʼu yelan ta jtunes kipal xchiʼuk li jujun kʼakʼal ch-echʼe, ¿mi xvinaj ti jkʼanoj tajek li Jeovae? ¿Mi chkakʼ ta ilel jujun kʼakʼal ti jpatoj koʼonton ta stojolal ti chakʼbun li kʼusitik chtun kuʼune?». w15 15/9 5:7, 8

¿Mi oy ajakʼojbe aba junuk velta mi kuxul chakom yuʼun Jeova kʼalal mi tal li mukʼta tsatsal vokolile? Jaʼ yuʼun tsots skʼoplal skʼan xkakʼtik persa sventa tsotsuk li xchʼunel koʼontontike. Li jtakbol Pedroe laj yal ti tsots tajek skʼoplal ti skʼan kuchemuk yuʼun «preva» li xchʼunel koʼontontike (1 Ped. 1:7). Ta jkʼantik jechukutik «kʼuchaʼal li krixchano ti oy xchʼunel yoʼonton sventa kuxuluk-o» xijkom li ta mukʼta tsatsal vokolil ti poʼot xa skʼan xtale (Evr. 10:39). Jaʼ yuʼun, skʼan xkakʼbetik yipal sventa mas to stsatsaj batel li xchʼunel koʼontontike. Mi jech la jpastike, jaʼ jech kolem chijkom yuʼun Jesus kʼalal mi tal slajes li chopol balumile. Jech kʼuchaʼal la skʼanbe Jesus li jun vinike, xuʼ jech xi jkʼanbetik li Jeova eke: «¡Koltaun ti bu skʼan oyuk xchʼunel koʼontone!» (Mar. 9:24). O xuʼ jech jkʼanbetik Dios ek li kʼusi la skʼanbeik Jesus li jtakboletik kʼalal xi laj yalbeike: «Akʼbun mas xchʼunel koʼontonkutik» (Luk. 17:5). w15 15/10 2:1, 2

Li Pabloe jaʼ bat ta yoʼonton spasel «li kʼusi mas tsots skʼoplale». Jaʼ laj yakʼ tajek ta yoʼonton li cholmantale xchiʼuk ep butik xanav, bat ta Siria, ta Asia Menor, ta Masedonia xchiʼuk ta Judea. Xi laj yale: «Ta jchʼay ta jol li kʼusi komem xa ta patile, jaʼ chkakʼ persa ti chi-anilaj batel sventa ta jta li kʼusi oy ta jelavele, jnutsoj batel li matanal ta jkʼan ta [jtae]» (Filip. 1:10; 3:8, 13, 14). Ta skoj ti muʼyuk snup xchiʼile, xokol noʼox sventa xuʼ xtun ta stojolal Dios (1 Kor. 7:32-35). Li avie, jlom yajtuneltak Jeovae yolbaj mu skʼan saʼ snup xchiʼilik sventa mas xtunik ta stojolal li Jeovae (Mat. 19:11, 12). Li buchʼutik muʼyuk snup xchiʼilike jutuk onoʼox kʼusitik sbainojik spasel ta skoj ti muʼyuk to yutsʼ yalalike. Manchuk mi nupunemutik o mi muʼyuk, jkotoltik skʼan jkʼeltik lek ti muʼyukuk kʼusi smakutik sventa xijtun ta stojolal li Jeovae. Xuʼ van persa skʼan jeltik li kʼusitik nopem xkaʼitik spasel sventa mu jecheʼuk noʼox jchʼay jkʼakʼaltik yoʼ xijtun mas ta stojolal Jeovae. w15 15/10 3:15, 16

Li krixchanoetike «mu xuʼ ta spas sba ta mantal [stukik]» (Jer. 10:23). Melel onoʼox maʼ li kʼusi chal Vivliae, yuʼun ti kʼu xa sjalil kuxul talel li krixchanoe, jamal vinajem ti mu jnaʼ jventain jba jtuktike. Jech xtok, muʼyuk jderechotik sventa jpas jba ta mantal jtuktik, yuʼun maʼuk jech la spasutik li Jeovae. ¿Kʼu yuʼun yakʼoj to permiso Jeova ti akʼo to xkuxi li chopol krixchanoetike? Jaʼ sventa jamal xvinaj ti jaʼ noʼox snaʼ lek spas mantal li Ajvalilal yuʼun Diose. Ta me xakʼbe slajeb skotol chopol krixchanoetik ta tsʼakal li Diose. Pe mi oy to buchʼu chchibal kʼoptabe li sderecho sventa tspas mantale, muʼyuk xa me chakʼ jelavuk kʼuk sjalil kʼuchaʼal la spas ta baʼyuke. Sventa xichʼ noʼox lajesel li jtoybaetike, jaʼ tstsak ta venta li kʼusitik kʼot ta pasel ti kʼu sjalil kuxiem talel li krixchanoe. Jaʼ yuʼun chaʼa, tstupʼbe-o skʼoplal li chopol krixchanoetike. w15 15/11 3:5, 6

La skʼupin tajek yalbel skʼoplal Ajvalilal yuʼun Dios li Jesuse. Yuʼun jaʼ li kʼusi mas toj tsots skʼoplal laj yaʼi ta xkuxlejale. Laj yalbe skʼoplal mas ta sien ta velta kʼalal ay ta Balumile. Jaʼ li kʼusi mas laj yalbe skʼoplale (Mat. 12:34). Kʼalal jaʼtik toʼox chaʼkuxi li Jesuse, laj yakʼ sba ta ilel ta stojolal mas ta voʼob sien krixchanoetik ti kʼotik van ta yajchankʼoptake (1 Kor. 15:6). Yikʼaluk van jaʼ li buchʼutik laj yalbe ti akʼo xbat xcholbeik mantal «krixchanoetik ta skotol jteklumetike». Pe li xcholbel mantal skotol jteklumetike mu kʼunuk ta pasel. Li Jesuse laj yal ti jal tajek chichʼe. Laj yal ti chichʼ to cholel «kʼalal poʼot xa xlaj skotol li kʼusitik oy ta balumile». Kʼalal ta jcholtik mantale, yakal ta jkolta jbatik yoʼ xkʼot ta pasel li kʼusi laj yal Jesuse (Mat. 28:19, 20). Jaʼ jech, li Diose jaʼ chakʼ «skotol kʼusitik lek» sventa jpasbetik li yabtele. w15 15/11 5:1-3

Li ta evreo kʼope oy chanib sletrail li sbi Diose. Li biil taje ep ta velta te tsʼibabil li ta voʼneal tsʼibetik ta evreoe, jech kʼuchaʼal li ta Balbal Vunetik ta Nab Muertoe. Te ta jtatik xtok ta jlom skopiailtak Septuaginta ti laj van yichʼ pasel ta sjabilal 200 kʼalal skʼan toʼox xtal Kristoe kʼalal to ta sjabilal 100 ta jkʼakʼaliltike. Ep krixchanoetike toj labal sba chilik ti buyuk xa noʼox xvinaj ta voʼneal tsʼibetik li sbi Diose. Jamal ta aʼiel chaʼa ti skʼan teuk tsʼibabil ta Vivlia li sbi Diose. Li ta 1952, la sjelubtasik yan velta li American Standard Version sbie, chʼabal xa te oy yuʼunik li sbi Diose. Pe mi la jkʼeltik ti kʼu toʼox yelan yiktaojik ta 1901 li Vivlia taje, te toʼox oy li sbi Diose. ¿Kʼu yuʼun la stupʼik li ta Vivlia la slokʼesik ta 1952? Yuʼun solel mu stakʼ chaʼiik ti tstunesbeik sbi Dios li buchʼutik la sjelubtasike. Jaʼ xa jech lik sjelubtasik yan Vivliaetik ta inglés xchiʼuk ta yan kʼopetik xtok. w15 15/12 2:3-5