«Һаятимиз вә хизмитимиз. Иш дәптири» үчүн мәлумат мәнбәлири
© 2025 Watch Tower Bible and Tract Society of Pennsylvania
ИЮЛЬ 7—13
ХУДА СӨЗИДИКИ ҒӘЗНӘ
Аилә бәхитлик болуши үчүн Худаниң даналиғи керәк
13 Қанчә узун арилишип жүрүшиңлар керәк? Алдирақсанлиқ билән қарар қилиш һемишәм яхши нәтиҗә бәрмәйду (Пәнд н. 21:5). Бир-бириңларни яхширақ тонуш үчүн йетәрлик вақит керәк. Шуңа бир мәзгил муһәббәтлишип жүрүшкә тоғра келиду. Йәнә бир тәрәптин сәвәпсиз вақит бәк узунға созулуп кәтмәслиги лазим. Муқәддәс китап мундақ дәйду: «Узақ күтүш жүрәкни ағритиду» (Пәнд н. 13:12). Арилишип жүргән вақтиңлар бәк узунға созулуп кәтсә, җинсий һәвәслириңларни тизгинләш қийин болуши мүмкин (Кор. 1-х. 7:9). Диққитиңизни қанчә вақит муһәббәтлишип жүрүшниң орниға, өзүңлардин мундақ сорап көрүңлар: «Қарар чиқиришим үчүн у тоғрилиқ йәнә немиләрни билишим керәк?»
3 Яратқучимиз Йәһва әр-аялниң нека турмушида бәхитлик болушини халайду. Бирақ улар намукәммәл болғачқа, уларниң арисида чүшәнмәсликләр пәйда болуши мүмкин. Әлчи Паул дегәндәк, әр-аял некада бәзи қийинчилиқларға дуч келиду (Кор. 1-х. 7:28). Бәзи әр-аяллар дайим такалишиду вә улар бир-биригә лайиқ әмәс дәп хуласигә келиши мүмкин. Әгәр улар мошу дунияниң көзқаришини қобул қилса, дәрһал аҗришип кетишимиз керәк дәп ойлайду. Әгәр мән аҗришип кәтсәм, бәхитлик болимән дегәнләр пәқәт өз-өзинила ойлайду.
4 «Сениң билән турмуш қурғуним чоң хаталиқ» дегән көзқараштин нери болушимиз керәк. Муқәддәс китапниң асасида аҗришишниң бирла сәвәви — җинсий әхлақсизлиқ екәнлигини билимиз (Мәт. 5:32). Шуңа Паул ейтқандәк, некада қийинчилиқларға дуч кәлгәндә, тәкәббурлуқ қилип: «Бу нека еһтияҗимни қандуриватамду? Мән сөйгү-муһәббәткә еришиватимәнму? Әгәр башқа адәм билән болған болсам, бәхитлигирәк болаттиму?»— дәп ойлишимиз мүмкин. Әгәр шундақ ойлисақ, өмүрлүк җүптүмизни әмәс, өзүмизнила ойлаймиз. Мошу дунияниң даналиғи, һәтта неканиң бузулушиға аз қалғандиму, «Өз жүригиңни тиңша, өз бәхтиң үчүн халиғиниңни қил»,— дәп үгитиду. Амма Муқәддәс китапта: «Пәқәт өз мәнпийәтлириңларға ғәмхорлуқ қилмай, башқиларниңму мәнпийәтлирини ойлаңлар»,— дәп йезилған (Флп. 2:4). Йәһва Худа сизниң аҗришишиңизни әмәс, некайиңизни сақлап қелишиңизни халайду (Мәт. 19:6). Йәһва Худа биринчи новәттә өзүңизни әмәс, Уни ойлишиңизни халайду.
5 Әр-аял бир-бирини яхши көрүп, һөрмәтлиши керәк (Әфәсликләргә 5:33ни оқуң). Муқәддәс китап елиштин көрә бериштин бәхитлигирәк дәп үгитиду (Әлч. 20:35). Әр-аялниң бир-бирини яхши көрүшигә вә һөрмәтлишигә қандақ пәзиләт ярдәм бериду? Кәмтәрлик. Кәмтәр әр-аял өз пайдисини әмәс, башқиларниң пайдисини издәйду (Кор. 1-х. 10:24).
w06 9/15 28-б., 13-абз.
13 Әр-аялниң арисидики нека риштиси аҗизлишип, хәтәр астида болуп қалса, немә қилиш керәк? Бу вәзийәтни яхшилаш үчүн көп күч чиқириш керәк. Бәлким, уларниң бир-биригә көңлини ағритидиған сөзләрни ейтиш адити болуп қалған (Пәнд-нәсиһәтләр 12:18). Буниң ақивети аилиниң вәйран болушиға елип келиши мүмкин. Муқәддәс китапта мундақ дәп йезилған: «Чөл-тақирда ялғуз яшаш териккәк һәм котулдақ аял билән яшаштин артуқ» (Пәнд-нәсиһәтләр 21:19). Шуңа, аял өзидин мундақ сориши лазим: «Йолдишимға мениң билән тил тепишиш қийинму?» Муқәддәс китапта әр кишиләргә мундақ дәйду: «Әрләр, өз аяллириңларни сөйүшни тохтатмаңлар вә улар билән қопал болмаңлар» (Колосилиқларға 3:19). Йолдиши өзидин мундақ дәп сориши муһим: «Аялимға соғ мунасивәт қилғиним уни башқа әрләрдин тәсәлли издәшкә дәвәт қиламду?» Әлвәттә, җинсий әхлақсизлиқни ақлашқа болмайду. Бирақ шундақ вәзийәт йүз бериши мүмкин болғанлиқтин, очуқ-ашкарә сөзлишиш интайин муһим.
Роһий гөһәрләрни издәйли
16 Худаниң барлиқ хизмәтчилири Уни үлгә қилип, рәһим-шәпқәт көрситишкә тиришиду. Немә үчүн? Буниң бир сәвәви — Йәһва Худа башқиларға рәһим-шәпқәт көрсәтмигән кишиниң дуалириға қулақ салмайду (Пәнд-нәсиһәтләр 21:13ни оқуң). Шуңа еһтиятчан болуп, таш жүрәк болуп кетиштин сақлинимиз. Бир қериндашниң бәзи бир дәрт-пәрядлиригә қулақ йопурувелишниң орниға, униң налә-пәрядлириға қулақ селишқа һәрдайим тәйяр туришимиз керәк. Шуниңға охшаш, биз Муқәддәс китаптики мону мәслиһәткә қулақ селишқа тиришишимиз керәк: «Рәһимлик көрсәтмәйватқан, рәһимсиз һөкүм қилиниду» (Яқуп 2:13). Әгәр биз кәмтәр болуп, өзүмизниң рәһим-шәпқәткә муһтаҗ екәнлигимизни әстә тутсақ, башқиларғиму рәһим-шәпқәт көрситимиз. Биз, болупму, җамаәттин чиқирилған киши җамаәткә қайта кәлгәндә, униңға рәһим-шәпқәт көрситишни халаймиз.
14—20 ИЮЛЬ
ХУДА СӨЗИДИКИ ҒӘЗНӘ
Пәрзәнтлиримизни тәрбийиләшкә ярдәм беридиған дана принциплар
7 Әгәр силәр той қилип, балилиқ болушни яхши көрсәңлар, өз-өзүңлардин сораңлар: «Биз Йүсүп билән Мәрийәмгә охшаш йеңидин туғулған боваққа ғәмхорлуқ қилалайдиған кичик пеил, роһий тәрәптин йетилгән адәмләрму?» (Зәб. 127:3, 4) Әгәр сиз аллиқачан балилиқ болсиңиз өзүңиздин мундақ сораң: «Мән балилиримға әмгәк сөйәр болушни үгитиватимәнму?» (Вәз 3:12, 13). Балилиримни Шәйтанниң дуниясида дуч келидиған роһий вә җисманий хейим-хәтәрликләрдин қоғдаш үчүн қолумдин кәлгәнниң һәммисини қиливатимәнму? (Пәнд н. 22:3). Сиз балилириңизни бешиға чүшкән барлиқ қийинчилиқлардин қоғдалмайсиз. Бу мүмкин әмәс. Бирақ сиз меһир-муһәббәт билән уларни Муқәддәс китапниң нәсиһәт сөзлирини қандақ әмәлий ишлитишни үгитиш арқилиқ, уларни аста-аста турмуштики түрлүк қийинчилиқлириға тәйярлалайсиз (Пәнд-нәсиһәтләр 2:1—6ни оқуң). Мәсилән, аилиңиздикиләрниң бири Йәһва Худаға хизмәт қилишни тохтатқанда, балилириңизға Муқәддәс китаптин Худаға садиқ болуп қелишниң қанчилик муһим екәнлигини көрситишиңиз зөрүр (Зәб. 31:23). Әгәр йеқинлиримиз өлүп кәтсә, Муқәддәс китаптин балилириңизға қайғу-һәсрәтләрдин йәңгиллитип, көңлигә тәсәлли беридиған айәтләрни көрситиң (Кор. 2-х. 1:3, 4; Тим. 2-х. 3:16).
17 Балиларни бовақ чеғидин тәрбийиләң. Ата-ана балилириға тәлим-тәрбийәни қанчә балдур башлиса, шунчә яхши (Пәнд н. 22:6). Әлчи Паул билән сәпәр қилған Тимотийниң мисалини көрүп чиқайли. Тимотийниң аниси Әвникә билән момиси Лоидә уни «бовақ чеғидин» тәрбийилигән (Тим. 2-х. 1:5; 3:15).
18 Жан-Клод вә Пис дегән Кот-д’Ивуарлиқ йәнә бир җүп әр-аялниң алтә балисиниң һәммиси Йәһваға хизмәт қилиду. Уларниң өз пәрзәнтлиригә Йәһва Худани яхши көрүшни үгитишигә немә ярдәм бәргән? Улар Әвникә билән Лоидәдин үлгә алған. Жан-Клод вә Пис мундақ дегән: «Биз Худа Сөзини балилиримизға бовақ чеғидин, йәни улар туғулуп узун өтмәй сиңдүрүшни башлидуқ» (Қ. шәр. 6:6, 7).
19 Худа Сөзини балиларға «сиңдүрүп үгитиш» немини билдүриду? Бу дегинимиз, балиларға бирнәрсини қайта-қайта ейтиш арқилиқ есигә селиш вә тәлим беришни билдүриду. Буниң үчүн ата-анилар кичик балилири билән дайим вақит өткүзүши керәк. Бәзидә ата-анилар балилириға бир нәрсини қайта-қайта ейтиштин зерикиши мүмкин. Лекин ата-анилар буни балилириға Худа Сөзини чүшинип, уни әмәлийәттә қоллинишқа ярдәм беришниң пурсити дәп қариши керәк.
w06 4/1 9-б., 4-абз.
Бәзи балилар җаһил яки ата-аниға беқинмайдиған болиду (Яритилиш 8:21). Шундақ вәзийәттә ата-аниға немә қилиш керәк? Муқәддәс китапта мундақ дейилгән: «Яш жигит қәлбигә наданлиқ қаттиқ чаплашти, лекин пәқәт тәлим тайиғи уни жирақлаштуралайду» (Пәнд-нәсиһәтләр 22:15). Бәзи ата-анилар мундақ җазани еғир вә бизниң күнлиримизгә налайиқ дәп һесаплайду. Муқәддәс китаптиму вәһшийлик вә көңүлгә тегидиған сөзләр һәм һәрикәтләр әйиплиниду. Айәттики «тәлим тайиғи» бәзи вақитта удул мәнада ейтилсиму, лекин бу сөз йәнә ата-аниниң бир тәрәптин җиддий һөкүм қилиши, башқа тәрәптин балилириниң утуқлуқ болушиға ғәмхорлуқ қилип, һәмдә меһир-муһәббәт көрситишни билдүриду (Ибранийларға 12:7—11).
Роһий гөһәрләрни издәйли
11 Мошу тәмсилидики чакарларға охшаш, бизму Йәһваға хизмәт қилишта өзүмизгә тапшурулған вәзипини көңүл қоюп орунлаш арқилиқ хошаллиғимиз үстигә хошаллиқ қошалаймиз. Вәз хизмәтниң вә җамаәтниң түрлүк иш-паалийәтлиригә қизғин қатнишиң (Әлч. 18:5; Ибр. 10:24, 25). Җамаәт жиғилишлириға алдин-ала тәйярлиқ қилип бериң. Шунда башқиларға илһам беридиған җавапларни берәләйсиз. Һәптә арилиғидики жиғилишта сизгә оқуғучилар тапшуруғи берилсә, әстаидил тәйярлиқ қилиң. Әгәр җамаәттә бири сиздин ярдәм сориса, сөзиңиздә туруп вақитқа әмәл қилиң. Сизгә тапшурулған вәзипини муһим әмәс, униңға көп вақит сәрип қилишимниң һаҗити йоқ дәп ойлимаң. Өз хизмитиңиздә маһир болушқа тиришиң (Пәнд н. 22:29). Роһий иш-паалийәтләр вә тапшурулған вәзипиңизни көңүл қоюп қилсиңиз, шу ишлириңизда техиму маһир болуп, хошаллиғиңиз үстигә хошаллиқ қошалайсиз (Гал. 6:4). Шундақла, башқилар сиз еришишни үмүт қилған имтиязға еришкәндә, сизниң улар билән биргә хошал болушиңиз асанирақ болиду (Рим. 12:15; Гал. 5:26).
21—27 ИЮЛЬ
ХУДА СӨЗИДИКИ ҒӘЗНӘ
Спиртлиқ ичимликләргә тегишлик дана нәсиһәтләр
Йәһва Худа һарақ-шарапни көп ичидиғанларни вә һарақкәшләрни әйипләйду (Галатилиқларға 5:21). Униң Сөзидә: «Болма һарақкәшләрниң арисида»,— дейилгән (Пәнд-нәсиһәтләр 23:20). Шуңа мәйли башқилар билән яки ялғуз олтирип ичәйли, һәргизму көп ичмәслигимиз, йәни әқил-һошимизни йоқитип, сөз-һәрикәтлиримизни тизгинләлмигидәк, тән-саламәтлигимизгә зиян йәткүзидиған дәриҗидә ичмәслигимиз керәк. Әгәр қанчилик ичишни контрол қилалмисақ, әң яхшиси ичишни пүтүнләй ташлишимиз лазим.
Худаниң хизмәтчилири болса, көйүмчан Яратқучимизниң йол-йоруғи билән яшайду. Мәсилән, Худа бизни көп ичишниң ақивети тоғрилиқ агаһландуриду. Буни Пәнд-нәсиһәтләр 23:29—35 айәтләрдин оқалаймиз. Бу айәтләрдә көп ичкән кишиниң һәрикәтлири тәсвирлиниду вә бу қандақ қийинчилиқларни туғдуридиғанлиғи йезилған. Европида хизмәт қилидиған Дэниел исимлиқ ақсақал һәқиқәтни билиштин бурунқи һаяти тоғрилиқ ейтип бәргән. У мундақ дәйду: «Мән мәс болғанда, яман ишларни қилип, буниң аччиқ ақиветини көрдүм. Һазир шуларни ойлисам, техичә қийинилимән».
Роһий гөһәрләрни издәйли
16 Бариға қанаәт қилиң. Муқәддәс китап мундақ нәсиһәт қилиду: «Йеқин арида йоқ болидиған нәрсигә немә үчүн көзлириңни қаритисән? Чүнки униң қанатлири чиқип, у бүркүттәк асман-пәләккә учуп кетиду» (Пәнд н. 23:4, 5). Кишиләр наһайити асанла пул вә мал-мүлүклиридин айрилип қелиши мүмкин. Мәйли қандақ болмисун, бүгүнки күндә байларму, намратларму пул тепишқа берилип кәтти. Шуңа улар дайим өз нам-абройиға, кишилик мунасивитигә, һәтта саламәтлигигә зиян йәткүзидиған иш-һәрикәтләрни қиливатиду (Пәнд н. 28:20; Тим. 1-х. 6:9, 10). Амма дана болсақ, пул вә мал-дунияға қарита тоғра көзқарашни сақлаймиз. Бундақ көзқараш бизни ачкөзлүктин қоғдайду вә қолумизда бариға қанаәт қилип, хошал-хорам яшишимизға ярдәм бериду (Вәз 7:12).
28-ИЮЛЬ—3-АВГУСТ
ХУДА СӨЗИДИКИ ҒӘЗНӘ
Бешиңизға еғир күн чүшкәндә күчлүк болуң
15 Худа Сөзини тәтқиқ қилиң вә үгәнгәнлириңиз һәққидә чоңқур ойлиниң. Худди чоңқур йилтиз тартқан дәрәқ мустәһкәм туралиғанға охшаш, Худаниң Сөзигә болған ишәнчимиз чоңқур йилтиз тартса, бизму мәһкәм туралаймиз. Дәрәқниң өсүшигә әгишип, униң йилтизи барғансири чоңқурлайду вә әтрапиға кеңийиду. Биз тәтқиқ қилип үгәнгәндә вә чоңқур ойланғанда, етиқадимиз күчийип, Худаниң йоллириниң әң яхши екәнлигигә техиму ишинимиз (Кол. 2:6, 7). Йәһва өтмүштики хизмәтчилиригә қандақ йол-йоруқларни, мәслиһәтләрни бәргәнлиги вә уларни қоғдиғанлиғи һәққидә ойлиниң. Мәсилән, Әзәкиял тәсвирий көрүнүштә бир пәриштә еһтиятчанлиқ билән ибадәтханини өлчәватқанлиғини көргән. У әҗайип көрүнүш Әзәкиялниң иман-етиқадини күчәйткән вә Йәһваниң пак ибадәт өлчәм-қаидилиригә қандақ бойсунуш һәққидә әмәлий көрсәтмиләрни бериду (Әзәк. 40:1—4; 43:10—12). Худаниң Сөзини чоңқурирақ тәтқиқ қилип, тәпәккүр қилишқа вақит чиқарсақ, бизму пайдисини көрүмиз.
9 Немә қилишимиз керәк? Һис-туйғулириңиз билән күришиватқан болсиңиз, давамлиқ роһий ишлар билән мәшғул болуш үчүн күч селиң. Бәлким, бурунқидәк көпирәк хизмәт қилалмай келиватқан болушиңиз мүмкин, бирақ шуни есиңиздә тутуңки: Йәһва сизниң қолуңиздин кәлмәйдиған ишни қилишиңизни күтмәйду (Луқа 21:1—4ни селиштуруң). Униңдин башқа, шәхсий үгиниш өткүзүп, чоңқур ойлинишқа вақит чиқириң. Йәһва Худа Өз тәшкилати арқилиқ тәңпуңлуқни сақлишиңизға ярдәм беридиған һәр түрлүк мақалиләр вә видеоларни тәминләп бәргән. «JW Library» программиси, «Күзитиш мунари материаллар көрсәткүчи» вә «Йәһва гувачилириниң йол көрсәткүчидин» өзүңизгә керәк мәлуматни тапалайсиз. Жуқурида тилға елинған Моника қериндишимиз азаплиқ һис-туйғулири боран-чапқунға охшаш күчийишкә башлиғанда, дәрһал мошу издиниш қураллиридин пайдиланған. Мәсилән, дәсләп «аччиқлиниш», «асийлиқ» яки «вападарлиқ» дегәнләрни йезип, шу тоғрилиқ издәнгән. Кейин шу мәлуматларни җени арам тапқичә давамлиқ оқуған. У мундақ дәйду: «Оқушни башлиғанда, көңлүм қаттиқ беарам болуп, қаттиқ әнсиридим. Бирақ көңүл қоюп оқуғандин кейин, Йәһваниң мени бағриға басқанлиғимни һис қилдим. Йәһва мениң һәммә һис-туйғулиримни чүшинипла қалмай, маңа ярдәм қолини сунуп кәлгәнлигини көрүп йәттим». Йәһва Худа өзүңизни тинч-хатирҗәм һис қилғичә, тәңпуңлуқни сақлишиңизға ярдәм бериду (Зәб. 119:143, 144).
Оқурмәнләрниң соаллири
Пәнд-нәсиһәтләр 24:16-айәттә: «һәққаний йәттә қетим жиқилсиму, бәрибир қопиду»,— дәп йезилған. Бу айәт қайта-қайта гуна қилип, Худадин кәчүрүм сориған кишигә қаритилғанму?
Әмәлийәттә, бу айәттә шундақ ой-пикир йоқ. Бу айәт қайта-қайта қийинчилиқларға дуч келидиған яки чүшкүнлүккә чүшидиған вә кейин әслигә келидиған адәмни көрситиду.
Шуңа жуқурида ейтилғандәк, Пәнд-нәсиһәтләр 24:16-айәттики «жиқилиш» дегән сөз гуна қилишни билдүрмәйду. Әксинчә, бу айәт бешиға қайта-қайта чүшкән қийинчилиқларни көрситиду. Бүгүнки рәзил дунияда һәққаний адәмләрниң саламәтлиги начарлишип кетиши яки башқа қийинчилиқларға дуч келиши мүмкин. У һәтта һөкүмәтләрниң зиянкәшлигигә дуч келиши еһтимал. Бирақ у Худаниң униң үчүн Қорам таш екәнлигигә вә қийинчилиқларни йеңишкә ярдәм беридиғанлиғиға ишинәләйду. Йәһва Худа Өз хизмәтчилирини қоллап-қувәтлигәнлигини қанчә қетим өз көзиңиз билән көргәнлигиңизни ойлап беқиң. Немә үчүн? «Йәһва жиқиливатқан инсанларни қоллап-қувәтләп, көңли сунған сәмимийләрни чоқум тикләйду», дегән сөзләргә ишинимиз (Зәб. 41:1—3; 145:14—19).
Роһий гөһәрләрни издәйли
13 Әгәр сиз аилә қурушни ойлап жүргән болсиңиз, өзүңиздин «Мән һәқиқәтән буниңға тәйярму?» дәп сориғиниңиз тоғра болиду. Бу соалниң җавави сизниң меһир-муһәббәт, җинсий мунасивәт, достлуқ яки пәрзәнт тәрбийиләш арзу-истәклиригә асасланмайду. Чүнки болғуси әр яки аял аиләвий һаятниң мәсъулийәтлири һәққидә тәпсилий ойлиниши керәк.
14 Өзигә яр издәватқан жигит мону принцип һәққидә җиддий ойлинип көрүши керәк: «Авал тирикчилигиң йолини сиртта һазирлап, етиз-ериқлириңни тәйярла, андин өйүңни салғин» (Пәнд-нәсиһәтләр 24:27). Бу сөзләр немини билдүриду? Қедимий заманда өйләнмәкчи болған әр киши өзидин: «Мән келәчәк аялим билән балилиримға ғәмхорлуқ қилип, уларни бақалаймәнму?» дәп сориши лазим еди. Буниң үчүн у алди билән етиз-ериқ ишлирини тәртипкә селиши, йәни әмгәк қилиши, керәк еди. Мошу принципни бүгүнки күндиму қоллинишқа болиду. Өйләнмәкчи болған жигит җавапкарлиқни елишқа тәйяр болуши зөрүр. Әгәр саламәтлиги ишқа ярамлиқ болса, у ишләп, тирикчилик қилиши лазим. Худаниң Сөзидә аилисиниң җисманий, һиссий вә роһий еһтияҗлирини ойлимиған әр киши етиқатчи әмәстинму яман екәнлиги тәкитләнгән (Тимотийға 1-хәт 5:8ни оқуң).
15 Турмушқа чиқишни қарар қилған қизму җиддий вәзипиләрни елишқа келишидиғанлиғини көрситиду. Муқәддәс китапта ериға ярдәмчи болуш вә аилисигә ғәмхорлуқ қилиш үчүн қабилийәтлири һәм хисләтлири бар аял мәдһийилиниду (Пәнд-нәсиһәтләр 31:10—31). Җавапкарлиқни бойниға елишқа тәйяр болмай, турмуш қурушқа алдираватқан қиз-жигитләр наһайити шәхсийәтчи, сәвәви улар болғуси җорисиниң мәнпәитини ойлимайду. Лекин әң муһими, турмуш қурмақчи болғанлар роһий җәһәттин тәйяр болуши керәк.
4—10 АВГУСТ
ХУДА СӨЗИДИКИ ҒӘЗНӘ
Тилимизни қоллинишқа мунасивәтлик Муқәддәс китаптики принциплар
w15 12/15 19-б., 6, 7-абз.
6 Пәнд-нәсиһәтләр 25:11дә дурус вақитта сөзләшниң қанчилик муһим екәнлиги мошундақ тәсвирлиниду: «Күмүч қачилардики алтун алмилар — бу өз вақтида ейтилған тоғра сөздур». Алтун алминиң өзи чирайлиқ көриниду. Амма күмүч қача алтун алминиң чирайиға чирай қошиду. Дәл шуниңға охшаш, әгәр биз өз вақит-саатида сөзлисәк, бизниң гепимиз техиму чирайлиқ вә тәсирлик болиду.
7 Бизниң ейтмақчи болған сөзлиримизгә адәм муһтаҗ болуши мүмкин, лекин өз вақтида ейтилмиса, сөзлиримизниң пайдиси болмайду (Пәнд-нәсиһәтләр 15:23ни оқуң). Мәсилән, 2011-жили, шималий Япониядә йүз бәргән йәр тәврәш вә цунами шәһәрләрни пүтүнләй йоқ қиливәтти. 15000дин очуқ адәм вапат болди. Йәһва гувачилириму зәрдап чәксиму, улар қайғуруватқан кишиләргә Муқәддәс китаптин тәсәлли беридиған хәвәрни ейтиш үчүн һәрбир пурсәтни қолдин бәрмигән. Бирақ шу йәрдә яшайдиған кишиләрниң көпинчиси будда диниға қәтъий ишәнгән вә Муқәддәс китап тоғрилиқ азирақла яки тамамән билмигән. Бурадәрләр буни әстә тутуп, апәттин җапа тартиватқан кишиләргә тирилиш һәққидә ейтишниң вақти әмәс екәнлигини чүшәнгән. Униң орниға улар адәмләргә тәсәлли берип, Муқәддәс китаптин бегуна адәмләр немишкә қийниливатқанлиғини чүшәндүрүшкә тиришқан.
w15 12/15 21-б., 15, 16-абз.
15 Ейтқан сөзлиримиз қанчилик муһим болса, қандақ сөзлигәнлигимизму шунчилик муһим. Әйса өзи чоң болған Насирә шәһиридики синагогида сөзлигәндә, адәмләр «униң еғизидин чиққан йеқимлиқ сөзләргә һәйран қелишти» (Луқа 4:22). Мулайим вә юмшақ сөзләр һәсәлдәкйеқимлиқ болуп, буниңдин сөзлиримиз әһмийәтсиз болуп қалмайду. Әслидә силиқ сөзлиримиз адәмгә көпирәк тәсир қилиду (Пәнд н. 25:15). Әгәр биз башқиларниң көңлигә қарап, меһрибан болуп, силиқ-сипайә сөзлисәк, сөзлиримиз йеқимлиқ вә тетимлиқ болуп, Әйсаға тәқлит қилимиз. Әйса адәмләрниң униң тәлимлирини аңлаш үчүн қанчә күч чиқириватқанлиғини көргәндә, уларға ич ағритип, «көп нәрсиләргә үгитишкә башлиди» (Марк 6:34). Һәтта башқилар уни мәсхирә қилғандиму, у һақарәт билән җавап қайтурмиған (Пет. 1-х. 2:23).
16 Бәзидә яхши тонуйдиған адәмләр билән мулайим вә юмшақ сөзлишиш тәс болуши мүмкин. Чүнки өзүмизни интайин әркин һис қилимиз. Мәсилән, аилә әзалиримиз яки җамаәттики достумиз билән параңлашқанда шундақ болуши мүмкин. Әйса шагиртлири билән йеқин дост болған, бирақ һечқачан улар билән қопал сөзлимигән. Һәтта униң шагиртлири бир-биридин ким улуқ екәнлигигә мунасивәтлик таллаш-тартиш қилғанда, Әйса уларни меһрибанлиқ билән түзитип, кичик бала тоғрилиқ мисал кәлтүргән (Марк 9:33—37). Ақсақаллар бирсини түзитиш керәк болғанда, Әйсадин үлгә елип, мулайимлиқ билән сөзләйду (Гал. 6:1).
Башқиларни илһамландуруш пәқәт ақсақалларниң вәзиписи әмәс. Әлчи Паул һәммә мәсиһийләрни «пайдилиқ сөз» ейтишқа дәвәт қилған. Бу сөзләр башқиларни «керәк вақитта» мустәһкәмләтти (Әфәсликләргә 4:29). Башқиларға ярдәм бериш үчүн, һәрбиримиз уларниң немигә муһтаҗ екәнлигини байқишимиз керәк. Паул ибраний мәсиһийләргә: «Һалсизланған қоллириңларни вә аҗизлашқан тизлириңларни чиңдаңлар, токулиған аяқниң чиқип кәтмәслиги, әксичә сақийип кетиши үчүн, аяқлириңларға түз йолларни ясаңлар»,— дәп ейтти (Ибранийларға 12:12, 13). Һәммимиз, һәтта яшларму, бир-биримизни илһамландуруп, мустәһкәмләләймиз.
Роһий гөһәрләрни издәйли
Буниңдин башқа вақтимизни оғрилайдиған йәнә башқа ишлар бар. Мәсилән, һәммимиз арам елиш яки көңүл ечишқа муһтаҗ. Амма диққәт қилмисақ, бундақ иш-паалийәтләр Йәһваға йеқинлишишқа сәрип қилидиған вақтимизни оғрилиши мүмкин. Гәрчә биз таллиған көңүл ечиш түрлири, яхши болсиму, уларға сәрип қилидиған вақтимизға чәк қоюшимиз керәк. Чүнки Йәһва билән болған мунасивитимиз шундақ көңүл ечиш паалийәтлиридинму муһимирақ (Пәнд н. 25:27; Тим. 1-х. 4:8).
11—17 АВГУСТ
ХУДА СӨЗИДИКИ ҒӘЗНӘ
«Надан» кишидин жирақ туруң
it «Ямғур»
Пәсилләр. Вәдә қилинған зәминдә асасий икки пәсил бар. Бу яз вә қиш пәсиллири. Бу пәсилләр қурғақчилиқ вә ямғур-йешин мәзгиллиригә мас келиду (Зб 32:4; К.к 2:11). Тәхминән апрель ейиниң оттурисидин октябрь ейиниң оттурисиғичә ямғур-йешин аз яғиду. Бу ома вақтиға тоғра келиду. Пәнд-нәсиһәт 26:1дә ома вақтида ямғур қамлашмайдиғанлиғи ейтилған (С1я 12:17—19ни селиштуруң). Қиш пәслидә ямғур-йешин көп болсиму, бирақ һава-райи очуқ күнлириму болиду. Шундақ күнләр соғ болғанлиқтин, адәм ямғур астида қалса бәк музлап кетиду (Әзр 10:9, 13).
w87 10/1 19-б., 12-абз.
12 Пәнд-нәсиһәт 26:3тә мундақ дейилгән: «Ат үчүн қамча, ишәк үчүн тизгин, әқилсиз дүмбисигә чивиқ лазим». Айәттә ейтилғандәк, бәзибир адәмләрни «қамчилаш» керәк. Өтмүштә Йәһва Худа Өз хәлқигә яман ишлириниң аччиқ ақиветини көрүшкә йол қойған. «Улар Худаниң сөзлиригә беқинмай, Илаһниң ирадисини рәт қилди. У уларниң жүригини бәхитсизликләр билән мулайимлаштурди. Улар путлишип жиқилғанда, ярдәмгә келидиған һечким тепилмиди. Дәрдидә улар Йәһвани чақирди вә У уларниң зәнҗирлирини чақти» (Зб 107:11—13). Бәзибир адәмләр шунчилик наданки, һәтта уларға «қамчиму» өтмәйду. Муқәддәс китапта мундақ дейилгән: «Гәдини қаттиқ адәм өзигә җазани тартиду, У туюқсиз гумран болиду һәм һечқандақ давалиниш униңда ярдәм болмайду» (Пәнд-нәсиһәтләр 29:1).
it «Ақсақ»
Тәмсилләрдә ишлитилиши. Сулайман падиша мундақ дегән: «Айиғи чолақ [өз-өзини нака қилған] көп дәрт тартқандәк, әқилсизгә ишларни қилишни буйруш» (Пәнд-нәсиһәтләр 26:6). Наданға иш тапшурған киши өз-өзигә зиян йәткүзиду. Чүнки надан адәм башлиған ишини пүтәрмәй, кишиниң планлирини вәйран қилиду.
Роһий гөһәрләрни издәйли
Әлвәттә, биз әң яхши чүшәндүргән һаләттиму, һәммила кишини униңға қайил қилалмаймиз. Мулайим вә пәм-парасәтлик болсақ, буниң нәтиҗиси башқичә болуши мүмкин (Колосилиқларға 4:6ни оқуң). Етиқадимизни чүшәндүрүшни доп ойнаш билән селиштурушқа болиду. Биз допни аста атсақ яки қаттиқ атсақму болиду. Допни аста атсақ, башқа киши уни тутувалалайду вә оюн давамлишиду. Худди шуниңдәк, әгәр биз пәм-парасәт вә мулайимлиқ билән җавап қайтурсақ, кишиләр бизни тиңшашқа тәйяр болиду вә давамлиқ сөһбәтлишишни халиши мүмкин. Әлвәттә, әгәр бири талаш-тартиш қилмақчи яки иман-етиқадимизни мәсхирә қилмақчи болса, ундақта, сөһбәтни давамлаштурушимизниң һаҗити йоқ (Пәнд н. 26:4). Лекин, ундақ вәзийәтләр аз болиду, адәмләр көпинчә тиңшашқа тәйяр болуши мүмкин.
18—24 АВГУСТ
ХУДА СӨЗИДИКИ ҒӘЗНӘ
Һәқиқий достниң қәдри
12 Кәмтәр киши мәслиһәт үчүн миннәтдар. Мәсилән, җамаәт учришишиға кәлдиңиз дәйли. Сиз бирнәччә қериндаш билән сөзлишип болғандин кейин, уларниң бири сизни чәткә тартип: «Чишиңизға бирнәрсә чаплишип қапту»,— дәп аста ейтип қойди. Сиз хиҗаләт болушиңиз мүмкин, бирақ шу қериндашқа миннәтдар болмамсиз? Әмәлийәттә, «буни маңа бирси балдурирақ ейтип қойған болса, хойму яхши болатти» дәп ойлайсиз. Шуниңға охшаш, бирси бизгә келип, нәсиһәт бәрсә, кәмтәрликни көрситишимиз вә шу кишигә миннәтдар болушимиз керәк. Биз мәслиһәт бәргән кишини дүшминимиз әмәс, достумиз дәп билишимиз лазим (Пәнд-нәсиһәтләр 27:5, 6ни оқуң; Гал. 4:16).
it «Йениңдики киши»
Пәнд-нәсиһәтләрдә достқа ишинип тайинишқа вә керәк вақтида униңға мураҗиәт қилишқа мәслиһәт бериду: «Өз достуңни вә атаңниң достини қалдурма вә бешиңға күн чүшкәндә, кериндишиңни издимә. Жирақтики җигәриңдин йеқиндики хошнаң әла» (П.н 27:10). Бу айәттә аилимизниң садиқ достини қәдирләп, керәк болғанда униңдин ярдәм соришимиз керәклиги йезилған. Чүнки жирақта яшайдиған йеқин туққинимиздин йенимиздики достимиз тез ярдәмгә келәләйду.
7 Йәһоашниң яман қараридин алалайдиған бир савақ — биз Йәһва Худани сөйидиған вә Уни хурсән қилишни халайдиған кишиләр билән дост болушимиз керәк, чүнки улар бизгә яхши тәсир қилиду. Пәқәт тәңдашлириңиз биләнла дост болмаң. Унтумаңки, Йәһоаш дости Йәһоядаһтин хелила кичик еди. Достларни таллиған чағда өзүңиздин мундақ сорап көрүң: «Достлирим Йәһваға болған иман-етиқадимни күчәйтишкә ярдәм берәмду? Улар мени Худаниң өлчәмлири бойичә яшашқа үндәмду? Улар Муқәддәс китаптики һәқиқәтләр тоғрилиқ сөзлишәмду? Худаниң әхлақий өлчәмлирини һөрмәтләйдиғанлиғини көрситәмду? Улар пәқәт қулиғимға хуш яқидиған нәрсиләрни дәмду яки керәк болғанда маңа нәсиһәт берәмду?» (Пәнд н. 27:5, 6, 17) Әслидә достуңиз Йәһвани сөймисә, ундақ достларниң һечқандақ кериги йоқ. Достлириңиз Йәһвани сөйсә, улардин айрилмаң. Чүнки шундақ достлар сизгә яхши тәсир қилалайду (Пәнд н. 13:20).
Роһий гөһәрләрни издәйли
11 Шуниң билән кичик пеиллиғимиз адәмләр бизни махтиғанда яки хошамәт қилғанда синилиши еһтимал. Башқилар Әстәрни көп махтиған. У Персиядики әң чирайлиқ аялларниң бири еди. Бир жил давамида уни вә униң риқабәтчилири болған башқа яш қизларни алаһидә хуш пурақ майлар билән әтирләрни сүркәп, падишаниң алдиға кириш үчүн тәйярлиған. Падиша Әстәрни таллап, уни мәликә қилди. Лекин униңға көрситилгән диққәт Әстәрни өзгәртмиди. У мәнмәнчи болуп кәтмәстин, кичик пеиллиқ, меһрибанлиқ вә башқиларға һөрмәтни сақлап қалди (Әстәр 2:9, 12, 15, 17).
12 Биз кичик пеил болсақ, өзүмизни вә башқиларни һөрмәтләйдиғанлиғимизни көрситидиған усулда кийинимиз вә һәрикәт қилимиз. Махтиниш вә башқиларниң диққитини җәлип қилишниң орниға, биз «еғир-бесиқ һәм мулайим роһқа» егә болушқа тиришимиз (Петрусниң 1-хети 3:3, 4ни оқуң; Йәрәмия 9:23, 24). Өзүмиз һәққидә қандақ ойда болғанлиғимиз бүгүнму-әтиму сөзүмиз яки ишимиздин көриниду. Мәсилән, қандақту бир имтиязға еришкәнликтин, башқилар билмәйдиған мәлуматни билгәнликтин яки җавапкарлиғи бар бурадәрләр билән йеқин мунасивәттә болғанлиқтин, өзүмизни алаһидә қилип көрситишни халишимиз мүмкин. Йә болмиса, бирәр муһим ишни қилишқа башқилар ярдәм бәргән болсиму, уни өзүмиз қилғандәк көрситишимиз мүмкин. Лекин Әйса һәққидә ойлап бақайли. У адәмләргә өзиниң қанчилик дана болғанлиғини көрситәләтти. Лекин у ундақ қилмай, әксичә пат-пат Худа Сөзигә көңүл бөлгән. У адәмләрниң уни мәдһийилишини халимиған. У пүткүл шан-шәрәпни Йәһваға кәлтүргән (Йоһан 8:28).
25—31 АВГУСТ
ХУДА СӨЗИДИКИ ҒӘЗНӘ
Зулум адәм билән һәққаний адәмниң арисида қандақ пәриқ бар?
w93 5/15 26-б., 2-абз.
«Һәққаний болса, яш ширдәк хатирҗәм» (Пәнд-нәсиһәтләр 28:1) У Йәһва Худаға пүтүнләй тайиниду вә хәвп-хәтәргә қаримай Худаға садақәтмәнлик билән хизмәт қилип, Пәрвәрдигарға ишинидиғанлиғини көрситиду.
БИЗ ахирқи күнләрниң ахириға аз қалған вақитта яшаватимиз. Зулум адәмләр барғансири көпийиватиду. Улар «от-чөптәк» бесип кетиватиду (Зәбур 92:7). Шуңа көп адәмләрниң Худа тоғра дәп һесаплайдиғанни рәт қилидиғанлиғиға һәйран қалмаймиз. Паул мәсиһийләргә: «Яманлиққа гөдәк болуңлар, чүшиниш қабилийитидә болса, чоңлардәк йетилиңлар»,— дәп ейтқан (Коринтлиқларға 1-хәт 14:20). Биз буни қандақ қилалаймиз?
Җавави бу мақалиниң асасий айитидә йезилған: «Рәзилләр адаләтни чүшәнмәс, бирақ Пәрвәрдигарни [Йәһвани] издәнгүчиләр һәммә ишни чүшинәр» (Пәнд-нәсиһәтләр 28:5). Демәк, улар Йәһваға йеқиш үчүн һаҗәт болғанниң һәммисини чүшинәләйду. Шундақла Пәнд-нәсиһәтләр 2:6—9да Йәһва тоғра һәрикәт қилидиғанларға даналиқни беридиғанлиғи ейтилған. Шу чағда улар «неминиң һәққаний, адил, дурус екәнлигини, йәнә һәрбир әвзәл йолниң немә екәнлигини чүшиниду».
it «Нуқсансизлиқ»
Адәм қандақларчә нуқсансиз болуп қалалайду? Бу адәмниң өз күч-ғәйрити билән әмәс, Йәһва Худаға болған мәһкәм ишәнч вә Худаниң қутқузуш күчиниң арқисида мүмкин болиду (Зб 25:21). Худа нуқсансиз адәмләр үчүн «қалқан» вә «һимайә» болушни вәдә қилған (П.н 2:6—8; 10:29; Зб 41:12). Улар Йәһва Худани дайим рази қилишни халиғанлиқтин, һаяти турақлиқ болуп, мәхсәтлиригә йетиш үчүн ишәнч билән илгири маңиду (Зб 26:1—3; П.н 11:5; 28:18). Аюп пәйғәмбәр ейтқандәк, гәрчә зулум кишиләр һөкүмранлиқ қилғанда, һәққаний адәм азап тартип, зулумларға охшаш вапат болсиму, Йәһва нуқсансиз адәмләрниң турмушини яхши билидиғанлиғиға ишәндүриду. Шундақла, уларниң мираслири сақлинип қелип, келәчәктә тинч-хатирҗәмликтә вә баяшат яшайдиғанлиғиға вәдә қилиду (Ап 9:20—22; Зб 37:18, 19, 37; 84:11; П.н 28:10). Аюпниң мисалидин көргинимиздәк, адәмниң мал-дунияси әмәс, нуқсансизлиғи уни лайәқәтлик вә һөрмәткә сазавәр қилиду (П.н 19:1; 28:6). Шундақ адәмниң балилири интайин бәхитлик болиду, чүнки уларни яхши нам-абройға вә һөрмәткә лайиқ ата-аниниң балилири дәп тонуйду (П.н 20:7).
Роһий гөһәрләрни издәйли
15 Һә, чүнки биз өз әқлимизгә тайинишқа башлишимиз мүмкин. Өз һис-туйғулиримиз вә идеялиримизниң бизниң ой-пикир қилишимизни тизгинлишигә йол қоюшимиз мүмкин. Бу бәк хәтәрлик! Муқәддәс китап өз әқлимизгә таянмаслиғимиз керәклиги һәққидә ениқ агаһландуриду (Пәнд-нәсиһәтләр 3:5, 6; 28:26).