«Һаятимиз вә хизмитимиз. Иш дәптири» үчүн мәлумат мәнбәлири
© 2025 Watch Tower Bible and Tract Society of Pennsylvania
1—7 СЕНТЯБРЬ
ХУДА СӨЗИДИКИ ҒӘЗНӘ
Худаға яқмайдиған тәлиматлар билән урп-адәтләрни рәт қилиң
Хошаллиғимиз ашқансири, биз буниң көп пайдисини көримиз. Мәсилән, қийинчилиқларға қаримастин, давамлиқ хошаллиқ билән хизмәт қилғанда, Йәһваниң мақуллишиға техиму көп еришимиз (Қанун шәрһи 16:15; Салоникилиқларға 1-хәт 5:16—18). Шундақла биз һәқиқий хошаллиққа егә болғанлиқтин, мал-мүлүк жиғиш һаяттики әң муһим нәрсә дәп һесаплимаймиз. Әксичә, Худа Падишалиғи үчүн техиму көп қурбанлиқ қилишқа тиришимиз (Мәтта 13:44). Йәһваға көпирәк беришниң яхши нәтиҗисини көргәндә, қин-қинимизға патмай, өз-өзүмизгә рази болуп, башқиларниму хурсән қилимиз (Әлчиләр 20:35; Филипиликләргә 1:3—5).
13 Әгәр қандақту бир урп-адәтниң яки мәрасимниң Худаға яқидиған-яқмайдиғанлиғини билмисиңизчу? Шу вақитта Йәһваға дуа қилип, даналиқ сораң (Яқуп 1:5ни оқуң). Бизниң әдәбиятлиримиздин мәлумат издәп көрүң. Керәк болса, ақсақаллар билән мәслиһәтлишип көрүң. Улар қатнишишқа болиду яки болмайду дәп кесип ейтмайду, лекин сизгә ярдәм беридиған принципларни көрситиду. Бу қәдәмләрни қилсақ, әқлимизни йетилдүримиз. Әқлимиз яхши билән яманни пәриқ қилишқа ярдәм бериду (Ибр. 5:14).
12 Худаға яқмайдиған урп-адәтләр вә қаидә-йосунлар. Аилә әзалиримиз, хизмәтдашлиримиз вә синипдашлиримиз мәйрәмләргә қатнишишимиз үчүн бизгә бесим қилиши мүмкин. Йәһваға яқмайдиған урп-адәтләр билән мәйрәмләргә қатнишиш бесимиға қарши турушимизға немә ярдәм берәләйду? Бу мәйрәмләр Йәһваға немә үчүн яқмайдиғанлиғини һәрдайим әстә тутушимиз керәк. Биз бу мәйрәмләрниң келип чиқишини есимизгә селиш үчүн, әдәбиятлиримизни тәтқиқ қилсақ болиду. Бу мәйрәмләргә немә сәвәптин қатнашмайдиғанлиғимиз һәққидә мулаһизә қилсақ, «Худаға яқидиған» йол билән меңиватқанлиғимизға көз йәткүзәләймиз (Әфәсликләргә 5:10). Йәһваға вә Униң Сөзигә ишәнсәк, адәмләрниң сөзидин қорқмаймиз (Пәнд-нәсиһәтләр 29:25).
11 Чин жүрәктин махтаң. Башқиларни махташ үчүн мүмкинчиликни издәң. Махташ сөзләр адәмләрни мустәһкәмләйду (Әфәсликләргә 4:29). Бирақ биз сөзлиримизниң сәмимий болғанлиғини халаймиз вә башқиларға хошамәт қилғумиз кәлмәйду. Биз көңүлдә йоқ нәрсини ейтмаслиғимиз керәк, болмиса керәклик мәслиһәтни бериштин тартинмаслиғимиз керәк (Пәнд-нәсиһәтләр 29:5). Мәсилән, әгәр адәмни махтап, лекин кәйнидин уни яманлисақ, бу иккиүзлүк болатти. Әлчи Паул қериндашларни чин жүрәктин яхши көргән. Коринттики қериндашларға хәт язғанда, у уларниң яхши тәрәплирини махтиған (Коринтлиқларға 1-хәт 11:2). Амма уларға мәслиһәт керәк болғанда, сәвәвини ениқ вә меһрибанлиқ билән чүшәндүрди (Коринтлиқларға 1-хәт 11:20—22).
8—14 СЕНТЯБРЬ
ХУДА СӨЗИДИКИ ҒӘЗНӘ | ПӘНД-НӘСИҺӘТЛӘР 30
«Маңа намратчилиқ һәм байлиқни бәрмигинә»
10 Әлвәттә, һәммимизгә пул һаҗәт. У бизгә қандақту бир мәнада һимайә бериду (Вәз 7:12). Амма биздә пәқәт асасий еһтияҗлиримизғила йетәрлик пулумиз болса, бәхитлик болалаймизму? Һә, болалаймиз! (Вәз 5:12ни оқуң.) Худаниң бир хизмәтчиси: «Намратчилиқ һәм байлиқни бәрмигинә»,— дәп язған. Бу кишиниң немә сәвәптин гадай болушни халимиғанлиғи чүшинишлик. У оғрилиқ қилишни халимиған, чүнки мундақ қилиш Худаниң намиға дағ кәлтүрәтти. Амма немишкә у байлиқниму соримиған? У буни мундақ чүшәндүрди: «Чүнки мән тоюп, Сәндин баш тартип: “Кимкән у Йәһва?”— демәй» (Пәнд-нәсиһәтләр 30:8, 9). Бәлким, сиз Худаға әмәс, байлиққа тайинидиған бираз адәмләрни билидиғансиз.
11 Пулхумар инсан Худаниң мақуллишиға еришәлмәйду. Әйса мундақ дегән: «Һечким икки ғоҗайинниң қули болалмайду, чүнки бирсини өч көрүп, йәнә бирсини яхши көриду яки биригә садиқ болуп, йәнә бирсини көзигә илмайду. Силәр Худаниң һәм байлиқниң қули болалмайсиләр». У йәнә: «Өзүңларға йәрдә ғәзнә топлашни тохтитиңлар, чүнки уларни күйә вә дат йәйду һәм оғрилар кирип оғрилап кетиду. Әксичә, ғәзнини асманда топлаңлар, чүнки у йәрдә күйә вә дат йоқ һәм оғриларму кирип оғрилалмайду»,— дәп ейтқан (Мәтта 6:19, 20, 24).
12 Йәһваниң көп хизмәтчиси аддий турмуш кәчүрүшкә тиришиду. Уларниң байқишичә, бу Йәһваға хизмәт қилишқа көпирәк вақит чиқиришиға ярдәм берип, уларни техиму бәхитлик қилиду. Қошма Штатларда яшайдиған Джек аяли билән пешқәдәм болуп хизмәт қилиш үчүн чоң өйи вә тиҗаритини сетивәтти. У мундақ дәйду: «Шәһәр сиртидики чирайлиқ өйүмиз билән йеримиздин ваз кечиш қийин болди». Лекин жиллар давамида Джек ишидики қийинчилиқлар кесиридин өйгә терикип келәтти. У мундақ дәйду: «Пешқәдәм болуп хизмәт қилған аялим болса, һәрқачан шундақ бәхитлик еди. У: “Мениң башлиғим әң яхши”,— дәп ейтатти. Әнди мәнму пешқәдәм болғанда, иккилимиз бир Шәхскә, Йәһваға, хизмәт қилимиз».
15 Бүгүнки таңда көп адәмләр әң йеңи телефонлар билән компьютерлар, ахирқи модидики кийимләргә егә болушқа тәшна. Улар дунияхорлуққа берилип, мал-мүлүкни һәммидин артуқ көриду. Сиз үчүн болса, әң муһими немә? Өзүңиздин мундақ сорап көрүң: «Учришишларға тәйярлинишқа қариғанда йеңи чиқирилған машинилар яки кийим үлгилири һәққидә ойлинишқа көп вақтимни чиқармайватимәнму? Күндилик турмушқа берилип кәткиним шуки, дуа қилиш вә Муқәддәс китапни оқушқа аз вақит бөлмәйватимәнму?» Пәхәс болмисақ, дуния-мүлүккә болған муһәббитимиз Мәсиһкә болған меһир-муһәббитимиздин ешип кетиши мүмкин. Биз Әйсаниң «һәрхил ачкөзлүктин сақлиниңлар» дегән сөзлири һәққидә мулаһизә қилишимиз зөрүр (Луқа 12:15). Немишкә?
16 Әйсаниң ейтишичә, «һечким икки ғоҗайинниң қули болалмайду». Кейин у йәнә: «Силәр Худаниң һәм байлиқниң қули болалмайсиләр»,— дегән. Дуния-мүлүкниң кәйнигә кирсәк, Йәһваға пүтүнләй берилип хизмәт қилиш мүмкин әмәс. Әйса буниң сәвәвини чүшәндүрүп: «бирсини өч көрүп, йәнә бирсини яхши көриду, яки биригә садиқ болуп, йәнә бирсини көзигә илмайду»,— дәп ейтқан (Мәтта 6:24). Биз намукәммәл болғанлиқтин, «тенимизниң хаһишлириға», шу җүмлидин дунияхорлуққа, қарши туришимиз керәк (Әфәсликләргә 2:3).
17 Пәқәт өз хаһиши билән раһәт-паравәнлик һаятни ойлайдиғанларға дуния-мүлүккә тәмкин көзқараш көрситиш асан әмәс (Коринтлиқларға 1-хәт 2:14ни оқуң). Уларниң әқли туманлашқанлиқтин, тоғра билән натоғрини аҗритиш қийин болуш мүмкин (Ибранийларға 5:11—14). Шундақ мал-мүлүккә дегән хумарлиғи барғансири күчийип, һечқачан толуқ қандуруп болмайдиған истәкни риваҗландурған (Вәз 5:10). Шундақ пикир қилиш тәрзи билән күришишкә ярдәм беридиған бир нәрсә бар. Худа Сөзини дайим оқусақ, у бизни дунияхорлуққа қарши турушқа мустәһкәмләйду (Петрусниң 1-хети 2:2). Йәһваниң даналиғи һәққидә мулаһизә қилғини Әйсаға езиқишларға қарши турушқа күч бәргән (Мәтта 4:8—10). Бүгүнки күндә бизму дунияхорлуққа қарши күрәшкимиз кәлсә, Йәһваниң дана мәслиһәтлирини һаятимизда қоллинишимиз керәк. Шундақ қилсақ, мал-мүлүктин көрә, Әйсани көпирәк яхши көридиғанлиғимизни көрситимиз.
w11 6/1 10-б., 4-абз.
Бир нәрсини сетивелиштин бурун пул жиғиң. Бу бурунқи адәмләрниң адити болуп көрүнсиму, ихтисадий қийинчилиқлардин сақлайдиған әң утуқлуқ йол. Чүнки биз кредит вә униң билән бағлиқ қийинчилиқлардин нери туримиз. Мәсилән, әгәр бир нәрсини кредитқа сетивалсиңиз, уни өсүми билән қайтурушқа тоғра келиду. Шуңа, сетивалған нәрсиңиз бәк қиммәткә чүшиду. Муқәддәс китапта чүмүлә «дана» дәп тәсвирлиниду, чүнки у «ненини язда тәйярлайду, ома вақта амбириға озуғини жиғиду» (Пәнд-нәсиһәтләр 6:6—8; 30:24, 25).
18 Өзүмизниң пулға болған көзқаришимизни яхширақ тәкшүрүп көрүш бәк муһим. Өз-өзүңиздин сорап көрүң: «Мән дайим пул яки бир нәрсиләрни сетивелиш тоғрилиқ ойлинимәнму? Мән қәриз алсам, қәриз бәргән киши һазирчә бу пулға муһтаҗ әмәс дәп, қәриз қайтурушни арқиға созимәнму? Пулум болғанлиғидин өзүмни муһим киши дәп қараймәнму яки маңа сехийлиқ көрситиш қийинму? Бәзи етиқатдашларниң пули көп болса, улар пулни Йәһвадин көпирәк яхши көриду дәп ойлинимәнму? Мән бай етиқатдашларни дост тутуп, кәмбәғәлләр билән арилашмай жүримәнму?» Өз-өзүмиздин бундақ соалларни сораш муһим, чүнки биз зор шан-шәрәпкә ериштуқ, йәни Йәһва өз чедирида бизни меһман болушқа тәклип қилди. Шуңлашқа, пулпәрәсликни жүригимиздин түп йилтизи билән қомуруп ташлишимиз керәк. Шу чағда давамлиқ Йәһва Худаниң чедирида меһман болуп қалимиз вә Яратқучимиз бизни һәргизму ташлап кәтмәйду (Ибранийларға 13:5ни оқуң).
Роһий гөһәрләрни издәйли
19 Йәһва һайванатларни туғма қабилийәт билән яратқан, адәмләрни болса, өзлири қандақ һаят кәчүрүшни қарар қилалиши үчүн, таллаш әркинлиги билән яратқан (Пәнд-нәсиһәтләр 30:24). Йәһвани хурсән қилидиған иш-һәрикәтләрни қилимизму яки қилмаймизму, буниңға өзүмиз қарар қилимиз. Биз робот әмәс. Шуңа ким болушни, қандақ адәмләр билән арилишишни вә қандақ һаят кәчүрүшни өзүмиз таллаймиз. Йәһва һаяттин һузурлинишимизни халайду.
20 Йәһва бизниң Уни сөйүшүмизни халайду (Мәтта 22:37, 38). Мәсилән, ата балисиниң «Мән сизни яхши көрүмән», дегән сөзини мәҗбурий һалда әмәс, чин жүрәктин ейтқинини аңлиғанда интайин хошал болиду. Шуниңға охшаш, Йәһва бизгә таллаш әркинлигини бәргәнликтин, Уму бизниң чин жүрәктин Униңға хизмәт қилишимизни халайду. Шәйтан, Адәм ата вә Һава ана Худаниң һөкүмранлиғини рәт қилишни таллиған. Сизчу таллаш әркинлигиңизни қандақ ишләтмәкчисиз?
15—21 СЕНТЯБРЬ
ХУДА СӨЗИДИКИ ҒӘЗНӘ | ПӘНД-НӘСИҺӘТЛӘР 31
Аниниң балиға бәргән мәслиһәтлиридин қандақ савақ алалаймиз?
w11 2/1 19-б., 7, 8-абз.
Өсмүргә җинсий мунасивәткә болған тоғра көзқарашни йетилдүрүшкә ярдәм бериң. Әлвәттә бу тоғрилиқ агаһландуруш муһим (Коринтлиқларға 1-хәт 6:18; Яқуп 1:14, 15). Шундақ болсиму, Муқәддәс китапта җинсий мунасивәт Шәйтанниң тузиғи дәп әмәс, лекин Худаниң соғиси дәп тәсвирлиниду (Пәнд-нәсиһәтләр 5:18, 19; Күйләрниң күйи 1:2). Әгәр ата-анилар җинсий мунасивәтниң пәқәт хәвп-хәтәрлиги тоғрилиқ ейтивәрсә, балида Муқәддәс китапқа асасланмиған көзқараш пәйда болуши мүмкин. Франциядә яшайдиған Коррина исимлиқ яш аял мундақ дәйду: «Ата-анам әхлақсиз җинсий мунасивәт тоғрилиқ көп ейтқанлиқтин, мениңдә җинсий мунасивәткә болған өчмәнлик пәйда болди».
Балиңизниң җинсий мунасивәткә тоғра көзқарашта екәнлигигә көз йәткүзүң. Мексикада яшайдиған Надия мундақ дәйду: «Мән һәрқачан балилиримға җинсий мунасивәтниң Худадин кәлгән әҗайип соға һәм тәбиий нәрсә екәнлигини йәткүзүшкә тиришип, бу пәқәтла некалиқ болғанда мүмкин екәнлигини ейтаттим. Җинсий мунасивәт бәхит әкелиши яки азапқа дучар қилиши мүмкин. Һәммиси бу соғини қандақ һаләттә пайдилинишиға бағлиқ».
ijwhf 4-мақалә, 11—13 абз.
Сөһбәтни өзүңиз башлаң. Улуқ Британиядики Марк мундақ дәйду: «Ичимлик тоғрилиқ сөз қилғанда, балилар уюлиши мүмкин. Мән өзүмниң 8 яшлиқ баламдин: “Ичимлик ичиш яхшиму яки яманму?” дәп соридим. Сөһбитимиз әркин һалда болғанлиқтин, у очуқ-йоруқ гәпләшти».
Улар ейтқанлириңизни яхши чүшиниши үчүн бу мавзуға бирнәччә қетим сөзләшсәңлар болиду. Балиниң яш өзгичилигигә қарап, спиртлиқ ичимликләрдин башқа, йол бехәтәрлиги, җинсий мунасивәт тоғрилиқ муһим мавзуларни муһакимә қилиңлар.
Үлгә көрситиң. Балилар көргән, аңлиған нәрсиләрниң һәммисини өзигә сиңдүривалиду. Тәтқиқатчиларниң ейтиши бойичә, балилар ата-аниларни көпирәк дорайду. Әгәр сиз шарапни стрессни йеңиш үчүн дәп истимал қилсиңиз, балиңиз спиртлиқ ичимликләр ғәм-тәшвишләрдин қутулушниң йоли дәп қариши мүмкин. Шуниң үчүн спиртлиқ ичимликләрни истимал қилишқа җавапкарлиқ билән қараң.
g17.06 9-б., 5-абз.
Башқилар тоғрилиқ ойлашни үгитиң. Балиңизға «елиштин көрә бериш бәхитлигирәк» екәнлигини чүшинишкә ярдәм бериң (Әлчиләр 20:35). Буни қандақ қилишқа болиду? Балилириңиз билән ярдәмгә муһтаҗ болған адәмләрниң тизимини биллә түзүңлар. Мүмкин бәзиләргә дукандин озуқ-түлүк сетивелиш, бирсини бир йәргә йәткүзүш керәк яки өйдә җөндәш ишлирини қилишқа ярдәм бериш керәкту. Бирсигә ярдәм қилмақчи болсиңиз, балиңизни өзүңиз билән биллә елип бериң. Улар башқиларға ғәмхорлуқ қилиш сизгә қанчилик хошаллиқ әкелидиғанлиғини көрсун. Балини үгитишниң әң яхши усули — сөзүңиз вә иш-һәрикитиңиз билән үлгә көрситиш (Муқәддәс китаптики принцип: Луқа 6:38).
Роһий гөһәрләрни издәйли
7 Яхши сөһбәтдаш болушни үгиниң. Бу барлиқ Мәсиһ әгәшкүчилири үчүн интайин муһим бир маһарәт. Бу тоғрисида Яқуп бизгә яхши мәслиһәтләрни бәргән: «Һәрқандақ адәм аңлашқа тез, сөзләшкә алдиримайдиған, болуши керәк» (Яқуп 1:19). Башқиларниң сөзлирини диққәт билән тиңшисиңиз, уларға һисдашлиқ яки «һәмдәртлик» көрситәләйсиз (Пет. 1-х. 3:8). Әгәр бириниң немә дәп ейтқанлиғини яки униң қандақ һис-туйғуда болуватқанлиғини чүшәнмисиңиз, мувапиқ соалларни сораң. Андин бираз ойлинивалғандин кейин сөзләң (Пәнд н. 15:28). Өз-өзүңиздин сорап көрүң: «Мән ейтмақчи болған сөзләр кишигә илһам-мәдәт берәмду? Һөрмәт вә меһрибанлиқ көрситәмду?» Башқилар билән яхши алақә орниталайдиған пишип йетилгән қериндашлардин үгиниң (Пәнд-нәсиһәтләр 31:26ни оқуң). Уларниң сөзләш усулиға диққәт қилиң. Алақә қилиш маһаритиңизни қанчә яхши йетилдүрсиңиз, башқилар билән болған мунасивитиңиз техиму яхширақ болиду.
22—28 СЕНТЯБРЬ
ХУДА СӨЗИДИКИ ҒӘЗНӘ | ВӘЗ 1, 2
Келәрки әвлатни үгитиштә күч селиң
3 Биз Йәһва Худаға хизмәт қилишни яхши көримиз вә вәзипилиримизни қәдирләймиз. Биз хизмитимизни шунчилик яхши көримизки, уни мүмкинқәдәр узақ қилишни халаймиз. Әпсуски, йешимиз чоң болғансири, яш чеғимизда қилғанларни орунлалмаймиз (Вәз 1:4). Бу Йәһваниң хизмәтчилири үчүн алаһидә бир қийинчилиқни туғдуриду. Бүгүнки күндә вәз ишиниң көләми кәңәймәктә һәм Йәһваниң тәшкилати хуш хәвәрни көпирәк адәмләргә йәткүзүш үчүн заманивий технологияләрни қолланмақта. Лекин бәзи чағларда йеши чоңларға йеңи нәрсиләрни үгиниш тәс болуши мүмкин (Луқа 5:39). Адәттә адәмләрниң йеши чоңайғансири, күч-қувитиму азийиду (Пәнд-нәсиһәтләр 20:29). Шуниң үчүн йеши чоңларниң яшларни Йәһваниң тәшкилатида көпирәк вәзипиләрни елишқа үгәткәнлири меһир-муһәббәт вә зерәкликниң ипадиси (Зәбур 71:18ни оқуң).
4 Җавапкарлиққа егә болған бәзи бурадәрләр үчүн яш бурадәрләргә вәзипиләрни тапшуруш оңай әмәс. Өзлири яхши көргән җавапкарлиқни бирсигә бериш уларниң көңлини йерим қилиши мүмкин. Бәлким, улар бу вәзипини өзлиригә охшаш башқа һечким орунлалмайду дәп ойлайдиғанду. Йә болмиса, башқиларни үгитишкә вақтим йоқ дәп ойлайдиғанду. Яшлар болса, көпирәк вәзипиләргә еришкичә, сәвир-тақәтлик болуши һаҗәт.
Роһий гөһәрләрни издәйли
6 Йәр шарида су суюқ һаләттә мәвҗут, чүнки бу сәйярә Қуяштин мукәммәл жирақ арилиқта җайлашқан. Әгәр Йәр шари Қуяшқа азирақ йеқин җайлашқан болса, униңдики суниң һәммиси қайнап, һолинип йәр йүзи чидиғусиз иссиқ вә қурғақ болуп, униңда яшаш мүмкин әмәс болатти. Әксинчә, әгәр у Қуяштин азирақ жирағирақ җайлашқан болса, униңдики су тоңлап, Йәр йоған бир муз шарға айлинатти. Йәһва Худа Йәр шарини Қуяштин әң мувапиқ җирақлиқта җайлаштурған. Шу сәвәптин, йәр йүзидики су айлиниши мәвҗудатларниң яшишиға пурсәт яритиду. Қуяш нури океанлардики су билән йәр йүзидики суни исситқачқа, су һолинип, булутлар пәйда болиду. Һәр жили Қуяш 500000 куб километр суни һоға айландуриду. Бу сулар йәргә ямғур яки қар болуп чүшүштин авал, атмосферида тәхминән он күндәк туриду. Су ахирида океан яки башқа су мәнбәлиригә қайтип, су айлиниши давамлиқ қайтилинип туривериду. Йәр йүзидә һәрқачан суниң болуши үчүн Йәһва Худа бу айлинишни яратқан. Бу Униң дана вә күч-қудрәтлик екәнлигини испатлайду (Аюп 36:27, 28; Вәз 1:7).
29-СЕНТЯБРЬ—5-ОКТЯБРЬ
ХУДА СӨЗИДИКИ ҒӘЗНӘ | ВӘЗ 3, 4
Үч ешилгән ағамчаңни мустәһкәмләң
ijwhf 10-мақалә, 2—8 абз.
● Телефонни даналиқ билән қоллиниш нека риштилирини күчәйтәләйду. Мәсилән бәзи әр-аяллар бу қурулмиларни бир-бири билән алақилишиш үчүн пайдилиниду.
«“Мән сизни сөйүмән” яки “сизни сеғиндим” дегән икки еғиз иллиқ сөз билән учурни әвәтсәм, бу бизни бир-биримизгә йеқинлаштуриду» (Джонатан).
● Телефонни натоғра қоллиниш нека риштисини бузуши еһтимал. Мәсилән, бәзи кишиләр телефонлириға бағлинип қелип, бир-биригә көңүл бөлүшкә вақит чиқиралмайду.
«Әгәр мән телфонимға чаплишип қалмиған болсам, йолдишим маңа көпирәк көңүл бөлгән боллати» (Юлисса).
● Бәзиләр бирла вақитта җүптүм билән сөзлишип, телефонму ишлитәләймән дәп ейтиду. Җәмийәтшунас Шерри Тёркли бу «ойдурма» дәп бирла вақитта бирнәччә ишни қилиш мүмкин әмәслигини тәкитләйду. Гәрчә кишиләр бирла вақитта бирнәччә ишни әмәлгә ашуруш яхши дәп ойлисиму, бу һәқиқәтән ундақ әмәс. Жуқурида сөзлири кәлтүрүлгән җәмийәтшунасниң ейтишичә, әслидә қиливатқан ишимиздин йәнә башқа алған һәрбир қошумчә вәзипә түпәйлидин үнүмимиз пәсийиду.
«Ерим билән параңлишип олтириш маңа яқиду. Лекин у гәплишип олтирип, телефони билән бәнт болғанда, маңа у мени унтуп қалди дегән ой келиду» (Сара).
Хуласә. Телефонни қандақ қилип пайдилинидиғанлиғиңиз некайиңизни күчәйтиду яки униңға зиян кәлтүриду.
12 Әр-аяллар Акила билән Прискилани қандақ үлгә қилалайду? Сиз вә яриңиз қилишқа тегишлик ишлар һәққидә ойлап көрүң. Бәзи ишларни өз алдиңизға әмәс, бәлки бирликтә қилиңлар. Мәсилән, Акила билән Прискила бирликтә вәз қилған. Силәрму шундақ қилиш үчүн план түзәмсиләр? Акила билән Прискила биргә ишлигән. Сиз вә җориңиз охшаш иш орнида ишлимәслигиңлар мүмкин. Амма өй оқәтлирини биллә қилаламсиләр? (Вәз 4:9) Бир-бириңларға ярдәм бәрсаңлар, өзүңларни бир командидәк һис қилип, өз ара параңлишиш үчүн пурситиңлар болиду. Роберт билән Линданиң той қилғиниға 50 жилдин ашқан. Роберт мундақ дәйду: «Растини ейтқанда, бирликтә көңүл ечиш үчүн көп вақит чиқиралмаймиз. Бирақ мән қача-қомучларни жуйғанда, аялим уларни сүртүп қуритиду. Сиртта от-чөпләрни жулғанда, у мән билән биргә ишләйду. Шу чағларда өзүмни интайин хошал һис қилимән. Бирликтә ишләш бизни бир-биримизгә йеқинлаштуриду вә аримиздики сөйгү-муһәббәт риштисини давамлиқ күчәйтиду».
13 Бирақ есиңларда болсунки, биллә яшиғиниңиз үчүнла һәргизму дайим бир-бириңларға йеқин болисиләр дегәнни билдүрмәйду. Бразилиядә яшайдиған бир аял мундақ дәйду: «Бүгүнки күндә адәмниң диққитини чачидиған нурғун ишлар бар. Пәқәт бир өйдә яшиғинимиз үчүнла бирликтә вақит өткүзүватимиз дәп ойлашниң тузиғиға чүшүп қалғанлиғимизни байқидим. Биргә болуштинму көпирәк ишларни қилишниң зөрүрлигини чүшәндим. Мән өз йолдишимға көпирәк көңүл бөлүшүм керәк». Бруно билән униң аяли Тайз бир-биригә көңүл бөлүш үчүн немиләрни қилғанлиғиға диққәт қилип бақайли. Бруно мундақ дәйду: «Биз биргә бош вақтимизни өткүзгәндә, телефонлиримизни бир чәткә қоюп, биргә болған пәйтләрдин хошаллиқ тапимиз».
14 Бирақ силәр бирликтә вақит өткүзүшни халимаслиғиңлар мүмкин. Бәлким, қизиқишиңлар охшимайду яки бир-бириңларни териктүрүп қойисиләр. Шундақ вәзийәттә немә қилсаңлар болиду? Жуқурида тилға елип өткән гүлхан һәққидики мисални ойлап көрүңлар. Гүлхан дәрһал лавулдап көйүшкә башлимайду. Уни аста-аста, чоңирақ отун парчилирини селиш арқилиқ отни улғайтиш керәк. Худди шуниңға охшаш, һәр күни бирнәччә минут биллә вақит өткүзүшкә тиришип беқиңлар. Араңларда келишмәслик пәйда қилған ишни әмәс, һәр иккиңлар яқтуридиған ишни қилиңлар (Яқуп 3:18). Кичик ишлардин башлаш арқилиқ муһәббәт отини қайтидин улғайталишиңлар мүмкин.
3 «Йәһниң ялқунлуқ отини» давамлиқ өчүрмәй сақлаш үчүн, әр-аял һәр иккиси Йәһва Худа билән болған мунасивитини күчлүк сақлашқа тиришиши керәк. Бу уларниң нека риштисини сақлашқа қандақ ярдәм бериду? Әр-аял асмандики Яратқучиси билән болған достлуқ мунасивитини қәдирлисә, улар Униң нәсиһитини әмәлий қоллинишқа тәйяр болиду. Бу уларниң арисидики муһәббәтниң совуп кетишигә сәвәп болидиған қийинчилиқлардин сақлинишиға вә уларни йеңишигә ярдәм бериду (Вәз 4:12ни оқуң). Йәһва билән йеқин достлуқ орнатқан кишиләр уни үлгә қилиш үчүн қолидин келишичә тиришчанлиқ көрситип, меһрибан, сәвирчан вә кәчүрүмчан болушқа тиришиду (Әфәс. 4:32—5:1). Бу пәзиләтләрни нәмаян қилғанда, әр-аял арисидики муһәббәт риштиси техиму күчийиду. Той қилғиниға 25 жилдин ашқан Лена исимлиқ қериндаш мундақ дәйду: «Йәһва билән йеқин мунасивәттә болған кишини сөйүш вә һөрмәтләш асан».
Роһий гөһәрләрни издәйли
it «Меһир-муһәббәт»
«Яхши көридиған вақит». Йәһва Худа меһир-муһәббәткә налайиқ дәп һесаплайдиған яки яман йолда маңған адәмләргә меһир-муһәббәт көрситилмәйду. Меһир-муһәббәт һәммә адәмләргә көрситилиши керәк, амма бирси Худани өч көрүшни башлиса, униңға меһир-муһәббәт көрситилмәйду. Йәһва Худа вә Әйса Мәсиһ һәқиқәтни яхши көриду вә қанунсизлиққа өч (Зб 45:7; Иб 1:9). Һәқиқий Худаға өч болғанларға меһир-муһәббәт көрситиш орунлуқ болмайду. Чүнки Худани өч көридиғанлар Униң меһир-муһәббитини қәдирлимәйду (Зб 139:21, 22; Йша 26:10). Шуңа, Худаниң ундақ адәмләрни өч көрүшигә асаси бар һәм вақти кәлгәндә, уларға қарши һәрикәт қилиду (Зб 21:8, 9; Вз 3:1, 8).
6—12 ОКТЯБРЬ
ХУДА СӨЗИДИКИ ҒӘЗНӘ | ВӘЗ 5, 6
Улуқ Худайимизға чоңқур һөрмәт көрситәйли!
1. Кийиниш вә ясиниш мәсилисидә қайси принципларға әмәл қилишимиз керәк?
Кийинишимиз мувапиқ, әхлақлиқ вә ой-пикирдә сағлам болғанлиғимизни һәмдә пакиз ташқи қияпитимиз Худа йолида маңған киши екәнлигимизни дайим көрситиши керәк (Тимотийға 1-хәт 2:9, 10). Бу төрт принципни көрүп бақайли: 1) Кийинишимиз мувапиқ болуши керәк. Җамаәт жиғилишлирида байқиған болсиңиз, Йәһваниң хизмәтчилири бир-биридин пәриқлиқ кийиниду. Кийим-кечәк вә чач фасонлиримиз өзүмиз ибадәт қилидиған Худани һөрмәтләйдиғанлиғимизни көрситиду. 2) Әхлақлиқ ташқи қияпәт дегинимиз башқиларниң шәһваний арзу-һәвәслирини қозғайдиған яки диққитини җәлип қилидиған кийиниш вә ясиништин сақлинишни билдүриду. 3) Биз һәрбир кийиниш вә ясиниш услублириға әгәшмисәк, ой-пикирдә сағлам екәнлигимизни көрситимиз. 4) Ташқи қияпитимиз бизниң Худа йолида маңидиған киши екәнлигимизни һемишәм ениқ көрситиши керәк. Шундила башқилар бизниң һәқ Худаға ибадәт қилидиғанлиғимизни көрәләйду (Коринтлиқларға 1-хәт 10:31).
18 Бир бурадәр вәз хизмәт жиғилишида яки җамаәт жиғилишида дуа қилишқа тәклип қилиниши мүмкин. Бу шан-шәрәпкә еришкән бурадәрләр жиғилишниң мәхситини әстә сақлиши керәк. Дуа қилиш җамаәткә нәсиһәт бериш яки елан қилиш әмәс. Көпинчә җамаәт ибадәт жиғилишлирида нахша вә дуа үчүн җәми бәш минут вақит аҗритилған. Шуңа болупму жиғилишта башлиниш дуасини қилған бурадәр бәк көп сөзләрни қилмаслиғи керәк (Мәт. 6:7).
12 Чөмдүрүлүш мәрасимидин өткәндә, сиз Йәһваға һаятиңизни униңға хизмәт қилишқа қоллинип, һәммә өлчәмлиригә риайә қилидиғанлиғиңизни вәдә қилдиңиз. Бирақ чөмдүрүлүш мәрасими — хизмәтниң беши халас. Вақит өткәнсири өзүмизни тәкшүрүп туришимиз керәк. Өзүмиздин: «Чөмдүрүлүш мәрасимидин өткәндин тартип Йәһва билән мунасивитим күчәйдиму? Униңға мошу вақитқичә пүткүл вуҗудумдин хизмәт қиливатимәнму?» (Колосилиқларға 3:23). «Пат-пат дуа қилимәнму? Муқәддәс китапни һәр күни оқуймәнму? Җамаәт учришишлириға дайим баримәнму? Мүмкинчиликниң баричә вәз ишиға қатнишимәнму? Яки бу ишларға бурунқидәк қизғин қатнашмайватимәнму?» Әлчи Петрус бизни Йәһваға хизмәт қилишта паалсиз болуп қелиштин агаһландурған. Әгәр етиқадимизни, билимимизни, тәқабиллиғимизни вә садақәтмәнлигимизни риваҗландурушқа күч чиқарсақ, совуп кәтмәймиз (Петрусниң 2-хети 1:5—8ни оқуң).
Роһий гөһәрләрни издәйли
Вәз 5:8-айәттә намратларни езидиған адаләтсиз әмәлдар тәсвирләнгән. Һәрқандақ һөкүмран униңкидинму жуқури дәриҗигә яки үстүн һоқуққа егә әмәлдар уни назарәт қилиши мүмкинлигини унтумаслиғи керәк. Әмәлийәттә, шу әмәлдардинму үстүн һоқуққа егә бирси бардур. Әпсуски, һәммә инсаний һөкүмранлар чирик яки адаләтсиз болуши мүмкин, шу сәвәптин аддий хәлиқ азап-оқубәтләрни чекиду.
Гәрчә вәзийәт үмүтсиз болуп көрүнсиму, Йәһва Худаниң һәтта жуқури мәнсәплик әмәлдарларни назарәт қилидиғанлиғини билиш бизгә тәсәлли бериду. Биз Худадин ярдәм сорап, ғәм-қайғулиримизни Униңға тапшуралаймиз (Зәб. 55:22; Флп. 4:6, 7). Биз Йәһва Худаниң «Йәһваниң көзлири пүткүл йәр-зиминни бақмақта, У кимниң жүриги пүтүнләй Униңға вапа болса, шуларни қоллап-қувәтләйду» жүгүртидиғанлиғини билимиз (Тар. 2-яз. 16:9).
Шуңа Вәз 5-бапниң 8-айитидики сөзләр биз яшаватқан дуниядики әһвални әслитидуки — һәрқачан һәммидин үстүн һоқуққа егә бирси бардур. Әң муһими, мошу айәт әң жуқури һоқуққа пәқәт Әң Алий Һөкүмран, Йәһва Худа, егә екәнлигини есимизгә салиду. Һазир У Оғли Әйса Мәсиһни Өз Падишалиғиниң Падишаси сүпитидә қоюп һөкүмранлиқ қиливатиду. Һәммини көридиған Һәммигә Қадир Яратқучимиз Йәһва адил Худадур вә Униң Оғли Әйсаму шундақ.
13—19 ОКТЯБРЬ
ХУДА СӨЗИДИКИ ҒӘЗНӘ | ВӘЗ 7, 8
«Жиға өйигә бериш әвзәл»
9 Қайғу-һәсрәт чекиватқанларни қоллап-қувәтләләйсиз. Әйса Мәсиһ Марта вә Мәрийәм билән биллә көз яш қилип қалмай, уларға қулақ селип, тәсәлли сөзләрниму қилған. Бизму қайғу-һәсрәт чекиватқанларға шундақ муамилә қилалаймиз. Австралиядә яшайдиған Дан исимлиқ ақсақал мундақ дәйду: «Аялимдин айрилғандин кейин, мән башқиларниң қоллап-қувәтлишигә муһтаҗ болдум. Бирнәччә җүп әр-аял сөзлиримни аңлаш үчүн кечә-күндүз маңа йеқин турди. Улар қайғу-һәсрәтлиримни ипадилишимгә йол бәрди вә көз яшлиримдин оңайсизлиқ һис қилмиди. Мәсилән, машина жуюш, нәрсә-керәк сетивелиш вә тамақ етиш дегәндәк ишларни өзүм қилалмайдиғандәк һис қилғанда, улар ярдәм қолини сунди. Улар дайим мән билән биллә дуа қилди. Улар еғир күнләрдә ярдәмдә болушқа туғулған һәқиқий дост вә қериндаш екәнлигини испатлиди» (Пәнд н. 17:17).
15 Аяли бирнәччә жил бурун җан үзгән Ваһидин мундақ дәйду: «Башқилар мениң аялим тоғрилиқ яхши нәрсиләрни ейтқанда хошал болуп қалимән. Башқилар уни яхши көргәнлигини вә һөрмәтлигәнлигини билиш мениң үчүн зор ярдәм. Рәпиқәмниң орни өзгичә болған». Тул қалған Баһаргүл мундақ дәп ейтқан: «Башқилар мениң билән дуа қилғанда, Муқәддәс китаптин бир-икки айәтни оқуғанда, йолдишимни әслигәндә, униң тоғрилиқ ейтип бәргәнлиримни диққәт қоюп тиңшиғанда, мән йеникләп қалимән».
16 Һәсрәт чекиватқан қериндашлиримиз үчүн дуалиримизниң пайдиси зор. Улар үчүн яки һәтта улар билән биллә дуа қилсақ болиду. Дуа қиливатқанда жиғлаветимән дәп қорқсиңизму, чин жүрәктин чиққан дуаңиз униңға тәсәлли беридиғанлиғи сөзсиз. Далин мундақ дәп есигә алиду: «Бәзидә тәсәлли бериш үчүн кәлгән қериндашларниң дуа қилишини сораттим. Дуа қилишни башлиғанда авази титрәп, қийнилип сөз тапалматти, лекин аста-аста үни күчийип, чин жүрәктин чиққан бәк тәсирлик дуа килиду. Уларниң ишәнчиси, меһир-муһәббити билән ғәмхорлуғи етиқадимни мустәһкәмләйду».
17 Адәмниң қайғуси қанчилик узақ болидиғанлиғини һечким ениқ ейталмайду. Йеқин адими қайтиш болғанда, бешида көп достлири билән туққанлири тәсәлли беришкә келиду. Амма қайғуруватқанлар күндилик турмушиға қайтқандин кейинму, тәсәллигә муһтаҗ. Шуниң үчүн уларға қол учиңизни беришкә тәйяр болуң. «Һәқиқий дост һәр дайим саңа муһәббәт көрситәр, һәқиқий қериндаш болса, яман күнүң үчүн дунияға кәлгәнду» (Пәнд-нәсиһәтләр 17:17). Йеқинлиридин айрилғанларға қанчә вақит керәк болса, шунчә вақит уларни қоллап, ярдәм бәргинимиз яхши (Салоникилиқларға 1-хәт 3:7ни оқуң).
18 Жүриги яриланған адәмни һәрқандақ вақитта қайғу бесивелиши мүмкинлигини унтумаң. Буниңға қандақту бир алаһидә күн, бәлгүлүк нахша-саз, рәсимләр, ишлар яки һәтта бир пурақ, аваз яки пәсил сәвәп болуши мүмкин. Сөйүмлүк яридин айрилған әр яки аял киши биринчи қетим ялғуз өзи бир нәрсә қилғанда, мәсилән конгрессқа яки Хатириләш кечигә қатнашқанда, бу униңға алаһидә еғир болуши мүмкин. Бир бурадәр мундақ деди: «Аялим қайтиш болғандин кейин дәсләпки жиллиқ той күни интайин қайғулуқ болиду дәп күткән едим. Һәқиқәтән, бу асан болмиди. Лекин бирнәччә қериндаш ялғуз қалмаслиғим үчүн әң йеқин достлиримни чақирип, кичик олтириш уюштурди».
19 Есиңиздә болсун, қайғуруватқанлар тәсәллигә алаһидә күнләрдила муһтаҗ әмәс. «Қандақту бир алаһидә күн болмисиму, маңа сунған ярдәм қоли билән достанә муамилә пайдиси көп. Мошундақ күтмигән пәйтләр бәк баһалиқ вә зор тәсәлли әта қилиду»,— деди Юния. Раст, адәмни қайғуси вә ялғузлуғидин толуқ азат қилалмаймиз, лекин униң үчүн бир нәрсә қилиш арқилиқ дәрдини йеник қилалаймиз (Йоһанниң 1-хети 3:18). Гэби мундақ дәйду: «Дәрдимгә дәрман болуп, қийин вақитларда дайим йенимда болған көйүмчан ақсақаллар үчүн Йәһваға чәксиз миннәтдармән. Улар Йәһваниң мени бағриға басқанлиғини һис қилишимға ярдәмләшти».
Роһий гөһәрләрни издәйли
18 Бәзидә бизни рәнҗитип қойған қериндаш билән сөзлишишимиз керәк дәп қаришимиз мүмкин. Амма авал өз-өзүмиздин мундақ соалларни сорап көрсәк яхши: «Мән йүз бәргән ишни толуқ чүшинимәнму?» (Пәнд н. 18:13) «У қәстән шундақ қилмиған болсичу?» (Вәз 7:20) «Мәнму илгири шундақ хаталиқни садир қилғанму?» (Вәз 7:21, 22) «Униң билән мошу тоғрисида параңлашсам, түгмидәк иш түгидәк йоған болуп кетәмду»? (Пәнд-нәсиһәтләр 26:20ни оқуң) Мошу соаллар үстидә ойлансақ, сөйгү-муһәббәт бизни йүз бәргән ишларни давамлиқ хиял қилишни тохтитишқа үндиши мүмкин.
20—26 ОКТЯБРЬ
ХУДА СӨЗИДИКИ ҒӘЗНӘ | ВӘЗ 9, 10
Қийинчилиқлириңизға тоғра көзқарашта болуң
4 Муқәддәс китап һәрқандақ киши күтүлмигән пәйт вә күтүлмигән вақиәләргә дуч келиду дәйду. Демәк, яман ишлар һәр бир инсанниң бешиға келиши мүмкин (Вәз 9:11). Мошу сәвәптин бәзидә адәттә адәмләр дуч келидиған қийинчилиқларға дуч келимиз (Кор. 1-х. 10:13). Бәлким, биз Әйсаниң шагиртлири болғинимиз үчүнла азап-оқубәтләргә дуч келишимиз мүмкин. Мәсилән, етиқадимиз сәвәплик мәсхирә қилинишимиз, қаршилиқларға яки болмиса зиянкәшликкә учришимиз мүмкин (Тим. 2-х. 3:12). Бирақ бешиңизға мәйли қандақ қийинчилиқлар кәлсун, Йәһва Худа сизниң бәрдашлиқ беришиңизгә ярдәм берәләйду. У Йүсүпкә қандақ ярдәм бәргән?
10 Шундақла кәмтәрлик һаятимизни асанирақ қилиду. Бәзидә биз адаләтсизликкә дуч келимиз. Дана падиша Сулайман: «Мән қулларни атларда жүргинини көрдүм, бәгләр болса қуллардәк пиядә жүриду»,— дәп язған (Вәз 10:7). Адәм қабилийәтлик болсиму, һәрқачан мукапатқа еришмәйду вә бәзидә адәмниң һечқандақ қабилийити болмисиму, у абройға егә болиду. Лекин Сулайман падиша һаятимиздики яманлиқларниң бизни чирмавелишиға йол беришкә қариғанда, бар нәрсиләргә рази болушниң дана екәнлигини ейтқан (Вәз 6:9). Кәмтәр болсақ, һаятимизда һәтта биз яқтурмайдиған бир ишқа дуч кәлсәк, уни қобул қилиш оңайирақ болиду.
w11 10/15 8-б., 1, 2-абз.
ЙӘҺВА ХУДА бизниң һаят кәчүрүпла қоймай, униңдин һузур елишимизни халайду. Мәсилән, Зәбур 104:14, 15тә Йәһва Худа тоғрилиқ: «Сән мал-варан үчүн көкни өстүрисән вә йәр нан бериши үчүн адәмгә дан зираәтлирини бәрдиң. Инсан қәлбини хошал қилидиған шарапни, үзини пақиритидиған майни вә униңға күч беридиған нанни һәдийә қилдиң»,— дәп йезилған. Йәһва бизгә озуқ болидиған буғдай, май вә шарапни бәргән. Һаят қелиш үчүн шарапниң һаҗити болмисиму, бу бизни хошал қилиду (Вәз 9:7; 10:19). Һә, Йәһва Худа бизниң жүригимиз хошаллиққа толуп, шат-хорам һаят кәчүрүшимизни халайду (Әлч. 14:16, 17).
2 Шуниң үчүн «көктики қушларға» вә «далада өсүватқан явайи гүлләргә» диққәт билән қараш үчүн вақит бөлүштә яки һадуғимизни чиқирип, дәм елишта һеч яман нәрсә йоқ (Мт 6:26, 28; Зб 8:3, 4). Сағлам һаят бу — Худаниң соғиси (Вз 3:12, 13). Дәм алидиған вақитқа Худаниң соғиси дәп қарисақ, уни Худаға яқидиған усулда қоллинимиз.
Роһий гөһәрләрни издәйли
it «Ғевәт, төһмәт»
Ғевәт төһмәткә айлинип, төһмәтчигә апәт елип келиши мүмкин. Вәз 10:12—14тә дана сөзләр йезилған: «Ахмақниң гекитиги өзи үчүн һалактур. Униң сөзлириниң башлиниши — ахмақлиқ, гәплириниң ахири дәрткә йетәкләйдиған әқилсизлик. Надан көп сөзләрни қилиду».
Ғевәт бәзи вақитларда аз-тола зиянсиз болуши мүмкин. Бирақ у төһмәткә айлиниши яки төһмәткә елип келәләйду. Төһмәт болса, һәр вақитта зиян вә яридар қилиду, йәнә җедәл-маҗира туғдириду. Төһмәтчиниң нийити яхши яки яман болсун, униң һәрикити Худаға яқмайду. Чүнки Худа «қериндашлар арисида бөлгүнчилик һасил қилидиған кишини» өч көриду (П.н 6:16—19). Грек тилиниң диаболос сөзи «төһмәтчи» вә «әйиплигүчи» дегән мәнани билдүриду. Бу сөз Муқәддәс китапта Йәһва Худаға әң биринчи наһәқ төһмәт қилған Шәйтан Иблискә қарита қоллиниду (Йоһ 8:44; Вһ 12:9, 10; Яр 3:2—5). Буниңдин төһмәтниң мәнбәси ким екәнлигини ениқ чүшинимиз.
27-ОКТЯБРЬ—2-НОЯБРЬ
ХУДА СӨЗИДИКИ ҒӘЗНӘ | ВӘЗ 11, 12
Сағлам болуп, һаяттин һузурлиниң
16 Йәһва Худа яратқан мәвҗудатлар аилиләрниң арам елиши вә көңүл ечиши үчүн ярдәм берәләйду. Бу арқилиқ аилә әзалириниң меһир-муһәббәт ришти техиму күчийиду. Муқәддәс китапта күлүшниңму бир вақти бар, усул ойнашниңму бир вақти бар дейилгән (Вәз 3:1, 4). Йәһва Өз қоли билән йәр йүзидә әҗайип чирайлиқ җайларни яратқан. Шу җайларда өзүмиз яхши көргән ишларни қилалаймиз. Нурғун аилиләр тәбиәт бағчилири, йеза-қишлақлар, тағлар вә деңиз саһиллирида бирликтә вақитни өткүзүшни яхши көриду. Бәзи балилар бағчиларда жүгрәп ойнашни, һайванатларни күзитишни яки дәрия, көл вә деңизда су үзүшни яхши көриду. Йәһваниң әсәрлири билән толған тәбиәт бизгә көңүл ечиш үчүн нәқәдәр көп имканийәтләрни яритип бериду-һә!
6 Гәрчә Муқәддәс китап тән сағламлиқни асраш үчүн мәслиһәт беридиған китап яки йемәк-ичмәк қолланмиси болмисиму, Йәһваниң бу җәһәттики көзқаришини бизгә ейтип бериду. Мәсилән, У бизни тенимизгә зиянлиқ нәрсиләрдин жирақ турушқа үндәйду (Вәз 11:10). Муқәддәс китапта ачкөзлүк вә һарақкәшликниң һаятқа хәвп-хәтәр йәткүзидиғанлиғи тилға елинған (Пәнд н. 23:20). Немини йейиш вә ичиш, шуниңдәк қанчилик йейиш вә ичишни қарар қилғинимизда, Йәһва бизниң өзүмизни тутувелишимизни үмүт қилиду (Кор. 1-х. 6:12; 9:25).
7 Биз тәпәккүр қилиш иқтидаримизни ишлитиш арқилиқ Яратқучимизниң һаятлиқ соғисиға чоңқур миннәтдарлиғимизни көрситидиған қарарларни чиқиралаймиз (Зәб. 119:99, 100; Пәнд-нәсиһәтләр 2:11ни оқуң). Мәсилән, немә йейишни таллашта дана қарар чиқиралаймиз. Мәлум бир нәрсини йейишни яқтурсақ, амма униң бизни кесәл қилидиғанлиғини билсәк, чоқум уни йейиштин сақлинишимиз лазим. Биз йетәрлик ухлап, дайим бәдән чиниқтутуп, яхши тазилиқ адитини сақлап, өйүмизни пакиз тутқанда ой-пикримизниң сағлам екәнлигини көрситимиз.
2 Йәһва Худаниң хизмәтчилири бәхитлик. Немә үчүн? Буниң нурғун сәвәплири бар. Уларниң бири — биз Худаниң Сөзини дайим оқуймиз вә үгәнгәнлиримизни турмушимизда қоллинишқа һәрикәт қилимиз (Яқуп 1:22—25ни оқуң).
3 Худаниң Сөзидә йезилғанларни орунлашниң көп пайдиси бар. Мәсилән, шундақ қилип биз Йәһва Худаниң көңлини хурсән қилалаймиз (Вәз 12:13). Шундақла Муқәддәс китаптики принципларни һаятимизда қоллансақ, аилимиз, достлиримиз һәм етиқатдашлиримиз билән мунасивитимиз йеқин вә мәһкәм болиду. Буни өзүңизму көрүватқансиз. Шундақла Худаниң Сөзидә йезилғанларни орунлисақ, мошу дуниядики адәмләр дуч келидиған нурғун қийинчилиқлардин нери болимиз. Биз Давут падишаниң сөзлиригә қошулимиз. У Йәһваниң қанунлири, буйруқлири вә һөкүмлири тоғрисида: «Уларға әмәл қилишта — бүйүк мукапат»,— дегән (Зәб. 19:7—11).
Роһий гөһәрләрни издәйли
16 Адәмләр бизни тиңшимайдиғандәк көрүнсиму, хуш хәвәрниң уларға чоңқур тәсир қилалайдиғанлиғини унтумаслиғимиз лазим (Вәз 11:6ни оқуң). Көп адәмләр бизни көриду. Улар бизниң әдәплик кийингәнлигимизгә, силиқ-сипайә вә достанә муамилимизгә диққәт қилиду. Вақит өткәнсири бу уларға қаттиқ тәсир қилип, у һәтта биз һәққидә яман ойда болғанларму көзқаришини өзгәртиши мүмкин. Серджо билән Олинда мошуни бешидин өткүзгән.
17 Серджо мундақ дәйду: «Бир қетим ағрип қелип, бир мәзгил мәйданға чиқалмидуқ. Биз қайтип кәлгәндә, өтүп кетиватқанларниң бири: “Немә болди, йоқап кәттиңларғу. Силәрни бәкму сеғиндуқ”»,— деди. Олинда күлүмсирәп шундақ қошти: «Автобус шоферлири қолини пулаңлитип, бәзилири: “Ярайсиләр!”— дәп вақириди. Улар һәтта журналларни сориди». Бир киши уларға гүлдәстә соға қилип, ишлири үчүн рәхмәт ейтқанда, Серджо билән Олинда бәк һәйран қалди.
18 Башқиларға Худа Падишалиғи һәққидә хуш хәвәр ейтиштин «қолуңизни қалдурмисиңиз», «барлиқ хәлиқләргә» вәз қилиш ишиға өз һәссиңизни қошалайсиз (Мәтта 24:14). Әң муһими, Йәһваниң көңлини хурсән қилғанлиқтин, өзүңизму буниңдин хошал болисиз. У сәвирчанлиқ билән мевә беридиғанларниң һәммисини бәк яхши көриду!