1 Va Korindo
10 A vamanji, njongola okuti vu kũlĩha okuti vakukululu yetu vosi va endela vemehi lielende kuenda va pita vokalunga, 2 ovo va papatisiwa osimbu va kuama Mose, leci va kala vemehi lielende loku pita vokalunga, 3 kuenda vosi va lia okulia kumuamue kuespiritu, 4 vosi va nyua ovava amuamue espiritu. Va enda oku nyua ovava espiritu kesenje lia va kuama, okuti esenje liaco li lomboloka* Kristu. 5 Suku ka sanjukilile valua pokati kavo, momo va pondiwila vekalasoko.
6 Ovina evi via tu lingila ndalungulo, oco okuti ka tu liveli ovina vĩvi ndeci ovo va vi livelele. 7 Ko ka lingi vakuakufendela oviteka ndeci vamue pokati kavo va linga; ndomo ca sonehiwa okuti: “Omanu va tumãla oku lia loku nyua. Noke va votoka oku piluka.” 8 Ka tu ka lingi evĩho liukahonga* ndeci vamue pokati kavo va linga evĩho liukahonga,* okuti keteke limosi kua fa eci ci soka 23.000 komanu. 9 Ndaño oku seteka Yehova ndeci vamue pokati kavo vo seteka, okuti va lumaniwa lolonyõha kuenje va fa. 10 Ka tu ka lisiõsiõli ndeci vamue pokati kavo va lisiõsiõla, yu va nyõliwa lunyõli. 11 Ovina evi via kala ndelungulo kokuavo kuenje via sonehiwila oku tu longisa etu tu kasi kesulilo lioloneke vilo.*
12 Una o sima okuti wa kolapo, a lunguke sanga o kupuka. 13 Lalimue eyonjo liya kokuene, te lina lia siata pokati komanu. Pole, Suku wa koleliwa kuenda ka ecelela okuti vu yonjiwa leci ka vu tẽla, puãi kumue leyonjo u muisivo evelo lioku puluka okuti vu pandikisi lalio.
14 A vamanji wa soliwi, tili efendelo lioviteka. 15 Ñasi oku popia la vakualondunge; ene muẽle sokololi eci nda popia. 16 Okopo yolopandu tua eca, ka ya tiamẽlele hẽ kosonde ya Kristu? Ombolo tua timbula, ka ya tiamẽlele hẽ ketimba lia Kristu? 17 Kuli ombolo yimosi, pole, etu ndaño tualua, tutimba limosi, momo vosi tu lia kombolo yimuamue.
18 Tali omanu va Isareli: Siti va lia ovilumba kowatale? 19 Nye ñasi oku popia? Anga eci ca lumbiwa kociteka oco cimue, ale ociteka caco oco cimue? 20 Sio; pole, mopia siti ovina vakualofeka va lumba, ka va vi lumbile ku Suku, te kolondele; kuenda si yongola okuti vu kuata ukamba lolondele. 21 Ko ka nyui kokopo ya Yehova kuenda kokopo yolondele; ko ka li “komesa ya Yehova” kuenda komesa yolondele. 22 Ale ‘tu kasi oku kokela Yehova ukuse’? Siti eye wa pama vali okuti etu tu sule?
23 Ocihandeleko ci ngecelela oku linga ovina viosi, pole, haviosiko vi kuatisa. Ocihandeleko ci ngecelela oku linga ovina viosi, pole, haviosiko vi pamisa. 24 Omunu lomunu ka ka sande eci caye muẽle, te cukuavo.
25 Li ño cosi ci landisiwa pocitanda cositu, ko ka lingi apulilo omo liovitima viene, 26 momo “ongongo ya Yehova lovina viosi vie yukamo.” 27 Nda umue okuti hukuetavoko wa ku laleki kuenje wa pangi oku enda, li cosi vo wĩhi, ko ka lingi apulilo omo liovitima viene. 28 Pole, nda umue wa ku sapuili hoti, “Ositu eyi ya lumbiwa kociteka,” ko ka li omo lia una wa ku ci sapuili kuenda omo liuwanji wovutima. 29 Si ci popela omo liovitima viene, te womunu ukuavo. Utima womunu ukuavo u pisila nye elianjo liange? 30 Nda eci ndi lia ndi ci panduila, momo lie va ndi pisila eci nda panduila?
31 Oco, nda vu lia, ale vu nyua, pamue vu linga ovina vikuavo, cosi ci lingili ulamba wa Suku. 32 Ko ka lingi cimue ci kokela ocilondokua va Yudea, pamue va Helasi kuenda ekongelo lia Suku, 33 ndeci ame ndi seteka oku sanjuisa omanu vosi kovina viosi, haloku sandako oku lisanjuisa ame muẽle, oco ovo va popeliwe.