Va Roma
1 Ame ndi Paulu ukuenje wa Kristu Yesu, haime nda kovongiwa oku linga upostolo kuenje nda nõliwa oku kunda olondaka viwa via Suku, 2 vina eye a likuminyile tunde osimbu vonduko yovaprofeto Vovisonehua vi kola, 3 viatiamẽla Komõlaye, una wa citiwa ndomunu kocitumbulukila* ca Daviti, 4 pole, omo liunene wespiritu sandu, wa tukuiwa Mõla a Suku eci a pinduiwa ku vakualofa—okuti Yesu Kristu Ñala yetu. 5 Vokuaye tua tambula ohenda ya piãla ya Suku kuenda ocikele cupostolo okuti olofeka viosi viu kolela loku pokola konduko yaye, 6 okuti pokati kolofeka viaco lenevo wa kovongiwili oku tiamẽla ku Yesu Kristu— 7 ku vosi va kasi vo Roma okuti va soliwe la Suku, haivo va tukuiwa olosandu:
Ohenda ya piãla lombembua yi tunda ku Suku Isietu kuenda ku Ñala Yesu Kristu, yi kale lene.
8 Catete, vonduko ya Yesu Kristu ngeca olopandu ku Suku yange omo liekolelo liene, momo ekolelo liene lia yevala komanu vosi. 9 Suku una ndingila lutima wosi upange u kola woku sapula olondaka viwa Viomõlaye, o njimbila uvangi ndomo sia la liwekapo oku vu tukoli olonjanja viosi volohutililo viange, 10 ndi pinga okuti cilo nda ca ngecelela, ndiya kokuene nda Suku wa panga. 11 Momo ndi lavoka oku vu moli, okuti ndu wĩhi ongavelo yespiritu oco vu pamisiwi; 12 loku sanga evelo lioku likolisa pokati, okuti ekolelo liene li ñuatisa ame kuenda ekolelo liange liu kuatisivo ene.
13 A vamanji, koleli okuti olonjanja vialua nda yonguile oku iya kokuene—pole, ñasi oku tatekiwa toke cilo—oco okuti oku kunda kuange ku eca onima yiwa ci kale pokati kene, ci kale ku vakualofeka vakuavo. 14 Ñuetele ofuka va Helasi lovingendeleyi,* ci kale ava va kuete olondunge, lava ka va kuete olondunge; 15 oco ndi livela oku wu kundilivo olondaka viwa ene vu kasi vo Roma. 16 Si kuete osõi yolondaka viwa; momo ovio vi kuete unene wa Suku woku popela vosi va kuete ekolelo, okuti tete va Yudea noke va Helasi. 17 Momo kokuavio oko esunga lia Suku lia situluiwa omo liekolelo kuenda lekolelo, ndomo ca sonehiwa citi: “Ukuesunga o muila omuenyo kekolelo.”
18 Momo onyeño ya Suku yi tunda kilu, yi situlula etombo kuenda akandu omanu vosi va tateka ocili lonjila yimue ka ya sungulukile, 19 omo eci ca Suku citava oku kũlĩhĩwa, va ci kũlĩha, momo Suku wa va ci situluila. 20 Momo ovituwa viaye ka vi muiwa vi limbukiwa tunde koku lulikiwa kuoluali, momo vi muiwila kovina via lulikiwa, ndaño unene waye okuti eye Suku, oco, ka va tẽla oku ci tatãla. 21 Momo ndaño va kũlĩha Suku, pole, ka vo kemainyaile nda Suku pamue oku u pandula, puãi, ovisimĩlo viavo ka vi silivila, momo ovitima viavo viuveke kuenda via vuvala. 22 Ndaño va popia vati tuakualondunge, puãi va linga aveke, 23 kuenda ulamba wa Suku una ka fi va u pongolola ndociñumañuma cesetahãlo liomunu o fa fa, leli liolonjila, leli liovinyama viovolu akuãla kuenda evi vi likoka posi.*
24 Omo va kasi loloñeyi vĩvi vovitima viavo, Suku wa va eca kevĩho liosi, okuti atimba avo a lavisiwa pokati kavo muẽle. 25 Ovo va pongolola ocili ca Suku uhembi kuenje va fendela loku vumba ociluvo okuti U wa ci Lulika hayeko, una okuti o sivayiwa otembo ka yi pui. Amene. 26 Oco Suku wa va eca koloñeyi viukahonga, momo akãi vavo va pongolola ovituwa viavo via sunguluka ha va lingi evi ka via sungulukile; 27 kuenda alume va liweka oku lala lakãi, ndaño Suku ka va pangele ndoco kuenje va likuatela pokati oloñeyi vĩvi, alume va linga akutisasõi lalume kuenje va tambula episo* li sesamẽla oku lueya kuavo.
28 Omo ka va tavele oku kũlĩha Suku,* oco Suku wa va eca kutima uveke kuenda koku linga ovina viumbondo. 29 Ovo ve yuka ovina viosi ka via sungulukile okuti evĩho, ocipululu,* ũvi, onya, umondi, ema, uhembi, esuvu kuenda va linga vakuakulisiõsiõla,* 30 va sokola vakuavo, va suvuka Suku, vakuemande, haivo va litunula, vakuakulipanda, vakuakusovola ovina vĩvi, va tomba olonjali viavo, 31 ka va kuete olondunge, havakuaciliko, ka va kuete ocisola, haivo ka va kuete ohenda. 32 Ndaño va kũlĩha ndomo Suku a tetulula lesunga—okuti vana va lingainga ovina viaco va sesamẽla oku fa—ovo ka va vi lingi lika, pole, va sanjukilavo lava va vi linga.