2 Va Korindo
1 Ame Paulu upostolo wa Kristu Yesu locipango ca Suku kuenda Timoteo manjetu, tu sonehela ekongelo lia Suku li kasi ko Korindo oku kongelamo olosandu viosi vi kasi ko Akaya yosi okuti:
2 Ohenda ya piãla lombembua yi tunda ku Suku Isietu kuenda ku Ñala Yesu Kristu yi kale lene.
3 Suku Isia ya Ñala yetu Yesu Kristu a sivayiwe, haeye Isia yohenda kuenda Suku yelembeleko liosi, 4 una o tu lembeleka kohali yetu yosi, okuti tu tẽla oku lembeleka vakuetu kohali yosi lelembeleko tu tambula ku Suku. 5 Ndeci ohali tu tala omo lia Kristu yalua, elembeleko tu tambula omo lia Kristu lialuavo. 6 Nda tu tala ohali, tu yi talela oco okuti vu lembelekiwa kuenda vu popeliwa; nda tu lembelekiwa, elembeleko liaco li tiamẽla kokuene okuti vu kuatisiwa oku pandikisa kohali ndeyi yetu. 7 Elavoko tu vu kueteli lia kolapo, omo tua kũlĩha okuti ndeci vu talela kumue letu ohali, haico vu lembelekiwila kumue letu.
8 A vamanji, ka tu yongola okuti vu kala vonumbi yohali tua tala osimbu tua kala kolupale luo Asia. Tua sakalalele calua okuti ka tua tẽlele oku yula longusu yetu muẽle kuenje tua kala lohele yovimuenyo vietu. 9 Omo liaco, tua simĩle okuti tu fa. Eci ca lingiwila okuti ka tu likolela etu muẽle, pole, tu kolela Suku una o pindula ava va fa. 10 Eye wa tu yovola kohele yolofa kuenda o ka tu yovola vali kuenje elavoko lietu li kasi kokuaye okuti amamako oku tu yovola. 11 Lenevo vu pondola oku tu kuatisa lolohutililo viene, okuti valua va panduila ohenda tua tambula omo liolohutililo viomanu valua.
12 Momo eci oco tu lipanda laco kuenda utima wetu u tu imbila uvangi wokuti, voluali tua lekisa okuti tua lipua ca piãla enene eci tua kala pokati kene loku sunguluka ka ku tundi volondunge violuali lulo, te kohenda ya piãla ya Suku. 13 Momo lacimue tu wu soneheli, te eci wa tangi haico co lomboloki kuenda ndi lavoka okuti vu amamako oku kuata elomboloko liwa liovina viaco, 14 ndeci ene wa kuati elomboloko, okuti etu tu tẽla oku lipanda mekonda liene, lenevo vu lipanda mekonda lietu keteke lia Ñala yetu Yesu.
15 Omo nda kala lekolelo liaco, nda yonguile ale oku iya tete kokuene, okuti vu kuata esanju onjanja yavali; 16 momo nda sokiya oku ko nyuli poku enda ko Makedonia, eci nunda ko Makedonia ndi tiuka vali kokuene oco vu ndi sindikili naito eci ngenda ko Yudea. 17 Eci nda kuata ocisimĩlo caco, nda ci tenda hẽ leselula? Ale nda sokiya oku tẽlisa olonjongole vietimba, loku popia ño siti “Oco, oco,” noke “Hacoko, hacoko”? 18 Pole, Suku wa kolelua kuenje ondaka tuo sapuili ka ya lingile okuti “oco” kuenda noke “hacoko.” 19 Momo Omõla a Suku, Yesu Kristu, una ame la Siluano kuenda Timoteo tua kunda pokati kene, ka popele okuti “oco” kuenda noke “hacoko,” puãi kokuaye “oco” yi linga lika “oco.” 20 Momo olohuminyo viosi Suku a linga, vi linga “oco” vokuaye. Etu tu popela vonduko yaye “Amene” ku Suku, okuti o muisua ulamba mekonda lietu. 21 Puãi Suku eye wa tu ĩha ohuminyo kumue lene vu Kristu, haeye wa tu waveka. 22 Eye wa tu kapa ondimbukiso yaye kuenda wa tu ĩha ohuminyo yeci ci laika oku iya, okuti espiritu vovitima vietu.
23 Cilo Suku ombangi yange okuti sia endele handi ko Korindo omo lioku yuvula oku wu kokeli esumuo lialua. 24 Ka ci lomboloka okuti tu vacime cekolelo liene, puãi tu talavayela esanju liene, momo ene wa pami omo liekolelo liene.