Etavo Liakristão Vocili Li Kasi Oku Amamako

KOCITA catete, upange wa Yesu Kristu woku kunda wa lisanduile lonjanga. Ondaka eye a kunda ya kala ondaka yimue yi kolisa, ya lomboloka, haiyo yi vetiya, okuti ya komõhisa calua omanu. Omanu valua vo yevalaila, va komõha calua oku vangula kuaye.​—⁠Mateo 7:​28, 29.

Yesu lutõi walua wa likala oku panga onepa kosungu yavakuetavo vokoloneke viaye kuenda ka tavelevo oku litenga vovisoko viopulitika via kala kotembo yaco. Pole, wa kapeleko calua omanu vaño. (Mateo 11:​25-​30) Eye wa kũlĩhĩle ciwa ũvi u tundilila kaspiritu ãvi, kuenje wa lekisa unene Suku o wihĩle koku tundisa aspiritu aco. (Mateo 4:​2-11, 24; Yoano 14:​30) Yesu luloño walua wa lekisa elitokeko li kasi pokati kohali lekandu, kuenje locisola calua wa lekisa okuti Usoma wa Suku owo u ka nena eyovo liasuapo kolohali viosi. (Marko 2:​1-12; Luka 11:​2, 17-​23) Oku sulako, wa sikũlula ocifuto cowelema ca vuvalisile ekalo liocili lia Isiaye vokuenda kuotembo yalua, poku sapula onduko ya Suku ku vosi va yonguile oku kuata ukamba laye.​—⁠Yoano 17:​6, 26.

Omo liaco, ka ci komõhisa okuti, ndaño lalambalalo alua a vakuetavo kuenda a vakuapulitika, ondaka olondonge via Yesu via kunda, ya lisandula lonjanga. Votembo yi soka 30 kanyamo, kua tumbikiwa akongelo a pama vocifuka co Afrika, co Asia, kuenda ko Europa. (Va Kolosai 1:​23) Olondaka viocili vina Yesu a longisa, via patulula ovitima viambombe levi via vakuesunga va kala kolofeka viosi viombala yo Roma.​—⁠Va Efeso 1:​17, 18.

Ocili okuti, olondonge viaco evi viokaliye via tunda vakalo alitepa. Vamue va kala olohuasi vakuavo olohukũi, vakuavituwa via litepa, vakualimi añi añi, haivo vakulila vatavo alitepa. Pole, va kala vongongela yimosi okuti ‘vekolelo limuamue’ ndomo upostolo Paulu a ci tukula. (Va Efeso 4:⁠5) Nye ca va kuatisa oku “popia popia cimuamue” okuti pokati kavo ka pa kale olonepele? (1 Va Korindo 1:​10) Omo liolonepele via piãla vi kasi pokati komanu vana vakuakulitukola hati tuakristão koloneke vilo, etu tu sukila oku konomuisa ciwa eci Yesu a longisa.

Ono Yelitokeko Pokati Kakristão

Eci Yesu a kala loku sombisiwa kovaso a Pondio Pilato, eye wa lombolola ono yelitokeko pokati Kakristão. Eye wa popia hati: “Eci oco nda citiwila, haico ndeyilila voluali, okuti, njimbila Ocili uvangi.” (Yoano 18:​37) Omo liaco, oku tava kalongiso a Yesu loku tavavo kalomboluilo a sangiwa Vembimbiliya, ci kuete unene woku tokekisa olondonge viocili via Kristu.​—⁠1 Va Korindo 4:6; 2 Timoteo 3:​16, 17.

Ocili okuti, pokati kolondonge via Yesu olonjanja vimue ci tava okuti pa kala olonamãlala. Oco hẽ ndamupi ovo va tetulula olonamãlala viaco? Yesu wa popia hati: ‘Eci espiritu liocili liya, olio liu songuili kocili cosi, momo ka li popi lomoko yalio, puãi cosi li yeva oco li popia, kuenje liu sapuili ovina vi lingiwa noke.’ (Yoano 16:​12, 13) Omo liaco, espiritu sandu lia Suku olio lia pamisa olondonge viocili via Yesu oco vi kuate elomboloko liondaka yocili osimbu Suku a yi situlula vokuenda kuotembo. Kuendavo, espiritu lia va kuatisa oku lekisa apako espiritu ndeci, ocisola, esanju, kuenda ombembua, okuti ovio ovituwa via koka elitokeko pokati kavo.​—⁠Ovilinga 15:28; Va Galatia 5:​22, 23.

Yesu ka ecelelele okuti pokati kolondonge viaye pa kala olonamãlala ale olonepele kuenda ka va ĩhilevo omoko yoku situlula ocili ci sangiwa Vembimbiliya loku citiamisila koviholo viomanu vana ovo va enda oku vangula lavo. Pole, vuteke wa sulako eye a kala lavo, wa likutilila longusu hati: “Si va likutilila ovo lika, puãi ndi likutililavo ava va laika oku ñolelela ondaka yavo, okuti vosi va kala vamuamue, ndeci ove, a Tate, o kasi vokuange lame ñasi vokuove, okuti lavovo va kala vokuetu, oco oluali lu tave okuti ove wa numa.” (Yoano 17:​20, 21) Omo liaco, elitokeko liocili, olio ondimbukiso yi tepisa olondonge viocili via Kristu tunde kefetikilo lietavo Liakristão toke koloneke vilo. (Yoano 4:​23, 24) Atavo koloneke vilo, ka a likuete omunga, pole alitepa tepa. Momo lie?

Esunga Lieci Atavo a Litepela

Etambululo liatiamẽla koku litepa ku sangiwa pokati ka vana valitukola hati Tuakristão lieli okuti ovo ka vakuãi alongiso a Yesu. Umue usonehi wukanda wasapulo wa soneha hati: ‘Koloneke vilo vana va litukula hati Akristão ka va tava cosi ci sangiwa Vembimbiliya. Ovo ka va kapiko olonumbi Viembimbiliya vi pisa oviholo vietavo liavo muna va citiwila.’ Eci oco Yesu lovapostolo vaye va popele okuti oco ci ka pitako.

Loku vetiyiwa lespiritu sandu, upostolo Paulu wa sonehela ekamba liaye Timoteo hati: “Kuiya oloneke [vimue] okuti omanu ka va [ka] tava kokulongisa kuocili, puãi, omo va kasi lovatui a yua, oco va liongoluila alongisi ndovipango viavo. Kuenje vopa ovatui koku yevelela ovina viocili ha va yapukila kolosapo viaño.” Eci hẽ ci lekisa okuti Akristão vosi va kembiwa? Sio, hacoko. Paulu wamisako hati: “Ove puãi, lilava kovina viosi. Pandikisa kohali. Linga ukundi wondaka yiwa. Tẽlisa ocikundi cupange wove.” (2 Timoteo 4:​3-5; Luka 21:8; Ovilinga 20:​29, 30; 2 Petulu 2:​1-3) Timoteo kuenda Akristão vakuavo vakuekolelo, va kapeleko onumbi eyi.

Akristão Vocili Haimo Valikuetele Omunga

Ndeci Timoteo, Akristão vocili koloneke vilo handi va kasi oku likolisilako oku likala ovisimĩlo viomanu loku tava lika kueci Embimbiliya li popia oku ci tiamisila kolondotilina viavo. (Va Kolosai 2:8; 1 Yoano 4:⁠1) Ndeci Akristão vokocita catete va linga, Olombangi via Yehova vi kasi oku kundila olondaka viwa Viusoma vina Yesu a kunda, kueci ci pitãhala 230 kolofeka, oku sapuilako omanu vokolonepa viosi. Kũlĩhĩsa kolonepa vikuãla via velapo vi lekisa ndomo Olombangi via Yehova vi likuete omunga koku setukula Yesu kuenda oku kuama etavo liocili lina lia tumbikiwa la Kristu.

Olondotilina viavo via kunamẽla Vondaka ya Suku. (Yoano 17:​17) Ocitunda cetavo limue, ca popia hati: ‘Cimue ndi lilongisila Kolombangi via Yehova ceci okuti, via kapako eci va lilongisa Vembimbiliya kuenda va kuete utõi woku kunda ondaka yaco.’

Ovo va kolela okuti Usoma wa Suku owo lika uka malako ovitangi viosi. (Luka 8:⁠1) Kofeka yo Kolombia, kolupale luo Barranquilla, yimue Ombangi ya Yehova ya vangula la Antonio, umue watiamẽlele kocitundo cimue co pulitika. Pole, Ombangi ya Yehova ka ya kuatele onepa kocitundo caye ndaño kocitundo cimue cikuavo co pulitika. Pole, oyo ya laleka Antonio lavamanjaye afeko oco va lilongise Embimbiliya laye okuti ka va feti lacimue. Vokuenda kuotembo yimue yitito, Antonio wa limbuka okuti Usoma wa Suku owo lika elavoko liolohukũi kofeka yo Kolombia lokolonepa vikuavo violuali.

Ovo va sumbila onduko ya Suku. (Mateo 6:⁠9) Eci yimue Ombangi ya Yehova ya lisanga la Maria, umue wa litumbika ketavo lio Katolika o kasi kofeka yo Australia, eye wa ecelela okuti Ombangi ya Yehova yu lekisa onduko ya Suku Vembimbiliya. Ndamupi hẽ eye a tambuluiya? Eye wa popia hati: “Eci nda mõla onjanja yatete onduko ya Suku Vembimbiliya, nda lila. Ca mbeta calua kutima okuti kaliye ndi tẽla oku kũlĩha kuenda oku tukula onduko ya Suku.” Maria wamamako oku lilongisa Embimbiliya. Kuenje onjanja yatete vomuenyo waye, weya oku kũlĩha okuti Yehova omunu muẽle. Omo liaco, wa tẽla oku livala ukamba umue wocili laye.

Valikuetele ocisola. (Yoano 13:​34, 35) Ukanda umue wasapulo wokolupale luo kofeka yo Kanada, wa lombolola hati: ‘Cikale okuti ukuetavo ale kukuetavoko, okuete oku eca epandiyo lisesamẽla Kolombangi via Yehova vi soka 4.500. Ovio via talavaya 24 kolowola veteke vokuenda kuosemana ya sulako ndeti, koku tunga Onjango Yolohongele vimbo lio Cassidy. Onjango yaco yi kuete ocinãla ci soka 2.300 kolometulu. . . . Upange waco wa lingiwa lesanju, okuti lonjuela lakamue ndaño olonamãlala. Ovo va lekisa umbombe kuenda ka va sandiliyile oku pandiyiwa. Omo liaco, eyi oyo ondimbukiso Yakristão vocili.’

Omo liaco, kapako uvangi owu. Osimbu olomissionariu vietavo Liakristão vesanda kuenda omanu vatiamẽla ketavo liavo va liyaka lovitangi, etavo Liakristão vocili li kasi oku amamako koluali luosi. Ocili okuti, Akristão vocili, va kasi oku amamako locikundi cavo coku kunda kuenda oku longisa Ondaka ya Suku. (Mateo 24:14; 28:​19, 20) Nda wa siata oku “lisiõsiõla loku leñaila” avĩho osi a lingaiwa koloneke vilo, kuenda wa sakalala lolonepele vi sangiwa pokati Kakristão vesanda, tu ku laleka oku likongela Kakristão vocili, okuti Olombangi via Yehova, oco o fendelevo Suku yocili, Yehova.​—⁠Esekiele 9:4; Isaya 2:​2-4.