Elembeleko Komanu Va Tala Ohali
KOSIMBU, alume lakãi vakuekolelo va pitailevo lolohali. Ovo va enda loku likutilila ku Suku oco a va imbe onumbi yeci va sukilile oku linga. Pole, ovo va endavo loku likolisilako oku tepulula ohali yavo. Daviti wa kolelele Yehova. Pole, wa likolisilako oku tila tila ovanyali vaye. Eci co kuatisa oku pandikisa kolohali viaye. Oco hẽ, etu koloneke vilo tu linga ndati eci tu sangiwa lolohali?
Eci tu sangiwa lolohali, tu sukila oku sanda onjila yoku tepulula ohali yetu. Nda ocitangi cetu ekambo liupange, tu sukila oku likolisilako oku sanda upange wa sunguluka oco tu tekule epata lietu. (1 Timoteo 5:8) Nda ocitangi cetu oku vela, tu sukila oku enda kosipitali. Yesu wa kala lunene woku sakula ovoveyi osi. Pole, wa limbukile esilivilo lioku enda kondotolo. Eye wa popia hati: ‘Ava va vela va sukila ondotolo.’ (Mateo 9:12) Olonjanja vimue, ndaño wa likolisilako pamue ku sangi onjila yi malako ohali yove yosi. Kuenje, o sukila oku pandikisa layo.
Likutilila ku Yehova. Kapa ocitangi cove peka liaye. Poku sanda upange, tu sukila oku kolela Yehova, loku likutilila kokuaye oco ka tu ka tave upange una okuti ka u litava lovihandeleko Viembimbiliya. Nda tua ci linga, ka tu ka “yapuka vekolelo” omo liocipululu colombongo. (1 Timoteo 6:10) Poku sanda upange ale onjila yoku tetulula ovitangi viatiamẽla kepata ale kuhayele, tu sukila oku kuama onumbi ya soma Daviti, eci a popia hati: “Tuika Yehova ocitele cove kuenje eye o ku kuatisa. Lalimue eteke a tava okuti ukuesunga o sengiwa.”—Osamo 55:22.
Ohutililo yi tu kuatisa oku kuata ombembua yovutima, okuti olohali vietu ka vi tu sakalaisa enene. Upostolo Paulu wa soneha hati: “Lacimue ko ka ci kuateli ohele, puãi kovina viosi apingilo ene a sapuiwe ku Suku lolopandu volohutililo viene lalombelo ene.” Oco hẽ ndamupi ohutililo yi tu lembeleka? Upostolo Paulu wamisako hati: “Ombembua ya Suku, yina ya piãla olondunge viosi, yi lava ovitima viene lovisimilo viene vu Kristu Yesu.” (Va Filipoi 4:6, 7) Ombembua ya Suku “ya piãla olondunge viosi.” Omo liaco, eci tu sangiwa lovitangi, ombembua yaco yi pondola oku tulumũla ‘utima wetu lovisimilo vietu’ okuti ka tu lingi cimue ka ca sungulukile.
Ohutililo yi pondola oku tu kuatisa oku tepulula ohali yetu. Upostolo Paulu eci a kala vokayike ko Roma, wa pinga ku vamanji Akristão oco vo likutilileko. Momo lie? Eye wa soneha hati: “Ndu vetiyi ca lua oku ci linga ndokuti niuwiwa kokuene lombili.” (Va Heveru 13:19) Upostolo Paulu wa kũlĩhĩle okuti, olohutililo via vamanjaye vika yeviwa la Yehova kuenje eye eciwa lonjanga.—Filemone 22.
Pole, tu sukila oku limbuka okuti, Yehova Suku pamue ka tambulula olohutililo vietu ndomo etu tu yongola. Upostolo Paulu wa likutilila olonjanja vialua ku Suku oco o upe “osongo” a kala layo vetimba. Osongo yaco soketi ya kala evalo limue a kala lalio ketimba. Pole Suku ko u pile evalo liaco. Wo tambulula hati: “Ocali cange cu ku tẽla, momo unene wange u loñolohela poku pekengua.”—2 Va Korindo 12:7-9.
Omo liaco, pamue ohali yetu ka yi pui vonjanja yaco eci tu likutilila. Pole tu ka lilongisa oku kuata epandi loku kolela ku Isietu wokilu. (Tiago 1:2-4) Kolela okuti ndaño Yehova ka malẽleko ohali yove, eye oku ‘muisa evelo lioku puluka okuti o soka lalio.’ (1 Va Korindo 10:13) Ivaluka okuti Yehova o tukuiwa hati, “Suku ukuakulembeleka . . . [una] o tu lembeleka kohali yetu yosi.” (2 Va Korindo 1:3, 4) Yehova Suku oka tu kuatisa oku pandikisa kohali yetu. Eye wa tu likuminyavo omuenyo ko pui.
Vembimbiliya tu sangamo ohuminyo ya Yehova yokuti, “Eye [oka] puenya asuelela osi kovaso avo. Okufa ka ku kalako vali, ndaño oku lila loku liyula lupongo laviovo ka vi kalako vali.” (Esituluilo 21:3, 4) Nda tua siata oku pita lolohali vialua, pamue ci tu tĩlila oku tava okuti Suku eteke limue oka malako ohali yosi. Pole, Suku wa likuminya oku malako usumba lohali yosi. Kuenje tu pondola oku ci kolela. Momo cosi Suku a likuminya cika tẽlisiwa muẽle.—Isaya 55:10, 11.
[Elitalatu kemẽla 9]
Ohutililo yi tu kuatisa oku tepulula ohali yetu