Citava hẽ Okuti Voluali mu Kala Elitokeko?

ANGA HẼ voluali lulo muka kala ombembua, ale lua loña kenyolẽho? Citava okuti muka kala ale sio.

Olombiali via siata oku lombolola catiamẽla kombembua loku lekisa okuti, yika tumbikiwa voluali luosi. Momo nda voluali ka mua kalele ombembua, muka pita enyolẽho lialua. Handi vali, omanu valua va kuete usumba eci va lipula ndoco: Olofeka vipi vi kuete ovota oku loya atenda anene? Anga hẽ, kuli umue o va tateka oku yaka lovota aco? Nda va fetika oku linga uyaki lovota aco, nye cika pita voluali?

Ovolandu oluali a lekisa okuti, ndaño olonepele lungangala, ovio via siata oku tateka elitokeko voluali, pole, atavo a siatavo oku vetiya omanu oco ka vaka kuate elitokeko. Ulume umue o talavaya kovingungu viasapulo o tukuiwa hati, James A. Haught, wa popia hati: “Ovina viosi vi nena olonepele, vi vetiya esuvu pokati komanu, kuenda atavo a siatavo oku koka olonepele viaco. Ndaño omanu va tava kocisimĩlo cokuti atavo a kasi oku kuatisa omanu oku linga eci ‘ciwa,’ pole, ovolandu a lekisa okuti atavo ovo va siata oku vetiya omanu oku linga ungangala.” Onoño yikuavo o tukuiwa hati, Author Steven Weinberg, wa popiavo hati: “Atavo a siata oku vetiya omanu va sunguluka oku linga eci cĩvi.”

Kuli hẽ elavoko liokuti voluali muka kala elitokeko? Kuli elavoko! Pole, ndomo tu ci konomuisa vocipama ci kuãimo, cikale olombiali violuali ale atavo, havoko vaka nena elitokeko liaco.

[Elitalatu kemẽla 3]

Anga hẽ oluali lu kasi ndetenda li panda koku tuika?