Va Kuata Esanju Lia Velapo Komuenyoz—Ove hẽ, o Cilingavo?
MANJI umue o tukuiwa hati, Marc kofeka yo Kanada, wa kala oku talavaya kupange woku tunga olomakina via velapo vi talavaya lavina via kapiwa vokati kilu oco vi kũlĩhĩse ovina vi pita voluali. Eye veteke wa enda oku talavaya lika epuluvi limosi omo lioku kala ukundi wotembo yosi. Noke mitavaso yaye wo vokiya ovikele okuti, o fetika oku talavaya eteke liosi kuenda oku tambula olombongo vialua. Nye manji Marc a linga?
Manji umue ukãi kofeka yo Filipina o tukuiwa hati, Amy eci a kala oku malusula osikola yaye wa talavaya ndukundi wa velapo. Eci a mãla oku tanga, vo kapa kupange umue woku talavaya eteke liosi, kuenda oku fetiwa olombongo vialua. Nye Amy a nõlapo oku linga?
Marc la Amy va nõla olonjila via litepa, kuenda onima ya tunda koku nõla kuavo yi lekisa olondunge vioku pokola kelungulo Paulu a ecele Kakristão vo ko Korindo. Eye wa popia hati: “Ava va sakalala lovina violuali va linge ndava ka va kuete cimue laluo.”—1 Va Kor. 7:29-31.
Kuka Sakalale Calua Lovina Violuali
Osimbu ka tua kũlĩhĩsile eci ca pita la Marc kuenda Amy, tu konomuisi elomboloko liondaka “oluali” (ale, koʹsmos kelimi lio Helasi) Paulu a tukula ndeti vukanda a sonehela va Korindo. Vembimbiliya liaco, ondaka koʹsmos, yi lomboloka ocisoko comanu va tunga kilu lieve. Pole, vondaka yaco mua kongela ovina viomuenyo wetu weteke leteke ndeci, onjo, okulia, kuenda uwalo.a Omanu valua pokati ketu oco va sange ovina viaco, va sukila oku kuata upange woku talavaya. Omo okuti ka tu kuete onjila yikuavo yoku tẽlisa ocikele cetu Cakristão coku litata etu muẽle kuenda oku tata epata lietu, tu sukila oku talavaya loluali. (1 Tim. 5:8) Pole, tua kũlĩha okuti, “oluali lu takata.” (1 Yoa. 2:17) Omo liaco, ka tu sukila oku “sakalala” calua lovina violuali.—1 Va Kor. 7:31.
Vamanji valua alume lakãi, omo lioku vetiyiwa lelungulo Liembimbiliya liatiamẽla koku yuvula oku sakalala enene lovina violuali, va siata oku kũlĩhĩsa ekalo liavo, loku tepulula otembo va siata oku pesila kupange wavo kuenda oku leluisa omuenyo wavo. Noke yoku linga ovina viaco, va siata oku limbuka okuti, va kuete esanju lia velapo komuenyo. Momo va siata oku kuata otembo yalua yoku kala lepata kuenda yoku linga upange wa Yehova. Handi vali, omo lioku ambata omuenyo wa leluka, ka va kuete otembo yalua yoku linga ovina violuali, momo otembo yavo va yi pesila calua kupange wa Yehova. Ove hẽ, citava okuti o leluisavo omuenyo wove oco o pesile otembo yalua koku linga ocipango ca Yehova?—Mat. 6:19-24, 33.
“Tua Pamisa Ukamba Wetu la Yehova Okuti, Kotete ci Sule”
Marc wa tukuiwa kefetikilo liocipama cilo, wa pokola kelungulo Liembimbiliya lioku yuvula oku sakalala calua lovina violuali. Eye ka tavele oku tambula ovikele vikuavo kupange waye. Eci papita oloneke vimue, mitavaso yaye wo wĩha olombongo vioku u yonja oco a tave oku iñila kupange ukuavo. Marc wa popia hati: “Ombanjaile yaco, ya kala oseteko, pole, nda yi likala.” Eye wa lombolola esunga liaco, hati: “Ame Lukãi wange Paula, tua yonguile oku lieca kupange wa Yehova. Omo liaco, tua nõlapo oku leluisa omuenyo wetu. Tua likutilila ku Yehova oco a tu ĩhe olondunge vioku tẽlisa ocimãho cetu kuenda oku kũlĩha otembo yoku fetika oku lieca kupange waye.”
Paula wa popia hati: “Vokuenda kuosemana ndaenda oku talavaya oloneke vitatu kupange wusonehi kosipitili kuenda ndaenda oku fetiwa olombongo vialua. Otembo yaco, nda kala oku talavaya kupange wakundi vavelapo. Pole, nda yonguilevo oku vumba Yehova kocikanjo kuosi ku sukila ekuatiso liakundi Vusoma ndeci ca kala ocisimĩlo ca Marc. Eci nda pinga oku liwekapo oku talavaya kupange waco, mitavaso yange wa ndi sapuila hati, kaliye ove o kala usonehi wa velapo. Momo kuli esukila liaco. Omunu nda o kuete ocikele caco kosipitali, o fetiwa olombongo vialua. Pole, nda nõlapo oku tẽlisa ondaka yange. Eci nda sapuila mitavaso yange esunga lieci nda nõlelapo onjila yaco, wa ndi pandiya omo liekolelo liange.”
Eci papita okatembo kamue, Marc la Paula va tambula ukanda woku iñila kupange wakundi valikasi oco va kuatise ekongelo lia kala kocikanjo cimue kofeka yo Kanada. Onima yipi ya tunda kupange wavo vocikanjo caco? Marc wa popia hati: “Eci nda siapo upange wange kuna nda talavaya anyamo alua, nda sumuile calua poku sokolola eci cika pita lame kovaso yoloneke. Pole, Yehova wa sumũlũisa upange wetu woku kunda. Tu lete esanju li tunda koku kuatisa vakuetu konepa yespiritu oco va vumbe Suku. Oku kala ukundi wotembo yosi, ca pamisa olohuela vietu. Olombangulo vietu tua siata oku vi tiamisila lika kovina viespiritu. Tua pamisa ukamba wetu la Yehova okuti, kotete ci sule.” (Ovil. 20:35) Paula wa popia hati: “Eci o siapo upange wove woku sanda eteku, kuenda ekalo liwa lionjo yove, o sukila oku kolela ku Yehova. Eci oco tua linga, kuenje Yehova wa tu sumũlũisa. Vamanji vekongelo lietu, va lekisa okuti va tu sole, kuenda tu kuete esilivilo kokuavo. Cilo ongusu yina nda enda oku pesila kupange wange, ndi kasi oku yi pesila koku kuatisa vakuetu oco va kũlĩhe Yehova. Nda sanjukila calua ocikele cupange wange.”
‘Nda Kuata Ukuasi, Pole Sia Kuatele Esanju’
Amy una wa tukuiwa kefetikilo, wa nõla onjila yimue ya litepa. Eye wa tava oku tambula ocikele coku fetiwa olombongo vialua kupange waye. Eye wa popia hati: “Kunyamo watete kupange waco, nda kala lombili kupange woku kunda, pole, nda fetika oku limbuka okuti, utima wange ka u kasi vali oku tiamẽla kupange wa Yehova. Momo nda pitisile lika kovaso upange woku fetiwa olombongo vialua. Nda tambula ovikele vialua vioseteko yekolelo kupange, kuenje nda fetika oku talavaya calua omo liovikele viaco. Osimbu ovikele viange via kala oku livokiya kupange, sia kuatele vali otembo yoku enda kupange woku kunda. Noke nda liwekapo oku kunda.”
Amy poku sokolola eci ca pita laye kotembo yaco, wa popia hati: “Konepa yukuasi, nda kuata ovina vialua pole, sia kuatele esanju. Nda enda oku linga ovongende alua kuenda nda kuata ekalo liwa omo liocikele cange. Pole, sia kuatele esanju. Ndaño okuti nda kuata olombongo vialua, pole, nda kuatavo ovitangi vialua. Sia kuatele elomboloko liaco. Noke nda limbuka okuti, omo lioku tiamisila calua utima kovina violuali lulo, nda puluka oku “yapuka vekolelo.” Omo liaco, ndomo Ondaka ya Suku ya ci popia, nda liyaka ‘lohali ya lua.’”—1 Tim. 6:10.
Nye Amy a linga? Eye wa popia hati: “Nda pinga ekuatiso kakulu vekongelo oco ndi tumbulule ekalo liange kespiritu, kuenje nda fetika oku endaenda kolohongele. Kowola yoku imba ocisungo, nda enda oku lila calua. Momo ndivaluka esanju nda kuatele kanyamo atãlo a pita eci nda talavaya kupange wakundi votembo yosi ndaño okuti, otembo yaco sia kuatele cimue. Nda limbuka okuti, ndi sukila oku yuvula oku tiamisila utima koku sanda lika olombongo oco ndi pitise kovaso Usoma wa Suku. Noke nda siapo ovikele viaco, kuenje nda tambula ocikele ci sulemo kupange. Kolombongo viange va tepululako onepa yalua, kuenje nda fetika vali upange woku kunda.” Amy lesanju lialua wamisako hati: “Osimbu sia tambuile ovikele viaco kupange wange, nda talavayele ño anyamo atito kupange wakundi votembo yosi. Pole, cilo ñuete esanju lialua lioku linga upange wa Yehova okuti, eli nda kuata kotembo nda kala oku talavayela oluali li sule.”
Ove hẽ, citava okuti, o kũlĩhĩsa ekalo liove kuenda oku leluisa omuenyo wove? Nda otembo yove wa yi pesila koku sanda tete Usoma, oka kuata esumũlũho lialua komuenyo.—Olosap. 10:22.
[Atosi pombuelo yamẽla]
a Tanga Velivulu Estudo Perspicaz das Escrituras Volume 3 kamẽla 40-1.
[Elitalatu kemẽla 19]
Ove hẽ, citava okuti, o kũlĩhĩsa ekalo liove kuenda oku leluisa omuenyo wove?
[Elitalatu kemẽla 19]
“Nda Sanjukila Oku Talavaya Kupange Wotembo Yosi”
Ukulu umue wekongelo kofeka yo Estados Unidos, o tukuiwa hati, David, wa yonguile oku likongela kukãi waye lomãla va kasi oku talavaya kupange wakundi votembo yosi. Noke kupange waye wa sandiliya onjila yoku talavaya epuluvi limosi veteke kuenje wa li sonehisa kupange wakundi vavelapo. Anga hẽ, wa kuata esanju komuenyo waye? Eci papita otembo yimue, David wa sonehela akamba vaye hati: “Ka kuli lacimue cinena esanju lia velapo okuti, oku vumba Yehova kumosi lepata ci sule. Nda simĩle okuti, ndi talavaya ño okatembo kamue kupange wakundi votembo yosi. Pole, ndi sole calua upange waco! Momo u kavuluisa utima.”
[Elitalatu kemẽla 18]
Marc la Paula kupange woku kunda