Vakuakutanga va Pula

Anga Hẽ Olombangi Via Yehova Vi Tava Otestamento Yale?

Olombangi Via Yehova vi tenda Embimbiliya Ndondaka ya Suku, kuenda vi tava okuti ci kale Otestemento Yale Lotestamento Yokaliye, vi panga onepa Yembimbiliya liosi. Pole ovo va nõlapo oku tukula olonepa viaco vivali okuti “Ovisonehua vio Heveru” kuenda “Ovisonehua vio Helasi.” Momo Otestamento Yale, tete ya sonehiwa kelimi lio Heveru kuenda Otestamento Yokaliye kelimi lio Helasi.

Omanu vamue va li tukula okuti Akristão, va tatãla Otestamento Yale. Ovo va popia hati Otestamento Yale yi lekisa okuti Suku ukuanyeño, ecelela ovoyaki, lungangala, kuenda va popia vati, ovilinga viaco ka vi litava lovituwa viwa via lekisiwa Votestamento Yokaliye ndeci, ocisola lohenda. Va siata oku popiavo hati, omo okuti Otestamento Yale yi tukula lika ovina viatiamẽla kefendelo lia va Yudea, ka yi kuete esilivilo Kakristão. Omo liocihandeleko ca Suku ci sangiwa kelivulu Liesinumuĩlo 12:​32, ku lekisa okuti ka citava oku vokiya ale oku tepulula olondaka viaye, ca sunguluka hẽ oku tepulula onepa yalua Yembimbiliya?

Kunyamo wa 50 Kotembo ya Kristu, upostolo Paulu wa nyula Akristão va kala volupale luo Tesalonike kofeka yo Helasi, kuenje “wa tamalala lavo oku va situluila ovisonehua. Wa lombolola, kuenda wa lekisa okuti Mesiya, co sokiyilua oku tala ohali loku pinduka ku vakuavilangu.” (Ovilinga 17:​1-3) Olonjeveleli vimue via linga Akristão kuenje Paulu wa va pandiya hati: “Eci wa tambuli ondaka ya Suku, yina wa yevi kokuetu, wa yi tambuli ndomo yi kasi ocili okuti, handaka yomanuko, puãi ondaka ya Suku.” (1 Va Tesalonike 2:​13) Kotembo yaco, pokati kalivulu 27 Ovisonehua vio Helasi pa sonehiwile lika Evanjeliu lia Mateo. Omo liaco, onepa yalua ‘Yovisonehua’ Paulu a enda oku ‘tukula’ Yovisonehua vio Heveru.

Handi vali, vana va soneha Ovisonehua vio Helasi, va tukula eci ci soka 320 kolonjanja olondaka Viovisonehua via va Heveru, kuenda va tiamisila olondaka vikuavo kovisonehua viaco eci ci pitãhala ocita kolonjanja. Momo lie? “Momo cosi ca sonehiwa kosiahũlu ca sonehiwa oku tu longisa okuti, epandi kuenda okukolisiwa lovisonehua ku tu kokela elavoko.” (Va Roma 15:⁠4) Koloneke vilo, vana va tava olonepa viosi Viembimbiliya va kuatisiwa.

Ovisonehua vio Helasi, vi kuete elitokeko Lovisonehua vio Heveru, kuenda vi lombolola eci catiamẽla koku tẽlisiwa kuocipango ca Suku. Ovio ka vi tepulula esilivilo Liovisonehua vio Heveru. Ulongisi umue Wosikola ya Velapo yo Cambridge, o tukuiwa hati, Herbert H. Farmer, poku lombolola catiamẽla Kavanjeliu, wa popia hati: “Nda ka tu konomuisa esapulo liomanu vo kosimbu lina li sangiwa Votestamento Yale, ka tu tẽla oku kuata elomboloko liovina vio kosiahũlu.”

Ndaño okuti Ondaka ya Suku ka yi pongoloka, haimo lumue, ‘onjila yolondingesunga ya soka ndocinyi congula, camamako oku tua toke eci ci linga utanya.’ (Olosapo 4:​18) Suku poku vokiya Ovisonehua vio Helasi Kembimbiliya, o kasi oku situlula ocipango caye, pole ka tepuluile esilivilo Liovisonehua vio Heveru. Ovio vi panga onepa kovisonehua viosi okuti ‘ondaka ya Yehova yi kala ño-o hũ.’​—⁠1 Petulu 1:​24, 25.