Oku Lingila Kumosi Ovina ci Kuatisa Oku Kula Kespiritu
OCITUWA coku likuatisa pokati ci kuete esilivilo ku vana va yongola oku kuata epata li kuete ocisola kuenda li fendela Yehova. Eci Yehova a lulika Adama la Heva, wa lombolola esilivilo lioku likuatisa pokati. Heva wa sukilile oku talavaya la Adama, momo wa kala “oñuatisi” yaye. (Efet. 2:18) Olohuela vi pamisiwa lika nda ulume lukãi va likuatisa pokati. (Uku. 4:9-12) Oco olonjali lomãla va tẽlise ocikele va tambula ku Yehova, va sukila oku likuatisa pokati.
Oku Fendelela Kumosi Lepata
Manji umue o tukuiwa hati Barry kuenda ukãi waye Heidi, va kuete omãla vatãlo. Ovo va limbuka okuti, oku likuatisa pokati oco va kuate elilongiso Liembimbiliya vepata, ca va kuatisa oku kula kespiritu. Manji Barry wa popia hati: “Oco elilongiso liepata liende ciwa, nda siata oku eca ovikele vimue komãla, poku va tuma oku tanga ovipama vimue vo Despertai! okuti, velilongiso liepata, va lombolola ovina va tanga. Tua siatavo oku pongiya ovindekaise, vi tu kuatisa kupange woku kunda okuti, omõla lomõla o tẽla oku fetika ombangulo lomanu.” Manji Heidi wa popia hati: “Vosi yetu tua sokiya ovimãho tu yongola oku kuata kupange wa Yehova, kuenje olonjanja vimue velilongiso liepata, tua siata oku kũlĩhĩsa nda tu kasi oku vi tẽlisa.” Vamanji ava, va limbuka okuti, oku tepulula otembo yoku tala o televisãu koñolosi, ca va kuatisa oku vokiya otembo yavo yoku tanga ovipama vimue.
Olohongele Viekongelo
Manji umue o tukuiwa hati, Mike lukãi waye Denise, va kuete omãla vakuãla. Oku lingila kumosi ovina, ca kuatisa ndati epata liavo? Manji Mike wa popia hati: “Olonjanja vimue, nda ka tua lingile esokiyo liwa, tu cilua kolohongele, pole, oku lingila kumosi ovina, ci tu kuatisa oku pitila selo.” Ukãi waye Denise wa lombololavo hati: “Eci omãla vetu va kala oku kula, va tambuile ovikele konjo. Omõla wetu ukãi o tukuiwa hati, Kim, wa enda oku kuatisa oku teleka okulia, kuenda oku kapa alonga komesa.” Omõla wavo ulume o tukuiwa hati, Michael, wa popia hati: “Olosemana viosi vovali koñolosi, tua enda oku lingila ohongele vonjo yetu. Tua enda oku komba vonjo loku yelisa posi, kuenda oku pongiya olomangu.” Omõla ukuavo o tukuiwa hati, Matthew, wa popiavo hati: “Voloneke tu kuete ohongele koñolosi, Isietu wa enda oku likolisilako oku tiuka selo kupange oco a tu kuatise oku lipongiya okuti, tu enda kolohongele.” Asumũlũho api va kuata?
Oku Likolisilako ci Kuete Esilivilo
Manji Mike wa popia hati: “Kunyamo wo 1987, ame kumue lukãi wange Denise, tua litumbika kupange wakundi wotembo yosi. Kotembo yaco, omãla vetu vatatu va enda oku siala konjo. Vavali pokati kavo, veyavo oku litumbika kupange wakundi votembo yosi, kuenda ukuavo wa talavaya kupange woku tunga o Betele. Tua kuata esanju lialua vepata lietu, omo lioku kuatisa 40 komanu oku litumbika ku Yehova, kuenda oku papatisiwa. Tua kuatavo epuluvi lioku talavaya kupange woku tunga Olonjango Viusoma kolofeka vikuavo.”
Oku lingila kumosi ovina, ci nena asumũlũho alua vepata. Ove hẽ, o pondola oku kuama onjila yikuavo yoku likuatisa pokati vepata liove? Ivaluka okuti, ocituwa coku lingila ovina kumosi, ci pondola oku kuatisa epata liove oku kula kespiritu.
[Elitalatu kemẽla 28]
Oku pongiya ovindekaise, ci kuatisa kupange woku kunda