Lekisa Ocisola Cina Ka Ci Tokoka
‘Ocisola ci pandakaisa kovina viosi. Ocisola lalimue eteke ci tokoka.’ —1 VA KOR. 13:7, 8.
1. (a) Ocisola ca siata oku lekisiwa ndati olonjanja vimue? (b) Kovina vipi omanu va siata oku tiamisila ocisola cavo?
OMANU va siata oku sandeka alivulu alua a lombolola ovina viatiamẽla kocisola. Ovo va velisapo ocituwa caco, kuenda va siata oku ci kongela vovisungo viatiamẽla koku namulãla. Omanu vosi va sukila oku lekisa ocisola. Alivulu alua kuenda volosinema, va siata oku lombolola ovolandu uhembi atiamẽla kocisola. Povitanda va siatavo oku landisa ovina viaco. Pole, omanu vamue, ka va siatele oku lekisa ocisola ku Suku, kuenda ku vakuavo. Tua siata oku mola ovina Embimbiliya lia popele okuti, vika tẽlisiwa koloneke via sulako. Momo koloneke vilo, omanu “va linga vakuakulisola [ovo muẽle], vakuakusola olombongo, . . . vakuakusola ca lua esanju [okuti,] Suku ci sule.”—2 Tim. 3:1-5.
2. Embimbiliya li tu ĩha elungulo lipi liatiamẽla kocisola cina ka ci songuiwa lukũlĩhĩso wa Suku?
2 Omanu va pondola oku lekisa ocisola. Pole, Ovisonehua vi tu vetiya oku yuvula ocisola cina ka ci songuiwa lukũlĩhĩso wa Suku. Embimbiliya li lombolola okuti, omunu wosi o lekisa ocisola caco, o liyaka lovitangi vialua. (1 Tim. 6:9, 10) Ove hẽ, ivaluka olondaka upostolo Paulu a soneha viatiamẽla ku Demas? Ndaño wa kala la Paulu, pole, wa yapuisiwa lovina violuali. (2 Tim. 4:10) Upostolo Yoano, wa lungula Akristão oco va yuvule ovituwa viaco. (Tanga 1 Yoano 2:15, 16.) Oku sola oluali lovina vi kasimo, ca litepa loku sola Suku kuenda ovina a siata oku tu ĩha.
3. Ovitangi vipi tua siata oku liyaka lavio, kuenda apulilo api a votuiwa?
3 Ndaño tu kasi voluali, pole ka tu pangi onepa kovina viaco. Tua siata oku liyaka locitangi coku yuvula ovisimĩlo violuali viatiamẽla koku lekisa ocisola. Omo liaco, tu yuvuli oku yapuisiwa locisola ka ci songuiwa lukũlĩhĩso wa Suku. Kulie tu sukila oku lekisa ocisola? Nye ci pondola oku tu kuatisa oku lekisa ocisola ci pandikisa kovina viosi, haico ka ci tokoka? Oku lekisa ocituwa caco ci tu kuatisa ndati cilo, kuenda kovaso yoloneke? Tu sukila oku kapako ovisimĩlo via Suku viatiamẽla kondaka yaco, oco a tu songuile.
Lekisa Ocisola ku Yehova
4. Ocisola tu kuetele Suku, ci pondola ndati oku livokiya?
4 Oco tu kũle ombuto yimue, tu sukila oku pongiya osi, oco ovina vi kule ciwa. Ocili okuti ongunja yi sukila oku pongiya ciwa osi oco yi waye ombuto. Noke, o kevelela oco ombuto yaco yi kule. (Va Hev. 6:7) Cimuamue haico ci pita letu okuti, tu sukila oku lekisa ocisola ku Yehova. Nye tu sukila oku linga oco tu pamise ocisola caco? Tu sukila oku pongiya utima wetu u lomboloka osi yiwa, muna mua kũliwa ombuto yocili ci sangiwa Vembimbiliya. Tu ci linga, poku likolisilako oku tanga Embimbiliya oco tu vokiye ukũlĩhĩso tu kuete watiamẽla ku Suku. (Va Kol. 1:10) Oku endaenda kolohongele loku eca atambululo, ci tu kuatisavo oku vokiya ukũlĩhĩso wetu. Anga hẽ, tua siata oku likolisilako oku vokiya ukũlĩhĩso waco?—Olosap. 2:1-7.
5. (a) Ovituwa via Yehova vi tu longisa nye? (b) Nye o pondola oku popia catiamẽla kesunga lia Suku, kolondunge viaye, kuenda kunene waye?
5 Yehova wa siata oku situlula ovituwa viaye Vembimbiliya. Oku tanga Ovisonehua, ci tu kuatisa oku kuata ukũlĩhĩso watiamẽla ku Yehova, kuenda oku sola ovituwa viaye ndeci: Esunga, unene, olondunge, kuenda ocisola. Yehova wa siata oku lekisa esunga, poku tu songuila volonjila viaye, kuenda poku tu ĩha olonumbi viaye via lipua. (Esin. 32:4; Osa. 19:7) Tu pondola oku sokolola ovopange osi a Yehova, kuenda olondunge viaye vi komohisa. (Osa. 104:24) Ovina vi kasi voluali, vi eca uvangi wokuti, Yehova o kuete Ongusu yalua, kuenda unene wa piãla.—Isa. 40:26.
6. Suku wa lekisa ndati ocisola caye kokuetu, kuenda ove wa kongeliwamo ndati?
6 Nye ci popiwa catiamẽla kocisola ca Suku? Ocisola caye ka ci pui, kuenda ci kuatisa omanu vosi. Eye wa ci lekisa poku linga eliangiliyo liocisembi oco ci yovole omanu kekandu. (Tanga Va Roma 5:8.) Ndaño Suku wa lingila eliangiliyo liaco omanu vosi, pole vana va tava kokuaye okuti va lekisa ekolelo Komõlaye, ovo lika va pondola oku kuatisiwa leliangiliyo liaco. (Yoa. 3:16, 36) Tu sukila oku lekisa ocisola ku Suku omo lioku eca Yesu ndocisembi oco tu tambule ongecelo yakandu etu.
7, 8. (a) Nye tu sukila oku linga, oco tu lekise ocisola ku Suku? (b) Afendeli va Suku va siata oku liyaka lovitangi vipi poku pokola kolonumbi viaye?
7 Tu lekisa ndati ocisola ku Suku omo liovina a siata oku tu lingila? Embimbiliya li tambulula hati: “Okusola Suku [ci] lomboloka oku pokola kovihandeleko viaye. Ovihandeleko viaye ka vi lemi.” (1 Yoa. 5:3) Ocisola ca Yehova Suku, ci tu vetiya oku pokola kovihandeleko viaye. Eli olio esunga lieci tua siatela oku kunda catiamẽla konduko yaye kuenda Kusoma waye, una u kuatisa omanu vosi. Nda tua ci linga lutima wetu wosi, tu lekisa okuti, tu kasi oku pokola kovihandeleko via Suku lovisimĩlo via sunguluka.—Mat. 12:34.
8 Vamanjetu voluali luosi, va siata oku pandikisa poku pokola kovihandeleko via Suku ndaño omanu ka va lekisa onjongole kesapulo Liusoma. Pole, va siata oku likolisilako oku tẽlisa upange wavo woku kunda. (2 Tim. 4:5) Ndaño lovitangi, tua siatavo oku vetiyiwa oku longisa omanu ukũlĩhĩso watiamẽla ku Suku, kuenda oku pokola kovihandeleko viaye.
Esunga Lieci tu Lekisila Ocisola ku Ñala Yetu Yesu Kristu
9. Kovina vipi Kristu a pandikisa, kuenda nye co vetiya oku ci linga?
9 Ndaño tua siata oku lekisa ocisola ku Suku, pole, kuli ovina vikuavo vi tu vetiya oku lekisa ocisola Komõlaye. Ndaño ka tua la mola Yesu, pole, osimbu tuamamako oku lilongisa ovina viatiamẽla kokuaye, ocisola tu u kuetele ci li vokiya. (1 Pet. 1:8) Kovina vipi Yesu a pandikisa? Osimbu Yesu a kala oku tẽlisa ocipango ca Isiaye, wa suvukiwa lomanu, wa lambalaliwa, vo lundila, kuenda vo talisa ohali. (Tanga Yoano 15:25.) Ocisola Yesu a kuatela Isiaye, co kuatisa oku pandikisa kovitangi a liyaka lavio. Ocisola a kuata, co vetiya oku lieca ndocilumba cocisembi coku yovola omanu.—Mat. 20:28.
10, 11. Nye tua nõlapo oku linga omo liovina Kristu a tu lingila?
10 Ovina Yesu a linga, vi tu vetiya calua. Oku sokolola ovina a siata oku tu lingila, ocisola tu u kuetele ci livokiya. Omo okuti tulondonge via Yesu, tu sukila oku amamako oku lekisa ocisola ndeci eye a linga. Momo ci tu kuatisa oku pandikisa loku pokola kovihandeleko via Suku, kuenda oku kunda olondaka viwa Viusoma, loku longisa omanu oco va linge olondonge.—Mat. 28:19, 20.
11 Omo liocisola Kristu a kuetele omanu vosi, tu sukila oku tẽlisa ocikele tua tambula osimbu esulilo ka lieyile. (Tanga 2 Va Korindo 5:14, 15.) Ocisola Kristu a lekisa, ca yulula onjila yoku tẽlisa ocipango ca Suku catiamẽla komanu. Ongangu a tu sila, yi tu kuatisa oku panga onepa kocipango caco. Tu ci linga poku lekisa ocisola ku Suku olonjanja viosi. (Mat. 22:37) Tu pondola oku lekisa ocisola cetu ku Yesu poku pokola kovina a longisa loku kapako ovihandeleko viaye. Nda tua ci linga, tu lekisa okuti, tua nõlapo oku teyuila uviali wa Suku ndeci Yesu a linga.—Yoa. 14:23, 24; 15:10.
Kuama Onjila Yavelapo Yocisola
12. Olondaka Paulu a popia viokuti, “onjila yavelapo,” vi lomboloka nye?
12 Upostolo Paulu wa kuama ongangu ya Kristu. Omo liaco, wa lekisa utõi poku lungula vamanji oco va kuame ongangu yaye. (1 Va Kor. 11:1) Paulu wa vetiya Akristão vo ko Korindo oco va lekise ombili kolongavelo vimue viespiritu vina ovapostolo vatete va lekisile, ndeci oku sakula omanu, kuenda oku vangula alimi a litepa. Pole, wa va sapuila hati, kuli ocina cikuavo va pondola oku kuata. Kelivulu lia 1 Va Korindo 12:31, Paulu wa lombolola hati: “Ndu lekisi onjila ya velapo.” Ocinimbu eci, ci lombolola okuti, kuli onjila yavelapo yocisola. Onjila yaco yavelapo ndati? Paulu wa lombolola ulandu waco. (Tanga 1 Va Korindo 13:1-3.) Ndaño Paulu wa kuata uloño kuenda wa linga ovina vialua, nda ka lekisile ocisola, uloño waco nda ka wa kuatele esilivilo. Espiritu lia Suku lio kuatisa oku lombolola esilivilo liondaka yaco. Ongangu ya Paulu yi tu kuatisa oku kuama onjila yavelapo yocisola!
13. (a) Cipi ocinimbu Cembimbiliya cunyamo wo 2010? (b) Momo lie ocisola ka ci tokokela?
13 Noke Paulu o tu sapuila eci ci lomboloka ocisola kuenda eci ka ci lomboloka ocisola. (Tanga 1 Va Korindo 13:4-8.) Sokiya otembo yoku konomuisa Embimbiliya oco o limbuke ovina vi sukiliwa koku lekisa ocisola. Kũlĩhĩsa olondaka via sulako viocinimbu 7, kuenda viatete viocinimbu 8 vi popia hati: ‘Ocisola ci pandakaisa kovina viosi. Ocisola lalimue eteke ci tokoka.’ Olondaka evi, ovio ocinimbu Cembimbiliya cunyamo wo 2010. Kocinimbu 8, Paulu wa popia hati, volongavelo viespiritu mua kongela oku imba owanji, kuenda oku vangula alimi a litepa, ana Akristão va kuamele eci ekongelo liatete lia sokiyiwa. Ndaño vokuenda kuotembo olongavelo viaco vieya oku sulila, pole, Akristão vocili va kasi oku amamako oku lekisa ocisola. Yehova eye ono yocisola, kuenda o kala otembo ka yi pui. Ocisola ka ci tokoka, kuenda cikamamako otembo ka yi pui. Momo oco ocituwa cavelapo ca Suku yetu una ka kuete efetikilo ndaño esulilo.—1 Yoa. 4:8.
Ocisola ci Pandikisa Kovina Viosi
14, 15. (a) Ocisola ci tu kuatisa ndati oku pandikisa poku liyaka lovitangi? (b) Momo lie manji umue umalẽhe ka konyohele omo lielambalalo?
14 Nye ca siata oku kuatisa Akristão oku pandikisa ndaño lovitangi va siata oku liyaka lavio? Ocisola coku pokola kolonumbi Viembimbiliya, oco ca siata oku va kuatisa. Vocisola caco, mua kongela oku siapo ovokuasi tu kuete. Mua kongelavo oku lekisa epandi toke kolofa, ndeci Kristu a linga. (Luka 9:24, 25) Sokolola ulandu Wolombangi Via Yehova via kala vokayike. Sokololavo ulandu wa vana va talisiwa ohali kocila coku kangisila omanu vokuenda Kuyaki Wavali Voluali Luosi, kuenda noke liuyaki waco.
15 Umalẽhe umue Ombangi ya Yehova o tukuiwa hati, Wilhelm kofeka yo Alemanya, wa pandikisa kovitangi viaco. Ndaño Asualali olongangala vo sapuila hati o pondiwa, eye ka konyohele, pole, wamamako loku pandikisa. Omo liaco, wa soneha ukanda umue woku liusika lepata liaye loku popia hati: “Tu sukila oku lekisa ocisola ku Suku, ndomo Usongui wetu Yesu Kristu a ci popia. Nda tua pokola kokuaye, oka tu ĩha onima.” Noke, umue pokati kepata liaye, wa lombolola vocipama cimue Cutala Wondavululi hati: “Otembo tua liyaka lelambalalo, ame kumue lepata liange, tua pitisa kovaso ocisola cetu ku Suku.” Vamanji vamue va kala vokayike kolofeka vimue ndeci: ko Armenia, ko Eritrea, Kombuelo yo Korea, kuenda kolofeka vikuavo, va pandikisavo kelambalalo. Ovo va pandikisa omo liocisola va kuatela Yehova.
16. Ovitangi vipi vamanji kofeka yo Malawi va liyaka lavio?
16 Vamanji kolofeka vialua va siata oku liyaka lovitangi vi kapa voseteko ekolelo liavo. Olombangi Via Yehova kofeka yo Malawi, via pandikisa kelambalalo liolombiali, kuenda via liyaka lovitangi vialua ci soka 26 kanyamo. Omo liepandi va lekisa, va tambula onima yiwa. Eci elambalalo lia pitila kesulilo, vofeka yavo mua kala 18.000 Kolombangi Via Yehova. Noke liakũi atatu kanyamo, etendelo liavo lia pitahãla eci ci soka 38.393 kakundi. Vamanji kolofeka vikuavo, va kuatavo asumũlũho aco.
17. Ovitangi vipi vamanji vamue va siata oku liyaka lavio vepata liavo, kuenda nye ca siata oku va kuatisa oku pandikisa kovitangi viaco?
17 Ocili okuti afendeli valua va Suku va siata oku lambalaliwa. Pole, ka ca lelukile oku pandikisa kelambalalo li tunda kepata. Vamanji vamue va siata oku lambalaliwa la vana va kasi vonjo yavo, ale lomanu vakuavo vakuepata. Yesu wa popele hati, Akristão vaka liyaka lovitangi viaco. Vamanji valua va siata oku limbuka oku tẽlisiwa kuolondaka viaye. (Mat. 10:35, 36) Amalẽhe va siata oku lambalaliwa lolonjali viavo ka vi lilongisa Embimbiliya. Vamue pokati kavo eci va tundisiwa kolonjo viavo, va siata oku tambuiwa Lolombangi Via Yehova. Vakuavo va siata oku tundisiwa kolonjo viepata liavo omo lielambalalo. Nye ca siata oku va kuatisa oku pandikisa kovitangi viaco? Ndaño va likuete omunga la vamanji, pole, ocisola va kuetele Yehova kuenda Omõlaye, oco ca siata oku va kuatisa oku pandikisa.—1 Pet. 1:22; 1 Yoa. 4:21.
18. Ocisola ci pandikisa kovina viosi ci pondola ndati oku pamisa Akristão va kuele?
18 Kuli ovitangi vialua vamanji va siata oku liyaka lavio okuti, va sukila oku lekisa ocisola ci pandikisa kovina viosi. Vamanji vana va kuele, va siata oku pamisa olohuela viavo poku pokola kolondaka via Yesu wa popia hati: “Eci ca tokekisa Suku omunu ka ka ci [tepe].” (Mat. 19:6) Nda vamanji va kuele va kasi oku “tala ohali yoketimba,” va sukila oku ivaluka okuti, Yehova o pondola oku va kuatisa oco va pamise olohuela viavo. (1 Va Kor. 7:28) Ondaka ya Suku yi popia hati, ‘ocisola ci pandikisa kovina viosi.’ Omo liaco, ulume lukãi waye, va sukila oku lekisa ocisola, oco va pamise olohuela viavo.—Va Kol. 3:14.
19. Nye afendeli va Suku va siata oku linga noke liahunguhungu ofela?
19 Ocisola ci tu kuatisa oku pandikisa kovina viosi eci tu pita lovilemawe. Kombuelo yofeka yo Peru, omanu va pita locilemawe. Ehunguhungu liofela li tukuiwa hati, Katrina, lia teya olonjo viosi via kala ocipepi lo Golfo, kofeka yo Estados Unidos. Olonjo vialua via vamanji via teyiwa locilunga caco, kuenda va pesela ovina viavo. Ocisola ca vetiya vamanji vo kolofeka vikuavo oku eca ekuatiso. Vamue va lieca kupange woku semulula olonjo viaco, kuenda Olonjango Viusoma. Ekuatiso liavo, lieca uvangi wokuti, vamanji va likuetele ocisola pokati ndaño lovitangi.—Yoa. 13:34, 35; 1 Pet. 2:17.
Ocisola ka ci Tokoka
20, 21. (a) Momo lie ocisola ci kuetele esilivilo lia velapo? (b) Momo lie wa nõlelapo oku kuama onjila ya velapo yocisola?
20 Koloneke vilo, tua siata oku limbuka ndomo afendeli va Yehova va kasi oku lekisa ocisola ku vakuavo. Ocisola caco, ca siata oku va kuatisa oku liyaka lovitangi. Tu konomuisi ndomo upostolo Paulu a lombolola ulandu waco. Catete, wa popia hati, olongavelo viespiritu vika sulila, kuenda ekongelo lika amamako oku kula. Noke wa malusula lolondaka vi popia hati: “Cilo pa siala ekolelo, lelavoko, locisola, katatu kavio, puãi pokati kavio, ca piãla ocisola.”—1 Va Kor. 13:13.
21 Ovina viosi tua kolela vika tẽlisiwa, kuenje noke yoku tẽlisiwa, ka tuka sukila vali oku kuata ekolelo kovina viaco. Elavoko liovina viosi tu kasi oku kevelela tunde kosimbu, ka tuka li sukila vali eci ovina viosi vika linga viokaliye. Pole, nye ci popiwa catiamẽla kocisola? Ocisola ka ci sulila, momo cika kala otembo ka yi pui. Omo lioku kala otembo ka yi pui, tuka mõla oku tẽlisiwa kuovina viosi viatiamẽla kocisola ca Suku, kuenda tuka kuata elomboloko liovina viaco. Nda wa linga ocipango ca Suku loku kuama onjila ya velapo yocisola cina ka ci tokoka, oka kuata omuenyo ko pui.—1 Yoa. 2:17.
O Tambulula Ndati?
• Momo lie tu sukilila oku yuvula ocisola ka ci songuiwa lukũlĩhĩso wa Suku?
• Ocisola ci tu kuatisa oku pandikisa kovina vipi?
• Momo lie ocisola ka ci tokokela?
[Elitalatu kemẽla 25]
Ocisola tu kuetele Suku, ci tu vetiya oku kunda olondaka viwa
[Elitalatu kemẽla 26]
Ocisola ka ci tokoka, ca kuatisa vamanjetu kofeka yo Malawi oku pandikisa kelambalalo
[Etosi Liavelapo kemẽla 27]
Ocipama Cembimbiliya cunyamo wo 2010, ci popia hati: ‘Ocisola ci pandakaisa kovina viosi. Ocisola lalimue eteke ci tokoka.’—1 Va Kor. 13:7, 8.