‘Ocipango ca Suku ci Lingiwe’
1. Yipi osapi yohongele yilikasi yunyamo wo 2012, kuenda momo lie ca sungulukila oku kũlĩhĩsa ulandu waco?
1 Tua lulikiwa omo liocipango ca Yehova. (Esit. 4:11) Nda ka tua lilongisile loku linga ocipango ca Suku, ka tu tẽlisa esunga lieci tua lulikiwila. Pole ka ca lelukile oku ci linga, momo tu kasi oku liyaka lonjongole yovutima yoku “lingainga ocipango cetimba leci covisimilo” ale coku “linga ndeci vakualofeka.” (Va Efe. 2:3; 1 Pet. 4:3; 2 Pet. 2:10) Nda ka tu kuete ekuatiso lia Suku, tu kala kohele yoku ‘kuatiwa Leliapu ha tu lingi ocipango caye.’ (2 Tim. 2:26) Ohongele yilikasi yunyamo wo 2012, yi ka kuatisa omunu lomunu oku kapako epingilo liatatu yohutililo ya Yesu ya linga hati, “ocipango cove ci lingiwe.”—Mat. 6:9, 10.
2. Apulilo api a ka tambuluiwa vokuenda kuohongele?
2 Apulilo a ka Tambuluiwa: Osimbu o yevelela ulandu wohongele, kũlĩhĩsa atambululo apulilo a-a: Oku yevelela Ondaka ya Suku ci kuete esilivilo lie? Tu limbuka ndati eci Suku a yongola kokuetu? Momo lie tu sukilila oku sandiliya omanu vosi? Tu sanga ndati ukuasi, lomuenyo wesanju? Ene amãlehe, ovilinga vipi vu sukila oku lekisa kovaso a Yehova? Onima yipi yi tunda koku linga ocipango ca Suku? Momo lie ci kuetele esilivilo cilo, oku pamisa kuenda oku vetiya vakuetu?
3. Tu kuatisiwa ndati lulandu wohongele yilikasi?
3 Lipongiya oco o ka kale kohongele loku yevelela ciwa ovipama. Onumiwa yo Betele ale manji ukuakunyula akongelo o ka sanjukila oku kala lene kohongele. Osimbu ohongele ka ya fetikile ale kesulilo, sanda onjila yoku sapela laye kuenda ukãi waye nda o kuele. Eci o tiukila konjo, ku ka linge “ukuakuyeva lika loku ivala,” pole pitululi ovipama viohongele kumosi lepata kuenda sapeli ndomo vu pondola oku tẽlisa ciwa ocipango ca Suku.—Tia. 1:25.
4. Momo lie ci kuetele esilivilo oku pitisa kovaso oku linga ocipango ca Suku?
4 Vana va sanda olonjongole viavo muẽle kuenda va likala oku linga ocipango ca Yehova, ndopo va ka nyoliwa. (1 Yoa. 2:17) Hesumũlũhokuolio tu kuete, omo Yehova wa siata oku tu pongiyila ovina vi tu kuatisa oku pitisa kovaso ocipango Caye!