Ondaka ya Suku yi Kuatisa Koku Longisa

1. Yipi osapi yohongele yimbo yunyamo wupange wo 2014 kuenda apulilo api a ka tambuluiwa kohongele yaco?

¹ Yehova ‘Ulongisi wetu Unene,’ eye ulongisi wa velapo voluali. (Isa. 30:20, 21) Yehova o tu longisa ndati? Eye wa eca Embimbiliya okuti olio elivulu lia velapo pokati kalivulu osi. Elongiso liokilu li tu kuatisa ndati ketimba, kovisimĩlo, kekalo, loku pamisa ekolelo lietu? Etambululo liepulilo eli li ka kũlĩhĩsiwa vokuenda kuohongele Yimbo yunyamo wupange wo 2014. Osapi yaco yeyi: ‘Ondaka ya Suku yi Kuatisa Koku Longisa.’ Oyo yopiwa kelivulu lia 2 Timoteo 3:16.

2. Apulilo api a ka tambuluiwa vatosi a velapo?

² Kũlĩhĩsa Atosi a Velapo: Atosi a velapo ulandu wohongele a ka konomuisiwa poku tambulula apulilo a kuãimo:

• Elongiso lia Suku li tu kuatisa ndati komuenyo wetu? (Isa. 48:17, 18)

• Nda tua linga apongoloko kekalo liomuenyo wetu oco tu vumbe Yehova poku litumbika kupange wotembo yosi, nye tu lavoka oku tambula? (Mal. 3:10)

• Eci tu yeva ‘ovilongua vi tunda kuiñi’ tu kala ndati? (Va Hev. 13:9)

• Tu setukula ndati ‘onjila ya Yesu yoku longisa’? (Mat. 7:28, 29)

• Momo lie vana vakuete ocikele coku longisa vekongelo va sukilila oku lilongisa ovo muẽle? (Va Rom. 2:21)

• Ondaka ya Suku yi kuete esilivilo lie? (2 Tim. 3:16)

• Omanu va kasi oku vetiyiwa ndati loku ‘tuñunyiwa’ kuolofeka? (Hag. 2:6, 7)

• Ekolelo lipi Yehova a tu kuetele? (Va Efe. 5:1)

• Momo lie tu sukilila oku likolisilako oco tua amameko oku longisiwa la Yehova? (Luka. 13:24)

3. Momo lie oku yevelela lutate ulandu wohongele yimbo wa pongiyiwa votembo ya sokiyiwa ci kuetele esilivilo?

³ Kelivulu lia 2 Timoteo ocipama 3, osimbu Paulu ka sonehele olondaka kuopiwa osapi yohongele, wa tukula otembo yovitangi yi situlula oloneke via sulako. Eye wa soneha ndoco: “Omanu vãvi lolohembi vamamako loku linga cĩvi haivo va kemba kemba loku kembiwa.” (2 Tim. 3:13) Oco ka tu ka kembiwe, ci kuete esilivilo oku yevelela kuenda oku kapako elongiso lia Suku! Omo liaco, tu nõlipo oku yevelela lutate ulandu wohongele yimbo wa pongiyiwa votembo ya sokiyiwa.