Vangula Olondaka vi Vetiya
1. Ndomo Akristão vatete va enda oku pongolola ombangulo poku kundila omanu, ci tu longisa nye?
1 Akristão vatete, va kundaila olondaka viwa komanu vakuapata aiñi aiñi kuenda kovitumãlo via litepa. (Va Kol. 1:23) Ndaño okuti va kunda esapulo Liusoma wa Suku, pole, va enda oku pongolola ombangulo ndomo yi litava lekalo liomanu va sanga. Kũlĩhĩsa ongangu yupostolo Petulu okuti, poku fetika oku kundila va Yudea vana va sumbilile Ovisonehua, wa tukula uprofeto Yoeli. (Ovil. 2:14-17) Kũlĩhĩsavo olondaka via Paulu vi sangiwa kelivulu Liovilinga 17:22-31, kuna ku lekisa ndomo a vangula la va Helasi. Koloneke vilo, omo omanu tua siata oku kundila va sumbila Ovisonehua, tu pondola oku tukula Embimbiliya poku kundila konjo lanjo. Omo liaco, tu sukila oku kuata utate poku sapela lomanu vana ka va kuete onjongole yoku lilongisa Embimbiliya, ale vava ka va sole oku vangula ovina viatiamẽla ketavo kuenda komanu vana okuti Hakristãoko.
2. Tu pondola ndati oku talavaya ciwa lalivulu etu oco tu kuatise omanu vana va sole esapulo Liembimbiliya la vana ka va li sole?
2 Talavaya Ciwa Lalivulu: Unyamo ulo, onjila tua siata oku kuama poku eca alivulu, yi ka pongoloka okuti, konjanja lonjanja volosãi vivali, tu ka eca olorevista, olotratadu, kuenda olombrochura. Ndaño omanu tua siata oku sanga vocikanjo ka va tava kesapulo Liembimbiliya, tu sukila oku va lekisa ocinimbu cimue vorevista, votratadu, ale vombrochura okuti ci pondola oku vetiya onjongole yavo. Pamue ka tu tangi ocinimbu cimue Cembimbiliya lomanu tu sanga onjanja yatete, pole, tu sukila oku tiuka oco tu va kuatise oku kolela Kululiki wetu kuenda Kondaka yaye. Handi vali, poku kundila omanu vana va sole esapulo Liembimbiliya, tu sukila oku eca kokuavo alivulu a pondola oku vetiya onjongole yavo. Citava okuti, tu va ĩhavo elivulu Embimbiliya li Longisa Nye? ale olombrochura vivali ndeci: Yevelela Suku, kuenda Yevelela Suku Kuenje Kala Otembo ka yi Pui, ndaño ka via sokiyiwile oku vi eca vosãi yaco. Momo alivulu aco a pondola oku vetiya onjongole yomanu.
3. Utima womanu tua siata oku kundila vocikanjo u sokisiwa ndati losi?
3 Pongiya Ciwa Osi: Utima womunu u sokisiwa losi. (Luka 8:15) Utima womanu vamue u sukila oku pongiyiwa tete oco va tave kesapulo Liembimbiliya, ndeci tu pongiya ciwa osi okuti, eci tu imba ombuto yi kuata olombombo kuenda yi kula ciwa. Omo okuti kocita catete alongisi Vondaka ya Suku va kuata onima yiwa poku kundila omanu vosi, ca va nenela esanju lialua lonjolela. (Ovil. 13:48, 52) Tu pondolavo oku kuata onima yiwa poku kũlĩhĩsa ndomo tua siata oku vangula lomanu olondaka vi vetiya.