Nye ci tu Vetiya Oku Kunda?
1. Elitokeko lipi li kasi pokati kocisola lupange wetu woku kunda?
1 Oku kunda olondaka viwa Viusoma wa Suku, upange umue wa velapo tu pondola oku linga koloneke vilo. Poku linga upange waco, tu lekisa epokolo kovihandeleko vivali, okuti: Ocisola tu kuetele Yehova, kuenda omanu vosi. (Mar. 12:29-31) Ocisola, oco ci tu vetiya oku kuata ombili yoku linga upange woku kunda.—1 Yoa. 5:3.
2. Upange wetu woku kunda u lekisa ndati ocisola tu kuetele Yehova?
2 Ocisola tu Kuetele Yehova: Ocisola tu kuetele Yehova ci tu vetiya oku teyuila unu waye. Vokuenda kueci ci pitahãla olohulukãi epandu kanyamo, Satana wa siata oku lundila calua Yehova. (2 Va Kor. 4:3, 4) Eli olio esunga lieci omanu va simĩla okuti Suku o kangisa olondingaĩvi vifelu viondalu, va tava kelongiso lia Suku Muvatatu, kuenda va simavo okuti, Suku ka kapeleko ovitangi viomanu. Vamue va sima vati, ka kuli Suku. Omo liaco, tu vetiyiwa oku longisa omanu vaco oco va kũlĩhe ocili catiamẽla ku Isietu wokilu! Alikolisilo etu koku eca uvangi, a sanjuisa Suku pole, a sumuisa Satana.—Olosap. 27:11; Va Hev. 13:15, 16.
3. Kolonepa vipi upange wetu woku kunda u situlula ocisola tu kuetele omanu?
3 Ocisola tu Kuetele Omanu: Onjanja lonjanja eci tu kundila omunu umue, tu lekisa ocisola tu u kuetele. Koloneke vilo viohali, omanu va sukila oku yeva esapulo liwa. Valua va sokisiwa la va Ninivei va kala koloneke via Yona okuti, “ka va kũlĩhĩle oku tepisa eka liondio leka liepĩli.” (Yona 4:11) Upange wetu woku kunda, u longisa omanu ndomo va kuata esanju komuenyo. (Isa. 48:17-19) Weca elavoko. (Va Rom. 15:4) Nda omanu va tu yevelela kuenda va kapako ovina tu va lilongisa, ‘va ka popeliwa.’—Va Rom. 10:13, 14.
4. Ocina cipi okuti, Yehova lalimue eteke a ka ivalako?
4 Omãla vana va kuete olondunge, ka va lekisa lika ocisola kolonjali viavo vapuluvi amue. Ovo va ci linga otembo yosi. Cimuamue haico ci pita letu okuti, ocisola tu kuetele Suku kuenda omanu, ci tu vetiya oku lavulula oco tu ece uvangi kapuluvi osi, kuenda ka tu ci lingi lika volonjanja vimue. Omo liaco, ka tu ka liwekipo oku kundila omanu. (Ovil. 5:42) Momo Yehova lalimue eteke a ka ivalako ocisola tu u kuetele.—Va Hev. 6:10.