Ndomo ku Fetikiwa Ombangulo Poku Talavaya Lotuikanda

Tunde kosãi ya Susu 2018, kemẽla liatete Liekalo Lietu Tuakristão Kuenda Oku Kunda, kua siata oku sandekiwa onepa yokuti, ombangulo yikuamiwa. Tua siata oku vetiyiwa oku sapela lomanu tu sanga okuti, ka tu eci lika alivulu kokuavo. Oco ci kuatise akundi oku mioñolola onjila ndomo va fetika ombangulo, onepa yolovideo viombangulo yikuamiwa, ya siata oku lekisa ndomo tu fetika ombangulo poku talavaya lika Lembimbiliya. Anga hẽ eci ci lomboloka okuti ka tu sukila oku talavaya lalivulu etu eci tu kundila konjo lanjo? Sio, hacoko! Ndeci, otuikanda vi pondola oku tu kuatisa oku fetika ombangulo yimue. Poku talavaya lotuikanda, tu pondola oku kuama olonjila ndevi:

1. Linga apulilo a sangiwa kemẽla liatete.

2. Lekisa etambululo Liembimbiliya li sangiwa kocisonehua ci kasi kemẽla liavali. Nda otembo yecelela, tanga kuenda lombolola olonumbi vi sangiwa vokokanda kaco.

3. Eca okokanda kaco komunu wa sangiwa kuenda u vetiya oku ka tanga.

4. Osimbu kua endele, lekisa kokuaye onepa yokuti, “Sokolola Epulilo Eli” kuenda sokiya oku sapela etambululo Liembimbiliya onjanja yikuavo.

Eci o tiuka tambulula epulilo wa sile kuenda sia epulilo likuavo oco o li tambulule eci o tiuka. O pondola oku nõla epulilo limue li sangiwa vonumbi yetu yo internet ale velivulu lia tukuiwa koñoño yokokanda kaco. Ca sunguluka oku tukula ombrochura losapi hati, Olondaka Viwa vi Tunda ku Suku! ale elivulu likuavo li sangiwa Vovimãleho Vietu Vioku Longisa.