Ono Yovipama Viohongele Ekalo Lietu Tuakristão Kuenda Oku Kunda
OSEMANA 5-11 YA MBALAVIPEMBE
OVOKUASI A SANGIWA VONDAKA YA SUKU | ETUNDILO 31–32
“Tili Efendelo Lioviteka”
(Etundilo 32:1) Eci Omanu va limbuka okuti poku tunda komunda Mose wa cilua, oco omanu va liongoluila ku Arone, va popia laye vati, Votoka. Tu tungile olosuku vi tu pitaile kovaso yetu. Momo omunu waco Mose wa tu tundisa vofeka ye Egito, ka tua kũlĩhile eci cukuete.
Utala Wondavululi, 15/5/2009 kem. 11 ocin. 11
Likolisilako Oku Kula Kespiritu Momo ‘Eteke Linene Lia Yehova Li Kasi Ocipepi’
11 Oku kapako ovina tua siata oku lilongisa Vovisonehua, ka ca lelukile, capiãla enene poku liyaka lovitangi. Noke yokatembo kamue tunde eci Yehova a yovola va Isareli kupika Kegito, ovo va fetika oku “hoya la Mose” kuenda vamamako ‘oku nyika Yehova.’ Momo lie? Momo ka va kuatele ovava. (Etu. 17:1-4) Osimbu handi ka papitile olosãi vivali tunde eci va linga ocisila la Suku loku tava oku pokola ‘kolondaka viosi Yehova a popia,’ ovo va lueya ovihandeleko viaye poku fendela oviteka. (Etu. 24:3, 12-18; 32:1, 2, 7-9) Anga hẽ, va ci linga omo lioku limbuka okuti Mose wa endele Komunda Horeve oku tambula olonumbi wa kala oku cilua? Anga hẽ va simĩle okuti vaka liyaka vali la va Amaleke kuenje vaka yuliwa lavo nda Mose una wa va kuatisile tete keyile lonjanga? (Etu. 17:8-16) Citava okuti va Isareli va kuatele ovisimĩlo viaco, pole, ‘ka va lekisile epokolo.’ (Ovil. 7:39-41) Paulu wa vetiya Akristão oco va likolisileko okuti, ‘lomue o konyoha loku sina’ nda va Isareli va kuata usumba woku iñila Vofeka Yohuminyo.—Va Hev. 4:3, 11.
(Etundilo 32:4-6) Eye wa tambula ulu waco povaka avo, wo songa locivela kuenje wa tunga ociñumañuma congombe. Oco hati, a Isareli, Suku wa ku upa vofeka ye Egito, yu. 5 Eci Arone a ci mõla, wa ci tungila utala. Arone a imba oluiwa, hati, Hẽla ku kala ofesta ya Yehova. 6 Oco hẽla va pasuka ociteketeke, va lumba ovilumba vioku pia elisi, va nena ovilumba viombembua, kuenje omanu va tumãla loku lia loku nyua. Va votoka oku piluka.
Utala Wondavululi, 15/10/2015 kem. 25 ocin. 12
Pokola ku Suku Oco o Kuatisiwe Lolohuminyo Viaye
12 Yehova wa tẽlisa ohuminyo Yocihandeleko a lingile ku va Isareli poku sokiya oku tunga ombalaka yoku u fendela. Kuenje, Yehova wa nõla ovitunda okuti, vi kuatisa omanu vana va lueya oco va kuate ukamba laye. Pole, va Isareli va ivalako ohuminyo va lingile yoku pokola ku Suku, kuenje, “va valula U o kola wa Isareli.” (Osa. 78:41) Osimbu Mose a kala oku tambula olonumbi komunda Sinai, va Isareli va liwekapo oku pandikisa, kuenje, va pua ekolelo ku Suku loku sima okuti, Mose wa va yanduluka. Omo liaco, va tunga ociñumañuma congombe loku popia vati: “A Isareli, Suku wa ku upa vofeka [Yegito], yu.” (Etu. 32:1, 4) Noke, va fetika oku fendela ociñumañuma caco loku eca ovilumba, kuenje va popia vati: ‘Va kala oku lingila Yehova ocipito.’ Eci Yehova a mola ovina viaco, wa sapuila Mose hati: “Va [yapuka lonjanga] vonjila nda va lekisa oku endelamo.” (Etu. 32:5, 6, 8) Omo liaco, va Isareli ka va tẽlisile ohuminyo va lingile ku Suku.—Ate. 30:2.
(Etundilo 32:9, 10) Kuenje Yehova wa popia la Mose hati, nda mõla omanu vaco okuti va huka muẽle ocili. 10 Oco handi ci kale peka liange okuti onyeño yange yi va wengukile. Ndi va nyõla. Ove puãi hu lingisa ofeka yinene.
Utala Wondavululi, 18.07 kem. 20 ocin. 14
“Helie wa Tiamẽla ku Yehova?”
14 Va Isareli va kũlĩhĩle okuti ka ca sungulukile oku fendela oviteka. (Etu. 20:3-5) Pole, lonjanga yalua va fetika oku fendela ongombe yulu! Ovo va sinĩla ovihandeleko via Yehova, poku ci linga va likemba ovo muẽle oku sima okuti handi vakasi konele ya Yehova. Arone wa tukula efendelo liaco liongombe hati, “ocipito ca Yehova”! Nye Yehova a linga? Eye wa sapuila Mose okuti, omanu va kala loku “livĩhisa” kuenda va pambuka vonjila Eye ava “lekisa oku endelamo.” Yehova wa temẽle calua okuti, wa simĩle oku kundula va Isareli vosi.—Etu. 32:5-10.
Oku Konomuisa Lutate Ovina vi Sangiwa Vembimbiliya (Akuk. 10)
(Etundilo 31:17) Olio ondimbukiso pokati kange la va Isareli otembo ka yi pui. Omo oloneke epandu Yehova wa lulika ilu longongo, kuenje eteke liepanduvali wa puyuka yu wa kavuluka.
Utala Wondavululi, 19.12 kem. 3 ocin. 4
“Ovina Viosi vi Kuete Uvo Wavio” Woku Talavaya Kuenda Woku Puyuka
4 Anga hẽ ongangu yupange walua u lingiwa la Yehova kuenda Yesu, ci tu vetiya oku sima okuti ka tu sukila vali epuyuko? Sio, hacoko! Yehova lalimue eteke a kava. Omo liaco, eye ka sukila epuyuko. Pole Embimbiliya li popia okuti, noke yoku lulika ilu losi, eye “wa puyuka yu wa kavuluka.” (Etu. 31:17) Eci ci lomboloka okuti Yehova wa mala oku lulika ovina kuenda wopa otembo yoku tala ovina viosi a lulika. Yesu wa talavayavo calua eci a kala palo posi, pole, eye wa sanda otembo yoku puyuka kuenda yoku lia lakamba vaye.—Mat. 14:13; Luka 7:34.
(Etundilo 32:32, 33) Kaliye puãi nda o tava, ecela ekandu liavo. Nda ku tava, lamevo nyõla velivulu liove wa sonẽha. 33 Yehova puãi wa popia la Mose hati, Wosi wa ndingila ekandu eye muẽle nyõla velivulu liange.
Utala Wondavululi, 1/9/1987 kem. 29
Apulilo a Lingiwa la Vakuakutanga
Oku kala omunu umue ivalukiwa kuenda oku taviwa, (onduko yove oku kapiwa “velivulu liomuenyo,”) ka ci lomboloka okuti o kuete elavoko liomuenyo ko pui, ndu okuti ca sokiyiwa ale. Catiamẽla ku va Isareli, Mose wa pinga ku Yehova hati: “Kaliye puãi nda o tava, ecela ekandu liavo. Nda ku tava, lamevo nyõla velivulu liove wa sonẽha.” Suku wa tambulula hati: “Wosi wa ndingila ekandu eye muẽle nyõla velivulu liange.” (Etundilo 32:32, 33) Ndaño okuti Suku wa soneha omunu umue “velivulu” liaye, kuenje omunu waco o linga ukuesino loku yanduluka ekolelo liaye, Suku wa laikele oku nyõla onduko yaye velivulu liomuenyo.’—Esituluilo 3:5.
Oku Tangiwa Kuembimbiliya
(Etundilo 32:15-35) Oco Mose wa ñualapo, wa loka komunda. Wambata peka ovawe avali ovihandeleko. Ovawe aco a sonehĩwa kolonẽle vivali, onẽle lonẽle ya sonẽhĩwa. 16 Ovawe aco upange wa Suku. Lokusonẽha kuaco okusonẽha kua Suku kua tãliwa vovawe. 17 Eci Yehosua a yeva onjuela yomanu va kaluka wa popia la Mose hati, Kocilombo kuli onjuela yovita. 18 Eye hati, Handakako yava va kalukila oku yula; handakako yava va liyula omo va yuliwa. Ondaka njevite ondaka yava va imba ovisungo. 19 Tuli eya ocipepi locilombo kuenje wa mõla ongombe, lomo va kasi loku piluka, oco onyeño ya Mose ya wenguka. Wa kupula ovawe a kala povaka, wa a sasõwaila vepato liomunda. 20 Wa nyañula ongombe va tunga, wa yi yoka londalu, wa yi keleketa ndosema, osema yaco wa yi waya kovava, wa nyuisako va Isareli. 21 Mose wa popia la Arone hati, Omanu hẽ nye va ku linga okuti wa va tiamisa kekandu eli linene? 22 Arone wa kumbulula hati, Onyeño ya cime cange ka yi ka wenguke. Ove wa kũlĩha omanu vaco okuti va puiya enene. 23 Va vangula lame vati, Tu tungile olosuku vi tu songuila. Mose una wa tu upa vofeka ye Egito, eci co sanga ka tu ci. 24 Ame nda va sapuila siti, O kuete ulu o wupe. Oco vo nyiha, lame nda wimba vondalu, kuenje mua tunda ongombe eyi. 25 Eci Mose a mõla okuti omanu va lundukila kehungu momo Arone wa va lunduisa kuenje va pembuiwa pokati kovanyali vavo, 26 oco Mose wa talama kepandavelo liocilombo hati, U wa tiamẽla ku Yehova helie? Eye kokuange. Oco omãla valume vosi va Lewi vongolokela kokuaye. 27 Eye wa popia lavo hati, Ca popia Yehova, Suku ya Isareli, ceci, hati, Omunu omunu a malẽhe osipata yaye kocilalo. A ñuale ñuale vocilombo tunde kepandavelo toke kepandavelo. A ipaye, ci kale manjaye, ci kale u a lisungue laye. 28 Kuenje va Lewi va linga ndondaka ya Mose. Oco eteke liaco kua ipaiwa omanu ca soka huti ño olohulukãi vitatu vialume. 29 Mose yu wa linga hati, Etaili wa litumbiki kupange wa Yehova. Co peselisi, umue omõlaye, umue manjaye. Puãi wa ci lingi okuti Yehova o vu sumuluĩsa etaili. 30 Hẽla liaco Mose wa popia lomanu hati, Wa lingi ekandu linene. Oco cilo namanẽla ku Yehova. Mbi ci ka tava okuti ame ndu livondeli ekandu liene. 31 Mose wa tiukila ku Yehova. Wa popia laye hati, Omanu ava va linga ekandu linene, va litungila olosuku viulu. 32 Kaliye puãi nda o tava, ecela ekandu liavo. Nda ku tava, lamevo nyõla velivulu liove wa sonẽha. 33 Yehova puãi wa popia la Mose hati, Wosi wa ndingila ekandu eye muẽle nyõla velivulu liange. 34 Ove puãi kuende, ka songuile omanu oku nda ku tukuila. Ungelo wange o ku pitila kovaso. Haimo lumue eteke ndi va nyũla ndi va fetuluinya ekandu liavo. 35 Kuenje Yehova wa yambula omanu vaco omo va tunga ongombe Arone a tungisa.
OSEMANA 12-18 YA MBALAVIPEMBE
OVOKUASI A SANGIWA VONDAKA YA SUKU | ETUNDILO 33-34
“Ovituwa vi Komohisa Via Yehova”
(Etundilo 34:5) Yehova yu wa loka valende, wa talama kumue laye, wa tukula onduko ya Yehova.
Perspicaz-3 kem. 101
Onduko
Ovina via lulikiwa vi situlula okuti kuli Suku, pole ka vi situlula onduko ya Suku. (Osa. 19:1; Va Rom. 1:20) Voku kũlĩha onduko ya Suku mua kongela ovina vialua okuti oku kũlĩha lika ondaka yaco ci sule. (2 Asa. 6:33) Voku u kũlĩha ci lomboloka oku kũlĩha ocipango caye, ovopange aye kuenda ovituwa viaye ndomo ci situluiwa Vondaka yaye. (tanga 1 Olos. 8:41-43; 9:3, 7; Neh. 9:10) Ndeci, Mose wa kala ulume umue okuti Yehova wo ‘kũlĩhĩle konduko’ ale wo kũlĩhĩle ciwa. (Etu. 33:12) Mose wa kuata esumũlũho lioku mola ulamba wa Yehova loku yeva oku tukuiwa ‘kuonduko ya Yehova.’ (Etu. 34:5) Poku situluiwa kuonduko ya Yehova ka ca lombolokele lika oku pitulula onduko yaco, pole, mua kongelele oku situluiwa kuovituwa kuenda kuovopange a Suku. “Yehova, Yehova Suku yohenda, ukuacali, ukuakulivala konyeño, ukuacisola calua haeye ukuacili, ukuakumuisa kolohulukãi viomanu ocisola ka ci pui. Ukuakuecela olongole levĩho kuenda akandu, kuenje ka yovuisa ukueko. O fetuluinya ongole yavaisia komãla vavo, lokomãla vomãla vavo, kocitumbulukila catatu leci cakuãla.” (Etu. 34:6, 7) Cimuamue haico okuti, vocisungo ca Mose mua kongela olondaka viokuti, “njevalisa onduko ya Yehova,” ci lombolola ocisila ca Suku la va Isareli kuenda Ocituwa caye.—Esin. 32:3-44.
(Etundilo 34:6) Yehova wa vinjuka kovaso yaye, wa imba ondaka hati, Yehova, Yehova Suku yohenda, ukuacali, ukuakulivala konyeño, ukuacisola calua haeye ukuacili,
Utala Wondavululi, 5/1/2009 kem. 18 ocin. 3-5 kelimi Lioputu
Yehova wa Lisitulula
Ocina catete Yehova a situlula catiamẽla kokuaye ceci okuti eye Suku ‘yohenda, haiye ukuacali.’ (Ocinimbu 6) Ndeci ca lomboluiwa lonoño yimue, ondaka ya pongoluiwa kelimi lio Heveru yokuti “ukuahenda” yi lekisa okuti ohenda ya Suku yi situlula ‘ohenda isia umue a kuetele omãla vaye.’ Ondaka ya pongoluiwa okuti “ukuacali,” yi kuete elitokeko londaka yimue yi “situlula ocisimĩlo cutima wosi omunu umue o kuete ocina cimue, oco a ci ece komunu umue wa suka.” Eci ci lekisa okuti Yehova o yongola okuti tu kũlĩha okuti eye o tata afendeli vaye ndeci olonjali vi tata omãla vavo.—Osamo 103:8, 13.
Noke Yehova wa popia hati “ukuakulivala konyeño.” (Ocinimbu 6) Eye ka kuete ocisimĩlo coku tema lafendeli vaye palo posi. Pole, o lekisa epandi kokuavo, loku livala kakulueya avo kuenda oku eca otembo kokuavo yoku likekembela akandu avo.—2 Petulu 3:9.
Suku amisako oku popia okuti eye “ukuacisola calua haeye ukuacili.” (Ocinimbu 6) Ocisola cocili ale ocisola ka ci pongoloka ocituwa cimue cecelela pokati ka Yehova kumue lafendeli vaye pakala ukamba ka u tokoka. (Esinumuĩlo 7:9) Yehova eye ono yocili. Eye ka kembi kuenda ka kembiwavo. Omo okuti eye “Suku yocili,” tu sukila oku kolela kovina viosi eye apopia, oku kongelamo olohuminyo viaye viokovaso yoloneke.—Osamo 31:5.
(Etundilo 34:7) ukuakumuisa kolohulukãi viomanu ocisola ka ci pui. Ukuakuecela olongole levĩho kuenda akandu, kuenje ka yovuisa ukueko. O fetuluinya ongole yavaisia komãla vavo, lokomãla vomãla vavo, kocitumbulukila catatu leci cakuãla.
Utala Wondavululi, 5/1/2009 kem. 18 ocin. 6 kelimi Lioputu
Yehova wa Lisitulula
Ocina ci kuavo ci kuete esilivilo Yehova a yongola okuti tu ci kũlĩha ceci okuti, eye ukuakuecela “olongole levĩho kuenda akandu.” (Ocinimbu 7) Eye ‘ukuakuecela’ vana valikekembela. (Osamo 86:5) Handi vali, Yehova ka kapiko akulueya. Eye o popia okuti, “ka yovuisa ukueko.” (Ocinimbu 7) Suku o kola haiye ukuesunga, ka ka ecelela okuti vakuakandu ka va ka yambuiwa. Noke ovo va ka lilombolola ku Suku akulueya avo.
Oku Konomuisa Lutate Ovina vi Sangiwa Vembimbiliya
(Etundilo 33:11) Oco Yehova a vangola la Mose, omẽla lomẽla, ndeci omunu a vangula lekamba liaye. Eci Mose a tiukila kocilombo, ukuenje waye Yehosua, omõla a Nune, wo sia vombalaka yoku ñualẽhẽla la Yehova.
(Etundilo 33:20) Puãi hati, Ka ci tava oku mõla ocipala cange. Momo lomue omunu o mõla kuenje o kala vali lomuenyo.
Utala Wondavululi, 1/4/2004 kem. 11 ocin. 5
Atosi Avelapo Velivulu Lietundilo
33:11, 20—Suku wa Vangula Ndati la Mose ‘Mẽla la Mẽla’? Ondaka oku vangula ‘mẽla la mẽla’ yi lomboloka oku livanguisa pokati. Pole, Mose ka vanguile muẽle la Suku. Eye wa vangula lakapitiya ka Suku. Mose ka muile Yehova kocipala. Momo, ‘lomue omunu o tẽla oku mõla ocipala ca Suku kuenje o kala vali lomuenyo.’ Kelivulu lia Va Galatia 3:19, tu tangako hati: ‘Ovihandeleko via eciwa lovangelo peka lia kapitiya.’
(Etundilo 34:23, 24) Kunyamo alume vosi veya lutatu ku Ñala Yehova, Suku ya Isareli. 24 Momo ndi hangisa olofeka kovaso yove, loku amisa olongave viove. Kuenda vali lomue omunu o kuatela usenge wove ocipululu nda ove o lamayana hu tukulukila ku Yehova Suku yove, kunyamo lutatu.
Utala Wondavululi, 1/9/1998 kem. 20 ocin. 5
Pitisa Kovaso Ovina vi Kuete Esilivilo!
Olonjanja vitatu vunyamo, ulume wosi u Isareli kuenda omongoloke vofeka yaco, wa sukilile oku pokola kocihandeleko coku moleha kovaso a Yehova. A songui valua vepata vambataile akãi vavo kuenda omãla, momo va kũlĩhĩle okuti epuluvi liaco lia laikele oku kuatisa epata liosi konepa yespiritu. Pole, elie wa laikele oku teyuila olonjo viavo, ovapia avo kovanyãli osimbu ovo tunda? Yehova wa likuminya hati: “Lomue omunu o kuatela usenge wove ocipululu nda ove o lamayana hu tukulukila ku Yehova Suku yove, kunyamo lutatu.” (Etundilo 34:24) Va Isareli va sukilile oku kuata ekolelo liokuti va laikele oku kuatisiwa calua konepa yespiritu. Anga hẽ Yehova wa tẽlisa ondaka yaye? Ocili okuti oco!
Oku Tangiwa Kuembimbiliya
(Etundilo 33:1-16) Yehova wa popia la Mose hati, Kulo tundako, ove lomanu wopa vofeka ye Egito. Lamani kofeka nda likuminya la Avirahama la Isake kuenda Yakoba, siti, Ndi yeca kombuto yove. 2 Numa ungelo o ku pitila kovaso. Nundisa va Kanana, la va Amori, la va Hiti la va Persi, la va Hiwi kuenda va Yevusi. 3 Lamani kofeka yi tumõha asenjele lowiki. Ame puãi si endi lene sanga ndu kunduili vonjila omo ene vumanu va huka. 4 Eci omanu va yeva olondaka evi vi vala va litetela. Lomue omunu wa wala aposuiso aye evi va liyangola lavio. 5 Momo Yehova wa popia la Mose hati, Popia la va Isareli huti, Wumanu va huka. Nda nda enda lene okasimbu kaño nda ndo kunduli, oco luli aposuiso ene okuti sokolola eci ndinga lene. 6 Oco va Isareli va lula aposuiso avo. Tunde komunda Horeve ka va vi walela vali. 7 Mose oku yelula ombalaka wa yi tamoluaila kofeka, kupãla locilombo. Wa yi tukula hati, Ombalaka yoku ñualẽhẽla la Yehova. Wosi o sanda Yehova o tunda, enda kombalaka yoku ñualẽhẽla la Yehova ya kala kofeka. 8 Oco Mose nda enda kombalaka omanu vosi va votoka vilu, va talama, omunu kuvelo wombalaka yaye, omunu kuvelo wombalaka yaye. Va vanja Mose toke a iñila vombalaka. 9 Eci Mose a iñila vombalaka, ongunji yelende ya loka, ya talama kuvelo wombalaka, kuenje Yehova wa popia la Mose. 10 Eci omanu vosi va mõla ongunji yelende yi tãi kuvelo wombalaka oco omanu vosi va votoka, kuenje va fendela, omunu puvelo wombalako yaye, omunu puvelo wombalaka yaye. 11 Oco Yehova a vangola la Mose, omẽla lomẽla, ndeci omunu a vangula lekamba liaye. Eci Mose a tiukila kocilombo, ukuenje waye Yehosua, omõla a Nune, wo sia vombalaka yoku ñualẽhẽla la Yehova. 12 Mose wa popia la Yehova hati, ove muẽle wa mañinya huti, Lamanisa omanu ava. Puãi kua ndekisile u o tuma lame. Haimo lumue wa popia huti, Nda kulĩha onduko yove haive o kasi ciwa lame. 13 Oco nda ñasi ciwa love, ndongise ovituwa viove okuti hu kulĩha si kala ciwa love. Sokololavo okuti omanu ava omanu vove. 14 Yehova wa linga hati, Ngenda lene ame muẽle. Ame muẽle ndu muisi owusa. 15 Mose wa popia laye hati, Nda ove muẽle kuendi letu, ku ka tupe kulo. 16 Momo ci limbukiwa ndati okuti ñasi ciwa love, ame lomanu vove? Siti te nda wenda letu, okuti ame lomanu vove tu tepisua lomanu vakuavo vosi va kasi kilu lieve.
OSEMANA 19-25 YA MBALAVIPEMBE
OVOKUASI A SANGIWA VONDAKA YA SUKU | ETUNDILO 35–36
“Oku Liangiliyila Upange wa Yehova”
(Etundilo 35:25, 26) Akãi vosi olonoño vakuakupota lovaka avo va nena evi va vi pota, alinya onoloti, la a vumbula la a kusuka, lovalatanya. 26 Akãi vosi ovitima viavo via pinduka lolondunge va pota ovonya olohombo.
Utala Wondavululi 15/12/2014 kem. 4 ocin. 4 kelimi Lioputu
Yehova o Sumũlũisa Una o Kuete Ocituwa Coku Lieca Olumue
Yehova ka sanjukilile lika ovina via lumbiwa, pole wa sanjukilile ocituwa ca vana va lieca olumue koku kuatisa efendelo liocili. Ovo va eca otembo yavo poku linga upange waco. Ulandu u popia hati, “Akãi vosi olonoño vakuakupota lovaka avo va nena evi va vi pota.” Wamisako hati, “akãi vosi ovitima viavo via pinduka lolondunge va pota ovonya olohombo.” Handi vali, Yehova wa eca ku Becalele ‘olondunge, lelimbuko, lukũlĩhiso, luloño wosi.’ Yehova wa eca ku Becalele la Aholiava ovoloño va sukilile oco va tẽlise upange wosi va tumiwile oku linga.—Etu. 35:25, 26, 30-35.
(Etundilo 35:30-35) Mose yu wa popia la va Isareli hati, Tala, Yehova wa tukula Becalele londuko, omõla a Uri omõla a Huru, kepata lia Yuda. 31 Wo yukisa Espiritu lia Suku lio tiamisa kolondunge, lelimbuko, lukũlĩhiso, luloño wosi, 32 loku sovola evi viuloño, poku talavaya lulu lopalata losipi, 33 lo poku songa otuvawe tuoku sokeka ovivela, loku songa oviti, oku linga upange wosi wuloño. 34 Wo kapisa utima woku longisa, leye la Aholiava, omõla a Ahisamaka, kepata lia Dani. 35 Wa va muisa ovitima violondunge ha va talavaya ovopange osi umesele, u woku songa, lu wuloño, lu wokuposuisa olonanga lalinya onoloti la a vumbula la a kusuka, lovalatanya, lu woku tuta, ovopange umesele wosi, la omanu vakuakusovola evi viuloño.
Utala Wondavululi, 15/12/2011 kem. 18 ocin. 6
Afendeli va Suku—Kosimbu va Songuiwa Lespiritu Liaye
6 Ovina Becalele a linga kotembo ya Mose, vi situlula ndomo espiritu lia Suku lia siata oku tu kuatisa. (Tanga Etundilo 35:30-35.) Becalele, wa nõliwile oco a songuile omanu va panga ovikuata vio votavernakulu. Anga hẽ, wa enda oku linga upange waco? Citava okuti wa kuatele uloño woku linga upange waco. Pole, eci a kala Kegito, wa enda oku sukula olondopi. (Etu. 1:13, 14) Becalele wa tẽlisa ndati upange waye? Yehova, eye wa ecele kokuaye espiritu sandu, oco a kuate ‘olondunge, luloño woku limbuka ovina, oku kuata ukũlĩhiso, umesele woku linga ovina, oku sovola ovina viuloño, kuenda oku linga upange wosi.’ Espiritu sandu lia kuatisa Becalele oco a loñolohe. Espiritu liaco lia kuatisavo Aholiava. Becalele la Aholiava va lilongisa uloño kuenje, va longisavo vakuavo oku linga upange waco. Suku eye wa kapele vovitima viavo uloño woku longisa vakuavo.
(Etundilo 36:1, 2) Becalele la Aholiava lomunu wosi Yehova avela uloño lukũlĩhiso okuti va tẽla muẽle oku linga upange umue oku tunga onjo yi kola, va talavaya oku linga cosi Yehova a tukula. 2 Oco Mose wa kovonga Becalele la Aholiava kuenda vosi va loñolõha kovina viñi viñi haivo ovitima viavo via va vetiya oku iya oku linga upange.
Utala Wondavululi, 15/12/2011 kem. 19 ocin. 7
Afendeli va Suku—Kosimbu Va Songuiwa Lespiritu Liaye
7 Uvangi ukuavo u lekisa okuti Becalele la Aholiava va songuiwa lespiritu lia Suku, u limbukiwila kovikuata via pama va pangele. Momo, omanu va talavaya lavio ci pitahãla 500 kanyamo. (2 Asa. 1:2-6) Aholiava la Becalele, ka va sonehele olonduko viavo kovikuata va panga ndeci omanu vamue koloneke vilo va siata oku linga. Ovopange avo, a eca esivayo ku Yehova.—Etu. 36:1, 2.
Oku Konomuisa Lutate Ovina vi Sangiwa Vembimbiliya
(Etundilo 35:1-3) Mose wongolola owiñi wosi wa va Isareli. Wa popia lavo hati, Ovina Yehova a sapuila okuti ovio vu linga vievi: 2 Upange u lingiwa oloneke epandu. Puãi eteke liepanduvali li linga esambata liowusa wefendelo lia Yehova. Wosi o lingamo upange ipaiwa. 3 Ka ci tava oku siakãla ondalu volonjo viene keteke liesambata.
Utala Wondavululi, 1/6/2005 kem. 11 ocin. 14
Tu Kũlĩhi Olonjila Via Yehova
14 Pitisa kovaso ovina viespiritu. Va Isareli va kuatele ocihandeleko ca lekisile okuti, ka citava oku pesila lika otembo kovopange oku sanda eteku. Ovo va sukilile oku sanda otembo yoku kapako ovina viespiritu kuenda oku yuvula oku sandiliya lika ovokuasi. Vosemana, Yehova wa nõlelemo eteke limue kuenje wa li tukula okuti, li kola. Kuenda wa va handelekele okuti, veteke liaco ka ci tava oku linga upange. Momo lia kala eteke lioku fendela Suku. (Etundilo 35:1-3; Atendelo 15:32-36) Unyamo lunyamo otembo yaco yoku fendela Suku, ya enda oku vokiyiwa kolohongele viavo vi kola. (Ovisila 23:4-44) Kolohongele viaco, va enda oku lilongisa ovilinga vikomõhisa via Yehova kuenda oku ivaluisiwa olonjila viaye. Va endavo oku kuata epuluvi lioku eca olopandu ku Yehova omo liohenda yaye. Eci va Isareli va litumbika ku Yehova, va sukilile oku lekisa esumbilo kokuaye kuenda ocisola. Nda va cilingile, Yehova nda wa va kuatisa oco vamameko oku endela volonjila viaye. (Esinumuĩlo 10:12, 13) Olonumbi Yehova a ecele ku va Isareli, vi kuatisavo Akristão koloneke vilo.—Va Heveru 10:24, 25.
(Etundilo 35:21) Veya, wosi okuti utima waye wo vetiya, lu espiritu liaye lio kapisa ocipango caco, va nena ombanjaile ya Yehova yupange wombalaka yoku ñualehela la Yehova, levi viefendelo liaco, levi viuwalo u kola.
Utala Wondavululi, 1/11/2000 kem. 29 ocin. 1 kelimi Lioputu
Oku Kala Ukuacali Cinena Esanju
Sokolola ndomo va Isareli va liyeva. Va kukululu yavo va talisiwile ohali ndapika haivo ka va kuatele elianjo. Noke veya oku yovuiwa loku kuata ovipako vialua. Ovo nda va liyeva ndati oku eca onepa yimue yo vipako viaco? Citava okuti nda va sima okuti va sesamelele ovina viaco loku kala lavio. Pole, eci va vi likiyiwa oco va ece olombanjaile oco vikuatise kefendelo liocili, va ci linga kuenda ka va ci lingile loku hoya! Ovo ka va ivaleleko okuti Yehova eye wa ecelela oco va kuate ovipako viaco. Kuenje va kuatisa lopalata, ulu kuenda olohombo. Va kala “lutima woku eca.” Ovitima ‘viavo via vetiyiwa.’ ‘Lu espiritu liaye lio kapisa ocipango caco, va nena ombanjaile.’ Ovo va panga “okueca kupange Yehova.”—Etundilo 25:1-9; 35:4-9, 20-29; 36:3-7.
Oku Tangiwa Kuembimbiliya:
(Etundilo 35:1-24) Mose wongolola owiñi wosi wa va Isareli. Wa popia lavo hati, Ovina Yehova a sapuila okuti ovio vu linga vievi: 2 Upange u lingiwa oloneke epandu. Puãi eteke liepanduvali li linga esambata liowusa wefendelo lia Yehova. Wosi o lingamo upange ipaiwa. 3 Ka ci tava oku siakãla ondalu volonjo viene keteke liesambata. 4 Mose wa sapuisa owiñi wosi wa va Isareli hati, Eci ca tuma Yehova okuti ci lingiwa ceci, hati, 5 Kongoli olombanjaile via Yehova. U o kasi lutima woku eca a nene ku Yehova ombanjaile: ulu, opalata, osipi, 6 alinya onoloti la a vumbula la a kusuka, lovalatanya, lovonya olohombo, 7 ovipa violonupi via tengua leci ci kusuka, ovipa violonjundu, oviti viositimi, 8 ulela wolovela, olosimbolua viulela woku waveka, levi vinsensu vi pepa; 9 otuvawe tuasardonika lotuvawe tuolomota tuefonde lotu tuonjeke yoponete. 10 Oco olomesele viosi pokati kene viye, vi tunge viosi Yehova a handeleka; okuti 11 otavernakulu, ombalaka yayo, ocisikililo cayo, akuatelo ayo, lavaya ayo, olombala viayo, olonungi viayo, otulukuki tuayo tua sokuiwa; 12 ocikasia caco lolomuangaluwa, omangu yohenda longumbo yoku vindikiya; 13 omesa lolomuangaluwa lovikuata viayo viosi lombolo yoku taliwa; 14 ondiyelo layovo yeca ocinyi lovikuata viayo, lolovela viayo lulela wolovela; 15 utala winsensu, lolomuangaluwa viawo, lulela woku waveka, linsensu vi pepa lonanga yoku vindikiya uvelo, kuvelo wotavernakulu; 16 utala wocilumba coku pia elisi, owanda wawo wosipi, olomuangaluwa viawo lovikuata viawo viosi, etasu lomangu yalio. 17 olongumbo viocitali, olongunji viavio lotualukuki tuavio tua sokuiwa, lonanga yoku vindikiya ombundi yocitali; 18 olombambo viotavernakulu lolombambo viocitali lovikolo viavio; 19 uwalo wa tungiwa ca fina woku vumbila omu mu kola, uwalo u kola wa Arone eye ocitunda, luwalo womãla vaye woku vumbila komangu yutunda. 20 Oco owiñi wosi wa va Isareli wa tunda ku Mose. 21 Veya, wosi okuti utima waye wo vetiya, lu espiritu liaye lio kapisa ocipango caco, va nena ombanjaile ya Yehova yupange wombalaka yoku ñualehela la Yehova, levi viefendelo liaco, levi viuwalo u kola. 22 Kuenje veya, lalume lakãi, vosi va kala lutima waco, va nena olofunete lovingẽlengẽle lolonẽla lovinunga, viosi viulu; alume vosi va nena ku Yehova ombanjaile yulu. 23 Alume vosi va kala lalinya onoloti la a vumbula la a kusuka lovalatanya, lovonya olohombo, lovipa violonupi via tekua leci ci kusuka, lovipa violonjundu, va vi nena. 24 Vosi va eca ocilumba copalata leci cosipi va nena ombanjaile ya Yehova; alume vosi va kala luti wositimi wa posokela upange waco vo nena.
OSEMANA 26 YA MBALAVIPEMBE–1 YA KUVALA
OVOKUASI A SANGIWA VONDAKA YA SUKU | ETUNDILO 37–38
“Ovotala Otavernakulu Kuenda Oviña Vialio Kefendelo Liocili”
(Etundilo 37:25) Wa tunga utala winsensu loviti viositimi, usõvi ukeya, upati ukeya, avindi akuãla a lisoka, okulepa kilu ovikeya vivali. Olombinga viaco via linga lawo uti umosi.
Perspicaz-1 kem. 95 ocin. 3
Utala
Utala winsensu. Utala winsensu (wa tukuiwavo okuti “utala wulu” [Etu. 39:38]) wa pangiwile lavaya oviti viositimi, ndo kasia yimue, kilu liaco kuenda volonele ya lañiwile lulu. Ilu liaco va ñualisako longenge yulu. Owo wa kuatele ci soka 44,5 kovikeya konele lonele, vusõvi 89 kovikiya kuenda ya kuata “olombinga” via kala kavindi akuãla utula. Ovinunga vivali viulu via pangiwila oco vi linge ovinunga violomuangaluwa viositimi vioku ambata lavio via lañiwa lulu kuenda ovinunga viaco viulu via kapiwa vemi lienimba kolonẽle vivali viutala. (Etu. 30:1-5; 37:25-28) Insensu vimue vi likasi via enda oku timihĩwa kutala waco olonjanja vivali veteke, komẽle kuenda koñolosi. (Etu. 30:7-9, 34-38) Ociyukilo ca tukuiwa kolonepa vikuavo okuti coku yoka insensu kuenda citava okuti, va endavo oku talavayila laco kutala winsensu. (Ovis. 16:12, 13; Va Hev. 9:4; ci sokisa Lesit. 8:5; 2 Asa. 26:16, 19) Utala winsensu wa kala vokati kotavernakulu, ocipepi lonanga Yohondo yi Kola kuenje ya tukuiwa hati u kasi “kovaso yocikasia cuvangi,”—Etu. 30:1, 6; 40:5, 26, 27.
(Etundilo 37:29) Wa tenga ulela u kola woku waveka, linsensu via fina violosimbolua vi pepa, luloño wukuakutenga olonguendu.
Perspicaz-2 kem. 390
Insensu
Insensu vi kola via enda oku talavayiwa lavio Votarvenakulu vekalasoko, via pangiwile lovina viatĩla ekongelo lia enda oku lumba. (Etu. 25:1, 2, 6; 35:4, 5, 8, 27-29) Poku kuama onumbi ya Suku oco ku lingiwe onenga yaco, Yehova wa sapuila Mose hati: “Nyañuala olosimbolua vi pepa, ovio ostakate, omika, la gaibano, ovio olosimbolua vi pepa kumosi linsensu via fina. Opesu yavio yi kala yimosi. O tengulula lavio insensu vielemba liwa, luloño wukuakutenga olonguendu via simbuiwa, via fina, vi kola. Oco o kungala vimue ciwa, o vi kapa kovaso yocikasia covisila vombalaka yoku ñualẽhẽla la Yehova, oku ndi ñualẽhẽla love. Vi kolisa cimue” Kuenje oco Yehova a lekise kokuavo esilivilo kuenda oku kola kuinsensu eye wamisako hati: “U o tenga vimue via lisoka lavio ha vi lehũla, o tepiwa ku vakuavo.”—Etu. 30:34-38; 37:29.
(Etundilo 38:1) Utala wovilumba vioku pia elisi wo tunga lositimi, usõvi ovikeya vitãlo, upati ovikeya vitãlo, avindi awo akuãla a lisoka; okulepa kilu ovikeya vitatu.
Perspicaz-1 kem. 95 ocin. 5
Utala
Ovotala Otavernakulu. Votavernakulu, va tungilamo ovotala avali ndomo ci likuata lolonumbi via Suku. Utala wocilumba coku pia elisi, (u tukuiwavo okuti “utala wosipi,” [Etu. 39:39]) wa pangiwile lavaya ositimi, ndocikasia, citava okuti ka ca kuatele onuviko. Owo wa kuatele ci soka 2,2 kovikeya konele lonele, vusõvi 1,3 kovikiya, kuenda wa kuata “olombinga” via kala kavindi akuãla. Kolonele viosi kua lañiwile losipi. Ocivela capangu haico owanda wosipi ca kapiwa vemẽhi liopalatende yi ñuala utala, oco owanda u sulile “pokati lakati kutala.” Ovinunga vikuãla via kapiwa kolonjo viaco vikuãla, konele yocivela capangu kuenda citava okuti vovinunga viaco omo mu pita olomuangaluwa vivali viositimi via lañiwa lulu oco vi ecelele oku ambata lavio utala. Eci ci lekisa okuti ca sukilile oku yikula apangu kolonele vivali viutala, oco ci ecelele oku kapamo ovinunga kolonele vivali. Kuli ovisimilo via litepa pokati kolonoño catiamẽla kulandu owu kuenda valua va sima okuti ovinunga viaco vivali via kongeliwile konepa yavali, vioku kapa olomuangaluwa vioku ambata lavio loku pandekiwa kosamua yutala. Ovikuata viosi viosipi via tungiwa olombia, olopa viokupa atiko, atasu oku lavekelapo osonde yovinyama, olongalufu vioku senga lavio ositu kuenda, oviyukilo viondalu.—Etu. 27:1-8; 38:1-7, 30; Ate. 4:14.
Oku Konomuisa Lutate Ovina vi Sangiwa Vembimbiliya
(Etundilo 37:1) Becalele yu wa tunga ocikasia loviti viositimi; usõvi waco ovikeya vivali komeyu, upati ukeya komeyu, okulepa kilu ukeya komeyu.
(Etundilo 37:10) Omesa wa tunga lositimi; usõvi wayo ovikeya vivali, upati ukeya okulepa kilu ukeya komeyu.
(Etundilo 37:25) Wa tunga utala winsensu loviti viositimi, usõvi ukeya, upati ukeya, avindi akuãla a lisoka, okulepa kilu ovikeya vivali. Olombinga viaco via linga lawo uti umosi.
Perspicaz-1 kem. 36
Ositimi
Ositimi yi kuete olosongo via lepa haivio via lisanduila calua kovianja. Ovianja viaco olonjanja vialua vi li tokeka loviti vikuavo viositimi vi li sungue, kuenje ci kala usenge umue wa liyika calua, eci ci situlula esunga lieci olonjanja vialua kutukuiwila ondaka yaco okuti shit·tim kovisonehua Viembimbiliya. Uti wositimi u pondola oku lepa eci ci soka 6 ale 8 kolokilometulu, pole, ovio vi kasi ndovisapa. Amela alio a leñela, a suñama kuenda vie yuka loloneleho vi yeluluka, vi kuete elemba liwa haivio vima apako. Ekaka lialio litekãva lia sitika evaya limue lia kõla calua, lilema okuti ci tĩla oku nyõliwa lovipuka. Omo okuti uti waco wa pamele, owo wa sesamelele oku tunga lawo otavernakulu kuenda ovikuata vialio. Wa tungiwa lawovo ocikasia covisila (Etu. 25:10; 37:1), omesa yolombolo viataliwa (Etu. 25:23; 37:10), ovotala (Etu. 27:1; 37:25; 38:1), olomuangaluwa vioku ambata ovikuata viaco (Etu. 25:13, 28; 27:6; 30:5; 37:4, 15, 28; 38:6), olongunji kuenda onanga (Etu. 26:32, 37; 36:36) kuenda avaya a pasiwa (Etu. 26:15; 36:20), kumue lolombala vialio (Etu. 26:26; 36:31).
(Etundilo 38:8) Wa tunga etasu liosipi, lomangu yaco yosipi, lalumuĩlo akãi vongolokela ha va vumbila puvelo wombalaka yoku ñualẽhẽla la Yehova.
Utala Wondavululi, 1/4/2015 kem. 15 ocin. 4
WA CI KŨLĨHA?
Oku li tepa kualumuilo o koloneke vilo, ceci okuti o kosimbu a pangawaile lutale wa sieleñiwa ciwa losipi—olonjanja vimue ci lingiwa lopalata ale ulu. Onjanja yatete olumuĩlo wa tukuiwa Vembimbiliya wa tiamisiwila koku tungiwa kuotavernakulu, ono yatete yefendelo ko Isareli. Akãi va eca olombanjaile via lumuilo oco va tele lavio etasu liosipi. (Etundilo 38:8) Alumuĩlo aco va enda oku a yengulula oco va linge lao upange waco.
Oku Tangiwa Kuembimbiliya
(Etundilo 37:1-24) Becalele yu wa tunga ocikasia loviti viositimi; usõvi waco ovikeya vivali komeyu, upati ukeya komeyu, okulepa kilu ukeya komeyu. 2 Wa ci laña lulu vokati lo koñoño, wa ci tungila enimba liulu lia ñualãpo. 3 Wa ci yenguluila ovinunga vikuãla kolongonjo viaco vikuãla, konẽle ovinunga vivali, konẽle ovinunga vivali. 4 Wa pasa olomuangaluwa viositimi, wa vi laña lulu. 5 Wa pitisa olomuangaluwa viaco kovinunga viokolonele viocikasia, oku ambata ocikasia. 6 Wa tungavo omangu yohenda lulu wa fina; usõvi wayo ovikeya vivali komeyu, upati ukeya komeyu. 7 Wa telavo vakeruvi vavali lulu, wa va tunga loku tela kolonẽle vivali viomangu yohenda, 8 ukeruvi umue konẽle, ukeruvi ukuavo konẽle yikuavo. Wa tela vakeruvi ocivela cimosi lomangu yohenda kolonẽle viaco vivali. 9 Vakeruvi va linga ndoku oluĩla kilu avava avo, va sikĩlĩla omangu yohenda lavava, loku limba ovaso ovipala; ovipala viavakeruvi via imba ovaso komangu yohenda. 10 Omesa wa tunga lositimi; usõvi wayo ovikeya vivali, upati ukeya okulepa kilu ukeya komeyu. 11 Wa yi laña lulu wa fina, wa yi tungila enimba liulu lioku ñualãpo. 12 Wa yi tungila ocimbimbi ndupati weka oku ñualãpo; wa tunga enimba liulu oku ñualĩsa ocimbimbi caco. 13 Wa yi yenguluila ovinunga vikuãla viulu, wa kapa ovinunga kavindi akuãla a kala kolongonjo viaco vikuãla. 14 Ovinunga via kala ocipepi locimbimbi, omu va pitisa olomuangaluwa vioku ambata omesa. 15 Wa pasa olomuangaluwa viositimi vioku ambata omesa, wa vi laña lulu. 16 Wa tela ovikuata viukuakukala komesa, alonga aco, olonguto latiyela lasanga va itaila, viulu wa fina. 17 Wa tunga ondiyelo lulu wa fina; ondiyelo yaco wa yi tela, omangu longunji; ovilindo viaco lapumbu lolonẽlẽho via kala layo ocivela cimosi. 18 Ya kala lovimanganjumba epandu via tunda kolonẽle viaco; ovimanganjumba vitatu viondiyelo konẽli, ovimanganjumba vitatu viondiyelo konẽli. 19 Otuvilindo tutatu tua lisoka ndonẽlẽho yumendoeira kocimanganjumba cikuavo, epumbu liaco lonẽlẽho: haico ovimanganjumba viaco epandu via tunda kondiyelo. 20 Vondiyelo mua kala ovilindo vikuãla vionẽlẽho yumendoeira, apumbu aco lolonẽlẽho; 21 Lepumbu kombuelo yovimanganjumba vivali, viosi ocivela cimosi, epumbu kombuelo yovimanganjumba vivali, viosi ocivela cimosi, kovimaganjumba viaco epandu vi tunda kondiyelo. 22 Apumbu lovimanganjumba via linga laco ocivela cimosi. Cosi muẽle cimosi culu wa fina va ci tela. 23 Wa tunga olovela viaco epanduvali, lotuayola, lotualonga tuovinene, ulu wa fina. 24 Wa yi tunga lotalendo yulu wa fina, oyo lovikuata viaco viosi.