Ono Yovipama Viohongele Ekalo Lietu Tuakristão Kuenda Oku Kunda
© 2024 Watch Tower Bible and Tract Society of Pennsylvania
2-8 YENYENYE LINENE
OVOKUASI A SANGIWA VONDAKA YA SUKU | OLOSAMO 79-81
Lekisa Ocisola Konduko ya Yehova Yulamba
Ocisembi ‘Ombanjaile Yimue ya Lipua’ ya Tunda ku Isia
5 Tu lekisa ndati okuti tu kuetele ocisola onduko ya Yehova? Tu pondola oku ci lekisila kovituwa vietu. Yehova o yongola okuti tu kala omanu vamue va kola. (Tanga 1 Petulu 1:15, 16.) Eci ci lomboloka okuti eye lika tu fendela kuenda oku pokola kokuaye lutima wetu wosi. Eci tu lambalaliwa tu likolisilako oku ambata omuenyo wetu ndomo u litava lovina Yehova a tu longisa. Omo lioku ambata omuenyo wetu ndomo u litava lovihandeleko via Yehova, tu eca esivayo konduko yaye. (Mateo 5:14-16) Tua limbuka okuti, ovihandeleko via Yehova viwa kuenda Satana ohembi. Ocili okuti, etu ka tua lipuile kuenda tua siata oku lueya. Pole, eci tu lueya, tu likekembela kuenda tu likolisilako oku yuvula oku linga ovina vi tomba onduko ya Suku.—Osamo 79:9.
ijwbv ocip. 3 ocin. 4-5
Va Roma 10:13—“Oku Tukula Onduko ya Ñala”
Vembimbiliya, ondaka “oku vilikiya onduko ya Yehova” ka ci lombololaka lika oku yi kũlĩha kuenda oku yi tukula vefendelo. (Osamo 116:12-14) Mua kongelavo oku kolela ku Suku kuenda oku sanda ekuatiso liaye.—Osamo 20:7; 99:6.
Onduko ya Suku ya kuatele esilivilo lialua ku Yesu Kristu. Yesu eci a longisa olondonge viaye oku likutilila, wa fetika ohutililo yaye poku popia hati: “A Isietu o kasi kovailu, onduko yove yi sumbiwe,” ale yi kolisiwe. (Mateo 6:9) Yesu wa lekisavo okuti, oco tu kuate omuenyo ko pui, tu sukila oku kũlĩha, oku pokola kuenda oku sola omunu o kuete onduko eyi, Yehova.—Yoano 17:3, 6, 26.
Ovina vi Sangiwa Vembimbiliya
Perspicaz-2 kem. 145
Yosefe
Onduko Yosefe ya Velisiwilepo. Yosefe omo liocikele ca velapo a kuatele pokati komãla va Yakoba, ca sungulukile okuti onduko yaye olonjanja vialua yi tukuiwa poku nõla ovikoti viosi via va Isareli. (Os 80:1) ale ovikoti vina via kongeliwile vuviali wo konano. (Os 78:67; Amo 5:6, 15; 6:6) Onduko yaye yi sangiwavo Vovitumasuku Viembimbiliya. Vocinjonde Esekiele a mola, ocipiñalo ca Yosefe onepa yimue ya tepiwa volonepa vivali. (Esk 47:13) Yimue pokati kolombundi violupale londuko “Yehova Oko a Kasi,” mua kongela onduko Yosefe (Esk 48:32, 35) kuenda ondaka yokuti oku kongela afendeli va Yehova, Yosefe o tukuiwa okuti eye wa velapo pokati konepa yimue yofeka kuenda Yuda eye wa velapo konepa yikuavo. (Esk 37:15-26) Ocitumasuku ca Ovadiya ci lekisa okuti “onjo ya Yosefe,” ya pangele onepa koku nyõliwa “kuonjo ya Esau” (Ova 18) kuenda ocitumasuku ca Sakariya ca lekisile okuti, Yehova wa laikele oku popela “onjo ya Yosefe.” (Sak 10:6) Yosefe okuti Efarimi hayeko, o molẽha ndocikoti cimue pokati kovikoti vio Isareli yespiritu.—Esi 7:8.
Yosefe oku tukuiwa kelivulu Liesituluilo ocipama 7:8, ci lekisa okuti ocitumasuku ca Yakoba, osimbu a kala oku panda kolofa, ci tiamisiwilavo ko Isareli yespiritu. Omo liaco, ca sunguluka oku limbuka okuti Yehova Suku Ukuonene wa Yakoba, wa eca Yesu Kristu ungombo wa Velapo wa lumba omuenyo waye oco a popele “olomeme.” (Yoa 10:11-16) Yesu Kristu wa lingavo ociseveto kuna kua kunamẽla onembele ya Suku ya sokiyiwa lo Isareli yespiritu. (Efs 2:20-22; 1Pe 2:4-6) Ungombo waco haeye Ewe o kasi la Suku Ukuonene wosi.—Yoa 1:1-3; Ovl 7:56; Hev 10:12; Eft 49:24, 25.
9-15 YENYENYE LINENE
OVOKUASI A SANGIWA VONDAKA YA SUKU | OLOSAMO 82-84
Sanjukila Ovina o Lingila Yehova
Ceci tu Lilongisila Kolonjila Viokilu
Olonungi vio ko Yerusalãi via kũlĩhĩle okuti olomiapia via siata oku tungila ovianju viavio vovimano violonjo. Olomiapia vimue via enda oku tungila vonembele ya Salomone. Kua limbukiwa okuti vimue via enda oku tungila vocimano conembele omo okuti ovio via limbuka okuti, ca kala ocitumãlo cimue ca kolapo kuenda ka pa kaile onjuela.
Usonehi Wosamo 84 umue pokati komãla va Kora, okuti volosãi epandu wa enda oku talavaya vonembele osemana yimosi, wa mõla ovianju viaco vocimano conembele, kuenje wa yonguile oku kala ndolomiapia okuti, via enda oku kala vonjo ya Yehova otembo ka yi pui. Eye wa popia hati: “Ndi sole calua otavernakulu yove yinene! Utima wange wosi u livela, Ocili, ame nda hongua longeva, Yovitali via Yehova . . . Ndaño muẽle onjila yi sangamo onjo Kuenda omiapia yi sangamo ocanju, Muna oyo yi tatela omãla vaye Ocipepi lutala wove unene, A Yehova ukualohoka, Soma yange kuenda Suku yange!” (Osamo 84:1-3) Anga hẽ etu kuenda amalẽhe tua siatavo oku lekisa ojongole yimuamue kuenda esanju poku liongolola olonjanja viosi lafendeli va Suku?—Osamo 26:8, 12.
Kuata Ovimãho Via Sunguluka Oco Amameko Lesanju
Oku kuka ale ekambo liuhayele, vi pondola oku tepulula upange tu lingila Yehova. Nda unjali, pamue o limbuka okuti kua siatele okupa esilivilo lialua kelilongiso lio pokolika ale kolohongele, omo lioku pesila otembo yalua koku tata omãla. Anga hẽ, poku kũlĩhĩsa ovina evi, kua siatele oku limbuka ovina o pondola oku linga?
Kosimbu ulume umue u Lewi, wa lekisile onjongole yoku linga ocina cimue okuti ka kuatele epondolo liaco. Eye wa kuatele esumũlũho lioku talavaya vonembele olosemana vivali vunyamo. Pole, wa yonguile oku kala otembo yosi ocipepi lutala. (Osa. 84:1-3) Nye co kuatisa oku kuata esanju? Eye wa limbuka okuti, oku talavaya eteke limosi vonembele, ci nena asumũlũho. (Osa. 84:4, 5, 10) Cimuamue haico tu sukila oku linga. Eci tu liyaka lovitangi komuenyo wetu, tu sukila oku limbuka epondolo tu kuete lioku linga ovina tu yongola oku tẽlisa.
Yehova Suku Yove wa ku Kapako!
12 Nda ove o kasi oku liyaka luvei umue, kolela okuti Yehova wa kũlĩha ovitangi o kasi oku liyaka lavio. Pinga ekuatiso kokuaye oco ove o tende ekalo liove lonjila yimue ya sunguluka. Noke tanga Embimbiliya oco o sange olondaka vielembeleko Yehova a ku pongiyila. Tiamisila utima kolondaka viaco vina vi lekisa ndomo Yehova a kapako afendeli vaye. Osimbu ove amamako oku ci linga, o ka limbuka okuti Yehova uwa la vosi vo vumba lekolelo.—Osamo 84:11.
Ovina vi Sangiwa Vembimbiliya
Pespicaz-2 kem. 350
Omõla ka Kuete Isia
Omo okuti ka ca lelukile oku limbuka omanu vaco kuenda ka va kuatele eteyuilo, Yehova wa tukula ondaka yokuti omõla ka “kuete isia,” oco a lombolole ekambo liesunga lia kala pokati ka va Isareli, ale ndomo ovo va yapuka vesunga. Eci va Isareli va kala ciwa konepa yespiritu, va enda oku tata ciwa omõla ka kuatele isia. Pole, eci va fetika oku pengisa esunga vofeka, omõla ka kuete isia ka endele oku tatiwa ciwa. Kuenje ocituwa caco, ca enda oku muiwa vofeka yosi. (Os 82:3; 94:6; Isa 1:17, 23; Yer 7:5-7; 22:3; Esk 22:7; Sak 7:9-11; Mal 3:5) Esiñalo lia Yehova lia enda oku wila kuvosi vana va tataile lãvi omõla ka kuete isia. (Esn 27:19; Isa 10:1, 2) Yehova o litukula eye muẽle okuti Upopeli (Olo 23:10, 11), Oñuati (Os 10:14), kuenda Isia (Os 68:5) yomunu lomunu. Eye o linga esokiyo liesombiso liesunga kokuavo (Esn 10:17, 18) o lekisa ohenda kokuavo (Hos 14:3), eca ekavuluko kokuavo (Os 146:9) kuenda oku va teyuila oco vamameko lomuenyo.—Yer 49:11.
Yimue pokati kolondimbukiso Yakristão vocili, oku kapako ovimbumba kuenda vana ka va kuete isia. Ndonge Tiago wa sonehela Akristão hati: “Onjila yoku fendela ya lipua haiyo ya pua evĩho kovaso a Suku yetu haeye Isia, yeyi: oku tata olosiwe kuenda ovimbumba kohali yavo, loku li lava keliño lioluali.”—Tia 1:27.
16-22 YENYENYE LINENE
OVOKUASI A SANGIWA VO NDAKA YA SUKU | OLOSAMO 85-87
Ohutililo yi tu Kuatisa Oku Pandikisa
O Kasi hẽ Oku Molẽhisa Ulamba wa Yehova?
10 Oco tu molẽhise ulamba wa Suku, tu sukila oku ‘pandikisa lolohutililo.’ (Va Rom. 12:12) Omo liaco, tu sukila oku likutilila ku Yehova oco a tu kuatise oku u vumba lonjila ya sunguluka. Tu pingi kokuaye espiritu sandu oco li vokiye ekolelo lietu, okuti tu pondola oku liyaka layonjo kuenda oku kuata ‘uloño woku kunda ondaka yocili.’ (2 Tim. 2:15; Mat. 6:13; Luka 11:13; 17:5) Tua siata oku kuatisiwa la Yehova, ndeci isia a kuatisa omõlaye. Nda tu pinga ku Yehova oco tu u vumbe lutima wosi, eye o tu kuatisa. Ka tu ka simi okuti, Yehova ka tu kuatisa! Tu eci esivayo kuenda olopandu volohutililo vietu, loku pinga kokuaye ekuatiso eci tu liyaka lovitangi kuenda oku u vumba lonjila yimue yi sivaya onduko yaye yi kola.—Osa. 86:12; Tia. 1:5-7.
Ndomo Yehova a Tambulula Olohutililo Vietu
17 Tanga Olosamo 86:6, 7. Ukualosamo Daviti wa kũlĩhĩle okuti Yehova wa yeva loku tambulula olohutililo viaye. Ove o pondola oku kuata ekolelo limuamue. Ovolandu tua konomuisa vocipama cilo, a tu ĩha ekolelo liokuti, Yehova o pondola oku tu ĩha olondunge longusu tu sukila oco tu pandikise. Eye pamue o vetiya vamanji, ale vana okuti, ka vo fendela oco va tu kuatise lonjila yimue.
18 Ndaño okuti Yehova pamue ka tambulula olohutililo vietu lonjila tua lavokaile, pole, tua kũlĩha okuti o ka vi tambulula. Yehova o ka tu ĩha ovina tu sukila vepuluvi tu sukila. Omo liaco, amamako oku likutilila loku kolela okuti, Yehova o ku tata cilo kuenda o ka “tẽlisa olonjongole viovina viosi vi kasi lomuenyo” voluali luokaliye lu keya.—Os 145:16.
Ovina vi Sangiwa Vembimbiliya
Perspicaz-1 kem. 556 ocin. 6
Utima
Oku Vumba “Lutima Wosi.” Utima wetu u sukila oku kuata uhayele oco u talavaye ciwa. Pole, utima wocindekaise u pondola oku tepiwa. Daviti wa likutilila hati: “Ñuatise oku sumbila onduko yove lutima wosi,” ci lomboloka okuti utima womunu u pondola oku litepa catiamẽla kekalo liaye kuenda kasakalalo aye osi. (Os 86:11) Omanu vaco va pondola oku kuata utima wa tepiwa okuti va “pola” poku fendela Suku. (Os 119:113; Esi 3:16) Omunu umue o pondola oku kuata utiwa wa “tepiwa” poku seteka oku vumba vacime vavali ale poku popia uhembi osimbu okuti o kasi oku sima ocina cikuavo. (1As 12:33; Os 12:2, etosi) Yesu wa pisa ocituwa caco combambe.—Mat 15:7, 8.
23-29 YENYENYE LINENE
OVOKUASI A SANGIWA VONDAKA YA SUKU | OLOSAMO 88-89
Uviali wa Yehova Owo wa Velapo
Kuatisa Uviali wa Yehova!
5 Sokolola esunga likuavo lieci Yehova a kuetele omoko yoku viala. Eye wa siata oku talavaya lunene waye lonjila yimue ya sunguluka. Eye o tu sapuila hati: “Ame ndi Yehova, Una o lekisa ocisola ka ci pongoloka, esunga kuenda esunguluko kilu lieve, Momo ovina evi ovio ndi sanjukila.” (Yer. 9:24) Yehova ka sukila ovihandeleko viomanu oco vi u kuatise oku nõla onjila yimue ya sunguluka. Pole, eye wa tumbika olonumbi viesunga. Ovihadeleko Yehova a eca komanu wa vi tiamisila kesunga liaye lia lipua. Ukualosamo wa popia hati: “Esunguluko kuenda esunga, ovio ociseveto cocalo cove.” Omo liaco, ci kale ovihandeleko, olonumbi kuenda olonjila via nõliwa la Yehova, viosi via sunguluka. (Os. 89:14; 119:128) Satana wa popia hati, Yehova Ombiali yimue ĩvi. Pole, Satana ka kuete epondolo lioku nena esunga voluali.
Kuatisa Uviali wa Yehova!
10 Uviali wa Yehova wa sunguluka. Momo, omanu va pokola kokuaye va kuete elianjo kuenda esanju. (2 Va Kor. 3:17) Daviti wa popia eci catiamẽla ku Yehova hati: “Kovaso aye, kuli ulamba kuenda eposo; Ongusu kuenda esanju vi kasi kocitumãlo caye.” (1 Asa. 16:7, 27) Ukualosamo Etani wa soneha hati: “Va sumũlũha omanu va kũlĩha oku kaluka kuonjolela. A Yehova, ovo va endela vocinyi cocipala cove. Va sanjukila vonduko yove eteke liosi kuenda va kemãlisiwa vesunga liove.”—Os. 89:15, 16.
11 Osimbu tua amamako oku sokolola kohenda ya Yehova ci ka tu kuatisa oku limbuka okuti uviali wa Yehova wa velapo. Tu pondola oku kuata esanju ndeli liukualosamo wa popia hati: “Momo eteke limosi povitali viove lia velapo, ohulukãi koloneke kocitumãlo cikuavo ci sule!” (Os. 84:10) Omo okuti Yehova eye wa tu lulika, wa kũlĩha ciwa ovina vi tu nenela esanju. Eye ukuacali, wa tu ĩha ovina viosi tu sukila. Ovina viosi Yehova a tu pinga oco tu vi linge, vi pondola oku tu kuatisa. Omo liaco, nda tua likolisilako olonjanja viosi oku pokola ku Yehova, tu kuata esanju.—Tanga Isaya 48:17.
Kuata Ekolelo Lia Pama Kusoma
14 Kosimbu, Yehova wa lingile ohuminyo yimue ku Soma Daviti wo ko Isareli. Ohuminyo yaco yi tukuiwa hati, ocisila ca Daviti. (Tanga 2 Samuele 7:12, 16.) Yehova wa likuminyile okuti, Mesiya wa laikele oku tunda pokati kocitumbulukila ca Daviti. (Luka 1:30-33) Omo liaco, Yehova wa ecele olonumbi viatiamẽla kepata Mesiya a laikele oku citiwila. Kuenje, Yehova wa lekisa okuti Mesiya, eye ‘o sesamẽla’ oku kala Soma Yuviali waco. (Esekiele 21:25-27) Usoma wa Daviti u ka kala otembo ka yi pui, momo, Yesu ukuacitumbulukila ca Daviti, ‘o kala otembo ka yi pui, kuenda ocalo caye ca amamako ndekumbi.’ (Osamo 89:34-37) Tua kolela okuti, Usoma wa Mesiya u ka viala lesunga, kuenda u ka eca komanu asumũlũho ka a pui!
Ovina vi Sangiwa Vembimbiliya
‘Ove Lika Ukuacili’
4 Vovisonehua via va Heveru ondaka yi tukuiwa hati “esunguluko,” yi lomboloka oku linga uwa locisola calua ci likuata ocimunga locituwa eci coku kala ukuacili okuti ka ci liwekapo osimbu ocipango catiamẽla kocituwa caco ka ca tẽlisiwile. Ocituwa caco ci linga vali calua okuti oku kuata ekolelo ale oku koleliwa ci sule. Eci ocili, momo omunu o pondola oku lekisa ekolelo poku tẽlisa ocikele cimue. Eci ca litepa calua, omo okuti oku kala ukuacili ku yilila kocisola. Pole, ondaka “oku koleliwa” citava okuti yi suñamisiwavo koviluvo ka vi kuete omuenyo. Ndeci, ukualosamo wa tukula Osãi okuti “uvangi u kasi kovailu u koleliwa,” omo lioku mõleha kualio olonjanja viosi. (Osamo 89:37) Pole ka ci tava oku popia okuti osãi yi kala ukuacili. Momo lie? Momo oku kala ukuacili ocindekaise cimue cocisola osimbu okuti ovina ka vi kuete omuenyo ka vi pondola oku lekisa ocisola.
5 Oku ci tiamisila kupopi Wembimbiliya, oku kala ukuacili, ocituwa cimue cocisola. Ocituwa caco ukamba umue u molẽhela pokati komunu o lekisa oku kala ukuacili kuenda omunu una va lekisila ocituwa caco. Ocituwa caco cimue okuti ka ci pongoloka, ka ci sokisiwa lakimba ovokalunga okuti apungokaila oku ofela yi pongolokela. Ca litepa omo okuti, oku kala ukuacili ale oku lekisa ocisola cocili, ci kuete ongusu yoku pandikisa vali calua eci ku iya ovitangi.
30 YENYENYE LINENE–6 YA MBALAVIPEMBE
OVOKUASI A SANGIWA VONDAKA YA SUKU | OLOSAMO 90-91
Oco o Kale Otembo Yalua Komuenyo, Kolela ku Yehova
Akonomuiso Atiamẽla Koku Kala Otembo Yalua Komuenyo
Olonoño vialua vi kasi oku popia okuti ndaño kuli olonjila vialua vioku yuvula oku kuka, omanu ka va pondola oku kala otembo yalua komuenyo. Ocili okuti tunde kocita 19, elavoko lioku kala otembo yalua komuenyo lia livokiya calua. Ocisimĩlo ceci cokuti, omanu va siata oku kala otembo yalua komuenyo momo, va siata oku liyelisa kuenda kuli ovihemba vi tateka omanu oku vela, levi vi sakula ovoveyi alua. Olonoño vimue vi tava okuti anyamo omunu a kala komuenyo, a livokiya calua okuti a-a a sokiyiwila ci sule.
Pa pita ale ci soka 3.500 kanyamo tunde eci Mose usonehi Wembimbiliya a popia hati: “Omuenyo wetu u tẽla 70 kanyamo, Ale 80 ku vana va pamapo vali. Pole, anyamo aco eyuka ohali kuenda esumuo; o-o a pita lonjanga kuenje tu taka.” (Osamo 90:10) Ndaño omanu va siata oku likolisilako oku vokiya otembo omunu a kala komuenyo, omuenyo u kasi oku amamako oku kala ndomo Mose a ci popia.
Ca litepa lotembo omanu va kala komuenyo, oviluvo ndeci, o ouriço-do-mar vermelho kuenda ehotio lio vokalunga, vi pondola oku kala komuenyo ci soka 200 vianyamo. Oviti vimue via lepa calua vi tukuiwa hati o sequóia, vi pondola oku kala olohuluwa vianyamo. Eci tu sokisa anyamo omuenyo wetu, lowu woviluvo via tukuiwa ndeti, ka ca sungulukile hẽ oku lipula hati: ‘Anga hẽ omuenyo ulo woku kala 70 ale 80 kanyamo owo lika?’
wp19.1 kem. 5, okakasia
Onduko ya Suku Helie?
Omanu valua va siata oku linga epulilo liaco. Citava okuti wa lingilevo epulilo liaco. Citava okuti tu linga epulilo liaco lonjila ndeyi: Nda ongongo kuenda ovina vikuavo vi kasimo via lulikiwa, oco hẽ, helie wa lulika Suku?
Olonoño vialua vi tava okuti ongongo ya lulikiwa. Embimbiliya li likuata locisimĩlo caco poku popia hati: “Kefetikilo Suku wa lulika ovailu kuenda ongongo.”—Efetikilo 1:1.
Ongongo ka ya tukulukile ño. Ka citava okuti ocina cimue ci tukuluka ño. Nda ka kua kaile lacimue osimbu ongongo ka ya lulikiwile, toke cilo oluali nda ka lu kasiko. Oco ku kaile oluali, ca sukilile okuti ku kala cimue ale omunu umue ka kaile vongongo oco a lulike ongongo. Omunu waco, Yehova Suku. Eye o kuete etimba limue liespiritu kuenje omo liunene waye kuenda uloño, wa Lulika Ongongo.—Yoano 4:24.
Catiamẽla ku Suku, Embimbiliya li popia hati: “Ove o kasiko ndaño muẽle ceci olomunda ka via citiwile handi, osimbu kua lulikile ilu lieve kuenda oluali. Tunde otembo ka yi pui toke otembo ka yi pui, ove Suku.” (Osamo 90:2) Omo liaco, lomue wa lulika Suku. Eye wa kala ale tunde osimbu. “Kefetikilo” eye wa lulika oluali.—Esituluilo 4:11.
Ndomo Ocisola ci tu Kuatisa Oku Yula Usumba
16 Satana wa kũlĩha okuti etu tu tenda omuenyo okuti u kuete esilivilo lialua. Eye wa popia hati, tu pondola oku eca cosi tu kuete oku kongelamo oku nyõla ukamba wetu la Yehova, oco tu yovole omuenyo wetu. (Yov 2:4, 5) Eci Satana a popia haciliko! Omo okuti Satana “o kuete unene woku koka olofa,” eye o kuama usumba tu kuetele olofa oco tu liwekepo oku vumba Yehova. (Hev 2:14, 15) Olonjanja vimue vana va tiamẽla ku Satana, va seteka oku ponda afendeli va Yehova omo okuti, ka va yongola oku liwekapo kekolelo liavo. Ale pamue Satana o seteka oku tu konyuisa, nda tu kasi luveyi umue u kapa kohele omuenyo wetu. Olondotolo, ale apata ana okuti Halombangiko Via Yehova, pamue va tu kisika oco tu tave oku sakuiwa losonde, okuti ocina cimue ci lipatãla locihandeleko ca Suku. Ale pamue omunu umue o seteka oku tu kisika oku sakuiwa lonjila yimue ka yi likuata lolonumbi Viembimbiliya.
17 Ndaño okuti ka tu yongola oku fa, tua kũlĩha okuti Yehova lalimue eteke a ka liwekapo oku tu sola nda tua fa. (Tanga Va Roma 8:37-39.) Eci akamba va Yehova va fa ovo va amamako vovisimĩlo viaye ndu okuti, handi va kasi lomuenyo. (Luka 20:37, 38) Eye o ka va nena vali komuenyo. (Yov 14:15) Yehova wa feta ondando yimue yalua oco tu ‘kuate omuenyo ko pui.’ (Yoano 3:16) Etu tua kũlĩha okuti Yehova o tu kuetele ocisola calua kuenda wa tu kapako. Yehova ka tu yanduluka eci tu vela, ale tu kala kohele yoku fa. Omo liaco, tua kolela kelembeleko liaye, kolondunge kuenda kongusu yaye. Eci oco ca linga manji Valérie kumue lulume waye.—Os 41:3.
Ovina vi Sangiwa Vembimbiliya
O Kuete hẽ Ungelo Umue wa Siata Oku ku Teyuila?
Embimbiliya ka li lombolola okuti omunu lomunu o kuete ungelo umue u teyuila. Pole, Yesu wa popia hati: “Lunguki oco ka vu ka sepuli umue pokati kava vatito, ndu sapuili siti, ovangelo vavo kilu otembo yosi va mola ocipala ca Isiange o kasi kilu.” (Mateo 18:10) Olondaka evi ka vi lekisa okuti omunu lomunu pokati ketu o kuete ungelo umue u teyuila, pole Yesu wa kala oku popia okuti ovangelo va kapako olondonge viaye. Afendeli va Suku ka va lingi ovina vi koka ohele komuenyo wavo loku lavoka okuti ovangelo va Suku va va teyuila.
Anga hẽ eci ci lomboloka okuti ovangelo ka va kuatisa omanu? Sio. (Osamo 91:11) Omanu vamue va kolela okuti Suku wa siata oku va kuatisa kuenda oku va teyuila lekuatiso liovangelo. Manji Kenneth wa tukuiwa vocipama catete, wa kuatavo ovisimĩlo viaco. Ndaño okuti ka tu kuete uvangi wa suapo pole, tu pondola oku popia okuti ovisimĩlo viaco viocili. Olombangi Via Yehova olonjanja vialua via siata oku limbuka okuti ovangelo va siata oku va kuatisa kupange woku kunda. Omo okuti ovangelo ka va muiwa lovaso, ka tu pondola oku popia okuti Suku wa siata oku tuma ovangelo oco va tu kuatise kovina viosi. Omo liaco, ca sunguluka oku pandula Tõlo omo liekuatiso a siata oku tu ĩha.—Va Kolosai 3:15; Tiago 1:17, 18.
7-13 YA MBALAVIPEMBE
OVOKUASI A SANGIWA VONDAKA YA SUKU | OLOSAMO 92-95
Oku Vumba Yehova Oco Ocina ca Velapo Komuenyo!
Ene Amalẽhe, wa Litumbikili Ale Ovimãho Viene Viespiritu?
5 Esunga lia velapo lioku litumbikila ovimãho viespiritu, oku eca olopandu ku Yehova omo liocisola caye kuenda kovina viosi eye a siata oku tu lingila. Usonehi umue Wosamo wa popia hati: “Ca posoka oku pandula Yehova, . . . Momo ove, a Yehova, wa sanjuisa lupange wove. Njimbila ovilinga viovaka ove ovisungo vionjolela.” (Osamo 92:1, 4) Sokolola kovina viosi Yehova a ku ĩha ndeci: omuenyo wove, ekolelo, Embimbiliya, ekongelo kuenda elavoko lioku kuata omuenyo ko pui Voluali Luokaliye. Poku litumbikila ovimãho viespiritu, o lekisa ku Yehova okuti wa sanjukila ovina viaco viosi kuenje ukamba wove laye u pamisiwa.
O Kasi Oku Setukula Ovisimĩlo Vielie?
8 Yehova o kasi ndonjali yimue yiwa kuenje o yongola okuti omãla vaye va kuata esanju komuenyo. (Isa. 48:17, 18) Omo liaco, Yehova o tu ĩha olonumbi viatiamẽla kovituwa viwa kuenda ndomo tu pondola oku kapako vakuetu. Eye o tu longisa oku tenda ovina ndomo eye a vi tenda kuenda oku kapako olonumbi viaye komuenyo wetu. Eci ka ci tateka elianjo lietu. Pole, ci tu kuatisa oku kuata olondunge kuenda oku nõla ciwa onjila ya sunguluka. (Os. 92:5; Olo. 2:1-5; Isa. 55:9) Tu pondola oku kuata elianjo lioku nõla eci tu yongola, okuti onjila yi tu nenela esanju. (Os. 1:2, 3) Eci tu kuata ovisimĩlo ndevi via Yehova, tu ka kuatisiwa volonjila via litepa!
Yehova Suku Yove wa ku Kapako!
18 Osimbu tu panda koku kuka, tu koleli okuti Yehova handi o kuete upange walua a yongola okuti tu u linga. (Osa. 92:12-15) Yesu o tu longisa okuti ndaño epondolo tu kuete litito, ale ongusu yetu yitito, Yehova o kapako alikolisilo etu kupange tu u lingila. (Luka 21:2-4) Omo liaco, tiamisila utima kovina o pondola oku linga. Ndeci, ove o pondola oku vangula eci catiamẽla ku Yehova, oku likutililako vamanji kuenda oku pamisa ekolelo lia vamanji. Yehova oku tenda okuti ove undingupange kumue laye, hamekondako liuloño wove, pole, momo lionjongole yove yoku u pokola.—1 Va Kor. 3:5-9.
Ovina vi Sangiwa Vembimbiliya
‘Via Longa Nye! Olondunge Via Suku!’
18 Kũlĩhĩsa ndomo Upostolo Paulu a vangula eci catiamẽla kolondunge ka vi sokisiwa via Yehova okuti: “Wa longa nye! Ukuasi lolondunge lukũlĩhiso wa Suku! Okutetulula kuaye ka ku kũlĩhĩsiwa, kuenda olonjila viaye ka vi moñoluiwa.” (Va Roma 11:33) Poku fetika ocinimbu eci londaka yoku popia hati, “Wa,” upostolo Paulu wa lekisa esanju kuenda wa komõha calua. Ondaka eye a nõla kelimi lio Helasi, yoku popia hati oku “longa,” yi likuata londaka yoku popia okuti, “ocituno.” Pole, olondaka viaye vi vetiya oku sokolola. Eci tu sokolola kolondunge via Yehova, ci kasi ndoku vanja vokati kocina cimue ca longa, cinene calua, okuti ka tu tẽla oku sokolola unene walio, pole ci tu lomboluila ovina viosi. (Osamo 92:5) Anga hẽ, eci hakusokololako kumue kuokuliketisa?
14-20 YA MBALAVIPEMBE
OVOKUASI A SANGIWA VONDAKA YA SUKU | OLOSAMO 96-99
“Sapuli Olondaka Viwa”!
w11 1/3 kem. 6 ocin. 1-2
Olondaka Viwa vi Lombolola Nye?
AKRISTÃO va sukila oku kunda “olondaka viwa viusoma,” poku vi sapuila vakuavo, poku lombolola okuti, Usoma uviali umue u ka viala ongongo yosi lesunga. Pole, ondaka yokuti, “olondaka viwa,” yi tukuiwavo volonjila via litepa Vembimbiliya. Ndeci, olio li tukula “olondaka viwa viepopelo” (Olosamo 96:2); “olondaka viwa via Suku” (Va Roma 15:16); kuenda “olondaka viwa viatiamẽla ku Yesu Kristu.”—Marko 1:1.
Oku teta onimbu, volondaka viwa mua kongela ocili cosi Yesu a vangula kuenda eci olondonge viaye via soneha. Osimbu Yesu ka endele kilu, wa sapuila olondonge viaye hati: “Omo liaco, kuendi, ka longisi omanu vo kolofeka viosi oco va linge olondonge viange, va papatisili vonduko ya Tate la Mõla kuenda yespiritu sandu, va longisi oku linga ovina viosi ndo kundiki. Kuenje ñasi kumue lene oloneke viosi, toke kesulilo lioluali.” (Mateo 28:19, 20) Omo liaco, vupange Wakristão vocili, ka mua kongelele lika oku sapuilako vakuavo catiamẽla Kusoma, ovo va sukila oku likolisilako oku linga olondonge.
w12 1/9 kem. 16 ocin. 1
Nye ci ka Pita Keteke Liesombiso?
Ndomo ci lekisiwa velitalatu konele yondio, omanu valua va sima okuti, keteke liesombiso olohuluwa viomanu vi ka ambatiwa kocalo ca Suku, loku sombisiwa ndomo ci likuata lovilinga viavo viosimbu. Kuenda vamue va ka tambula esumũlũho lioku kuata omuenyo kilu, vakuavo va ka kangisiwa vifelu viondalu. Pole, Embimbiliya li lekisa okuti, ocimãho ceteke liesombiso, oku yovola omanu kekambo liesunga. (Osamo 96:13) Suku wa nõla Yesu oco a kaile Onganji yoku tumbulula esunga kilu lieve.—Tanga Isaya 11:1-5; Ovilinga 17:31.
Ombembua Vokuenda Kuohulukãi Yanyamo—Lovina vi Keya Noke!
18 Ukamba waco wa nyõleha eci Adama la Heva va kembiwa la Satana, kuenje, va tomba uviali wa Yehova. Tunde kunyamo wo 1914, Usoma wa Mesiya, u kasi oku linga esokiyo lioku tumbulula ombembua lelitokeko pokati komanu. (Va Efe. 1:9, 10) Vokuenda Kuohulukãi Yanyamo Yuviali wa Kristu, ovina vi komõhisa ‘ka vi letiwe lovaso etu,’ vi ka tẽlisiwa. Noke, ku keya “esulilo” Liohulukãi Yanyamo Yuviali wa Kristu. Nye ci ka pita noke? Omo okuti Yesu ka kuete ocipululu, ‘uviali wosi wokilu lowu wa palo posi, wa eciwa peka liaye.’ Eye, ka kuete ovisimĩlo vioku tambula omangu ya Yehova. Omo liumbombe Yesu a kuete, ‘o ka eca usoma ku Suku, Isiaye.’ Lekuatiso liuviali waye, ‘o ka muisa Suku ulamba.’—Mat. 28:18; Va Fil. 2:9-11.
19 Omanu vosi va ka kala palo posi vemẽhi Liuviali wa Suku, va ka lipua. Ovo va ka kuama ongangu ya Yesu yoku lekisa umbombe, kuenda va ka sanjukila oku kũlĩha uviali wa Yehova. Nda va lekisa onjongole yoku pokola kuviali wa Yehova, va ka pita voseteko ya sulako. (Esi. 20:7-10) Omo liaco, omanu kumue lovangelo vana ka va lekisa epokolo, va ka nyõliwa elisi. Kotembo yaco, omanu va ka kuata esanju lonjolela! Oviluvo viosi vi kasi voluali, vi ka sanjukila oku sivaya Yehova, una o ka ‘viala ovina viosi.’—Tanga Osamo 99:1-3.
Ovina vi Sangiwa Vembimbiliya
Perspicaz-1 kem. 427
Ocisungo
Ondaka “ocisungo cokaliye,” ka yi tukuiwa lika Kolosamo, pole ya tukuiwavo kovisonehua via Isaya kuenda viupostolo Yoano. (Os 33:3; 40:3; 96:1; 98:1; 144:9; 149:1; Isa 42:10; Esi 5:9; 14:3) Vekonomuiso lia lingiwa, vulandu waco wosi ondaka yokuti “ocisungo cokaliye” ci situlula okuti, oco ca imbiwa omo lieliangiliyo liokaliye liuviali wa Yehova. Ndomo ca imbiwa lesanju Kosamo 96:10: “Yehova wa linga Osoma!” Aliangiliyo okaliye oku vokiya Usoma waye lekuatiso lia Yehova kuenda eci o-o a lomboloka kilu kuenda kilu lieve, citava okuti o-o ulandu “wocisungo cokaliye.”—Os 96:11-13; 98:9; Isa 42:10, 13.
21-27 YA MBALAVIPEMBE
OVOKUASI A SANGIWA VONDAKA YA SUKU | OLOSAMO 100-102
Lekisa Okuti wa Sanjukila Ocisola ca Yehova ka ci Pongoloka
Ndomo o li Pongiyila Epapatiso
18 Ocisola o kuetele Yehova ocituwa cimue ca posoka, okuti oco ocina ca velapo o kuete. (Tanga Olosapo 3:3-6.) Ocisola ca pama o kuetele Suku ci ku kuatisa oku pandikisa kovitangi. Embimbiliya olonjanja viosi li tukula ocisola ka ci pongoloka Yehova a kuetele afendeli vaye. Ocisola ka ci pongoloka ci lomboloka okuti Yehova lalimue eteke a ka yanduluka afendeli vaye, ale oku liwekapo oku va sola. (Osa. 100:5) Ove wa lulikiwa lesetahãlo lia Suku. (Efet. 1:26) O setukula ndati ocisola caco?
19 Fetika loku lekisa olopandu. (1 Va Tes. 5:18) Eteke leteke lipula ndoco, ‘Yehova wa siata oku lekisa ndati ocisola kokuange?’ Noke eca olopandu ku Yehova vohutililo yove, poku tukula ovina a siata oku ku lingila. Limbuka okuti Yehova wa siata oku ku lingila ovina viwa omo okuti eye oku sole, ndeci upostolo Paulu a ci limbuka catiamẽla ku Yehova. (Tanga Va Galatia 2:20.) Lipula ndoco, ‘Njongola hẽ oku lekisa kokuaye okuti ndu u sole?’ Ocisola o kuetele Yehova, ci ka ku kuatisa oku tamalãla kayonjo kuenda oku pandikisa kovitangi. Eci ci ka ku kuatisa oku amamako oku vumba Yehova, loku lekisa ku Isiove okuti u sole eteke leteke.
“Lunguki, Lavululi!”
10 Ovina vimue tu sukila oku yuvula mua kongela ocitiokoso, oku nyua calua, oku vangula ovina vi sumuisa, kuenda oku tala ovina viungangala, ovina viumbondo, lovina vikuavo. (Osa. 101:3) Unyãli wetu Eliapu, olonjanja viosi o sandiliya apuluvi oku kapa kohele ukamba tu kuete la Yehova. (1 Pet. 5:8) Nda ka tua lavuluile, Satana o pondola oku kũla vovisimĩlo vietu lovutima wetu, ombuto yonya, ocipululu, esuvu, oku lipanda, ocikumbiti kuenda oku yuvula oku kala ukuacili. (Va Gal. 5:19-21) Kefetikilo ovina viaco vi moleha ndu okuti ka vi koki ohele kokuetu. Pole, nda lonjanga yalua ka tua yuvuile ovina viaco, ovio vi ka amamako oku kula ndocikũla cimue ci nyõla kuenje ci koka ovitangi.—Tia. 1:14, 15.
Anga hẽ wa Kapako Alungulo a Yehova?
7 Nye ca kongela voku yuvula alongisi vesanda? Tu sukila oku yuvula oku va tambula kolonjo vietu ale oku va lama. Tu sukilavo oku yuvula oku tanga alivulu avo, oku tala ovipama viavo vo Televisãu, oku konomuisa asapulo avo vo Internet, ale oku sapela olondaka viavo. Momo lie tu nõlelapo onjila yaco? Momo liocisola. Omo okuti tu sole “Suku yocili,” ka tu sanjukila alongiso a pengisa ocili Condaka yaye. (Osa. 31:5; Yoano 17:17) Etu tu solevo ocisoko ca Yehova, cina ca siata oku tu longisa ocili, oku kongelamo onduko ya Yehova lelomboloko liayo, ocipango ca Suku catiamẽla koluali, ekalo liava va fa, kuenda elavoko liepinduko. Ove hẽ, o tẽla oku ivaluka esanju wa kuata eci wa lilongisa ovina evi, kuenda ovina vikuavo viatiamẽla kocili condaka ya Suku? Momo lie wecelelela oku kembiwa lalongisi vesanda vana va sepula ocisoko cina ca ku longisa ocili covina evi?—Yoano 6:66-69.
8 Ka tu ka tavi kovina vi popiwa lalongisi vesanda! Momo lie tu sandela ovisimo viaco ka vi kuete ovava oco tu kembiwe loku sumuisiwa? Omo liaco, tu nõlipo oku kolela ku Yehova kuenda kocisoko caye. Ocisoko caco lalimue eteke ci ka tu sumuisa kuenda ci ka amamako oku tu ĩha ovava awa ocili Condaka ya Suku.—Isa. 55:1-3; Mat. 24:45-47.
Ovina vi Sangiwa Vembimbiliya
Perspicaz-2 kem. 624
Ohombe Yovenyãla
Eci ohombe yovenyãla yikuta, olonjanja vialua yi palãlẽla kocitumãlo cimue cohã, kuna yi kala ndu okuti ya sumua, loku nyoñamisa utue waye kapepe, ka yi lisengi, okuti oku imuila kupãla, yi kasi ndewe limue liyela. Oyo yi pitulula ekalo liaco vokuenda kuolowola vialua, ekalo liaco li likuata lekalo ukualosamo a tukula, poku sokisa esumuo liaye, eci a soneha hati: “Ame ndi molẽha ndu okuti ndihombe yo venyãla vekalasoko.” (Os 102:6) Ondaka “enyãla” ka yi lomboloka ekalasoko limue, pole, ocitumãlo cimue ci kasi kupãla lomanu, citava okuti vocisave cimue. Vokuenda kuotembo yimue, ovisave vi kasi konano yo Yordão, via kala ovitumãlo violohombe vio venyãla. Ko Isareli, kuli apata atatu olohombe viovenyãla. Eyi ya kũlĩhĩwapo vali ohombe yiyela yoku tundilo, pole ohombe Dalmata kuenda ohombe yi tekãvelua, ka via siatele oku muiwa calua.
Ohombe yo venyãla yi sole calua oku kala kovitumãlo kuna kuohã okuti, ka kuli omanu vo sakalaisa. Oko yi lingila ocanju cayo loku tatelako omãla kuenda yi tiukilako noke yoku pipa. Onjila yaco omo lioku kala kovitumãlo viohã, ya tukuiwa Vembimbiliya ndondimbukiso yupolokoso. Isaya oco a lombolole enyõleho lia laikele oku iya ko Edome, wa popia okuti oyo ya laikele oku kala ocitumãlo colohombe vio venyãla. (Isa 34:11) Sofoniya wa popia okuti, olohombe vio venyãla via laikele oku kala valupale o Ninivei, poku lekisa enyõleho lielisi kuenda ekalo liomanu.—Sof 2:13, 14.
28 YA MBALAVIPEMBE–3 YA KUVALA
OVOKUASI A SANGIWA VONDAKA YA SUKU | OLOSAMO 103-104
Eye Ivaluka Okuti “Tuneketela”
Setukula Yehova—Lekisa Esunguluko
5 Umbombe wa Yehova kuenda ocikembe viu vetiya oku lekisa esunguluko. Ndeci, Yehova wa lekisa umbombe eci a kundula omanu olondingaĩvi vo ko Sodoma. Yehova Pocakati covangelo vaye, wa sapuila Lote oco a tilile kovaimbo a kasi kolomunda. Lote wa kuata usumba woku endako. Kuenje wa pinga okuti eye kumue lepata liaye va tilila ko Cohara, olupale lumue lutito lua sokiyiwilile oku nyõliwa. Yehova wa kuatele omoko yoku kisika Lote oco a linge ovina o sapuila. Pole, Yehova wa tava epingilo lia Lote kuenje ka nyõlele vali olupale luo Cohara. (Efet. 19:18-22) Noke lianyamo amue, Yehova wa lekisa ocikembe kolonungi vio ko Ninivei. Eye wa tuma uprofeto Yona oco a sapuile komanu olondingaĩvi vio ko Ninivei okuti, olupale lua laikele oku nyõliwa. Pole, eci va Ninivei va likekembela, Yehova wa litiulamo kuenda ka kunduile vali va Ninivei.—Yona 3:1, 10; 4:10, 11.
Kolela ku Yehova Ndeci Samisone a Linga
16 Ocili okuti Samisone wa liyaka lovitangi omo liakulueya aye muẽle, pole, eye ka liwekelepo oku linga ocipango ca Yehova. Cimuamue haico ci pondola oku pita letu. Nda tua linga ekandu limue kuenda tua sukila oku tambula epindiso limue, ale oku pumba ovikele vimue, ka tu ka liwekipo oku vumba Yehova. Ivaluka okuti, Yehova lalimue eteke a tu yanduluka. (Osa. 103:8-10) Ndaño lakulueya etu, tu pondola oku amamako oku kuata esilivilo ku Yehova, ndeci ca lipita la Samisone.
17 Kũlĩhĩsa eci ca lipita lumalẽhe umue o tukuiwa Michael. Eye wa kuatele upange walua vekongelo, wa kala oñuatisi yekongelo kuenda ukundi wotembo yosi. Pole, ci sumuisa ceci okuti, eye wa linga ekandu limue kuenje wa pumba ovikele viaye vekongelo. Eye wa lombolola hati: “Ovina via kala oku enda ciwa kuenda nda kuata ovina vialua vioku linga kupange wa Yehova. Vocipikipiki, nda liyeva okuti sia ponduile vali oku linga cimue kupange wa Yehova. Nda kũlĩhĩle okuti Yehova lalimue eteke a ka njanduluka, pole, nda enda oku sokolola nda handi a tẽla oku kuata ukamba umuamue la Yehova kuenda ndi kamamako oku u vumba vekongelo, loku linga ovina vialua nda lingaile kosimbu.”
18 Ci sanjuisa ceci okuti, Michael ka liwekelepo. Vokuenda kuotembo wa tumbulula ovikele viaye vekongelo kuenje cilo ukulu wekongelo haeye ukundi wotembo yosi. Eye wa lombolola ndoco: “Ame nda tiamisilile utima koku tumbulula ukamba wange la Yehova poku likutilila olonjanja viosi ku Yehova, oku lilongisa kuenda oku sokolola kueci nda lilongisa. Ekuatiso kuenda evetiyo nda tambula, ca piãla enene kakulu vekongelo, via ñuatisa oku limbuka okuti Yehova handi o ndi sole. Cilo, mondola oku vumba vali vekongelo lutima wa yela. Eci ca ndongisa okuti, Yehova olonjanja viosi o ka ecela omunu wosi o li kekembela lutima wosi.” Nye tu lilongisilako? Tu pondolavo oku kolela okuti Yehova o ka ecelela okuti tu linga upange waye, loku tu sumũlũisa ndaño lakulueya etu, nda olonjanja viosi tu likolisilako oku yuvula akulueya aco kuenda oku amamako oku kolela kokuaye.—Osa. 86:5; Olosap. 28:13.
O Pondola Oku Tẽlisa Ovimãho Viove Konepa Yespiritu
2 Nda okuti o kuete ocimãho cimue pole, ku kasi oku ci tẽlisa, ku ka sumue. Momo ndaño muẽle o kuete ocimãho cimue ci sulemo, ci sukila otembo kuenda alikolisilo oco o ci tẽlise. Ocili okuti nda handi o yongola oku tẽlisa ocimãho cove, lekisa okuti wa kapako ukamba o kuetele Yehova kuenda o yongola oku eca kokuaye eci ove o tẽla. Yehova wa kapako alikolisilo ove. Eye ka lavoka okuti ove eca eci ku tẽla oku linga. (Osa. 103:14; Mika 6:8) Kuenje eci o litumbikila ocimãho cimue, kolela okuti o ka ci tẽlisa. Noke lioku litumbikila ocimãho cimue, nye o pondola oku linga oco o ci tẽlise? Tu konomuisi olonumbi vimue.
Ovina vi Sangiwa Vembimbiliya
“U wa Lulika Ilu Longongo” o Kuete Unene
18 Nye tu lilongisila koku talavaya kunene wa Yehova woku lulika? Ovina vialua via lulikiwa vi tu komohĩsa. Umue Ukualosamo wa komõha, hati: “A Yehova, oviluvo viove via lua cimue! . . . Oluali lue yuka ovilulikilo viove.” (Osamo 104:24) Olondaka evi viocili! Olonoño via limbuka okuti mulo vongongo mu sangiwa eci ci soka ohuluwa yimosi yovina vi kasi lomuenyo; pole catiamẽla ketendelo liaco, kuli ovisimĩlo via litepa nda okuti mu sangiwa eci ci soka 10 liolohuluwa, ale 30 kolohuluwa. Omunu una ukuakuluvikiya ovina, olonjanja vimue o sima okuti oku luvikiya kuaye ku kasi loku tepuluka. Pole ca litepa calua la Yehova momo unene waye, woku luvikiya kuenda oku lulika ovina viñi viñi, ka u tepuluka.