Ombiali Yipi Ove o ka Nõla?—Nye Embimbiliya li Popia?

Osemana yiya, ku ka lingiwa ocela kolofeka vialua voluali luosi. Omanu va kasi oku sokolola calua, catiamẽla kolombiali ovo va ka nõla.

Nye Embimbiliya li popia?

Olombiali viomanu ka vi tẽla oku linga ovina vialua

Embimbiliya li situlula ovina viosi olombiali viomanu ka vi tẽla oku linga.

• “Ko ka kapi ekolelo liene kolombuale, Ndaño komõla omunu, una ka tẽla oku nena epopelo. Efuimo liaye li tunda kuenje eye o tiukila posi; keteke liaco, ovisimĩlo viaye vi nyõleha.”—Osamo 146:3, 4, etosi.

Ndaño muẽle olombiali vina vi kuete unene walua, ovio vi pondola oku fa. Handi vali, ka vi tẽla oku koka okuti, ovopange avo osi awa amamako oku lingiwa, la vana va ka va piñala.—Ukundi 2:18, 19.

Embimbiliya li situlula okuti, omanu ka va lulikiwile oco va li viale ovo muẽle.

• “Omunu enda, ka ca tiamẽle kokuaye ndaño muẽle oku songuila oku enda kuaye.”—Yeremiya 10:23.

Anga hẽ, kuli omunu umue, o pondola oku vialua ciwa koloneke vilo?

Ombiali yimue ya nõliwa la Suku

Embimbiliya li lekisa okuti Suku wa nõla omunu umue, o kuete epondolo lilikasi lioku viala okuti, Yesu Kristu. (Olosamo 2:6) Yesu eye Osoma Yusoma wa Suku okuti, uviali umue u kasi oku viala kilu.—Mateo 6:10.

Ove hẽ o ka tava oku nõla Yesu ndombiali? Embimbiliya li lekisa esunga lieci epulilo eli li kuetele esilivilo:

• “Sumbili omõla [Yesu Kristu], sanga Suku o ka tema kuenje vu fila vonjila, momo onyeño Yaye yi wenguka lonjanga. Va sumũlũha vosi vana va sanda eteyuilo Kokuaye.”—Olosamo 2:12.

Yilo oyo otembo ove o sukila oku nõla onjila o kuama. Ocitumasuku Cembimbiliya ci lekisa okuti Yesu wa fetika oku viala kunyamo 1914 kuenda ndopo muẽle Usoma wa Suku u ka nyõla ovoviali osi omanu.—Daniele 2:44.

Oco o lilongise ovina vikuavo vi lekisa ndomo o kuatisa Yesu konjila yaye yoku viala, tanga ocipama losapi, “Nõlapo Oku Kuatisa Usoma wa Suku Cilo!”